Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Marzu de 2014

Imanötaq mana creikoq familiantsikpa shonqunman chashwan

Imanötaq mana creikoq familiantsikpa shonqunman chashwan

JUK nuna qateqnin këta munaptinmi, Jesus kënö nirqan: “Wayiquiman cutïcur castequicunata willë qamta Dios ancupäshurniqui llapanta qampaq rurashqanta”. Kënö Jesus ninqanqa, rikätsikun nunakuna precisaq cösaskunata yachakurir, familiankunataraq puntata willëta munayanqantam (Mar. 5:19).

Kanan witsankunapis, llapan familiakunachömi tsënölla pasakun. Tsëmi, Jehovä Diospa sirweqnin këman pipis tikrarirqa, puntataqa familiantaraq willëta munan. Tsëqa, ¿imanöraq parlapashwan? ¿Imanöraq juk religionyoq o Diosman mana creeq familiantsikpa shonqunman chashwan? Bibliam tsë asuntuchö yanapamantsik.

‘MESIASTAM TARIYARQÖ’

Apostulkuna kawayanqan witsankunaqa, Andresmi puntata musyarirqan Jesus Mesïas kanqanta. ¿Yarpankiku jinan höra pita willarinqanta? Bibliam kënö willakun: “Andresnam wauqin Simon asheq eucorqan; taririrnam queno nerqan: —¡Mesiastam noqacuna taricuyarqö! —nishpa. (Mesiasqa Dios Acrashqan ninanmi)”. Tsëpitanam Pëdruta aparqan Jesusta reqitseq, tsënöpam qateqnin këman tikrarirqan (Juan 1:35-42).

Tsëpita joqta wata pasariptinmi, Cesarëa markachö Corneliupa wayinman ëwanampaq Pëdruta invitayarqan. Tsëman chärir, ¿pikunatataq tarirqan? Bibliam kënö cuentakun: “Corneliunam combidashqa canaq castancunata y allapa cuyanacuyanqan amiguncunata Pedruta chasquiyänanpaq”. Tsënö rurarmi Corneliuqa familiankuna Diosta reqiyänampaq yanaparqan (Hëch. 10:22-33).

 ¿Imatataq yachakuntsik Andreswan Corneliu familiankunata imanö tratayanqampita?

Andreswan Corneliuqa manam imapis porsïlla pasakunanta dejayarqantsu. Kikin Andresmi wawqinta Jesusta reqitseq aparqan, y Corneliunam Pëdru ninqanta wiyakuyänampaq familianta ëllurqan. Peru manam ni mëqampis familiankunata cristiänuman tikrayänampaq obligayarqantsu. ¿Imatataq këpita yachakuntsik? ¿Imanötaq rurayanqankunata qatishwan? Itsa Bibliapa rasumpa yachatsikïninta reqiyänampaq ima cäsullatapis ashishwan familiantsikwan parlarinapaq, o wakin Testïgukunatam reqiratsishwan. Peru akrayanqankunataqa respetanantsikmi, y manam obligashwantsu ni mana alliqa sientikatsishwantsu. Imanö yanapanapaq kaqta musyanapaqqa, Alemaniapita casakushqa Jürgenwan Petra pasayanqanta rikärishun.

Petraqa Testïgukunawan Bibliata estudiarmi bautisakurirqan. Qowan Jürgenqa ejercitupa mandakoqninmi karqan, qallananchöqa manam gustarqantsu Petra Testïgu kananta. Tiempuwanqa cuentatam qokurirqan Testïgukuna Bibliapita rasumpa kaqta yachatsikuyanqanta. Tsëmi Bautisakurirqan, y kananqa anciänunömi juk congregacionchö yanapakun. ¿Imatataq pë consejakun juk religionyoq familiantsikpa shonqunman chänapaq?

Jürgenmi nin: “Ama obliguëtsu creinqëkita pëpis creinanta, ni alläpaqa Bibliapita parlapëtsu. Tsëqa masmi karupäratsinman. Mejorqa kanqa, höra höralla yachatsinqantsikmi. Jina tsë edäyoqlla Testïgukunata reqitsïpis yanapakunmi”.

“Ama obliguëtsu creinqëkita chaskinampaq, ni alläpaqa Bibliapita parlapëtsu.” (Jürgen)

Apostul Pëdrupa y Corneliupa familiankunaqa jinan höram Bibliapa yachatsikïninta chaskiyarqan. Peru wakinkunaqa mas tiemputaran wanayarqan.

JESUSPA WAWQINKUNA

Jesus yachatsikunqan witsanqa mëtsikaq familiankunam pëman creikuyarqan. Tantiyarinapaq, itsachi Santiäguwan Juanqa prïmunkuna kayarqan, y pëkunapa maman Salomëqa tiyan karqan. Itsa Salomëqa atska ‘warmicunawan’ këkarqan. “Pëcunam cayäponqancunawan Jesusta y disipuluncunata yanapayarqan” (Lüc. 8:1-3).

