Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Febrëru de 2014

¡Alabashun, Mandakoq Cristuta!

¡Alabashun, Mandakoq Cristuta!

“Gloriëkichö puntaman ëwë hasta vencinqëkiyaq.” (SAL. 45:4)

1, 2. ¿Imanirtaq Salmu librupa 45 kaq capïtulun noqantsikpaq precisan?

JUK alläpa reqishqa Mandakoqmi cawallunta montan rasun kaqta y alli rurë kaqta defendinampaq. Chikeqninkunata paqwë ushakäratsirmi, juk shumaqllan noviawan casakurin, yarpashqa y alabashqam imëyaqpis kanqa. Tsënö pasakunampaq kaqtam Salmu 45 textu rikätsikun.

2 Tsënö kaptimpis, Salmu librupa 45 kaq capïtulunqa manam tsëllatatsu parlan, sinöqa juk mas kushikïpaq pasakunampaq kaqtapis willakunmi. Tsë musyatsikïkunaqa alläpam precisan kanan tiempu y shamoq tiempu kawënintsikpaqpis. Tsëmi, Salmu 45 textuta alleq yachakurishun.

“SHONQÖMI KUSHIKUN SHUMAQ PALABRAKUNATA YARPARAR”

3, 4. a) ¿Ima ‘shumaq palabrakunataq’ alläpa precisan noqantsikpaq, y imanötaq shonquntsik sientikun? b) ¿Imatataq musyatsikuntsik juk Mandakoqpaq? c) ¿Imata rurashqataq parlakïnintsik ‘alleq qellqaq nunapanö’?

3 (Leyi Salmu 45:1 *.) ‘Shumaq palabrakunam’ salmistapa ‘shonqunta alläpa kushitsin’. Kushikïninqa juk mandakoqrëkurmi. “Shonqömi kushikur tïpulyan” neq palabrakunataqa traduciyämushqa hebrëu idiömachö “puwan” neq palabrapitam. Awmi,  juk mandakoqrëkurmi salmistapa shonqunqa kushikun imëka puwaqnöraq y parlakïninqa imëka ‘alleq qellqaq nunapanöran’.

4 Y noqantsikpa shonquntsikmanqa, ¿Diospa alli willakïnin ‘shumaq palabrakunanöku’ chan? 1914 watapita patsëmi, Diospa Gobiernumpita alli willakïninqa mas shumaqyärirqan, tsëpita patsëqa manam shamoq tiempuchö Gobiernupaqtsu rikätsikun, sinöqa ciëluchö gobiernu patsakashqa këkanqampaqmi. Tsë alli willakïtam ‘llapan nunacunata, jinantin nasioncunacho’ yachatsikuntsik (Mat. 24:14). ¿Tsë alli willakïwan shonquntsik kushikunku? ¿Shonqupita patsëku yachatsikuntsik Diospa alli willakïninta? Salmistanömi noqantsikpis Diospa Gobiernunchö Jesucristu Mandakoq këman chanqanta musyatsikuntsik. Jinamampis, tsë Gobiernuta cäsukuyänampaqmi llapan nunakunata willantsik (Sal. 2:1, 2, 4-12). Yachatsikurnin Diospa Palabranta utilisashqam parlakïnintsikpis ‘alleq qellqaq nunapanö’.

Mandakoqnintsik Jesucristupa alli willakïninkunatam kushishqa musyatsikuntsik

MANDAKOQPA PARLAKÏNINQA SHUMAQMI

5. a) ¿Imanirtaq Jesusqa kuyëllapaq karqan? b) ¿Imanötaq shumaq parlakïninwan Mandakoq yachatsikoq y imanötaq ruranqanta qatishwan?

5 (Leyi Salmu 45:2 *.) Bibliaqa manam willakuntsu Jesus janapa imanö kanqantaqa. Peru alläpa kuyëllapaq nunachi karqan jutsannaq karnin. Y Jehoväta imëpis wiyakurninmi mas kuyëllapaqqa karqan. Jinamampis, Diospa Gobiernumpitam alläpa shumaq parlakïninwan yachatsikurqan (Lüc. 4:22; Juan 7:46). ¿Kallpachakïkantsikku Jesus ruranqannö yachatsikunapaq y shumaq parlakïnintsikwan nunakunapa shonqunman chänapaq? (Col. 4:6.)

