Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Febrëru de 2014

Jehovämi mas alli kaq Amïguntsik

Jehovämi mas alli kaq Amïguntsik

“Abrahampaqmi Dios Yaya nerqan: ‘[. . .] noqapa amigümi’.” (SANT. 2:23)

1. Dios kikin rikoqta kamamashqantsik kaptin, ¿ima rurëtataq puëdintsik?

TEYTANKUNA imanö kayanqanmanmi wamrakunaqa pareciyan, tsëmi teytankuna niraq kayanqanta nintsik. Jehovämi ciëluchö këkaq Teytantsik, pëmi kawëta qomarquntsik (Sal. 36:9). Teytantsik kaptinmi, pë rikoq kantsik. Kikin rikoqta kamamashqantsik kaptinmi, noqantsikpis pënölla pensëta, imatapis decidita y alli amïgukunata ashita puëdintsik (Gen. 1:26).

2. ¿Imataq yanapamantsik Jehovä Amïguntsik kanampaq?

2 Jehovämi mas alli kaq Amïguntsik këta puëdin. Tsëqa kanqa Dios kuyamanqantsikpita, pëman y Tsurinman markäkunqantsikpitam. Jesusmi kënö nirqan: “Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Mëtsikaq nunakunam, Jehoväwan alli Amïgu kayashqa. Ishkaqllapaq parlarishun.

“ABRAHANQA, AMÏGÖMI”

3, 4. ¿Imachötaq jukläya kayarqan Abrahanwan mirënin israelïtakuna?

3 Jehoväqa israelïtakunapa awilumpaq parlarninmi, “Abranqa, amïgömi” nirqan (Is. 41:8). Jina, 2 Crönicas 20:7  textupis Abrahan Diospa amïgun kanqantam nin. ¿Imanirtaq pëqa Kamaqninwan amïgu këta puëdirqan? Markäkïninrëkurmi (Gen. 15:6; leyi Santiägu 2:21-23).

4 Abrahanpa mirënin unë israelïtakunaqa Jehoväta rikäyaq Teytankunatanö y Amïgunkunatanömi. Peru llakikïpaqqa pëwan amïgu këta oqrariyanqanmi. Tsëqa pasakurqan Jehovä awnikunqankunaman manana markäkuyaptinmi.

5, 6. a) ¿Imatataq rurarqunki Jehoväwan Amïgu kanëkipaq? b) ¿Ima tapukïkunataraq rurakushwan?

5 Jehoväta mas reqiptikiqa, markäkïnikim mas sinchiyanqa y masmi kuyanki. Yarpë yachakur qallarnin Dios rasumpa kanqanta y amïgun këta puëdinqëkita musyarinqëkiman. Jina yachakurqëkim Adan mana wiyakunqanrëkur llapantsik jutsayoq kanqantsikta. Y cäsi llapan nunakuna Diospita rakikashqa këkäyanqantam cuentata qokurirqëki (Col. 1:21). Tsëpitanam, ciëluchö këkaq Teytantsik karuchö mana këkanqanta cuentata qokurirqëki. Y Tsurimpa kawëninta noqantsikrëkur entreganqanta musyarirnam, tsë sacrificiuman markäkur Jehoväwan amïgu kanëkipaq kallpachakur qallëkurqëki.

6 Tsëkunaman yarparmi, kënö tapukushwan: “¿Jehoväwan amïgö kënï masku sinchiyëkan? ¿Paqwëku pëman confiakö? ¿Cada junaqku mas kuyä?”. Unë witsan Gedeonmi Jehoväwan amïgu karqan. Maslla reqirishun ruranqanta qatinapaq.

“YAMË KËTA QOKOQ JEHOVÄ”

7-9. a) ¿Imataq Gedeonta pasarqan y imanötaq tsë yanaparqan? (Rikäri kë yachatsikïpa qallananchö këkaq dibüjuta.) b) ¿Imanötaq Jehoväwan amïgu kënintsikta sinchiyätsishwan?

7 Juez Gedeonqa Jehoväta sirwirqan sasa tiempukunachömi, tsëqa karqan israelïtakuna Dios Awnikunqan Patsaman yëkuyanqanchönam. Juëces librupa 6 kaq capïtulunmi willakun, Ofrä sitiuchö Gedeonta Jehoväpa angelnin watukanqan witsankuna, madianïtakuna israelïtakunata ushakätsita munayanqanta. Tsëmi, Gedeonqa juk pakaraq sitiuchö trïgunta cosechëkarqan, tsënöpa chikeqninkuna shayämuptin trïgunta ras pakänampaq. Angel yuripurir “puëdeq y kallpasapa” niriptinmi, Jehovä yanapanampaq o mana yanapanampaq kaqta Gedeonqa angelta tapurqan. Kamakoqpa jutinchömi, angelqa Jehovä yanapanampaq kaqta nirqan.

