Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Febrëru de 2014

Jehovämi Qomaqnintsik y Tsapämaqnintsik

Jehovämi Qomaqnintsik y Tsapämaqnintsik

“Noqata kuyamaptinmi, noqapis salvacionta qoshaq. Jutïta reqishqa kaptinmi tsapäshaq.” (SAL. 91:14)

1, 2. Familiantsikchö y Diospa kaqchö, ¿imanötaq imanö kanqantsik y imakunapa pasanqantsik jukläya?

JEHOVÄMI familiataqa kamashqa (Efes. 3:14, 15). Juk familiachöpis cada ünu imakunapa pasanqantsik y imanö kanqantsikqa jukläyam. Itsa wakinkunaqa mëtsika watakunapa teytankunawan juntu kawayashqa. Wakinkunaqa itsa qeshyarëkur, accidentirëkur o ima desgraciakunarëkur teytankunata oqrayashqa. Y wakinkunanäqa manam teytankunata reqiyashqatsu.

2 Tsënöllam Diospa sirweqninkunapis juk familianölla kantsik, peru imakunapa pasanqantsik, Diospa kaqta imanö reqinqantsik y imanö kanqantsikqa jukläyam. Itsa qamtaqa teytëkikuna cristiänu karnin wamra kanqëkipita patsë Diospa leyninkunata yachatsiyäshurqëki (Deut. 6:6, 7). O itsa wakinkunata pasanqannöpis, Bibliapa rasumpa musyatsikïnintaqa yachakurqunki pillapis yachatsishuptikiraq (Rom. 10:13-15; 1 Tim. 2:3, 4).

3. Imachötaq llapantsik igualantsik?

3 Tsënö jukläya jukläya karnimpis, llapantsikmi Adan jutsallakunqanrëkur, jutsayoq kantsik y wanuntsik (Rom. 5:12). Tsënö kashqapis, Jehoväta mana jaqita sirwirninmi, Teytantsiktanö  rikantsik. Unë tiempuchömi, Diospa akrashqa markan kënö nirqan: “Oh Jehovä, qammi Teytäkuna kanki” (Is. 64:8). Jinamampis, Diosta imanö mañakunapaq yachatsikurmi Jesus kënö nirqan: “Sielucho quecaq Dios Yayalläcuna, jutillequi allapa respetuwan alabashqa catsun” (Mat. 6:9).

4, 5. ¿Imatataq yachakushun Teytantsik Jehoväta kuyanqantsik mas miranampaq?

4 Ciëluchö këkaq Teytantsikqa, markäkïwan jutinta parlaqkunatam cuidamantsik y tsapämantsik. Pëmi kënö nir awnimantsik: “Noqata kuyamaptinmi, noqapis salvacionta qoshaq. Jutïta reqishqa kaptinmi tsapäshaq” (Sal. 91:14). Jehoväqa chikeqninkunapitam markanta salvan y mana ushakätsiyänampaqmi tsapan.

5 Jehoväta kuyanqantsik mas miranampaqqa, rikärishun kima yachatsikïta: 1) Qomaqnintsiktanö, 2) Tsapämaqnintsiktanö y 3) mas alli kaq Amïguntsiktanö. Këkunata yachakïkarnin yarpachakushun ciëluchö këkaq Teytantsikwan amïgu kanqantsikman y alabanapaq imata ruranapaq kaqman. Jina pëman witeqkuna atska bendicionkunata chaskiyanqanmampis yarpachakushun (Sant. 4:8).

IMËKATA QOMAQNINTSIK JEHOVÄ

6. ¿Imataq rikätsikun Jehoväpita ‘llapan qomanqantsic caqcuna’ shamunqanta?

6 Santiägum kënö nirqan: “Llapan imecapis qomanqantsic caqcunaqa allapa allim. Tseqa llapan actsicuna camaq Dios Yayapitam shamun” (Sant. 1:17). Kawënintsikqa Jehoväpa shumaq qarëninmi (Sal. 36:9). Kawënintsikchö pëpa munëninta rurarninmi, atska bendicionkunata chaskintsik y shamoq tiempuchö mushoq Patsachö imëyaqpis kawakïtam shuyantsik (Prov. 10:22; 2 Pëd. 3:13). Peru Adan jutsata muyamashqantsik këkaptinqa, ¿imanöpataq tsë bendicionkunata chaskita puëdishwan?

7. ¿Imatataq Jehovä rurarqan pëwan amïgu kanapaq?