6. ¿Imanötaq Jehovä bendicirqan Jesusta?

6 Jehovällapaq kanqanta Jesus kawëninchö rikätsikushqa kaptinmi, yachatsikïninta y nunakunarëkur kawëninta entreganqampita Jehoväqa bendicirqan. Jesuspaq parlarmi apostul Pablu kënö nir qellqarqan: “Umillaquicorqan Diosta cäsucurmi asta waniyaqpis chärerqan, y manam penqacorqantsu cruscho wanitapis. Tserecurmi Dios sieluchopis y que patsachopis llapanpa mas presisaq mandacoqnin cananpaq churarerqan. Tsemi pe mandacoq captin qonquricuyanqa sielucho llapan caqcuna, que patsacho llapan caqcuna y patsa rurincho llapan caqcunapis. Y llapan nunacunam niyanqa: ‘Jesucristoqa Diosnintsicmi’ [“señornintsikmi”, NM] nishpa. Tsemi Dios Yayatapis allapa alabayanqa” (Filip. 2:8-11). Jehoväqa Jesusta bendicirqan mana ushakaq kawëta qorninmi (Rom. 6:9).

MANDAKOQQA YANAQINKUNAPITA MAS PRECISAQMI TIKRARIN

7. ¿Imanötaq Jesus yanaqinkunapita mas precisaq kanampaq Jehovä akrarqan?

7 (Leyi Salmu 45:6, 7 *.) Jesus alli kaq rurëkunata kuyaptin y mana alli kaq rurëkunata paqwë chikiptinmi, Jehoväqa Gobiernunchö Mandakoq kanampaq churashqa. Y ‘shumaq pukutaq aceitiwanmi’ akrashqa ‘yanaqinkunapita’ mas precisaq kanampaq, tsë ninanqa David kastapita shamoq mandakoqkunapita. Tsëtaqa rurarqan, Jesus Mandakoq kanampaq kikin Jehovä akrarmi, y manam tsëllatsu, Sacerdötikunapa Mandakoqnin  kanampaqpis akrarqanmi (Sal. 2:2; Heb. 5:5, 6). Peru Jesusqa manam rasumpa aceitiwantsu akrashqa karqan, sinöqa santu espïrituwanmi, y Gobiernunqa manam Patsachötsu kanqa, sinöqa ciëluchömi.

8. a) ¿Imanirtaq següru kantsik Jesuspa mandakïnin alli kaqllata ruramunampaq kaqta? b) ¿Imanirtaq nintsik Diospita Jesuspa ‘trönun shamunqanta’?

8 Jehoväqa 1914 watam Gobiernunchö Mandakoq kanampaq Tsurinta churashqa. ‘Llapantapis allillam väranwan gobernanqa’, tsëmi tsë gobiernuqa alli kaq rurëkunata ruranqa y llapampaqpis igual-llam kanqa. Tsënöqa kanqa ‘Diospita trönun shamuptinmi’, juk parlakïchöqa Jehovämi tsë gobiernuta patsätsishqa. Jinamampis, tsë gobiernuqa manam ushakanqatsu. ¿Manaku kushishqa sientikunki Jehovä churanqan Mandakoqta cäsukurnin?

MANDAKOQMI ESPÄDANTA TSËQLLANMAN WARKUN

9, 10. a) ¿Imëtaq Cristu espädanta tseqllanman warkurqan, y imapaqtaq utilisarqan? b) ¿Imanötaq Cristu shamoq tiempuchö espädanta utilisanqa?

9 (Leyi Salmu 45:3 *.) Jehoväqa Mandakoqnintam espädanta tseqllanman warkunampaq mandan. Tsënöpam, mandarqan autoridänimpa contran llapan këkaqkunata castiganampaq (Sal. 110:2). Cristuta guërrachö pipis mana ganëta puëdiptinmi, “poderösu” nir reqiyan. 1914 watam tseqllanman espädanta warkurqan Satanastawan demoniunkunata ciëlupita Patsaman qarpamunampaq (Apoc. 12:7-9).