8 Gedeonqa tapukoq “Madianpa makimpita” Israelta imanö salvanampaq kaqtam. Jehoväqa kënö nirmi contestarqan: “Noqaqa qamwanmi këkäshaq, Madian kasta nunakunataqa juk nunatanöllam vencirinki” (Juëc. 6:11-16). Tsëta imanö logranampaq kaqta tapukurmi, Gedeonqa juk señalta mañakurqan. Jehoväwan tsënö parlanqanqa, rikätsikun Gedeonpaq Jehovä rasumpa kanqantam.

9 Tsë pasakunqanmi Gedeonpa markäkïninta sinchiyätsirqan y Diosman mas wititsirqan. Mikïta cocinarirmi angelta sirwirqan. Tsë mikïta Angel väranwan takariptin mikïta nina ushakäratsiptinmi, Gedeonqa musyarirqan tsë angel Jehoväpita shamunqanta. Tsëmi, espantar kënö nirqan: “¡Ay Ciëluchö y Patsachö Autoridäyoq Jehovä, angelnikiwanmi rikänakushqa kä!” (Juëc. 6:17-22). Tsë pasakunqanqa, ¿micharqanku Diosman Gedeon witinanta? Manam. Tsëpa rantinqa, Jehovätam mas reqirqan y yamë këtam tarirqan. Tsëtam rikätsikun tsë sitiuchö altarta rurarir “Jehovä-salom” nir jutitsinqan, tsëqa “Yamë Këta Qokoq Jehovä” ninanmi (leyi Juëces  6:23, 24 *, nota). Noqantsikrëkur llapan junaqkuna imëkata ruranqankunaman yarpachakurninmi rasumpa Amïguntsik kanqanta cuentata qokuntsik. Y pëman mas mañakurninmi, yamë këta tarintsik y pëwan amïgu kënintsik mas sinchiyan.

“JEHOVÄ, ¿PITATAQ WAYIKIMAN CHASKINKI?”

10. Salmu 15:3, 5 textu ninqannö, ¿imanö nuna kanantsiktataq Jehovä mañamantsik amïgun kanapaq?

10 Tsënö kaptimpis, Jehovä Amïguntsik kanampaqqa, pë mandamanqantsikkunatam ruranantsik. Salmu librupa 15 kaq capïtulunchömi David qellqarqan, Jehovä ‘wayinman chaskimänapaq’ o amïguntsik kanampaq, imata ruranapaq kaqta (Sal. 15:1). Rikärishun ishkëllata: tumpakoq y honrädu këpaq. Jehoväpa wayinchö këkaqpaq parlarmi David kënö nirqa: “Manam pitapis tumpashqatsu. [. . .] y mana jutsayoqpa contran yarqunanrëkur manam imatapis chaskipakushqatsu” (Sal. 15:3, 5).

11. ¿Imanirtaq tumpakoq kashwantsu?

11 Jina Davidqa, “shimikita tsarë mana alli parlëpita” nirmi willakun (Sal. 34:13). Kë consëjuta mana wiyakurnin tumpakushqaqa, ciëluchö këkaq Teytantsikpitam karupäratsimashwan. Cläru parlakïchöqa, tumpakoq këqa Jehoväpa chikeqnin Diablupitam shamun. Griëgu idiömachö diablu palabraqa “tumpakoq” ninanmi. Tsëmi, wakinkunapaq mana allikunata parlëpita cuidakunqantsikqa, Jehoväwan amïgu kënintsik mana ushakänampaq yanapamäshun. Y masqa congregacionta pushaqkunapaq mana alli parlëpitam cuidakunantsik (leyi Hebrëus 13:17 y Jüdas 8).

12, 13. a) ¿Imanirtaq llapanchö honrädu kashwan? b) ¿Imanötaq honrädu kanqantsikta wakinkuna rikäyan?

