Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Enëru de 2014

Pasaq 100 watakunachö Diospa Gobiernun ruranqankuna

Pasaq 100 watakunachö Diospa Gobiernun ruranqankuna

“Alläpa shumag jatun mantsacaypagmi llapan imayca rurangayqui [. . .] imayyagpis mana ushacag Rey.” (APOC. 15:3, NTCN)

1, 2. a) ¿Imatataq Diospa Gobiernun ruranqa? b) ¿Imanirtaq següru këkantsik tsë Gobiernu chämunampaq kaqta?

CAPERNAUM markapa amänun jirkachö yachatsikïkarmi, “mandacuy Reynoyqui nogacunaman shamutsun” nir mañakuyänampaq, 31 watachö qateqninkunata Jesus yachatsirqan (Mat. 6:10, NTCN). Kanan witsanqa mëtsika nunakunam tsë gobiernu shamunampaq kaqman markäkuyantsu (yärakuyantsu). Peru noqantsikqa tsë mañakï contestashqa kanampaq kaqmanmi markäkuntsik.

2 Gobiernuntam Jehoväqa utilisanqa ciëluchö y Patsachö kaq sirweqninkunata juk familiatanölla juntanampaq. Y tsëqa mana faltëtam cumplikanqa (Is. 55:10, 11). Pasaq 100 watakunachö imëkakuna pasakunqanmi, alleq rikätsikun Jehovä Mandakoq këman chanqanta. Y millonyëpayan sirweqninkunapaqmi mana imawampis igualaq rurëkunata rurëkan (Zac. 14:9; Apoc. 15:3). Tsënö kaptimpis, Jehovä mandakoq këman chanqanqa manam igualtsu, “Reynoyqui nogacunaman shamutsun” nir mañakunqantsikwan. ¿Imachötaq jukläya kayan, y imanötaq tsëta musyanqantsik yanapamantsik?

JEHOVÄ CHURANQAN MANDAKOQ IMËKATA RURAN

3. a) ¿Imë y mëchötaq Jesus Mandakur qallarqan? b) ¿Imanöraq musyatsikunkiman 1914 watachö Diospa Gobiernun patsakanqanta? (Rikäri qateqnin kaq päginapa ura kuchunchö punta kaq willakïta.)

3 Daniel qellqanqan profecïam, 1880 witsankuna mas alli entiendikärirqan.  Pëmi kënö nir willakurqan: “Tsë gobiernukunapa tiempunchömi, ciëluchö këkaq Dios, mana ushakaq gobiernuta churanqa” (Dan. 2:44). Mëtsika watakunapam Bibliata Estudiaqkunaqa 1914 watachö juk precisaq pasakunampaq kaqta niyarqan. Tsë witsanchö nunakunaqa mana alläpa yarpachakushpam kawakuyaq. Juk qellqaq nunapis kënömi nin: “1914 witsanchö kawaqkunaqa shamoq tiempukuna alli kanampaq kaqtam shuyaräyaq”. Peru tsë watallachömi Punta kaq Jatun Guërra qallëkurqan. ¡Biblia ninqan profecïakunam cumplikärirqan! Patsa kuyunqan, mallaqë y imëka qeshyakuna kanqanmi rikätsikurqan, tsë wata Jesucristu Diospa Gobiernunchö mandakur qallëkunqanta. * Tsurinta Mandakunampaq churarmi, Jehoväqa juknöpana Mandakoq këman charqan.

4. a) ¿Imatataq Mandakoq këman chärirlla Jesus rurarqan? b) Tsëpitaqa, ¿pikunamantaq yarpachakur qallëkurqan?