10 Tsëqa qallananllam karqan, porqui kë Mandakoqqa ‘yapepis contrancunata bensinanran’ karqan (Apoc. 6:2). ¿Imanöraq tsëta ruranqa? Satanaspa makinchö këkaq mundutam ushakäratsinqa, y Satanastawan demoniunkunatam nunakunapita paqwë rakirinqa. Puntataqa Jatungarë Babilonia o llapan mana alli religionkunam chipyëpa ushakäyanqa. Tsëpaqqa, Jehovä utilisanqa Patsachö llapan mandakoqkunatam (Apoc. 17:16, 17). Tsëpitanam, Mandakoq Cristuqa, Satanaspa makinchö këkaq mandakoqkunata ushakäratsinqa. “Wanwanyarëkaq uchkupa angelnin” nirpis Cristutaqa reqiyanmi, pëmi wanwanyarëkaq uchkuman Satanastawan demoniunkunata jitarpur guërrata paqwë ganarinqa (Apoc. 9:1; 9:11, NM; 20:1-3). Këkuna imanö pasakunampaq kaqta Salmu librupa 45 kaq capïtulun willakunqanta rikärishun.

‘RASUMPA KAQRËKURMI’ MANDAKOQQA CAWALLUNTA MONTAN

11. ¿Ima ninantaq “rasumpa kaqrëkur” Cristu cawallunta montan ninan?

11 (Leyi Salmu 45:4 *.) Kë Mandakoqqa manam atska sitiukunata o markakunata dominanampaqtsu guërrata ruran, tsëpa rantinqa cawalluntam montan “rasumpa kaqrëkur y humildärëkur y alli rurë kaqrëkur” pelyanampaq. ¿Ima ninantaq “rasumpa kaqrëkur” montan ninan? Tsë ninanqa, Jehovälla Ciëluchö y Patsachö Autoridäyoq kanqanta defendim. Satanas rebelakurninmi, Jehoväpaq nirqan mana alli gobernanti kanqanta. Tsëpita patsëmi, demoniukuna y nunakuna tsënö kanqanta tumpayashqa. Peru chäramushqam höra Dios akranqan Mandakoq, Ciëluchö y Patsachö Autoridäyoq Jehovälla kanqanta rikätsikunampaq.

12. ¿Ima ninantaq “humildärëkur” Cristu cawallunta montan ninan?

12 Jina Mandakoqqa cawallunta montan ‘humildärëkurmi’. Diospa japallan Tsurin karpis, pëqa humildim karqan y Teytatam llapanchö wiyakurqan, tsëmi juk alli ejemplu noqantsikpaq (Is. 50:4, 5; Juan 5:19). Kë Mandakoqpa sirweqninkunaqa ejempluntam qatiyanman y humildäwanmi  Jehoväpa autoridäninta cäsukuyänan. Tsënö ruraqkunallam Dios awnikunqan mushoq Patsaman yëkuyanqa (Zac. 14:16, 17).

13. ¿Ima ninantaq Cristu “alli rurë kaqrëkur” cawallunta montan ninan?

13 Jinamampis, Cristuqa cawallunta montan ‘alli rurë kaq rëkurmi’. Kë Mandakoqqa, Dios ima allita o mana allita rikanqantam defendin (Rom. 3:21; Deut. 32:4). Jesucristupaqmi profëta Isaïasqa kënö nirqan: “Alli rurë kanampaqmi juk mandakoq gobernanqa” (Is. 32:1). Jesuspa gobiernunqa “mushoq sielutam” y “mushoq patsatam” apamunqa, tsëchöqa “allicunata rurarllanam, nunacuna cawayanqa” (2 Pëd. 3:13). Tsë ninanqa, mushoq Patsachö kawakoqkunaqa Diospa mandakïnintam cäsukuyanqa (Is. 11:1-5).

MANDAKOQQA ‘JATUN MANTSAKËPAQ KAQKUNATAM’ RURAN

14. ¿Ima ‘jatun mantsakëpaq kaqkunataraq’ Cristu ruranqa derëcha kaq makinwan? (Rikäri kë yachatsikïpa qallananchö këkaq dibüjuta.)