12 Jehoväta sirweqkunaqa honrädu kayanqampitam reqishqa kayan. Apostul Pablum kënö nirqan: “Noqacunapaq Diosnintsicman mañacayämunqui yanapecayämänanpaq. Musyecayämi consensiacunacho allillata rurecayanqäta, y munayä ime equepis alli portacur cawaquitam” (Heb. 13:18). ‘Alli portacunapaq’ decidishqa karninmi, cristiänu mayintsikkunapita provechakuntsiktsu. Cristiänu mayintsikkuna noqantsikpaq trabajayaptinqa, allim tratantsik y parlanqantsiknömi paganantsik. Cristiänukunaqa trabajaqninkunawan y pï mëwampis honrädum kayan. Y cristiänu mayintsikpaq noqantsik trabajarninqa, manam provechakuntsiktsu.

13 Mëtsikaq mana Testïgu nunakunam noqantsikwan trabajë kushikïpaq kanqanta niyan. Tantiyarinapaq, juk jatun emprësata dirigeqmi Testïgunkuna cumplïdu kayanqanta rikar kënö nirqan: “Qamkunaqa parlayanqëkitam imëpis cumpliyanki” (Sal. 15:4). Tsënö portakïqa, Jehoväwan amïgu kanallapaqtsu manam yanapamantsik, sinöqa kuyakoq Teytantsik Jehovätapis alabanmi.

WAKINKUNATA YANAPË JEHOVÄPA AMÏGUN KAYÄNAMPAQ

Wakinkunatam yanapantsik Jehoväpa amïgun kayänampaq (Rikäri 14 y 15 kaq pärrafukunata)

14, 15. ¿Imanötaq yachatsikur tarinqantsik nunakunata Jehoväpa amïgun kayänampaq yanapashwan?

14 Yachatsikurnin tarinqantsik nunakuna Dios kanqanta creirnimpis, quisä amïguntanötsu rikäyan. ¿Imanöraq yanaparishwan? Yachatsikoq ëwayänampaq 70 qateqninkunata ishkëpayan mandarnin Jesus ninqampita yachakurishun, kënömi nirqan: “Me marcaman charninpis,  wayincunaman chasquiyäshuptiqui, napacuriyanqui, ‘Quecho quecaqcuna shumaq cawaquicho cacuyë’ nishpa. Tsecho juc nuna shumaq cawaquicho captenqa, willacuyanqequi bendisionmi pecunacho quedanqa. Mana tseno captenqa, qamcunawanmi tse bendision cuticonqa” (Lüc. 10:5, 6). Wakinkunata shumaq tratanqantsikqa, itsa rasumpa kaqta yachakïta munayänampaq yanapakunqa. Jina piñashqa këkaqkunatapis itsa alliyäratsinman, y yapë kutishqa shumaq wiyamänapaq yanapakunman.

15 Mana alli religionninman o Biblia yachatsikunqampa contran costumbrikunaman markäkoq nunakunata tarirpis, shumaqmi tratantsik. Kë mana alli mundupita utishqana karnin y adoranqantsik Diospita yachakïta munarnin reunionkunaman shamoqkunatapis, shumaqmi chaskintsik. “Bibliam yanapashqa jukläyana kawakuyänampaq” neq yachatsikïkunachömi tsëpaq shumaq yachatsikïkunata tarintsik.

MAS ALLI KAQ AMÏGUNTSIKWAN TRABAJASHUN

16. ¿Imakunata rurartaq Jehoväpa amïgun y ‘mincan’ këta puëdintsik?

16 Höraqa piwampis juntu trabajaqkunaqa alli amïgum tikrayan. Y kushikïpaqqa, Jehovä llapan sirweqninkunata amïgunkunatanö y ‘mincancunatanö’ rikämanqantsikmi (leyi 1 Corintius 3:9). Diospita yachatsikïchö y Diospa sirweqnin kayänampaq yanapakurninqa, ciëluchö këkaq Teytantsik imanö kanqantam mas alleq entiendishun, y santu espïritu yanapamanqantsiktapis rikäshunmi.

17. ¿Imanötaq Jehovä Amïguntsik kanqanta rikätsikun asamblëakunachö yachatsikayämunqankuna?

