Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juniu de 2014

Llapan puëdiyanqanta rurayänampaq yanapashun

Llapan puëdiyanqanta rurayänampaq yanapashun

‘Rikëkurnikim consejashqëki.’ (SAL. 32:8)

1, 2. ¿Imanötaq Jehovä sirweqninkunata rikan?

WAMRANKUNA pukllaqta rikarmi, teytankunaqa espantakuyan yachëpa rurayanqanta rikar. Itsa qampis rikarqunki. Itsa juknin wamrataqa pelötawan pukllë gustanman y juknin kaqtana dibujë o juk rurëkuna. Mëqan rurë mas gustaptimpis, teytankunaqa mas yachakuyänampaqmi kushishqa yanapayan.

2 Tsënöllam Jehoväpis sirweqninkunata yanapan. Y ‘llapan nacionkunachö alli kaqkuna’ nirmi qayampis (Ageu 2:7). Pëman markäkuyanqanrëkurmi ‘alli kaqkuna’ kayan. Kanan witsampis Jehoväpa testïgunkunaqa imëka rurëkunatam yachayan. Shumaq discursaq o imëkatapis alli patsätseqmi kayan. Panikunanam juk idiömata raslla yachakuriyan Diospita yachatsikuyänampaq, wakinnam animakïta y qeshyaqkunata cuidëta yachayan (Rom. 16:1, 12). Alläpam kushikuntsik kënö cristiänukunata congregacionchö katsirnin.

3. ¿Ima tapukïkunatataq kë yachatsikïchö rikäshun?

3 Peru wakin jövinkuna y tsëllaraq bautisakushqakunaqa manam yachayantsu congregacionchö imanö yanapakïta.  ¿Imanötaq yanapashwan llapan puëdiyanqanta rurayänampaq? ¿Imanötaq Jehovänö pëkunachö alli kaqta rikashwan?

JEHOVÄQA SIRWEQNINKUNACHÖ ALLI KAQTAM RIKAN

4, 5. Juëces 6:11, 12 textu ninqannö, a) ¿Imatataq Gedeonchö Jehovä rikarqan? b) Sirweqninkunata rikarqa, ¿Imatataq Jehovä cuentachö katsin?

4 Bibliam rikätsikun Jehoväqa sirwëqninkunachö alli këninkunallata mana rikanqanta, sinöqa masta rurëta puëdiyanqantapis rikanqanta. Tantiyarinapaq, Gedeontam akrarqan markanta madianïtakunapita libranampaq, y espantakurqanchï juk angel kënö saludëkuptin: “Puëdeq y mana mantsakoq teytallë, qamwanmi Jehovä këkan”. Tsë hörachöqa, Gedeonqa mana puëdeqnömi sientikurqan. Mana kaqlla y mana musyaq kanqantam nirqan. Peru Jehoväqa masta rurëta puëdinqantam rikarqan (leyi Juëces 6:11, 12 *).

5 Jehoväqa Gedeon imanö kanqanta rikashqa karmi, markanta libranampaq markäkurqan. Jina Jehoväpa angelninmi rikashqa karqan trïguta llapan kallpanwan päjampita jorqanampaq imanö wilïkaqta (wiruykaqta). Jina rikarqanmi, ërachö trïguta wilunampa rantin, vïnu rurayänan pösuchö wilïkaqta, tsënöpa madianïtakuna ichiklla trïgunta mana qochiyänampaq (qechuyänampaq). ¡Musyaq nunam karqan! Tsënö kaptinchi, Jehoväqa chakra nunatanöllatsu rikarqan, sinöqa alli tantiyaq y peligrukunapita witikoq nunatanö. Tsënöpam precisaq carguta qorqan.

6, 7. a) ¿Jehoväqa wakin israelïtakuna rikäyanqannöku Amosta rikarqan? b) ¿Imataq rikätsikun Amosqa yachaq nuna kanqanta?

6 Profëta Amoschöpis Jehoväqa masta rurëta puëdinqantam rikarqan. Amosqa willakun, üsha mitseq y waktsakuna mas utilisäyanqan sicömoro hïgus tuksipakoq kanqantam. Ïdulukuna adoraq Israelpa chunka kastankunata Jehovä ushakätsinampaq willakïta apaptinqa, itsa wakin nunakuna tsëpaq pë mana sirwinqanta pensayarqan (leyi Amos 7:14, 15 *).

