Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Mäyu de 2014

 UNË IMANÖ KANQANTSIK

“Atskaraqmi cosechanapaq kan”

“Atskaraqmi cosechanapaq kan”

George Young Rio de Janeiruman chan 1923 wata marzu killa

SÃO PAULO markachö Conservatorio Dramätico e Musical nishqan localchömi nunakuna junta këkäyan. 1923 wata witsankunam karqan, George Young wawqim discursëkan, y tsë discursutaqa portugues idiömamanmi tikrëkätsiyan. Juk pantällachö Bibliapa textukuna potugues idiömachö yarqamunqanmannömi 585 nunakuna shumaq alli wiyëkäyan. Y ushanampaqnam, Millones que ahora viven no morirán jamás nishqan follëtuta, portugues, aleman, ingles y italianu idiömakunachö pachakta qarakuyan. ¡Tsë discursuqa alläpa allim yarqushqa! Yapëmi invitakuyan y ishkë paqas pasariptinllam, tsë localqa yapë juntarin juk discursupaq. Peru ¿imarëkurtaq kënö ëllukäyarqan?

1867 watam, Särah Bellona Ferguson familianwan Estädus Unïduspita Brasilman ëwakuyarqan. Y 1899 watanam, menor kaq turin publicacionkunata apanqanta Sarah leyirqan, y rasumpa kaq religionta tarinqanta cuentata qokurirqan. Mas yachakïta munarnam, Watch Tower nishqan revistata ingles idiömachö chaskinampaq apuntakurqan. Bibliapa yachatsikïnin shonqunyaq chaptinmi, wawqi Russellman qellqarqan, ‘rasumpa kaq yachatsikïqa më tsëmampis chanqanta, y pëta pasanqan tsëta rikätsikunqanta’.

¿Pueden los vivos hablar con los muertos? (portugueschö)

Särahqa allipam kallpachakurqan rasumpa kaqta musyatsikunampaq, peru pëta, familianta y Brasilchö llapan qollmi shonqu nunakunata, Diospa kaqchö mas poquyänampaq pï yanapanampaq kaqtam tapukoq. 1912 watam Brooklyn Betel musyaratsirqan portugués idiömachö ¿En dónde están los Muertos? nishqan tratäduta aparkur, São Paulo markaman pillapis ëwanampaq. 1915 watam Särahqa nirqan Bibliata Estudiaqkuna ichikllachöna ciëluman ëwëta shuyaräyanqanta imëpis yarpachakunqanta. Kënömi qellqarqan: “¿Imaraq pasakunqa Brasilchö y Sudamëricachö kaqkunawanqa? [. . .] Amërica del Sur alli jatun kaptinmi, cosëcha ëllïqa (qorïqa) pishinraq”. ¡Atskaran cosechakänan karqan!

 1920 wata witsanmi guërra barkunkunata altsayanqanyaq Brasilpita puwaq jövin marinërukuna, Nueva York markachö reunionkunaman ëwayarqan. Rio de Janeiru markaman kutirirmi tsë yachakuyanqankunata wakinkunatapis musyatsiyarqan. Tsëpita ichik tiempullatam 1923 watachö, congregacionkunata watukaq George Young wawqi tsë markaman chärirqan. Tsëchö mëtsikaq nunakuna yachakïta munayanqantam taririrqan. Wakin publicacionkunata portugues idiömaman traduciyänampaq patsäratsirmi São Paulo markaman ëwarqan, tsëchöqa 600 mil nunakunam täräyaq. Tsë markachömi qallananchö ninqantsik discursu rurakarqan y Millones nishqan follëtuta qokuyarqan. Pëmi nin: “Japallälla karninmi, musyatsikunäpaqqa periödicupa willatsikïtaraq wanarqä. Y tsë discursukunam karqan IBSA * nishqampa representantin Brasilchö punta kaq discursukunata qonqan”.

Wawqi Young discursanqanyaqmi juk pantällachö Bibliapa textukuna yarqamoq

Brasilpaq willakurninmi, 1923 wata 15 de diciembri Watch Tower revista, kënö nirqan: “Tsëchöqa 1 de juniu killam Diospita yachatsikï qallarqan, y manam tsë idiömachö publicacionkuna karqantsu, tsëmi tsë rurëta señor bendicinqanqa alläpa espantëpaq karqan”. Jina tsë willakïqa nirqanmi 1 de juniupita hasta 30 de septiembriyaq 21 discursuta wawqi Young qonqampita, São Paulochö ishkëta qonqanta. 3.600 nunakunam juntakäyarqan. Rio de Janeiru markachöqa ichikpa ichikpam Diospita wiyakuyarqan y wallka killakunallachömi portugues idiömachö 7 mil publicacionpitapis masta qarakuyarqan. Y portugues idiömachö Watch Tower revistaqa 1923 watam, noviembri-diciembri kaq revista rurakar qallarqan.

Särah Bellona Fergusonmi Brasilchö Watch Tower nishqan revistata ingles idiömachö chaskinampaq punta kaq apuntakoq karqan

George Young wawqim Sarah Ferguson panita watukarqan. Watch Tower revistam tinkuyanqampaq kënö nin: “Särahm sälaman yëkurqan y juk rätum upälla quedakurqan. Wawqi Youngta makinwan saludarnin rikëkurmi kënö nirqan: ‘Rasumpaku congregacionkunata watukaq kanki’”. Tsëpita ichik tiempullatam pë y wakin wamrankuna bautisakuriyarqan. ¡Särahqa 25 watam shuyararqan bautisakunampaq! 1924 wata 1 de agostu Watch Tower revistam willakurqan Brasilchö 50 nunakuna bautisakuyanqanta, y masqa Rio de Janeiru markachö.

Kananyaqqa 90 watanam pasarishqa, y mananam kënö nir tapukunantsiknatsu: “¿Imaraq pasakunqa Brasilchö y Sudamëricachö kaqkunawanqa?”. Brasilchöqa 760 mil Testïgukunam Diospa alli willakïninta yachatsikïkäyan. Y Diospa alli willakïnintaqa llapan Sudamëricachömi portugues, español y mas idiömakunachö yachatsikïkäyan. 1915 wata Särah Ferguson “atskaraqmi cosechanapaq kan” ninqanqa, ¡rasunmi karqan! (Unë imanö kanqantsik Brasilchö.)

^ par. 6 Kë letrakunaqa ingleschömi y Asociacion Internacional de Estudiantes de la Biblia ninanmi.