Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Marzu de 2014

Familiachö Diosta Adorana Höra: ¿Imatataq rurayanman mas kushikïpaq kanampaq?

Familiachö Diosta Adorana Höra: ¿Imatataq rurayanman mas kushikïpaq kanampaq?

Brasilpita juk teytam nin: “Familiachö Diosta Adorayänä Höraqa, llapäkuna shumaq parlakuriyaptïmi tiempuqa raslla pasarin”. Japonpita juk teytanam chunka watayoq wamrampaq kënö nin: “Tiempu pasanqantapis manam cuentata qokuntsu, sinöqa mas yachakurmi sïguita munan. Imanö yachakuyanqäpitam kushishqa sientikun”.

Tsënö kaptimpis, manam llapan wamrakunatsu mas yachakïta munayan. Porqui höraqa ajayäyanmi. Togo nacionpita juk teyta ninqannöpis, “Jehoväta adorëqa manam ajayëpaqtsu kanman”. Y säbadu junaqpaq Isaïas ninqannöpis “alläpa kushikïpaq” kanqantam mëtsikaq familiakuna rikäyashqa. Peru höraqa estudiuta imanö rurayanqampitam ajayëpaqnö kanman (Is. 58:13, 14).

Teyta kaq cristiänukunaqa, entiendiyanmi mana mantsakushpa parlakuriyänampaqnö kaptinlla kushishqa yachakuyänampaq kaqta. Chusku wamrayoq Ralf jutiyoq teytam nin, Familiachö Diosta Adorayänan Höraqa, llapankuna shumaq parlakuriyanqanta y juk estudiu mana niranqanta. Tsënö kaptimpis, yachakuyanqan hörachö altantulla kayänampaq familiankunata yanapëqa itsa fäciltsu kanman. Juk warmim kënö nin: “Höraqa kallpannaqmi sientikö familiäta kushishqa yachakuyänäpaq yanapanäpaq”. ¿Imatataq teytakuna rurayanman mas yachakïta munayänampaq?

WANAYANQANMANNÖ YANAPAYË Y IMËKATA RURAYË

Alemaniapita ishkë wamrayoq teytam nin: “Wanayanqanmannö yanapanantsikqa  alläpam precisan”. Ishkë warmi wamrakunayoq Natalianam kënö nin: “Noqakunapaqqa mas precisan, kaqllata rurayänäpa rantin, tukïläyapa rurayanqämi”. Wakin familiakunaqa yachakuyänampaq kaqtam atskaman rakiriyan. Brasilpita ishkë jövin wamrakunayoq Cleiton teytam kënö nin: “Tukïläyapa rurayanqäqa llapäkuna parlakuriyänäpaqmi yanapayäman”. Jina wamrakuna tsë winëlla mana kayaptinqa yachakuyanqan tiemputam rakiyänan cada ünuta wanayanqanmannö yanapayänampaq. Tsëpaqqa alläpam precisan llapankunaman pensëkur, imapita y imanö yachakuyänampaq kaqta alleq rikäyänan.

¿Imatataq wakin familiakuna rurayan kushishqa yachakuyänampaq? Wakinkunaqa Jehoväpaq cantarninmi yachakur qallayan. Mëxicupita Juan teytam kënö nin: “Tsënö rurayanqäqa kushishqa yachakuyänäpaq, y shonqökunata alistayänäpaqmi yanapayäman”. Familiankunaqa yachakuyänampaq kaqwan igualaq canticukunatam akrayan.

Sri Lanka

Wakin familiakunanam Bibliata leyirnin yachakur qallayan. Y jukninlla leyinampa rantinmi, Biblia willakunqankunata churapanakïkur actuaciontanö leyiyan. Qallananllachöqa tsënö leyi mana gustanqantam Japonpita juk teyta willakun. Peru ishkan wamrankunaqa alläpam kushikuyaq teytankunawan juntu imatapis rurarnin. Wakin familiakunaqa hasta Bibliapa willakïnintam actuayan. Sudafricachö täraq ishkë wamrayoq Roger teytam kënö nin: “Leyirnin shumaq willakïkunata mana tariyanqäkunatam wamräkuna taririyan”.