7 Taksha markallachö tärarpis, Amosqa yachaq nunam karqan; musyarqanmi tsë tiempu costumbrikunapita y gobernantikunapita. Mëraq musyarqan Israel imakunapa pasëkanqanta, y negociantikunawan tinkurchi musyaq vecïnun nacionkunachö ima pasëkanqanta (Amos 1:6, 9, 11, 13; 2:8; 6:4-6). Wakin yachaq nunakunam niyan, Amosqa alli qellqaq nuna kanqanta. Fäcil palabrakunata, igualatsikïkunata y maskunata utilisanqanta. Jina pëpita willakunampaq Jehovä alli akranqantaqa rikätsikun, mana alli sacerdöti Amasïasta mana mantsashpa contestanqanwanmi. Rurëta puëdinampaq kaq mana rikakuptimpis, Jehoväqa rikarqanmi (Amos 7:12, 13, 16, 17).

8. a) ¿Imatataq Jehovä Davidta änirqan? b) ¿Imanötaq Salmu 32:8 textu yanapakun rurëta mana puëdiyanqanta pensaqkunata?

8 Cada sirweqnin mëyaq rurëta puëdinqantam Jehoväqa rikan. Rey Davidtapis änirqan imëpis pushanampaq y alli rikëkur consejanampaqmi (leyi Salmu  32:8 *). Tsëta musyëqa alläpa kushikïpaqmi. Itsa noqantsik rurëta mana puëdinqantsikta pensashwan, peru Jehoväqa rurëta mana pensanqantsikkunata ruranapaqmi yanapamäshun. Imanömi juk alli profesor mana yachaq alumnunta shumaq yanapan, tsënöllam Jehoväpis llapan puëdinqantsikta ruranapaq yanapamantsik. Y tsëtaqa ruran congregacionchö cristiänu mayintsikkunawan llapan puëdinqantsikta ruranapaq yanapatsimarnintsikmi.

ALLI RURËNINKUNATA RIKÄSHUN

9. ¿Imanötaq Pablu consejakunqanta wiyakur wakinkunaman yarparashwan?

9 Pabluqa cristiänu mayinkunaman yarparäyänampaqmi consejakurqan (leyi Filipensis 2:3, 4). Kë consëjuqa cristiänu mayintsikkuna imanö kayanqanta cuentachö katsinapaq y shumaq felicitärinapaqwanmi yanapamantsik. Pipis ruranqantsikpita alkäbu këkar “allitam rurarqunki” nimashqaqa kushikuntsikmi, y mas allita ruranapaqmi yanaparamantsik. Tsënöllam, allita rurayanqampita wakinkunata shumaq parlapärinqantsikpis Diospa kaqchö mas poquyänampaq yanapan.

10. ¿Pikunataq yanapanantsikta mas wanayan?

10 ¿Pikunataq yanapanantsikta wanayan? Llapantsikmi. Peru masqa jövinkuna y tsëraq bautisakushqakunam congregacionpa rurëninkunachö yanapakuyänampaq churanantsikta wanayan, tsënöpa ütil sientikuyänampaq. Peru mana yanapashqaqa, carguyoq kayänampaq Biblia animëkaptimpis rurëta munëninkunaqa ushakärinqam (1 Tim. 3:1).

11. a) ¿Imanötaq juk anciänu juk jövinta yanaparqan? b) ¿Imata ruranapaqtaq Julien pasanqan yanapamantsik?

11 Ludovic anciänupis jövin këninchö yanapakïta chaskirqan. Kënömi willakun: “Juk wawqita mas yanaparmi rikarqö imanö Jehoväpa kaqchö mas poqunqanta”. Alläpa penqallïshu Julien jövinpaqmi kënö willakun: “Alläpa penqakoq karmi imachöpis yanapakunqanchö mana alli yarqapukoq. Peru noqaqa rikarqä kuyakoq kanqanta y congregacionchö rasumpa yanapakïta munanqantam. Tsëmi mana allita ruranqampita mana allita pensanäpa rantin, shumaq animar parlapaq kä”. Tiempuwanqa Julien siervu ministerialmi tikrarirqan y kananqa precursor regularnam.

YANAPASHUN LLAPAN RURËTA PUËDIYANQANTA RURAYÄNAMPAQ

12. ¿Imanö kanqantsiktaq yanapamashwan wakinkunata yanapanapaq? Juk igualatsikïwan willakaramï.