4 Mandakoq këman chärirllam Jesuswan angelninkunaqa, Teytampa chikeqnin Satanastawan demoniunkunata, ciëlupita Patsaman qarparayämurqan. Tsërëkurmi ciëluchöqa kushikïna karqan y Patsachönam imëka mana allikuna qallarirqan (leyi Apocalipsis 12:7-9, 12). Tsëpitanam, Jesusqa Patsachö sirweqninkunaman yarpachakur qallëkurqan. ¿Imapaq? Limpiuyätsinampaq, yachatsinampaq y Diospa munëninta shumaq churanakushqa rurayänampaq. Rikärishun kë kimanchö Jesusta cäsukuyanqan imanö yanapamanqantsikta.

JESUS SIRWEQNINKUNATA LIMPIUYÄTSIN

5. ¿Imataq pasakurqan 1914 watapita 1919 wata qallanan killakunayaq?

5 Ciëlupita Satanasta y demoniukunata limpiariptinllam, Jehoväqa Patsachö sirweqninkuna imanö këkäyanqanta rikänampaq, y limpiuyätsinampaq Tsurinta mandarqan. Profëta Malaquïasqa tsëta igualatsirqan Diospa kaqchö limpu këwanmi (Mal. 3:1-3). Pasakunqankunam rikätsikun 1914 witsampita 1919 wata qallanan killakunayaq tsëta ruranqanta. * Jehoväpa familiampita kanapaqqa imëkachömi limpiu kanantsik (1 Pëd. 1:15, 16). Jina mana alli religionkunapita y polïtica asuntupitam libri kanantsik.

6. a) ¿Pikunapitataq chaskintsik imëka mikï cuenta Diospa yachatsikïninta? b) ¿Imanirtaq noqantsikpaq alläpa precisan?

6 Tsëpitanam Jesusqa Mandakoq këninta utilisarqan “llapanchö wiyakoq y yachëwan sirweqta” churanampaq. Pëkunam Jesuspa cuidädunchö këkaqkunata mikï cuentata Diospa yachatsikïninta qoyan (Mat. 24:45-47, NM; Juan 10:16). 1919 watapita patsëmi, ciëlupaq akrashqa kaqkunapita juk grüpu cristiänukuna, “wayinchö kaqkunata” mikïnin qarayänampaq chaskiyanqan encarguta cumplikäyashqa. Pëkunapita Diospa yachatsikïninta chaskinqantsikqa yanapamantsik markäkïnintsikta sinchiyätsinapaq y imëkachöpis limpiu këta procuranapaqmi, jina yachatsimantsik y yanapamantsikmi entëru Patsachö Diospita yachatsikunapaqpis. ¿Alleqku provechëkantsik imëka mikï cuenta Diospa yachatsikïninta?

JESUSMI SIRWEQNINKUNATA YACHATSIN ENTËRU PATSACHÖ YACHATSIKUYÄNAMPAQ

7. a) ¿Ima precisaq rurëtataq Jesus qallarqan Patsachö kanqan witsan? b) ¿Imëyaqtaq tsë rurë sïguinqa?

7 Patsachö yachatsikur qallanqan witsanmi, Jesus kënö nir willakurqan: ‘Que patsamanmi Dios cachamashqa, pepa mandaquininta nunacunata willanäpaq’ (Lüc. 4:43).  Y kima wata pullanmi tsëta rurarqan, jina qateqninkunatapis tsënölla rurayänampaqmi kënö nir mandarqan: “Ewarnin queno yachatsicuyanqui: ‘Diosnintsic mandacoq cananpaq tiempu chäramunnam’” (Mat. 10:7). Kawariramurnam, qateqninkunata ‘jinantin munduyaq’ alli willakïta chätsiyänampaq mandarqan (Hëch. 1:8). Nïkurnam, Patsapa ushënin chämunqanyaq pëkunata yanapanampaq awnirqan (Mat. 28:19, 20).

8. ¿Imanötaq Mandakoq Jesus, sirweqninkuna yachatsikuyänampaq juk asamblëachö kallpata qorqan?

