Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Febrëru de 2014

 UNË IMANÖ KANQANTSIK

“Fötu-Dräma” yarqamunqampita 100 watanam pasarishqa

“Fötu-Dräma” yarqamunqampita 100 watanam pasarishqa

“¡Kikin Russell wawqipitapis Russell wawqi rikoqllam!” (1914 watachö Fötu-Drämata rikäkoq)

“FÖTU-Dräma de la Creacion” yarqamunqampitaqa 100 watanam pasarishqa, kë rikänapaq y wiyanapaq yachatsikïqa Biblia Diospa Palabran kanqanman markäkuyänampaqmi yanapakurqan. Këqa yarqamurqan imëkapis kikinlla rurakashqa creencia, alta crïtica y escepticismo nishqankuna, nunakunapa markäkïninta ushakätsinqan witsanmi, y kë “Fötu-Dräma” nishqanmi Jehovä Kamakoq kanqanta musyatsikurqan.

Bibliata Estudiaqkunapa pushaqnin Charles T. Russellmi, Bibliapa rasumpa yachatsikïninta nunakuna ras y entiendïpaqnölla yachakuyänampaq imatapis asheq. 30 watakunapita masnam Bibliata Estudiaqkunaqa papelman qellqashqata utilisäyaq, peru tsëpitaqa pelïculata rikänapaq kaqtapis utilisäyarqanmi.

JATUN PANTÄLLACHÖMI DIOSPA YACHATSIKÏNIN YARQAMUN

1890 witsankunam rikänallapaq kaq pelïculakuna yarqamurqan. Y 1903 watachömi Nueva York markachö juk religion pelïculata jorqarqan. Tsënö karpis, 1912 watachö “Fötu-Dräma” rurakanqan witsanqa, pelïculakuna rurëqa tsëraqmi qallëkarqan. Wawqi Russellmi tsënö yachatsikï papelchö qellqashqapitapis Bibliapa yachatsikïninta mas alli musyatsikunqanta cuentata qokurirqan.

“Fötu-Dräma” nishqanqa puwaq hörakuman duraq, tsëmi chuskumanraq rakiyaq. Bibliapita jorqushqa 96 yachatsikïninkunam kaq. Mëtsika partikunachömi müsicawan yarqamoq. Grabashqa voztawan müsicatam, Bibliapa mas reqishqa yachatsikïninkuna tukï color fötukunachö yarqamunqanmannö, yanapakoqkuna igualatsiyaq.

“Qoyllurkuna kamakanqampita hasta waranqa watachö Cristupa Gobiernun ushanqanyaqmi willakun.” (F. Stuart Barnes, 1914 wata 14 watayoq këkar)

“Fötu-Dräma” nishqantaqa mas rantiyämoq Filadelfia, Nueva York, Paris y Londres markakunapitam.Tsëchömi yachaqkuna cada fötukunata, y pelïculakunata makillapa pintayaq. Betelchö Dibüjukunata ruraqkunam encargakuyarqan pintëpita y makwayaq fötukunata trukëta. Manam rantiyämunqan  fötukunallatatsu utilisäyaq, antis Yonkers, Nueva York marka Betelchö yanapakoqkunatam grabayarqan, Abrahanwan Isaac rurayanqanta actuekaqta, jina wamranta mana wanutsinampaq Abrahanta juk angel michëkaqtapis (Gen. 22:9-12).

Yanapakoqkunam kima kilömetrutanö pelïculata, 26 grabashqa vozkunata y 500 fötukunata jinan hörallachö rikäyänampaq y wiyayänampaq igualatsiyaq

Tsëpaq parlarmi, wawqi Russellpa juk yanapaqnin kënö nirqan: “Religionninkunaman qaqayänampaq imëkata rurayanqankunapitapis, mëtsikaq nunakuna Bibliaman interesakuyänampaqmi këqa mas yanapanqa”. ¿Imataraq niyarqan cürakuna? ¿Kushikuyarqantsuraq “Fötu-Dräma” nishqanwan, mëtsikaq qollmi shonqu nunakunata tsë yanapakïwan Diospita yachatsikuyanqanta? Manam. Tsëpa rantinqa, mana alli religionkunapa pushaqninkunam, “Fötu-Drämata” pasayaptin mana allita parlayarqan. Jina wakinkunanäqa imëkanöpam nunakuna mana rikäyänampaq michëta tïrayarqan. Juk markachönäqa mana rikäyänampaqmi luztapis cortariyarqan.

Patsan kaq congregacionkunapita wawqikunam, Escenario nishqan libruta millonyëpayan qarakuyarqan. Tsë libruchömi “Fötu-Dräma” nishqampa dibüjukuna këkaq

Cada shamoqkunam insigniata chaskiyaq, y tsë insigniachöqa këkaq, wamra këkar Jesus y “Pax” nishqan palabram, tsëqa “yamë” këta ashiyänampaqmi yarpätseq

Tsënö rurayaptimpis, teatrumanmi juntayarqan “Fötu-Drämata” debaldilla rikäyänampaq. Estädus Unïduschöqa 80 markakunachömi cada junaq rikäyarqan, y mëtsikaqmi tsënö wiyanapaq y rikänapaq pelïculataqa rikäyarqanraqtsu. Fötukunata shumaq yachëllapa churayaptinmi, rikëta puëdiyaq imanö juk chipsa rurupita (runtupita) yarqoqta, y imanö juk wëta shumaq pashtaqta. Këqa Jehovä alläpa yachëyoq kanqantam rikätsikoq. Qallananchö ninqantsiknöpis, wawqi Russellta pantallachö “Fötu-Drämata” presentëkämoqta rikarmi, juk nuna nirqan tsë imagenqa “kikin Russell wawqipitapis Russell wawqi rikoqllam” nir.

BIBLIATA YACHAKUYÄNAMPAQ JUK PRECISAQ PASANQAN

1914 wata 11 de enëru killam, punta kaq “Fötu-Drämata” Nueva York markachö kë teatruchö, Asociacion Internacional de Estudiantes de la Biblia nishqan jorqayämurqan

Juk estudiösu nunam nirqan kë “Fötu-Drämaqa”, “vozyoq y müsicayoq fötukuna kuyukïkaqpita, y juk luzwan rikätsikoq pelïculakunapita, mas puntata yarqamunqanta”. Manaraq “Fötu-Dräma” yarqamuptinmi, juk pelïculakunaqa “Fötu-Dräma” ruranqannö vozta, müsicata y fötukuna kuyukïkaqta jinan hörallachö mana utilisäyarqantsu. Y “Fötu-Drämata” rikäyanqannöqa manam juk pelïculakunataqa mëtsikaq nunakuna rikäyarqantsu, porqui qallanqan watallachömi 9 millonnö nunakuna Norteamërica, Euröpa, Australia y Nueva Zelanda nacionkunachö rikäyarqan.

1914 wata, 11 de enëru killam, punta kaq “Fötu-Drämata” Nueva York markachö jorqayämurqan. Qanchis killakuna pasariptinllam, Punta kaq Jatun Guërra qallarirqan. Tsënö kaptimpis, entëru Patsachömi “Fötu-Drämata” presentayanqanman mëtsikaq nunakuna ëwayarqan, y tsëchömi Diospa Gobiernun alli cösaskunata ruramunampaq kaqta musyariyarqan. Awmi, “Fötu-Drämaqa” 1914 watapaqqa alläpa shumaq y shoqakoqmi karqan.

20 “Fötu-Dräma” copiakunatam Norteamëricachö rikätsikuyänampaq utilisäyarqan