“¡Allapa cushiquiwan alabecushun Diosta! Porqui chäramushqanam Achcaspa casaquinin öra.” (APOC. 19:7

1, 2. a) ¿Pipa casakïnintaq ciëluchö kaqkunata kushitsinqa? b) ¿Ima tapukïkunapitataq yachakushun?

CASAKÏ junaqpaqqa imëpis tiempuwanran alistapakuyan. Peru kananqa parlarishun ishkë waranqa watapana alistashqa Mandakoqpa casakïnin junaqpaq. Ichik tiempullanam pishin noviawan noviu juntakäyänampaq. Ichikllachönam Mandakoqpa palaciunchö mëtsikaq kënö nir cantayanqa: “¡Alabecushun Diosta! Porqui cananqa pemi puedeq queninwan mandamarnintsic qallarcun. ¡Allapa cushiquiwan alabecushun Diosta! Porqui chäramushqanam Achcaspa casaquinin öra; y nobianpis alistacushqanam shuyarëcan” (Apoc. 19:6, 7).

2 Ciëluchö kaqkunata casakïninwan kushitseq ‘Achcasqa’, Jesucristum (Juan 1:29). ¿Imanö vistishqataq casakïninman ëwan? ¿Pitaq novian? ¿Imanötaq novia alistakïkashqa tsë junaqpaq? ¿Imëtaq tsë casakï junaq kanqa? Musyantsikmi tsë casakïqa ciëluchö kaqkunata kushitsinampaq kaqta, peru ¿kë Patsachö imëyaqpis kawakïta shuyaraqkunapis kushikuyanqatsuraq? Kë tapukïkunapa respuestantaqa yachakïtam munantsik, tsëmi Salmu librupa 45 kaq capïtulunta yachakurnin sïguishun.

 SHUMAQ PUKUTAQ RÖPAKUNA

3, 4. a) ¿Imanö röpatataq casakïnimpaq Noviu vistikun, y imanirtaq kushikun? b) ¿Pikunataq kayan Noviuwan juntu kushikoq ‘reyna’ y ‘reykunapa warmi wamrankuna’?

3 (Leyi Salmu 45:8, 9 *.) Noviu Jesucristuqa shumaq röpatam casakïnimpaq vistikun. Tsë junaq alläpa precisaq kaptinmi, Israelchö reyta akrayänampaq utilisäyanqan mirra y casia nishqa “mas alli kaq perfumikunawan”, röpampis perfumashqa (Ex. 30:23-25).

4 Casakunan junaq chämunqanmannömi, palaciunchö müsicata tocayanqanqa Noviuta kushitsin. Tsë pasakunqampitaqa, ‘reynapis’ kushikunmi, tsëqa Diospa ciëluchö këkaq markanmi, jina tsëchömi këkan “reykunapa warmi wamrankunapis”, pëkunaqa angelkunam kayan. Alläpa shumaqmi ciëluchö kënö neqta wiyëqa: “¡Allapa cushiquiwan alabecushun Diosta! Porqui chäramushqanam Achcaspa casaquinin öra”.

CASAKUNAMPAQ NOVIA ALISTAKUN

5. ¿Pitaq Achkaspa warmin?

5 (Leyi Salmu 45:10, 11 *.) Jesucristu noviu kanqantaqa musyantsiknam, peru ¿pitaq noviaqa? Manam rasumpa warmitsu, sinöqa 144.000 ciëlupaq akrashqa cristiänukunam kayan, y Jesucristupa mandädunchömi këkäyan (leyi Efesius 5:23, 24). Pëkunaqa Cristuwan juntum mandakayämunqa (Lüc. 12:32). Kë cristiänukunaqa, ‘mecho tsechopis Achcastam qatiyan’ (Apoc. 14:1-4). Achkaspa warminman tikrarmi ciëluchö pëwan juntu kawayanqa (Apoc. 21:9; Juan 14:2, 3).

6. a) ¿Imanirtaq ciëlupaq akrashqakunata ‘mandakoqpa warmi wamran’ nir qayayan? b) ¿Imanirtaq ciëlupaq akrashqakunata ‘markëkita amana yarpënatsu’ niyan?