8 Diospa Gobiernumpita ‘willaquitaqa’ 1919 watachömi juknöpana entiendiyarqan (Mat. 24:14). Jesusqa ciëluchö mandakïkarqannam, y wallkaqlla nunakunatam limpiuyätsirqan sirweqninkuna kayänampaq, y ninqanta kushishqa wiyakurmi, Diospa Gobiernun ciëluchö patsakashqana kanqanta entëru Patsachö yachatsikuyarqan (Hëch. 10:42). Tsërëkurmi, 1922 wata Cedar Point (Ohio, Estädus Unïdus) nishqan markachö atska nacionkunapaq asamblëa rurakanqanchö, cäsi 20.000 nunakunanö ëllukäyarqan. Mëraq kushikuyarqan wawqi Rutherford “El Reino” nishqan discursuchö kënö niptin: “¡Rikäyë, Mandakoqqa mandakïkämunnam! Qamkunam musyatsikoqninkuna kayanki. Tsënö kaptinqa, willakuyë, willakuyë, willakuyë Gobiernumpita y Mandakoqnimpita”. ¿Imatataq rurayarqan tsëta wiyaqkunaqa? Waränin junaqmi, asamblëata rurayanqan localpita 2.000 nunakuna 70 kilömetrutanö Diospita yachatsikoq yarquyarqan. Juk wawqim kënö nirqan: “Manam qonqashaqtsu Diospita yachatsikuyänäpaq niyämanqanta y tsëchö llapan këkaqkuna alläpa kushikuyanqanta”.

9, 10. a) ¿Ima yanapakïkunataq kan Diospita yachatsikoqkunapaq? b) ¿Imanötaq qamta yanapashurqunki Diospa markan patsätsinqan escuëlakuna?

9 Y 1922 watapaqqa 17.000 publicadorkunapitapis masmi 58 nacionkunachö kayarqan. Peru manam alleqllaqa yachatsikïta puëdiyarqantsu. Apostulkuna kawayanqan witsanqa imapita, imanö y mëchö yachatsikuyänampaqmi qateqninkunata Jesus yachatsirqan (Mat. 10:5-7; Lüc. 9:1-6; 10:1-11). Tsënöllam, kanan witsampis sirweqninkunata yachatsin y yanapan Diospita shumaq yachatsikuyänampaq (2 Tim. 3:17). Y tsëtaqa ruran congregacionwanmi. Juk yanapakïqa Yachatsikunapaq Diospa Escuëlanmi, tsëqa yanapan entëru Patsachö 111.000 congregacionchö këkaqkunatam. Kë escuëlachö yachakuyanqanmi cäsi 7 millonpitapis mas publicadorkunata yanapan tukïläya nunakunata Diospita yachatsiyänampaq (leyi 1 Corintius 9:20-23).

10 Jina kanmi escuëlakuna anciänukunapaq, precursorkunapaq, soltëru cristiänukunapaq, casädu cristiänukunapaq, Sucursalta Rikaqkunapaqwan warminkunapaq, Congregacionkunata Watukaqkunapaqwan  Warminkunapaq, y misionërukunapaqpis. * Casakushqakuna Bibliapita Yachakuyänampaq Escuëlaman ëwaqkunam agradecikur kënö niyarqan: “Tsëchö yachakuyanqämi yanapayämashqa Jehoväta mas kuyayänäpaq y wakinkunata mas alli yanapayänäpaq”.

11. ¿Imataq yanapashqa publicadorkuna Diospita yachatsikïta mana jaqiyänampaq?

11 Satanasqa Diospita yachatsikunapaq kallpachakunqantsiktam rikëkan, tsëmi imëkanöpa tïran yachatsikïta jaqirinantsikta. Peru manam puëdintsu. Porqui Jehovämi Tsurinta churashqa ‘autoridacunapa mandacoqnin cananpaq’ (Efes. 1:20-22). Jesusqa autoridänintam utilisan sirweqninkunata tsapänampaq y pushanampaq, tsënöpam yanapakun Teytampa munënin rurakänampaq. * Alli willakïkunataqa më tsëchömi yachatsikïkäyan, y alli shonquyoq nunakunam Jehoväpita yachakïkäyan. ¡Imanö shumaqmi tsë rurëchö yanapakïqa!