14 Mandakoqqa cawallun montashqa ëwëkarmi tseqllanchö espädanta apan (Sal. 45:3). Peru tiempum chärin espädanta jorqarir derëcha kaq makinwan utilisänampaq. Salmistam willakurqan, ‘jatun mantsakëpaq kaqkunata’ derëcha makinwan ruranampaq (Sal. 45:4). Armagedonchö Diospa contran këkaqkunata ushakätsirmi Jesucristuqa ‘jatun mantsakëpaq’ cösaskunata ruranqa. Manam alleqllaqa musyantsiktsu Satanaspa makinchö këkaq munduta imanö ushakätsinampaq kaqta, peru Diospa willakïninkunata mana cäsukoqkuna y Mandakoqpa autoridäninta mana respetaqkunaqa paqwëmi espantakur mantsakäyanqa (Sal. 2:11, 12). Ushanan witsankunapaq Jesus parlarmi kënö nirqan: “Tsenam nunacuna mantsaquewan desmayariyanqa que patsa ushacänanta pensarnin; porqui llapan sielucho quecaqcunam cuyucurenqa. Tse öram llapan nunacuna ricayanqa Diospita Shamushqa Nunata pucutecho intino chipapäquicar, llapan puedeq queninwan shamicaqta” (Lüc. 21:26, 27).

15, 16. Cristu nacionkunata ushakätsiptin, ¿pikunayantaq tröpanchö këkäyanqa?

15 Diospa juiciunta ruranampaq Cristu “llapan puedeq queninwan” shamunampaq kaqta willakurmi, apostul Juan kënö nirqan: ‘Riquecorqä sielu quicharëcaqtam. Tsechomi quecarqan yulaq cawallun montashqa. Tse montaraqpa jutinmi carqan “Parlanqanmanno llapantapis Cumpleq”, porqui pëqa mana pimanpis qaqärishpam jusganqa, y enemiguncunata ushacätsenqa. Sielupitam qatiyämorqan yulaq cawalluncuna montashqa tröpakuna. Ropancunanäqa linu finupitam carqan, y yulaq pürum chipapäquicarqan. Y shiminpitanam juc espada ishcan ladupa afilashqa yarqamorqan, jinantin nasioncho nunacunata castigananpaq, y fierupita baranwanmi mandanqa. Imeca ubaspa yacunta qaptseq cuentam mana alli ruraqcunata castiganqa. Tsenoqa rureconqa allapa puedeq Diospa feyupa piñaquininrecurmi’ (Apoc. 19:11, 14, 15).

16 ¿Pikunataq kayan Cristuwan guërraman ëwaq tröpakuna? Tseqllanman espädanta warkurir Satanastawan demoniunkunata ciëlupita qarpamuptinmi, ‘angelninkunapis’ yanapayarqan. (Apoc. 12:7-9). Tsëmi musyatsimantsik Armagedonchö guërrata ruranampaq Cristupa tröpankunaqa angelkuna kayanqanta. Jinamampis, Jesusqa ciëlupaq kaq akrashqakunatam kënö nirqan: ‘Benseq caqta, y wanushqanyaq munashqäta ruraqcunataqa, churashaq llapan nasioncunapa mandacoqnin cananpaqmi. Imanomi Papänï qomashqa poderta mandacunäpaq, tsenomi noqapis fierupita rurashqa barequicuna qoyashqequi, tsewan mandacuyänequipaq. Tsemi mana alli ruraq nunacunata mitupita rurashqa mancatano shalluriyanqui’. (Apoc. 2:26, 27). Awmi, ciëlupaq akrashqakunapis Cristupa tröpankunachömi këkäyanqa, tsë tiempupaqqa ciëluchönam kayanqa. Cristuwanmi këkäyanqa  ‘jatun mantsakëpaq kaqkunata’ rurar nacionkunata ushakätsiptin.

MANDAKOQQA PAQWËMI VENCIRIN

17. a) ¿Imatataq rikätsikun Cristu yulaq cawalluta montashqa ëwanqanqa? b) ¿Imatataq rikätsikun espädawan flëchakunan arcu?

17 (Leyi Salmu 45:5 *.) Apocalipsis 6:2 textum kënö nin: “Riquecorqä juc yulaq cawallu yarqaramoqta. Tse cawalluta montaraqqa tsararëcarqan flechacunan arcutam. Bensicoq queninpitam coronata chasquirerqan, y listum quecarqan yapepis contrancunata bensirinanpaq”. Kë textu ninqannöpis, Mandakoqqa yulaq cawalluta montashqam ëwan, tsëqa rikätsikun, tsë guërra Jehoväpa rikënimpaq limpiu y allilla kanqantam. Jina espädawan flëchakunan arcuqa rikätsikun, chikeqninkunata Cristu ushakätsinampaq imëkata utilisänampaq kaqtam (Apoc. 6:2; 19:11).