6 Noviaqa ‘mandakoqpa warmi wamran’ karmi alläpa shumaq vistishqa ëwan (Sal. 45:13). ¿Pitaq tsë ‘mandakoqqa’? Jehovämi, porqui ciëlupaq akrashqa cristiänukunatam ‘wamrankunatanö’ chaskin (Rom. 8:15-17). Ciëluchö novia këman tikrayänan kaptinmi, kënö mandakïta chaskiyan: “Markëkitawan kastëkikunapa wayinman amana yarpënatsu”, sinöqa, “sielucho caqcunapaq imepis yarparäquicayë” (Col. 3:1-4).

7. a) ¿Imanötaq Cristu novianta alistëkashqa, y noviampa imanö kënintataq kuyan? b) ¿Imanötaq novia Noviunta rikan?

7 Unëpitanam Jesusqa ciëluchö casakuyänampaq novianta alistëkashqa. Apostul Pablum kënö nirqan: ‘Jesucristupis peman creyicoqcunata cuyarninmi pecunarecur wanurqan, creyicoqcuna pellapaqna canantsicpaq y yachatsiquininwan yacuwan paqareq cuenta limpiaramänapaq. Tsenopa imeca mana manchayoq, y mana qenticashqa ropayoqnona nopancho limpiu shonquna, pe munashqanllatana rurar canantsicpaq’ (Efes. 5:25-27). Jina Corintu cristiänukunatapis Pabluqa kënömi nirqan: ‘Nogaga feyupam yarpachacü Jesucristullaman criyicuyänayquita munar. Tsaynam Jesucristullamanna yarparäyänayqui juc jipash jövinwan reginacuycur parlashga car payllapäna yarparagnö’ (2 Cor. 11:2, MTCS). Mandakoq Jesucristuqa, Diospa kaqchö “kuyëllapaq” novian kanqantam precisaqpaq churan. Y novianam señornintanö rikarnin shamoq tiempuchö qowan kanampaq kaqta musyarnin “respëtuwan” rikan.

MANDAKOQ KAQMAN NOVIATA APAYAN

8. ¿Imanirtaq novia alläpa “kuyëllapaq” kanqanta nintsik?

8 (Leyi Salmu 45:13, 14a *.) Noviaqa  Jesuswan casakunampaqmi alläpa “kuyëllapaq” këkan. Apocalipsis 21:2 textuchömi ciëluchö këkaq Mushoq Jerusalen markatawan igualatsin, y “casacunanpaq shumaq bistishqa shipash nobiunta shuyarëcaqno” këkanqantam nin. Kë markaqa “Diospa chipapëninwanmi imeca jaspi rumino cuyellapaq chipapäquicarqan” (Apoc. 21:10, 11). Kë marka alläpa kuyëllapaq kanqantaqa Apocalipsis librum willakun (Apoc. 21:18-21). Tsëchi salmistapis novia alläpa “kuyëllapaq” kanqanta nin. ¿Manaku shuyarantsik ciëluchö tsënö casakï kananta?

9. a) ¿Pimantaq noviata apayan? b) ¿Imanö vistishqataq novia këkan?

9 Noviataqa Diospa Gobiernunchö Mandakoq noviumanmi apayan. Pëmi, novianta ‘yachatsiquininwan yacuwan paqareq cuenta limpiarishqa’, tsënöpam “mana manchayoq” këkan (Efes. 5:26, 27). Noviaqa alläpa shumaq vistishqam këkan, ‘öruwan shumaq bordashqa röpayoqtam mandakoq kaqman apayan’. Achkaspa casakïnimpaqqa, “linupita yulaq püru chipapäquicaq alli ropata yacacunanpaq[mi] Teyta Dios alistashqa. Tse finu telapita rurashga alli ropaqa Dios Yayaman creyicoqcuna allillata rurayanqanmi” (Apoc. 19:8).

“CHÄRAMUSHQANAM ACHCASPA CASAQUININ ÖRA”

10. ¿Imëtaq Achkas casakunqa?