JESUSMI PATSÄTSIN SIRWEQNINKUNA MASTA RURAYÄNAMPAQ

12. ¿Ima cambiukunataq kashqa Diospa markanchö Gobiernun qallanqampita patsë?

12 Diospa Gobiernun 1914 watachö qallanqampita patsëmi, Jesusqa Diospa munëninta mas alli churanakushqa rurayänampaq sirweqninkunata yanapëkashqa (leyi Isaïas 60:17 *). 1919 watachömi Diospita yachatsikïta rikänampaq cada congregacionchö juk wawqita churayarqan. Y 1927 watachönam domingu junaqkuna wayin wayin yachatsikoq yarquyänampaq churakäyarqan patsätsiyarqan, y ¡mëraq kushikuyarqan 1931 watachö Jehoväpa testïgunkuna nishpa reqishqa kayänampaq kaqta musyarirnin! (Is. 43:10-12.) 1938 watapita patsëqa manam votacionpanatsu congregacionta rikaq wawqikunata akrayarqan. Tsëpita patsëqa congregacionchö yanapakuyänampaqqa Bibliachö ninqankunatam cumpliyänan karqan. Y 1972 watachönam congregacionta jukllaqlla rikänampa rantin, juk grüpu anciänukuna rikäyänampaq churayarqan. Anciänu o siervu ministerial kayänampaq Biblia ninqanta cumpleq cristiänukunatam, Diospa “üshancunata cuidaqno” yanapakuyänampaq niyarqan (1 Pëd. 5:2). 1976 watachönam, Jehoväpa Testïgunkunata Pushaqkuna joqta grüpuman rakikäyarqan entëru Patsachö Diospita yachatsikïta shumaq rikäyänampaq. Yachakunqantsiknömi, Jehovä churanqan Mandakoq Jesusqa, sirweqninkunata ichikllapa ichikllapa yanapëkashqa  Dios munanqannö shumaq churanakushqa imatapis rurayänampaq.

13. ¿Imanötaq qamta yanapashurqunki pasaq 100 watakunachö Dios Gobiernunwan ruranqan?

13 Pasaq 100 watakunachö Dios akranqan Mandakoq imëkata ruranqanman pensari. Juk grüpu nunakunatam limpiuyätsishqa Diospa jutinta apayänampaq. 239 nacionkunaman Diospa alli willakïninkuna chänampaqmi yanapakushqa. Jina atskaqtam yanapashqa Jehoväta reqiyänampaq. 7 millonpitapis mas sirweqkunatam juntashqa Teytampa munëninta kushishqa rurayänampaq (Sal. 110:3). Gobiernunwan Jehovä ruranqankunaqa manam imawampis igualantsu. ¡Maskunatapis ruranqaran!

DIOSPA GOBIERNUN APAMUNAMPAQ KAQ BENDICIONKUNA

14. a) ¿Imatataq mañakïkantsik “mandacuy Reynoyqui nogacunaman shamutsun” nirqa? b) ¿Imataq 2014 watapaq akrashqa textu kanqa, y imanirtaq tsëta akrayämushqa?

14 Mandakoq kanampaq 1914 watachö Tsurinta churanqanwanqa, manam “mandacuy Reynoyqui nogacunaman shamutsun” nishqam mañakïqa chipyëpa contestakarqantsu (Mat. 6:10, NTCN). Bibliachöqa willakurqan ‘chikeqninkunapa rurinchö’ Jesus mandakunampaq kaqtam (Sal. 110:2). Kanan witsan mandakoqkunaqa, Diospa Gobiernumpa contran y Satanaspa makinchömi këkäyan. “Mandacuy Reynoyqui nogacunaman shamutsun” nir mañakurninqa, akranqan Mandakoq y 144.000 pëwan gobernaqkuna kë patsachö mandakoqkunata y Diospa Gobiernumpa contran këkaqkunata ushakätsinampaqmi mañakïkantsik. Tsënöpam, “chipyëmi ushakätsinqa tsë llapan gobiernukunata” nir Daniel 2:44 textu ninqan cumplikärinqa (Apoc. 6:1, 2; 13:1-18; 19:11-21). Y tsë pasakunampaqqa ichikllanam pishin. Kë 2014 watachömi Diospa Gobiernun ciëluchö patsakanqampita 100 watakuna cumpliramun. ¡Tsëmi kë watapaq akrashqa textuqa “Mandacuy Reynoyqui nogacunaman shamutsun” nin! Këqa jorqakämushqa Mateu 6:10 (NTCN) textupitam.