17 Diospita mas yachatsikurninqa, mas lädunchömi sientikushun. Yachatsikunqantsikchömi yanapamantsik y chikimaqnintsikkunapa rurëninkunata ushakätsinqantam rikantsik. Jinamampis pushëkämantsik mikï cuenta tukïläya publicacionkunawan y reunionkunawanmi. Y asamblëachö yachatsikäyämunqanqa rikätsikun kuyamanqantsikta, y problëmantsikkunapita y wananqantsikkunapita altantu këkanqantam. Jatun asamblëapita agradecikurmi, juk familia kënö nir cartakurqan: “Yachatsikayämunqanqa shonqökunayaqmi chärirqan. Cada ünuta kuyayämanqanta, y imapis allilla yarqapayämänanta Jehovä munanqantam sientiyä”. Alemaniapita juk matrimonium, Irlandachö asamblëaman ëwayaptin cristiänu mayinkuna shumaq chaskiyanqanta y cuidayanqanta agradecikurnin, sucursalman kënö nir cartakuyarqan: “Peru masqa Jehoväta y Mandakoq Jesucristutam agradecikuyä. Pëkunam invitayämashqa shumaq markanchö kayänäpaq.  Entëru nacionchö Diospa markan juknölla kanqantam rikäyarqö. Dublin markachö asamblëachö pasayanqäkunam yanapayämanqa Jehoväta qamkunawan juntu sirwinöqa imapis mana kanqanta yarpäyänäpaq”.

AMÏGUKUNAQA SHUMAQMI PARLAYAN

18. ¿Imatataq tapukushwan Jehoväwan parlakïnintsikpita?

18 Shumaq parlapänakï kaptinqa, amïgu kë masmi miran. Mushoq mäquinakuna yarqamuptin y Internet kaptinmi, kanankunaqa redes sociales y mensäji de textu nishqankuna alläpa reqishqa kayan. Peru, ¿mas alli kaq Amïguntsik Jehoväwan parlanapaq tiemputa rakintsikku? “Mañakïkuna Wiyaq” pë kanqanta musyantsikmi (Sal. 65:2). ¿Ëka kutitaq pëwan parlantsik?

19. ¿Imataraq rurashwan sientinqantsikkunata Jehoväta willë sasaraq kaptin?

19 Diosta wakin sirweqkunapaqqa sientiyanqankunata shonqupita patsë parlëqa sasaraqmi. Tsënö kaptimpis, mañakurnin shonqupita patsë parlapänatam Jehoväqa munan (Sal. 119:145; Lam. 3:41). Sientinqantsikkunata imanö nita mana puëdishqapis, Bibliam yanapamantsik. Röma cristiänukunamanmi Pablu kënö qellqarqan: “Porqui mañacurnin manam tantiyantsictsu imata mañaquitapis; peru Santu Espiritum rogacur mañacamun noqantsicpaq [. . .]. Y nunacunapa imapis yarpenincunata reqeq Diosmi musyan Santu Espiritu imata mañaconqantapis; porqui Dios munanqanmannomi Santu Espiritu rogacun, Teyta Jesusman creyicoq nunacunapaqqa” (Rom. 8:26, 27). Job, Salmu y Proverbius librukuna ninqankunaman yarpachakunqantsikmi, sientinqantsikkunata Jehoväta willanapaq yanapamäshun.

20, 21. ¿Imanötaq Filipensis 4:6, 7 textuchö Pablu qellqanqan shoqamantsik?

20 Llakikïkunapa pasarninqa, filipensis cristiänukunata Pablu consejanqannö rurashun, kënömi nirqan: “Ama imapaqpis yarpacachäyëtsu, antis imano ecano carpis, Diosnintsicman ‘Grasias’ nicur mañaquicuyë. Tseno mañacuyaptiquim, Jesucristurecur Teyta Diosqa allapa espantepaq juclaya shonquta, y yarpeta qoyashunqui shumaq cawacuyänequipaq” (Filip. 4:6, 7). Diospa yamë këninta imëpis këkätsishun, porqui tsëqa shonquntsikta y pensënintsiktam tsapan.

¿Imanötaq Dioswan amïgu kënintsikta mañakïnintsik sinchiyätsin? (Rikäri 21 kaq pärrafuta)

21 Mañakïqa Jehoväwan amïgu kënintsiktam mas sinchiyätsin. Tsëmi ‘mana qonqeta Diosman mañacushun’ (1 Tes. 5:17). Kë yachatsikï, Dioswan amïgu kënintsikta y mandakïninkunata imëpis cumplinapaq yanapamänata jaqishun. Yarpäshun, Jehovä Teytantsik, Diosnintsik y Amïguntsik karnin imanö yanapamanqantsikta.

^ par. 9 Juëces 6:23, 24: “Peru Jehovämi nirqan: ‘Qampa yamë këniki katsun. Ama mantsëtsu. Manam wanunkitsu’. Tsëmi Gedeonqa juk altarta Jehoväpaq tsëchö rurarqan, y kanankunayaqmi “Jehovä-salom” nir reqiyan. Y tsë altarqa abï-ezritas kastakuna täräyanqan Ofrä sitiuchömi këkan”.