Tsënö kaptimpis, puntataqa Jesuspa wakin familiankunaqa manam pëman markäkuyarqantsu. Bautisakunqampita juk wata pasariptinmi, juk wayichö mëtsikaq nunakuna pëta wiyayänampaq juntakäyarqan. “Tseta musyarirninnam, Jesuspa castancuna wayincunaman pushacuyänanpaq ewayarqan. Porqui Jesuspaqqa ‘locuyäcurishqam’ nirmi, parlayarqan.” Tiempu pasariptinnam, mëpa ëwanampaq kaqta wawqinkuna Jesusta tapuyaptin, pëqa clärutsu willarqan. Porqui wawqinkunaqa manam pëman markäkuyaqtsu (Mar. 3:21; Juan 7:5).

¿Imatataq Jesus familiankunata imanö tratanqampita yachakuntsik? “Locuyäshqam” niyaptimpis manam piñakurqantsu. Y kawariramurmi Santiäguta yuripurqan familianta animanampaq. Itsa tsëqa yanapakurqan Santiäguwan wakin wawqinkuna Jesus Mesïas kanqanta musyayänampaq. Tsëchi pëkunapis këkäyarqan, Jerusalenchö apostulkunaman y wakin juntakashqa creikoqkunaman santu espïritunta Dios ramamuptin. Tiempuwannam, Jesuspa wawqin  Jüdaspis Santiäguwan juntu precisaq cargukunata chaskiyarqan (Hëch. 1:12-14; 2:1-4; 1 Cor. 15:7).

WAKINKUNAQA MAS TIEMPUTARAN WANAYAN

“Imëkachöpis pacienciosu karninqa imëkatam logranki.” (Roswitha)

Puntatanöllam, kanampis wakin familiakunaqa rasumpa kaq yachatsikïta akrayänampaq tiemputaraq wanayan. Roswitha pasanqanta rikärishun. Pëqa alläpa catölicam karqan, 1978 watachömi qowan Jehoväpa testïgun këman tikrarirqan. Creinqankunaman markäkurmi qowan akranqanta gustaqtsu. Peru tiempu pasanqanmannömi cuentata qokurirqan Testïgukuna rasun kaqta yachatsikuyanqanta, tsëmi 2003 watachö bautisakurqan. ¿Imataq yanaparqan tsëta ruranampaq? Qowampa alli portakïninmi. Warmin ninqankunapita piñakunampa rantinmi, pëqa ninqankunata cambianampaq tiemputa qoq. Roswitham kënö nir consejakun: “Pacienciayoq karninqa imëkatam logranki”.

Monikaqa 1974 watachömi bautisakurqan, y ishkan wamrankunaqa chunka wata pasariptinmi. Religionnimpita mana michäkurnimpis, nunan Hansqa 2006 watachöran bautisakurqan. Pëkunam kënö niyan: “Jehovällapaq imëpis kayë y markäkïnikikunata ushakätsiyänanta jaqitsu”. Jina Hanstaqa yanaparqan kuyayanqanta imëpis rikätsiyanqan y Jehoväta imëllapis sirwinanta shuyaräyanqanmi.

YAKUNËNINKUNATA PASATSEQ RASUMPA KAQ YAKU

Juk kutim, Jesusqa rasumpa willakïta imëyaqpis kawatsikoq yakutawan igualatsirqan (Juan 4:13, 14). Familiantsikkuna kë limpiu y yakunëta pasatseq yakuta upuyänantam munantsik. Y manam munantsiktsu obligashqa mëtsika yakuta upur, tsapakäyänanta (pantakäyänanta). Yakunëninkuna pasanqan o yakuwan tsapakäyanqanqa creinqantsikkunata imanö ninqantsikpitam kanqa. “Alli ruraq nunapa shonqunqa pensanran imatapis parlanampaq” ninmi Bibliaqa. Jina “yachëyoq nunaqa shumaq yarpachakur-ran imatapis parlan, y parlanqankunaqa tantiyëpaqnöllam” ninmi. ¿Imanötaq kë consëjuta qatishwan? (Prov. 15:28; 16:23.)

Creenciankunata qowan reqinanta munaq warmiqa, “pensanran imatapis parlanampaq”, tsë ninanqa yachëllapa parlë y imatapis raslla mana parlëmi. Ama pëpita mas alli kanqëkitanö sientitsitsu. Tsënö shumaq pensëkur parlanqëkiqa, animakoqmi kanqa y yamë këtam mas miratsinqa. Tsëmi kënö tapukï: “¿Imëtaq parlayänäpaq qowa mas tranquïlu këkan? ¿Imapitataq mas parlë gustan? ¿Ciencia, polïtica o deportikunataku gustan? Pensanqankunata y ninqankunata respetarninlla, ¿imanötaq Bibliapita yachakïta munanampaqnölla parlapäman?”.