7 Jehoväqa tukïnöpam imëkata qomantsik. Tantiyarinapaq, Jehoväqa salvamarnintsikmi kuyakïninta rikätsimarquntsik. Adan jutsanta muyamashqantsik kaptinmi, llapantsik jutsasapa kantsik (Rom. 3:23). Tsënö kaptimpis, pëwan amïgu kanapaqmi kuyakïninta rikätsimarquntsik. Apostul Juanmi kënö willakun: “Quenomi allapa cuyamashqantsicta musyatsimarqantsic: jucllella Tsurin Jesustam que patsaman cachamorqan, Jesusrecur noqantsic alli cawanantsicpaq. Quenopam musyantsic Dios allapa cuyamanqantsicta: manam noqantsic cuyanqantsicrecurtsu, sinoqa pe cuyamarnintsicmi. Tsurin Jesusta cachamorqan, cruscho wanur llapan jutsa rurashqantsicpita Dios perdonamänantsicpaq” (1 Juan 4:9, 10).

8, 9. Abrahanwan Isaac kawayanqan witsankuna, ¿imanötaq Jehovä rikätsikurqan Imëkata Qokoq kanqanta? (Rikäri kë yachatsikïpa qallananchö këkaq dibüjuta.)

8 Jesus yurikunampaq 1900 watakuna pishikaptinmi, Abrahanta pasanqan rikätsikurqan, nunakuna imëyaqpis kawakïta tariyänanrëkur, Jehovä imata ruranampaq kaqta. Hebrëus 11:17-19 textum nin: “Diosmi ‘Tsuriqui Isaacpitam atsca mireniquicuna canqa’ nishpa, Abrahamta änishqa carqan. Tseno nirirpis, probaq cuentam “Tsuriquita wanicatsir qarecamë” nerqan. Y Abrahamqa Diosman allapa marcäcoq carmi, jucllella tsurin Isaacta cäsillapa Diospaq wanïcatserqan. Abrahamqa musyarqanmi Diosnintsic poderyoq car cawaritsicoq cashqanta. Tsemi Isaacta wanushqanpita cawarishqa cuentatana Abraham chasquerqan”. Këqa igualan, llapan nunakunata salvananrëkur Jehovä Tsurin Jesucristupa kawëninta entreganqanwanmi (leyi Juan 3:16, 36).

9 ¡Imanö kushishqaraq Isaac sientikurirqan manana wanunampaq kaqta musyarir!  Sacrificiuta rurayänampaq montiman juk üshata Dios awrikätsinqantaqa, alläpachi agradecikurqan (Gen. 22:10-13). Tsëmi, tsë sitiutaqa “Jehovä-yirë” nir jutitsiyarqan, këqa “Jehovämi qokoq” ninanmi (Gen. 22:14, nota).

DIOSWAN AMISHTANAPAQ YANAPAKÏ

10, 11. ¿Pikunataq ‘jucnolla cayänanpaq llapan nunacunata willapäquikäyan’, y imanötaq rurëkäyan?

10 Imëkata Jehovä qomanqantsikman yarpachakurninmi cuentata qokuntsik, noqantsikrëkur Jesus mana wanuptinqa, Dioswan amishtëta mana puëdinqantsikta. Jina Pablupis tsëta musyarmi, kënö nirqan: “Jesucristum llapantsicpaq wanorqan. Tseta musyarmi, llapantsic wanushqa cuentano ticrarerqontsic. Rasonpam Cristoqa wanorqan llapantsicpaq. Tsemi wanushqa cuenta quecarnin, quiquintsicpa munenintsictaqa manana rurashwannatsu; sinoqa pe munashqanllatanam rurashwan. Porqui tsepaqmi wanurir cawarimushqa” (2 Cor. 5:14, 15).

11 Punta kaq cristiänukunaqa Diostam kuyayaq y sirwiyanqampitam alläpa kushikuyaq. Tsëmi, ‘jucnolla cayänanpaq llapan nunacunata willapäcuyänanpaq’ mandakïta chaskiyarqan. Tsënö yachatsikuyaptinmi, alli shonquyoq mëtsikaq nunakuna Dioswan yamë këman, amïgu këman y wamrankuna këman chäyarqan. Kanan witsankunapis ciëlupaq akrashqa cristiänukunam, tsënölla rurëkäyan. Pëkunam Diospita y Cristupita yachatsikurnin, alli shonquyoq nunakunata Jehoväpa sirweqninkuna kayänampaq yachëkätsiyan (leyi 2 Corintius 5:18-20; Juan 6:44; Hëch. 13:48).

12, 13. Jehovä imëkakunata qomanqantsikpita, ¿imanötaq agradecikunqantsikta rikätsikushwan?