Patsata limpiayänampaqmi pichaqcunata qayayämunqa (Rikäri 18 kaq pärrafuta)

18. ¿Imanöraq flëchan puntash kanqanta Mandakoq rikätsikunqa?

18 Salmistaqa willakurqan Mandakoqpa flëchankuna puntash karnin, chikeqninkunapa shonqunyaq chänampaq kaqtam, y tsënöpa ushakätsinampaq kaqta. Jeremïasmi tsëpaq parlar, “tsë junaq Jehovä wanutsinqan nunakunaqa kayanqa patsapa juk kuchumpita hasta juknin kuchunyaqmi” nir willakurqan (Jer. 25:33). Y apostul Juanpis kënö nirmi willakurqan: “Riquecorqä juc anjelta intipa janancho shëcaqta. Tse anjelmi bolepa pureq llapan pichaqcunata qaparipa queno nishpa qayarqan: ‘Llapequi ellucayämï, Dios alistashqan banquetita micuyänequipaq. ¡Micuyanqui reycunapa etsancunatam, soldaducunapa mandaqnincunapatam y lisu nunacunapa etsancunatam, cawallucunapata y montaraqnin nunacunapa etsancunatam! Tsenollam micuyanqui imana caqlaya nunacunapa etsancunata, sirwicoq esclabucunapata o mana sirwipacoqcunapatapis, jatunpatapis ichicpatapis” (Apoc. 19:17, 18).

19. ¿Imanöraq vencinqanyaq Cristu sïguinqa?

19 Satanaspa makinchö këkaq munduta ushakäratsirmi, Mandakoq Jesucristuqa ‘hasta vencinqanyaqraq’ sïguinqa (Sal. 45:4). Wanwanyarëkaq uchkuchö waranqa watapa Satanaswan demoniunkuna kayänampaq qarpurmi, Cristuqa paqwë vencirinqa (Apoc. 20:2, 3). Wanushqa cuenta karninmi, Diabluwan angelninkunaqa ni imata rurëta puëdiyanqatsu. Tsëmi, Patsachö kawaqkunaqa, Satanaspita librakäriyanqa y venceq Mandakoqninkunata llapanchö wiyakïta puëdiyanqa. Peru entëru Patsa shumaq paraïsuman manaraq tikraptinmi, juk mas pasakuptin Mandakoqwan y ciëlupaq akrashqakunawan juntu kushikuyanqa. Qateqnin yachatsikïchömi rikäshun tsë kushikï imapita kanqanta.

^ par. 3 Salmu 45:1: “Shonqömi kushikur tïpulyan, shumaq palabrakunata yarparar. ‘Rurënïkunaqa juk mandakoqrëkurmi’ nikämi. Alleq qellqaq nunanömi shumaq parlashaq”.

^ par. 5 Salmu 45:2: “Qamqa llapan nunakunapitapis mas kuyëllapaqmi kanki. Alläpa shumaq parlaqmi kanki. Tsëmi Diosqa imëyaqpis bendicishurqonki”.

^ par. 7 Salmu 45:6, 7: “Diospita tronïki shamuptinmi, imëkamayaqpis gobernanki, qamqa llapantapis allillam värëkiwan gobernanki. Alli kaq rurëtam kuyarqunki y mana alli kaq rurëtam chikirqunki. Tsëmi Diosnikiqa yanaqikikunapitapis shumaq pukutaq aceitiwan akrashurqunki”.

^ par. 9 Salmu 45:3: “Poderösu mandakoq, espädëkita tseqllëkiman warkurkï respetashqa kënikiwan y gloriëkiwan”.

^ par. 11 Salmu 45:4: “Y gloriëkichö puntaman ëwë hasta vencinqëkiyaq; sillashqachö montë rasumpa kaqrëkur y humildärëkur y alli ruraq kaqrëkur. Y jatun mantsakëpaq kaqkunataqa alleqmi derëcha makikiwan ruranki”.

^ par. 17 Salmu 45:5: “Flëchëkikuna puntash kaptinmi —llapan markakuna ushakashqa kayanqa— chikishoqnikikunapa shonqunkunayaq chärinqa”.