Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Septiembri de 2017

Diospa Palabranqa alläpa poderyoqmi

Diospa Palabranqa alläpa poderyoqmi

“Diospa palabranqa kawaqmi, y alläpa poderyoqmi” (HEB. 4:12).

CANCION: 114 Y 113

1. ¿Imanirtaq següru këkantsik Diospa Palabranqa poderyoq kanqanta? (Rikäri kë yachatsikïpa qallananchö këkaq fötukunata).

JEHOVÄPA sirweqninkunaqa alleqmi musyantsik ‘Diospa palabranqa kawaq y alläpa poderyoq’ kanqanta (Heb. 4:12). Kawënintsikta y wakinkunapa kawëninkunatapis cambiashqam. Wakinkunaqa, manaraq Testïgu karninqa suwakoq, dröga shoqoq o jukwan jukwan kakoqmi kayarqan. Y wakinkunanam alläpa reqishqa o alläpa qellëyoq kayarqan, peru manam kushishqatsu sientikuyaq (Ecl. 2:3-11). Peru Diospa Palabran yanapashqa kaptinmi kananqa allina y kushishqana kayan. Itsachi, Täpakoq revistachö “Bibliam yanapashqa jukläyana kawakuyänampaq” neq willakïkunata leyirninqa alläpa kushikurquntsik. Testïguna karpis, Jehoväwan amïgu sïguinampaqqa Biblia yanapamänatam wanantsik.

2. ¿Diospa Palabran yanapaptin ima cambiukunatataq rurayarqan apostolkuna kawayanqan witsanchö cristiänukuna?

2 Biblia ninqanta yachakurnin nunakuna cambiayanqanta rikarninqa, manam espantakuntsiktsu. Porqui tsënömi pasakurqan apostolkuna kawayanqan tiempuchö  cristiänukunawampis (leyi 1 Corintius 6:9-11). Diospa Gobiernunman pikuna mana yëkuyänampaq kaqta parlarirmi, apostol Pablu kënö nirqan: “Qamkunapita wakinnikikunaqa tsënömi kayarqëki”. Pëkunataqa Diospa Palabran y santu espïritunmi yanapashqa karqan cambiayänampaq. Tsënö kaptimpis wakinkunaqa cristiänuna këkarmi pasëpa jutsakunata rurayarqan. Tsëmi Bibliaqa willakun juk cristiänuta congregacionpita qarquriyanqanta, peru arrepentikuriptinqa yapë chaskiyanqanta (1 Cor. 5:1-5; 2 Cor. 2:5-8). Diospa Palabran yanapaptin cristiänu mayintsikkuna cambiukunata rurayanqanta rikëqa alläpam yanapamantsik.

3. ¿Imakunapitataq kë yachatsikïchö yachakushun?

3 Jehoväpa alläpa poderyoq Palabrantaqa shumaqmi utilizänantsik (2 Tim. 2:15). Tsëmi kë yachatsikïchöqa rikäshun, kawënintsikchö y yachatsikunqantsikchö imanö alleq provechanapaq kaqta, y reunionchö o asamblëachö yachatsikoq kaqkunapis imanö utilizäyänampaq kaqta. Tsëmi yanapamäshun biennintsikpaq yachatsimaqnintsik Diosnintsikta mas kuyanapaq y agradecikunapaq (Is. 48:17).

KAWËNINTSIKCHÖ

4. (1) ¿Imatataq ruranantsik Diospa Palabran yanapamänata munarninqa? (2) ¿Qamqa imë hörakunataq Bibliata mas leyinki?

4 Diospa Palabran yanapamänantsikta munarqa seguïdum leyinantsik, y puëdirninqa cada junaq (Jos. 1:8). Rasunmi, llapantsikmi ocupädu kantsik, peru tsënö kaptimpis manam leyinantsikta imapis michämänata permitinantsiktsu (leyi Efesius 5:15, 16). Bibliataqa imë hörapis leyita puëdintsikmi; qoyapa, tardipa o paqaspapis. Tsënö rurarqa Salmuta qellqaqnömi kënö nishun: “¡Imanömi palabrëkita kuyëkü! Paqaspa junaqpapis tsëllamanmi yarparäkü” (Sal. 119:97).

5, 6. (1) ¿Imanirtaq leyinqantsikman alleq pensanantsik? (2) ¿Imatataq rurashwan leyinqantsikman alleq pensanapaq? (3) ¿Imanötaq yanapashurqunki Diospa Palabranta leyinqëki y leyinqëkiman pensanqëki?