10 (Leyi Apocalipsis 19:7.) ¿Imëtaq Achkas casakunqa? Casakunampaq ‘nobian alistacushqana’ kaptimpis, qateqnin kaq versïculukunaqa manam casakï hörapaqtsu parlan, sinöqa, jatun sufrimientupa ushanan witsankunapaqmi (Apoc. 19:11-21). Tsë ninanqa, ¿Mandakoq Jesucristu guërrachö manaraq vencirtsuraq casakunqa? Manam. Apocalipsis libruchöqa, pasakunampaq kaqkuna manam ordenchötsu qellqarëkan. Salmu librupa 45 kaq capïtulunqa willakun chikeqninkunata vencirir-raq, Mandakoq Jesucristu casakunampaq kaqtam (Sal. 45:3, 4).

11. ¿Ima ordinchötaq chikeqninkunata Cristu vencinqa?

11 Pasakunampaq kaqkunaqa kë ordenchömi pasakunqa. Puntataqa, ‘lluta pulicoq warmi’, Jatun Garë Babilonia o llapan mana alli religionkunam ushakanqa (Apoc. 17:1, 5, 16, 17; 19:1, 2). Tsëpitanam, ‘Llapan Kallpayoq Diosnintsikpa jatun guerran’ Armagedonchö, Satanaspa mundun quedaqta Cristu ushakäratsinqa (Apoc. 16:14-16, NM; 19:19-21). Y ushanampaqnam, Satanastawan demoniunkunata wanwanyarëkaq uchkuman qarpurkunqa, tsënöpa imëka wanushqa cuenta karnin imatapis manana rurayänampaq, tsënöpam Cristuqa vencirinqa (Apoc. 20:1-3).

12, 13. a) ¿Imëtaq Achkaspa casakïnin junaq kanqa? b) ¿Pikunataq kushikuyanqa Achkas ciëluchö casakuptin?

12 Ciëlupaq akrashqakunaqa, Cristu këkämunqan witsankunam Patsachö kawëninkuna ushanqanmannö ciëluchö kawariyanqa. Jatun Garë Babilonia ushakäriptin juk tiempu pasariptinmi, Jesusqa 144.000 ciëlupaq akrashqakunapita Patsachö quedaqkunata, pëwan kayänampaq llapanta ciëluman juntarinqa (1 Tes. 4:16, 17). Tsëtaqa ruranqa manaraq Armagedon guërra qallaptinmi. Tsë guërra ushariptinnam, Achkas casakurinqa. ¡Tsëqa alläpa shumaqchi kanqa! Apocalipsis 19:9 versïculum, “cushicuyätsun Achcaspa casaquininman combidashqacuna” nin. Awmi, 144.000 ciëlupaq akrashqa cristiänukunaqa alläpam kushikuyanqa. Noviu, Gobiernunchö mësampita mikïkaq y upïkaq cuenta pëwan gobernayänampaq lädunchö këkäyanqampitam alläpa kushikunqa (Lüc. 22:18, 28-30). Peru manam noviuwan noviallatsu Achkaspa casakïnin junaqchö kushikuyanqa.

13 Puntata ninqantsiknöpis, mëtsikaq angelkunam ciëluchö kushishqa kënö nir cantayanqa: “¡Allapa cushiquiwan alabecushun Diosta! Porqui chäramushqanam Achcaspa casaquinin öra; y nobianpis alistacushqanam  shuyarëcan” (Apoc. 19:6, 7). Peru Jehoväpa Patsachö këkaq sirweqninkunaqa, ¿kushikuyanqatsuraq?

“KUSHIKÏWANMI APAMUSHQA KAYANQA”

14. ¿Pikunataq Salmu librupa 45 kaq capïtulunchö ninqan noviapa ‘yanaqin doncëllakuna’ kayan?