Sudafrica

Jina juk yanapakïqa imallatapis juntu rurëmi. Itsapis Noë ruranqan arcatanö o Salomon ruranqan templutanö ichikllanllata rurariyanman. Tsëkunata rurayänampaq librukunata estudiar yachakïqa kushikïpaqmi kanqa. Asiachömi, pitsqa watayoq warmi wamra, teytankuna y awilan, apostul Pablu ruranqan viäjinkunaman yarpëkur juk pukllata patsätsiyarqan. Wakin familiakunanam Exodu librupa willakïninkunaman yarpëkur pukllakunata patsätsiyashqa. Togo nacionpita 19 watayoq Donald jövinmi kënö nin: “Imëkata rurayanqämi kushishqa yachakuyänäpaq yanapayämashqa”. ¿Familiachö Diosta Adorana Hörachö kushishqa yachakuriyänëkipaq ima rurëllatapis pensarqunkiku?

Estädus Unïdus

PUNTALLAPITANA ALISTAKUNANTSIKQA ALLÄPAM PRECISAN

Wanayanqanmannö yanapayanqan y tukïläyapa rurayanqanqa familiachö kushishqa yachakuyänampaqmi yanapanqa, peru tsëpaqqa puntallapitanam alistakuyänan. Höraqa jövinkuna utiriyanmanmi, tsëqa teyta kaqmi imatapis ruranampaq kaqta patsätsinan y puntallapitanam alleq alistakunan. Juk teytam kënö nin: “Puntallapitana alistakuptïqa llapäkunam kushishqa yachakuriyä”. Alemaniapita juk teytaqa puntallapitanam shamoq semänachö imapita yachakuyänampaq kaqta familianta willan. Benin nacionpita pitsqa wamrakunayoq familianam höraqa vidëuta rikäyänampaq patsätsiyan. Y teyta kaqmi tapukïkunata qellqëkur rikäyanqan höra respuestankunata ashiyänampaq puntallapita familianta qorin. Awmi, puntallapita alistakurninqa shumaqmi yachakuriyanqa.

Imapita yachakuyänampaq kaqta musyarninqa, entëru semänachömi tsëpaq parlayanqa y kushishqam yachakuyänan junaqta shuyaräyanqa. Jina imata rurayänampaq kaqta musyarninqa, llapankunam yanapanakuyanqa kushishqa yachakuyänampaq.

ALLÄPAM PRECISAN MANA JAQISHPA RURAYÄNAN

Wakin familiakunapaqqa manam fäciltsu cada semäna yachakuyänampaq.

Mëtsikaq teytakunaqa familiankunata manteniyänampaqmi atska hörakuna trabajayan. Tantiyarinapaq, Mëxicupita juk teytam qoyapa las seispita hasta ampipa las öchuyaq trabajan. Jina hörachöqa Diospa kaqchö imatapis rurayänampaq kaptinmi, Familiachö Diosta Adorayänan Hörata juk junaqpaq cambiariyan.

Imanö kaptimpis, Familiachö Diosta Adorana Hörata mana jaqishpa ruranapaqmi kallpachakunantsik. Togo nacionpita 11 watayoq Loïs jutiyoq warmi wamram kënö nin: “Höraqa illaqpita imapis pasakuptinmi, ichik mas tardiraq yachakur qallayä, peru manam imëpis yachakïtaqa jaqiyätsu”. Familiachö yachakïta mana jaqiyänampaqqa, allim semänakunapa qallanan junaqkunachö yachakuyänampaq patsätsiyanman, tsënöpa imapis pasakuptinqa tsë semänallachö juk junaqpaq cambiariyänampaq.

Familiachö Diosta Adorana Hörata rurarqa Jehovätam adorëkantsik. Tsëmi, familiëkichö llapankuna “mallwa törukunata” sacrificaqnö parlakïninkunawan Jehoväta alabayänampaq kallpachakï (Os. 14:2). Jina llapëkikuna kushishqa yachakuyänëkipaq kallpachakï, “porqui Jehoväpa kushikïninqa tsapäyäshoqniki wayinömi” (Neh. 8:9, 10).