12 Imëkata Qokoq Jehoväta agradecikurninmi, Patsachö kawëta shuyaraq cristiänukuna ciëlupaq akrashqa cristiänukunata, Diospita yachatsikïchö yanapayan. Tsëta rurarmi Jehoväpa juk shumaq qarënin Bibliata utilisantsik (2 Tim. 3:16, 17). Bibliata yachëwan utilisarninmi, nuna mayintsik imëyaqpis kawakïta tarinampaq yanapantsik. Peru manam tsëllatsu, tsë precisaq rurëta ruranapaqmi, Jehoväqa santu espïritunta qomarquntsik (Zac. 4:6; Lüc. 11:13). Tsë yanapakïwan alli yarqapukunqantsiktaqa tarintsik Anuario de los testigos de Jehová librukunachömi. ¡Imëkata Qomaqnintsik y Teytantsikta alabanarëkur yachatsikïchö yanapakunqantsikqa alläpa allim!

13 Jehovä imëkakunata qomashqantsik kaptinmi, kënö tapukunantsik: “¿Qomanqampita agradecikurku yachatsikïchö llapan puëdinqämannö rurëkä? ¿Imachötaq alliyäman mas alli yachatsikunäpaq?”. Agradecïkoq kanqantsiktaqa rikätsikushun, Diospa Gobiernunta puntaman churarmi. Tsënö rurashqaqa, llapan wananqantsiktam Jehovä qomäshun (Mat. 6:25-33). Kuyakïwan cuidamashqam shonqunta kushitsita munantsik (Prov. 27:11).

14. ¿Imatataq Jehovä rurashqa sirweqninkuna sasa tiempukunapa pasayaptin?

14 Davidmi kënö nir cantarqan: “Llakishqa y waktsam këkä. Jehovämi cuentaman churaman. Qammi yanapamaqnï y salvacionta Qomaqnï kanki” (Sal. 40:17). Jehoväqa kutin kutinmi sirweqninkunata salvashqa chikeqninkuna qatikachäyaptin. ¡Alläpam Jehoväta agradecikuntsik alli tsarakunapaq yanapamanqantsikpita y Diospa kaqchö qarëkämanqantsikpitapis!

JEHOVÄQA TSAPÄMANTSIKMI

15. Juk igualatsikïwan willakaramï juk kuyakoq teyta wamrankunata tsapëta tïranqanta.

15 Juk kuyakoq teytaqa manam wamrankuna wanayanqanllatatsu qon, sinöqa imëkapitam  tsapëta tïran. Ima pelïgru kaptimpis rasllam tsapärin. Juk wawqin willakun, wamrallaraq këkar teytanwan yachatsikuyanqampita wayinkunaman kutikäyaptinshi, alläpa tamyawan sanjapa (raqrapa) atska yaku kaptin rumikunapa saltar saltar tsimpayänan karqan. Pëshi teytampa puntanta ëwanaq, peru juk rumi kuyuptinshi ishkë kuti yakuman hundikärinaq. Wanunampaq këkaptinshi teytan jinan höra sutaramunaq. ¡Alläpa agradecïdum këkarqan! Tsënöllam, ciëluchö këkaq Teytantsikpis, Satanaspita y makinchö këkaq mundupita libramantsik. Awmi, Jehovänö Tsapämaqnintsikqa manam pipis kantsu (Mat. 6:13; 1 Juan 5:19).

16, 17. ¿Imanötaq Jehovä tsaparqan israelïtakunata amalequïtakunawan pelyayaptin?

16 Kuyakïwan Jehovä tsapämanqantsikqa, rikakun Egiptuchö esclävunö israelïtakuna kayanqampita libri quedariyanqanchö pasakunqankunam. Pëkunaqa, m.J.sh. 1513 watam Puka lamarpa tsimpayarqan, y Sinaï jirkapa pasarmi Refidim nishqan sitiuman chäyarqan.

17 Genesis 3:15 textu willakunqan profecïa cumplikänampaq kaqta Satanas musyarchi, israelïtakunata ushakätsita imëkanöpa munarqan. Tsëmi Diospa markanta chikeq amalequïtakunata utilisarqan (Nüm. 24:20). Josuë, Moises, Aaron y Hur sirweqninkunawan Jehovä logranqanta rikärishun. Amalequïtakunawan Josuë pelyanqanyaqmi, Moises, Aaron y Hurqa juk jatun jirkaman ëwayarqan. Moises makinta pallariraptinmi israelïtakunaqa chikeqninkunata ganayaq. Tsëmi Moisespa rikran utiptin (ajayaptin), Aaronwan Hur tsaräyäpoq. Jehoväpa yanapakïninwan y tsapäkïninwanmi, “Josuëqa Amaleqtawan markanta vencirqan” (Ex. 17:8-13). Tsëchömi Moises juk altarta rurarqan, y “Jehovä-nisï”  nirmi jutitsirqan, tsëqa hebrëu idiömachö “Jehovämi Tsapämaqnï” ninanmi (leyi Exodu 17:14, 15 *, nota).

SATANASPA MAKIMPITAM SALVARQAN

18, 19. ¿Imanötaq Jehovä kanan witsankuna tsapëkämantsik?