5 Peru Bibliataqa manam leyinantsikllatsu, sinöqa yachatsimanqantsikmanmi alleq pensanantsik (Sal. 1:1-3). Tsëta rurarllam Diospa Palabran ninqannö kawëta puëdishun. Tsëmi leyirninqa, shonquntsikman chänanta procuranantsik.

6 ¿Imatataq rurashwan Bibliata leyikanqantsikman alleq pensanapaq? Wakinkunaqa leyikarninmi pensariyänampaq  ichik pärariyan. Y wakinkunanam kënö tapukuyan: “Kë leyikanqäqa, ¿imatataq Jehoväpita yachatsiman? ¿Këchö ninqannöku kawëkä? ¿Imakunachötaq mas alliyänä pishin?”. Diospa Palabran ninqanman alleq pensanqantsik y Diosman mañakunqantsikmi yanapamäshun, tarinqantsik consëjukunata wiyakunapaq. Tsënömi kawënintsikchö yanapamänantsikpaq Diospa Palabranta alleq provechashun (2 Cor. 10:4, 5).

YACHATSIKUNQANTSIKCHÖ

7. ¿Imanötaq Diospa Palabranta alleq provechashwan yachatsikunqantsikchö?

7 ¿Imanötaq Diospa Palabranta alleq provechashwan yachatsikunqantsikchö? Alleq utilizarninmi. Juk wawqim kënö nirqan: “Jehoväwan yachatsikïkarninqa, ¿noqantsikllatsuraq parlakushwan? Manachi, pëpis parlanantachi permitishwan”. Tsëwanqa nïta munëkarqan yachatsikunqantsikchö Bibliata utilizänantsik precisanqantam. Kikintsik parlanqantsikpitaqa, juk versïculuta alleq akrëkur leyipurinqantsikmi masqa yanapanqa, porqui Diospa Palabranmi mas poderyoqqa (1 Tes. 2:13). Tsëmi kënö tapukunantsik: “¿Yachatsikurninqa procuräku Bibliapita leyipëta?”.

8. ¿Imanirtaq nunakunataqa Bibliata leyipänantsikllatsu?

8 Nunakunaqa, apostolkuna kawayanqan witsanchönömi Biblia ninqantaqa entiendiyantsu (Rom. 10:2). Tsëmi allitsu kanman entiendikäyanqanta pensarnin leyipärinqantsikllaqa. Tsëpa rantinqa, leyipunqantsik textutam alleq entienditsinantsik. Tsënöpam shonqunkunaman chärinqa (leyi Lücas 24:32).

9. Bibliata pitapis leyipunantsik kaptinqa, ¿puntataqa imanötaq nirishwan Diospa Palabranta respetayänampaq?

9 Bibliata leyipunantsik kaptinqa,  Diospa Palabranta respetayänampaqmi puntataqa shumaq parlarinantsik. Itsa kënö nirishwan: “Tsë asuntupaq Diosnintsik ima ninqanta rikärishun”. Y Jesusman mana creikoqkunawan parlarninqa, itsa kënö nirishwan: “Juk sagrädu libru ninqanta rikärishun”. Y religionpita musyëta mana munaqkunawan parlarninqa itsa kënö nirishwan: “Musyankiku unëna qellqayanqan libruchö kënö ninqanta. . .”. Cada nuna jukläya jukläya kayaptinmi imanö parlapärinapaq kaqta alleq pensarinantsik (1 Cor. 9:22, 23).

10. (1) ¿Yanapakunku yachatsikunqantsikchö Bibliata utilizanqantsik? Willakaramï. (2) ¿Qamqa yachatsikunqëkichö rikarqunkiku Biblia nunakunata yanapaqta?

10 Mëtsikaq wawqikunam niyan yachatsikunqantsikchö Diospa Palabranta utilicëqa alläpa yanapakunqanta. Këllaman pensarishun. Juk wawqim juk mayorna nunaman cada yarqamoq revistakunata seguïdu apapoq. Peru juk kutiqa Täpakoq revistata manaraq entregarninmi tsë revistachö këkaq 2 Corintius 1:3, 4 textuta leyirapurqan. Tsëchöqa nin, Diosqa “shonqupita patsë ankupäkoq Teyta y tukïnöpa shoqakoq” kanqantam. Tsë nunataqa alläpam gustarirqan y yapë leyirapunampaqmi nirqan. Y tsëpitanam willarirqan warminwan ishkan llakikïkunapa pasëkäyanqanta y Bibliapita mas yachakïta munayanqanta. Rikanqantsiknömi, yachatsikunqantsikchö Diospa Palabranta utilizanqantsikqa alläpa poderyoq (Hëch. 19:20).