12 Wakinkuna masta rurëta puëdiyanqanta cuentata qokunapaqqa alkäbullam këkänantsik. Mana allita rikänantsikpa rantinmi masta rurëta puëdiyanqankunata rikänantsik, tsëtam Julienchö rikäyarqan. Tsënömi Jesuspis rurarqan, höra höra Pëdru pantëkaptimpis Cëfas nirmi qayarqan, tsëqa “qaqa” ninanmi. Tsëwanmi rikätsikurqan rurëninkunachö qaqanö alli firmi kanampaq kaqta (Juan 1:42NM, nota).

13, 14. a) ¿Imatataq Marcuschö Bernabë rikarqan? b) ¿Imanötaq Marcusnöpis juk jövin yanapakïta chaskirqan? (Rikäri kë yachatsikïpa qallananchö këkaq dibüjuta.)

13 Bernabëpis alli alkabaq nunam karqan, tsëmi Juan Marcus masta rurëta puëdinqanta rikarqan (Hëch. 12:25). Pablupawan Bernabëpa punta kaq viäjinkunachömi,  Marcus yanapanampaq yanaqarqan. Peru Panfiliaman chärirmi, suwakoqkuna kayanqan norti kaq lädupa viajayänan këkäyaptin derepentita kutikurqan (Hëch. 13:5, 13). ¿Imatataq Bernabë rurarqan? Mana alli rurëninta rikänampa rantinmi, alli rurëninta rikarqan y yanapar sïguirqan (Hëch. 15:37-39). Tiempuwanqa kë jövin poqushqa cristiänum tikrarirqan. Y Röma carcelchö këkar Colosensiskunaman Pablu cartakunqan witsanmi, yanaparnin tsëchö këkarqan. Tsëmi apostul Pabluqa cartanchö Marcuspaq allita parlarqan y salüduntapis churarqan (Col. 4:10). Jina Bernabëqa alläpachi kushikurqan, juk kutichö Marcus yanapanampaq Pablu mañakuptin (2 Tim. 4:11).

14 Tsëllaraq anciänu tikrashqa Alexandrim, juk yachaq cristiänu yanapanqanta yarpan. Kënömi willakun: “Jövin karqa, atskaq këkäyaptinqa manam mañakïta puëdeqtsu kä. Juk anciänum yachatsimarqan preparakunapaq y tranquïlu sientikunäpaq. Manana churamänampa rantinmi, mas seguïdu churamaq yachatsikoq yarquyänä höra mañakunäpaq. Tsënöpam mantsakoq kënïta ichikpa ichikpa vencirirqä”.

15. ¿Imanötaq Pablu cristiänu mayinkunata felicitarqan?

15 Cristiänu mayintsik imachöpis alli këninta rikarqan, ¿felicitärintsikku? 16 kaq capïtuluchömi, Röma cristiänukunaman cartakunqanchö Pabluqa ishkë chunkapitapis mas cristiänukunata felicitarqan (Rom. 16:3-7, 13). Tantiyarinapaq, Andrönicupawan Juniaspaqmi nirqan pëpitapis mas unëna cristiänu kayanqanta, y alli tsarakuyanqantam rikätsikurqan. Jina Rufopa mamampaqpis allitam parlarqan, itsa pasaqchö mamannö cuidashqa kaptin.

Fredericmi (izquierdachö) Ricuta animarqan Jehoväta sirwir sïguinampaq (Rikäri 16 kaq pärrafuta)

16. ¿Imanötaq jövinkunata felicitanqantsik yanapan?

16 Felicitanqantsikqa alläpam yanapakun. Tantiyarinapaq, Franciapita Ricu jutiyoq wamram, mana creikoq papänin bautisakunanta mana munaptin desanimakurirqan. Y pensarqan, llapan puëdinqanmannö Jehoväta sirwinampaqqa mayor këninman chanqanyaqraq shuyaränampaq kaqtam. Jina estudiaq mayinkuna burlakuyaptinmi llakikoq. Bibliapita yachatseqnin Frederic anciänum nin: “Ricutam felicitärirqä, porqui tsëkunapa pasanqanqa markäkïnimpita valorwan parlanqantam rikätsikurqan”. Tsëmi yanaparqan mas yachakunampaq y papäninwampis alli kanampaq. Y 12 watayoqmi Bautisakurirqan.