2014 watapaq akrashqa textu: “Mandacuy Reynoyqui nogacunaman shamutsun.” (Mateu 6:10NTCN)

15, 16. a) ¿Imakunataq waranqa watakunapa Jesus mandakunqan witsanchö pasakunqa? b) ¿Imatataq mandakur usharir Jesus ruranqa? c) ¿Imanötaq llapan kamanqankunapaq Jehoväpa munënin cumplikärinqa?

15 Mandakoq Jesus Diospa chikeqninkunata Patsachö ushakäratsirmi, Satanastawan demoniunkunata waranqa watapa wanwanyarëkaq uchkuman jitarpunqa (Apoc. 20:1-3). Tsëta rurarirnam, Jesus nunakunarëkur wanunqanwan Adan ruranqan jutsapita libri quedariyänampaq nunakunata yanapanqa. Nïkurnam, mana yupëtapis puëdipaq nunakunata kawaritsimunqa y Jehoväta reqiyänampaqmi yanapanqa (Apoc. 20:12, 13). Entëru Patsam juk shumaq huertaman tikrarinqa, y Diosta llapan cäsukoqkunam jutsannaq këman chäyanqa.

16 Waranqa watapa Cristu mandakur ushariptinmi, Diospa munënin cumplikärinqa. Tsëpitanam Mandakoq këninta Teytanta entreguëkunqa (leyi 1 Corintius 15:24-28). Tsëpita patsëqa mananam Jehoväwan alli kayänampaq nunakuna juk yanapakoqta wanayanqanatsu. Ciëluchö y Patsachö Diosta llapan sirweqkunam Teytanwan juntu juk familianöllana kayanqa.

17. ¿Imata ruranapaqtaq decidïdu këkantsik?

17 Pasaq 100 watakuna imëka pasakunqankunam rikätsikun Jehovä mandakïkanqanta y kë Patsapaq munënin paqwë cumplikänampaq kaqta. Tsëmi mana jaqita Jehoväta sirwishun, y Gobiernumpita y Mandakoqnimpita willakushun. ¡Alläpam markäkuntsik “mandacuy Reynoyqui nogacunaman shamutsun” nir mañakunqantsikta ichikllachöna Jehovä contestamunampaq kaqta!

^ par. 5 Tsëpaq mas yachatsikïkunata, 2013 wata 15 de juliu killa Täpakoqpa 22 y 23 kaq päginankunachö 12 kaq pärrafuta rikäri.

^ par. 10 2012 wata 15 de septiembri killa Täpakoqpa 13-17 kaq päginankunachö, “Diospa kaqchö escuëlakunaqa Jehoväpa kuyakïnintam rikätsikun” neq yachatsikïta rikäri.

^ par. 11 1998 wata 1 de diciembri killa La Atalaya revistapa 19-22 kaq päginankunachömi, më tsë nacionchö juiciuta ganayanqampita willakïkunata tarinki.

^ par. 12 Isaïas 60:17: “Broncipa rantinmi öruta apamushaq, y hierrupa rantinmi plätata apamushaq, y qerupa rantinmi cobrita, y rumipa rantinmi hierruta apamushaq; y mandakoqnikitanömi shumaq kawakïta y justiciata churamushaq”.