14 (Leyi Salmu 45:12, 14b, 15 *.) Profëta Zacarïasmi willakurqan, ushanan junaqkunachö entëru nacionkunapita nunakuna agradecikurnin, ciëlupaq akrashqakunaman juntakäyänampaq kaqta. Pëmi kënö qellqarqan: “Tsë junaqkunachömi tukï idiömata parlaq tukï nacionkunapita chunka nunakuna tsaripakuyanqa, awmi, rasumpam tsaripakuyanqa juk judïu nunapa faldampita, kënömi niyanqa: ‘Qamkunawanmi ëwayäshaq, porqui qamkunawan Dios këkanqantam wiyayarqö’” (Zac. 8:23). Salmu 45:12 textuchömi, ‘chunka nunakunata’ ‘Tïrupa wamrankunatawan’ y ‘rïkun kaq nunakunatawan’ igualatsin. Pëkunam, ciëlupaq akrashqakunaman ëwayan yanapakïta munar y Diosta sirwiyänampaq yanapakïta ashirnin. 1935 watapita patsëmi, millonyëpayan nunakuna jaqiyashqa ciëlupaq akrashqakuna ‘alli kaq rurëman apayänanta’ (Dan. 12:3). Ciëlupaq akrashqakunapa yanaqinkunaqa kawëninkunatam limpiuyätsiyashqa, tsënöpam Diospa kaqchö limpiuyäyashqa. Jehoväta sirwiyänampaq awnikushqa karmi y Mandakoq Jesucristullapaq kayanqanrëkurmi, pëkunaqa noviapa ‘yanaqin doncëllakuna’ kayan.

15. ¿Imanötaq ‘yanaqin doncëllakuna’ Patsachö quedaq ciëlupaq akrashqakunata yanapayashqa?

 15 Patsachö quedaq ciëlupaq akrashqakunaqa alläpam agradecikuyan ‘yanaqin doncëllakuna’ entëru Patsachö Diospa ‘alli willaquininta’ yachatsikuyaptin (Mat. 24:14). Manam ‘santo espïrituwan noviallatsu, imëpis nikäyan: “¡Shamï!”’, sinöqa wiyaqkunapis “¡shamï!” niyanmi (Apoc. 22:17, NM). Awmi, ‘juk kaq üshakunaqa’ ciëlupaq akrashqakunata “¡shamï!” neqta wiyarmi, entëru Patsachö kaqkunata jina tsënö nir invitakuyan (Juan 10:16, NM).

16. ¿Imatataq juk kaq üshakunata Jehovä permitishqa?

16 Patsachö quedaq ciëlupaq akrashqakunaqa ‘juk kaq üshakunata’ kuyayanmi, y kushikuyanmi noviupa Teytan Jehovä, Achkaspa casakïnimpita pëkunapis kushikuyänampaq permitinqanta musyarirnin. Noviapa ‘yanaqin doncëllakunaqa’ “kushikïwanmi apashqa kayanqa mandakoqpa palaciunman yëkunampaq”. Awmi, Patsachö imëyaqpis kawëta shuyaraq üshakunapis, ciëluchö Achkas casakuptinmi kushikuyanqa. Apocalipsis librum willakun, ‘yupetapis mana puedipaq’ nunakuna “tronucho tëcaq Diospa y Achcaspa nopancho” shëkäyaqta. Pëkunam, Jehoväta sirwiyan Patsa templunchö (Apoc. 7:9, 15).

Achkaspa casakïninmi noviapa ‘yanaqin doncëllakunata’ alläpa kushitsin (Rikäri 16 kaq pärrafuta)

“UNË AWILÏKIKUNAPA RANTINMI WAMRËKIKUNA KANQA”

17, 18. a) ¿Ima allikunataraq apamunqa Achkaspa casakïnin? b) ¿Pikunapa teytan këmantaq chanqa Cristu, Waranqa Watapa Mandakurnin?

17 (Leyi Salmu 45:16 *.) Cristupa noviampa ‘yanaqin doncëllakunaqa’ masraqmi kushikuyanqa tsë casakï, mushoq Patsaman imëkata apamunampaq kaqta musyarnin. Noviu Mandakoq Jesucristuqa, Patsachö imëkakunatam ruranqa y wanushqa ‘unë awilukunatapis’ kawaritsimunqam, pëkunam Patsachö këkaq ‘wamrankuna’ kayanqa (Juan 5:25-29; Heb. 11:35). “Pëkunapitam entëru patsachö principikunata” churanqa. Jina pëkunachömi këkäyanqa Diosta mana jaqita kanan witsan sirweq wakin anciänukunapis, mushoq Patsachö asuntukunata dirigiyänampaq (Is. 32:1).