REUNIONCHÖ O ASAMBLËACHÖ

11. ¿Imatataq alleq segurakuyänan yachatsikoq wawqikuna?

11 Jehoväta adoranapaq reunionkunaman y asamblëakunaman ëwëqa llapantsiktam gustamantsik. Jina tsëmanqa ëwantsik yachatsikayämunqanta wiyakïta munarmi (Sant. 3:1). Tsëmi yachatsikamoq wawqikunaqa alleq segurakuyänan, yachatsikuyanqanqa Biblia ninqannölla kanampaq. Qamta yachatsikï tocashuptikiqa, ¿imatataq rurankiman wiyayäshoqnikikunata Diospa poderyoq Palabran yanapanampaq?

12. ¿Imatataq juk wawqi ruranman yachatsikunqanchö Biblia mas precisaq kanampaq?

12 Yachatsikurninqa Diospa Palabran Biblia ninqanta mas precisaqpaq churë (Juan 7:16). Igualatsikïkunata o juk willakïkunata utilizanqëkiqa ama leyinqëki versïculupita mas precisaq kanantaqa permititsu. Y versïculukunata leyirqa, ama leyinallanqa leyitsu, tsëpa rantinqa entienditsita procurë. Jina manam atska textukunataqa leyinëkitsu, porqui llapantaqa manam yarpëta puëdiyanqatsu. Tsëmi alläpa precisan mëqan textukunata leyinëkipaq alleq akranëki, igualatsikïkunawan entienditsikunëki y imakunachö yanapamanqantsikta rikätsikunëki (Neh. 8:8). Y juk bosquëjupita yachatsikurninqa alleq estudië y tsë yachatsikïta tsëchö këkaq textukuna imanö yanapanqanta alleq entiendï. Y tsëpitana tsë yachatsikïta yanapaq textukunata, yachatsikunqëki höra leyinëkipaq akrë (tsëpaq mas yanapakïtaqa tarinki Benefíciese de la Escuela del Ministerio Teocrático nishqan librupa 21-23 kaq yachatsikïninkunachömi). Peru tsëpitapis masqa Jehoväta mañakunqëkim yanapashunki Palabranta cläru entienditsikunëkipaq  (leyi Esdras 7:10 * y Proverbius 3:13, 14 *).

13. (1) ¿Imanötaq juk panintsikta yanaparqan reunionchö juk textuta wiyarinqan? (2) Willakaramï reunionchö o asamblëachö kar juk textuta wiyarinqëki imanö yanapashunqëkita.

13 Reunionchö Bibliata alleq utilizarnin juk wawqi shumaq entienditsikuptin, Australiapita juk panintsikta imanö yanapanqanta rikärishun. Kë panintsikqa wamra këninchömi alläpa mana allikunapa pasarqan, peru Bibliapita yachakurirmi bautizakurirqan. Tsënö këkarpis Jehovä kuyanqantaqa manam alleqllaqa creeqtsu. Peru juk kutim reunionchö wiyarirqan juk textuta, y tsë textu ninqanqa shonqunmanmi chärirqan. Tsëmi tsë textuman alleq pensarqan y juk textukunata leyirqan, y tsëmi Jehovä alläpa kuyanqanta entiendirirqan. * Y qamqa, ¿reunionchö o asamblëachö karpis wiyarqunkiku shonqïkiman chaq textukunata? (Neh. 8:12).

14. ¿Imanötaq Diospa Palabranta kuyanqantsikta rikätsikushun?

14 Llapantsikmi Jehová Diosnintsikta alläpa agradecikuntsik Palabranta qomanqantsikpita y ushakänanta mana permitinqampita (1 Pëd. 1:24, 25). Tsënö këkaptinqa alleq leyishun, ninqanmannö kawëta procurashun y wakinkunata yanapanampaq alleq utilizäshun. Tsënömi rikätsikushun Bibliata kuyanqantsikta, y masqa Qellqatsimoqnin Jehoväta kuyanqantsikta.

^ par. 12 Esdras 7:10: “Esdrasqa shonqunchömi listuna këkarqan Jehoväpa palabranta alli yachakunampaq, ninqannölla ruranampaq, jina Israelchö Diospa mandakïninta y alli kaq rurëta yachatsikunampaq”.

^ par. 12 Proverbius 3:13, 14: “Alläpam kushikun yachaq këta tarishqa nunaqa, y alläpam kushikun entiendeq nunaqa, porqui qellëyoq këpitapis mas allim; y öruta katsinqantsikpitapis mas allim”.

^ par. 13 Rikäri “ Kawënïtam cambiarirqan” neq recuadruta.