Jeromim (derëchachö) yanaparqan Ryanta misionëru kanampaq (Rikäri 17 kaq pärrafuta)

17. a) ¿Imanötaq cristiänu mayintsikkunata yanapashwan mas poquyänampaq? b) ¿Imatataq juk misionëru ruran jövinkunata yanapanampaq?

17 Imëpis felicitarmi Jehoväta mas sirwiyänampaq yanapantsik. Francia Betelchö  atska watapana sirweq Sylvie * panim willakun, warmikaqkunaqa ollqukuna cuentata mana qokuyanqanta mas raslla mäkuriyanqanta. Tsënöpa ollqukunata felicitëta puëdiyanqanta. Kënömi nin: “Tsënö parlapäriyanqanmi, poqushqa cristiänukuna niyanqanta mas yanaparin”. Jina ninmi: “Noqapaqqa pitapis felicitëqa alläpam precisan” (Prov. 3:27). Guayana Francesa nacionchö misionërunö yanapakoq Jeromipis, atskaq ollqu jövinkunatam misionëru kayänampaq yanapashqa. Kënömi nin: “Diospita yachatsikur rurayanqampita, o alli pensëkur comentayanqampita felicitaptïqa, mas segürum sientikuyan y mas allitaran rurayampis”.

18. ¿Imanirtaq alli kanman jövinkunawan trabajë?

18 Jina pëkunawan trabajanapaq inkitarnimpis, Diospa kaqchö mas poquyänampaqmi yanapashwan. Juk jövin Internetta alli utilisëta yachaptinqa, itsa juk anciänu mañarinman mayor cristiänukunata animaq yachatsikïta, jw.org päginapita jorqanampaq. O Diospita yachatsikuyänan wayita limpiarnin o altsarninqa, juk jövintam yanapamänapaq nirishwan. Tsëmi yanapamäshun rikänapaq, felicitänapaq y tsënö ruranqantsik imanö yanapanqanta rikänapaq (Prov. 15:23).

SHAMOQ TIEMPUMAN PENSAR RURASHUN

19, 20. ¿Imanirtaq wakinkunata yanapashwan mas poquyänampaq?

19 Israelïtakunata pushanampaq Josuëta churarmi, Moisesta Jehovä kënö mandarqan: “Kallpata qoy y sinchiyätsi” (leyi Deuteronomiu 3:28 *). Jehoväpa markanmanqa mëtsikaq nunakunam yëkïkäyämun, tsëmi unëna kaqkunaqa jövinkunata y tsëraq bautisakushqakunata yanapanantsik llapan puëdiyanqanta rurayänampaq. Tsënöpam llapan tiempunkunawan yanapakoqkuna y alli yachatsikoqkuna kayanqa (2 Tim. 2:2).

20 Juk congregacionchö o juk grüpuchö yanapakurpis, shamoq tiempupaq pensëkur trabajashun, y tsëpaqqa alläpam precisan, Jehovänöpis cristiänu mayintsikkunachö alli kaqta imëpis rikänantsik.

^ par. 4 Juëces 6:11, 12: “Tsëpitanam Jehoväpa angelnin shamurqan Ofräman y abï-ezrita Joaspa jatusaq qerunkuna jawanman täkurirqan, y tsurin Gedeonmi uvas jalukuyänan pösuchö trïguta raslla wilïkarqan madianïtakuna mana rikäyänampaq. Tsënam Jehoväpa angelnin yuripurir kënö nirqan: ‘Puëdeq y mana mantsakoq teytallë, qamwanmi Jehovä këkan’”.

^ par. 6 Amos 7:14, 15: “Tsënam Amosqa Amasïasta kënö contestarqan: ‘Manam profëtatsu, ni profëtapa tsurintsu karqä; üsha täpakoqlla y sicömuru hïgus poqunampaq tuksipakoqllam karqä. Üsha mitseq kanqäpitam Jehovä jorqamarqan y kënö nimarqan: “Ëwë, Israel markäta willë”’”.

^ par. 8 Salmu 32:8: “Tantiyaq kënikim qoshqëki, y alli nänipa purinëkipaqmi yachatsishqëki. Rasumpam, rikëkurniki consejashqëki”.

^ par. 17 Rasumpëpa jutinqa jukmi.

^ par. 19 Deuteronomiu 3:28: “Y Josuëta churë y kallpata qoy y sinchiyätsi, porqui pëmi kë markapa puntanta ëwanqa, y pëmi kë rikëkanqëki patsata chaskiyänampaq yanapanqa”.