18 Waranqa watapa Mandakurninmi Cristuqa llapan nunakunapa teytan këman chanqa. Porqui Patsachö kawaqkunaqa, Jesus wanunqanman markäkuyanqanrëkurmi imëyaqpis kawakïta chaskiyanqa (Juan 3:16). Tsënöpam, “Imëyaqpis Kawatsikoq Teyta[nkunaman]” tikranqa (Is. 9:6, 7).

‘JUTINTA PARLANAPAQMI’ LISTU KËKANTSIK

19, 20. ¿Imanötaq kanan witsan llapan cristiänukunata Salmu 45 textu ninqan yanapan?

19 (Leyi Salmu 45:1, 17 *.) Rikanqantsiknömi, Salmu 45 textupa willakïninqa llapan cristiänukunapaq alläpa precisan. Patsachö quedaq ciëlupaq akrashqakunaqa, ichikllachöna wawqinkunawan y noviunwan ciëluchö juntakäyänampaq kaqta musyarmi kushikuyan. Pëkunawan juntu trabajayanqampita agradecikurmi, juk kaq üshakunaqa Mandakoq Jesucristupa mandädunchö këta mas munayan. Casakurirmi, Cristuwan mandakoq yanaqinkunaqa llapan nunakunata mana imëpis ushakaq bendicionkunata qoyanqa (Apoc. 7:17; 21:1-4).

20 Shamoq tiempuchö Diospa Gobiernunchö Mandakoqrëkur ‘shumaq palabrakuna’ cumplikaqta rikarqa, ¿manaku ‘jutinta parlarnin’ llapan nunakunata reqitsita munantsik? Tsënö karqan, Mandakoqta ‘imëkamayaqpis alabëkäshun’.

^ par. 3 Salmu 45:8, 9: “Mirrawan palo de aloe y casia nishqan alli kaq perfumikunawanmi röpëkipis alli pukutëkan, kuyëllapaq marfilwan adornashqa palaciuchömi kushitsiyäshurqonki arpakunata tukapäyäshurniki. Reykunapa warmi wamrankunam këkäyan kuyëllapaq warmikunapa chowpinchö. Shumaq ofir öruwan adornashqa reynaqa, jamakunëkipa derëcha kaq läduchömi këkan”.

^ par. 5 Salmu 45:10, 11: “Wiyamë wamrallä, y ninqäkunata wiyakï, markëkitawan kastëkikunapa wayinman amana yarpënatsu. Y kuyëllapaq kanqëkitam mandakoqqa munarinqa, pëqa señornikim, tsëmi respëtuwan cäsukï”.

^ par. 8 Salmu 45:13, 14a: “Mandakoqpa warmi wamranmi kuyëllapaq këkan palaciuchö; röpampis öruwan bordashqam. shumaq bordashqa röpayoqmi mandakoq kaqman apashqa kanqa”.

^ par. 14 Salmu 45:12, 14b, 15: “Tïrupa wamrankunam qarëninkunawan shayämunqa. . . rïkun kaq nunakunapis yanapanëkipaqmi rogakuyäshunki. [. . .] Yanaqaqnin doncëllakunapis qam kaqmanmi shamïkäyan. Kushikïwanmi apamushqa kayanqa mandakoqpa palaciunman yëkuyänampaq”.

^ par. 17 Salmu 45:16: “Unë awilïkikunapa rantinmi wamrëkikuna kanqa, pëkunapitam entëru patsachö principikunata churanki”.

^ par. 19 Salmu 45:1, 17: “Shonqömi kushikur tïpulyan, shumaq palabrakunata yarparar. ‘Rurënïkunaqa juk mandakoqrëkurmi’ nikämi. Alleq qellqaq nunanömi shumaq parlashaq. [. . .] Noqam jutikita parlashaq shamoq tiempuchö nunakunapaq, tsënöpam llapan nunakuna imëkamayaqpis alabayäshunki”.