Tsënö kaptimpis, manaraq Testïgu këman chaq familiantsikpa shonqunman chänapaqqa, manam creenciantsikkunallatatsu parlapashwan, antis parlanqantsikmannömi ruranantsik.

ALLI PORTAKININTSIK

“Bibliapa musyatsikïninkuna ninqannö y yachatsikunqantsiknömi llapan junaqkuna ruranantsik. Tsënöpam, imanö kanqantsikta familiantsik cuentata qokurinqa”, ninmi näqa parlanqantsik Jürgen. Warmin bautisakunqampita 30 watataraq bautisakoq Hanspis, kënömi nin: “Cristiänunö alli portakïqa precisanmi. Tsënöpam mana creikoq familiantsik rikärinqa rasumpa kaq, kawënintsikchö yanapakunqanta”. Wakin cösaskunachö jukläya kashqapis, familiantsikkunaqa cuentatam qokuyänan creenciantsikkuna allipaq kanqanta.

“Cristiänunö alli portakïqa precisanmi. Tsënöpam mana creikoq familiantsik rikärinqa rasumpa kaq, kawënintsikchö yanapakunqanta.” (Hans)

Mana creikoq qowayoq cristiänakunatam apostul Pëdru kënö nir consejarqan: “Tsenolla, casadu warmicuna, Diosnintsicpa alli willaquininman qowequicuna mana creyiyaptinpis, pecunapa mandaduncho cawacuyë. Tsemi respetosa y alli cawacuyanqequita ricarnin, qowequicunapis Diosnintsicmanna paqwepa creyicuyanqa, Diosnintsicpaq mana parlapëcaptiquipis. Ama yarpacachäyëtsu aqtsequicunata tuquilayaman nactsaquita, ni orupita areticunata, wallqacunata, sortijacunata churaquita, ni alli caq ropacunapaq. Antis shonqiquicunacho yarpacachäyë shumaq alli  cawaquipaq. Tseno cawacurnenqa, Diospa riqueninchopis allapa baleqmi quecayanqui” (1 Pëd. 3:1-4).

Pëdruqa willakurqan cristiäna warmikuna portakïninkunawan qowankunata convensïta puëdiyanqantam. Tsë consëjuta wiyakurninmi, Christa jutiyoq paniqa 1972 watachö bautisakunqampita patsë qowampa shonqunman chänampaq kallpachakïkashqa. Nunanqa unënam Testïgukunawan estudiashqa karqan, peru manaran Diosta sirwita churakarqanraqtsu. Wakin reunionkunamanqa ëwashqam y cristiänukunawampis allim apanakun, y pëkunaqa ninqantam respetayan. ¿Imanötaq Christa shonqunman chëta procuran?

Pëmi kënö nin: “Jehoväta imëpis wiyakunäpaqmi churakarqö y ‘Diospita mana parlaparninlla’ alli portakïnïwan qowä Diosman creïkunampaqmi procurä. Bibliapa musyatsikïnimpa contran mana kaptinqa, munanqanta ruranantam jaqï y akranqantapis respetämi. Jehoväpa makinchömi imëkatapis jaqirï”.

Christata pasanqanmi, juknöpapis patsätsi alli kanqanta musyatsikun. Pëqa Diospa kaqchö rurëkunawanmi ocupädu kakun. Tsëkunata rurarpis, qowantaqa precisaqpaqmi churan. Musyanmi, atiendinanta y kuyanqanta rikätsinampaq qowan shuyaranqanta. Llapantsikmi mana Testïgu kaq familiantsikkunata comprendinantsik y precisaptinqa juknöpapis patsäratsinantsik. “Llapampaqmi churashqa tiempu kan” ninmi Biblia. Këqa musyatsimantsik mana creikoq familiantsikwan y majantsikwan tiemputa pasanapaqmi. Tsënökunachömi shumaq parlakurintsik, tsëmi japallankunalla mana sientikuyänampaq yanapakun (Ecl. 3:1).

AMA SHUYAKÏNINTSIKTA OQRASHUNTSU

Holgerpa teytanqa familiampita 20 watataraqmi bautisakurqan, pëmi kënö nin: “Alläpam precisan mana creikoq familiantsik, pëpaq Diosman mañakunqantsikta y kuyanqantsikta musyanan”. Jina Christam nin: “Imëpis shuyarëkäshaqmi qowa imë karpis rasumpa kaqta yachakur Jehoväta sirwinanta”. Familiantsik cristiänu manaraq kayaptinqa, imëllapis Testïgu këman chänampaq kaqtam markäkunantsik. Shuyakïnikita ama oqrëtsu.

Familiantsikwan alli apanakïta, rasumpa kaqta reqiyänanta y Bibliapa willakïninkunata shonqunkunayaq chätsitam munantsik. ‘Peru tsëtaqa rurashun qollmi shonqu karnin y alläpa respëtuwanmi’ (1 Pëd. 3:15NM).