18 Jehoväqa tsapanmi kuyaqninkunata y wiyaqninkunata. Refidim sitiuchö israelïtakuna rurayanqannöllam, noqantsikpis chikimaqnintsikkuna qatikachämashqa, pëpa tsapäkïninta ashintsik. Rasumpa kaqchöqa, mëtsika kutim Satanaspa makimpita Jehovä markanta salvashqa. Polïtica asuntukunaman mana mëtikoq cristiänukunata Jehovä cuidanqanman yarpäri. Tsëmi pasarqan 1930 y 1940 watakuna Alemania y wakin nacionkunachö cristiänu mayintsikkunata. Sirweqninkunata sasa tiempukunachö Jehovä tsapanqanta Anuariukunachö y wakin publicacionkunachö leyinqantsikmi, yanapamantsik pë Tsapämaqnintsik kanqanman confiakunapaq (Sal. 91:2).

Jehoväqa cristiänu mayintsikkunatam utilisan sasa tiempukunachö alli tsarakunapaq (Rikäri 18-20 kaq pärrafukunata)

19 Jehoväqa markanwan y publicacionninkunawanmi shumaq yachatsikïkunata musyatsimarnintsik tsapämantsik. Y tsëmi, kanan witsan alläpa yanapamantsik. Satanaspa makinchö këkaq nunakuna pornografïata rikar y lluta kawakurnin mas peorman chëkäyaptimpis, Jehoväqa tsë pelïgrukunaman mana ishkinapaqmi kutin kutin yanapakoq consëjukunata qomantsik. Tantiyarinapaq, juk Teytanömi redes sociales (fötukunata y mas willakïkunata wakinkuna rikäyänampaq Internetpa päginakunaman churëmi) nishqanchö mana alli amïgukunapita cuidakunapaq consejamantsik (1 Cor. 15:33). *

20. ¿Ima yanapakïtataq tarintsik congregacionchö?

20 ¿Imanötaq rikätsikuntsik ‘Jehovä yachatsimaqnintsik’ kanqanta? Mandamanqantsikta wiyakurninmi (Is. 54:13). Congregacionchömi wananqantsik yachatsikïta y tsapäkïta tarintsik, porqui tsëchömi anciänukuna Bibliapa yanapakïninwan consejamantsik y yanapamantsik (Gäl. 6:1). Awmi, Jehoväqa cuidamantsik ‘qare’ cuenta anciänukunawanmi (Efes. 4:7, 8). ¿Imatataq noqantsik ruranantsik? Llapanchömi cäsukunantsik, tsënö rurashqaqa Diosmi bendicimäshun (Heb. 13:17).

21. a) ¿Imata chaskikunapaqtaq listu këkänantsik? b) ¿Imatataq yachakushun qateqnin kaq yachatsikïchö?

21 Ciëluchö këkaq Teytantsikpa consëjunkunata y santu espïritumpa yanapakïninta chaskikunapaq listu këkäshun. Yarpachakushun Jesucristu ruranqankunaman y ruranqankunata qatishun. Pëqa wanunqanyaqmi wiyakurqan, tsëmi Jehoväqa bendicirqan (Filip. 2:5-11). Noqantsikpis Jehoväman shonqupita patsë confiakushqaqa, bendicishqam kashun (Prov. 3:5, 6). Tsëmi, imëpis yarpänantsik Jehovälla Qomaqnintsik y Tsapämaqnintsik kanqanta. ¡Imanö kushikïpaqmi pëta sirwiqa! Y, ¿imanirtaq nintsik mas alli kaq Amïguntsik kanqanta? Qateqnin kaq yachatsikïchö kë tapukïpa respuestanta yachakunqantsikmi, yanapamäshun Jehoväta mas kuyanapaq.

^ par. 17 Exodu 17:14, 15: “Tsëpitanam Jehovä Moisesta kënö nirqan: ‘Pasakunqanta mana qonqayänëkipaq libruman qellqë, y Josuëta willë Amaleq nunakunata noqa chipyëpa ushakätsinapaq kaqta’. Tsëpitam Moises juk altarta rurarirnin ‘Jehovä-nisï’ nir jutitsirqan”.

^ par. 19 Kë asuntupita mas yachatsikïtaqa tarinki, 2011 wata 15 de agostu La Atalaya revistapa 3-5 kaq päginankunachö “Internet: cómo usar la red sin caer en ella” neq yachatsikïchömi, jina rikäri 2012 wata 15 de agostu Täpakoq revistapa 20-29 kaq päginankunachö “¡Diablupa trampankunapita cuidakuyë!” y “Satanaspa trampankunaman mana ishkinapaq alli tsarakushun” neq yachatsikïkunatapis.