Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Noviembri de 2017

Provechashun Jehovä dispunimunqanta

Provechashun Jehovä dispunimunqanta

“Jehovämi sirweqninkunata salvëkan; pëpa salvacionninta asheq kaqqa culpannaqmi quedanqa” (SAL. 34:22).

CANCION: 49 Y 65

1. ¿Imanötaq Diospa sirweqninkuna sientikuyan jutsata rurayanqampita?

JEHOVÄPA sirweqkunaqa pë munanqannö kawakïtam procurantsik, peru jutsasapa karninmi mana allikunata rurarintsik. Tsëmi apostol Pablunö sientikuntsik. Pëmi nirqan,“¡alläpa ankupëpaq nunam kä!” nishpa (Rom. 7:24). Jina wakinqa, jatun jutsata rurashqa karninmi Jehovä imëpis manana perdonanampaq kaqta pensayan.

2. (1) Salmus 34:22 textu ninqannöpis, ¿imanirtaq Diosta sirweqkunaqa rurayanqan jutsapita alläpa llakishqa sientikuyanmantsu? (2) ¿Imatataq kë yachatsikïchö yachakushun? (Rikäri “ ¿Shamoq tiempupaq kaqtaku rikätsikun?” neq recuadruta).

2 Tsënö kaptimpis, yanapamänapaq Jehovä dispuninqanta provechaqkunaqa, manam rurayanqan jutsapita alläpa llakishqa sientikuyanmantsu (leyi Salmus 34:22 *). Peru ¿imanötaq provechashwan? ¿Imatataq ruranantsik Jehovä llakipämänapaq y perdonamänapaq? Jehovämi israelïtakunata mandarqan escapar ëwakuyänampaq markakunata akrayänampaq.  Tsë Leyqa 33 wata Pentecostes fiestachömi cambiarirqan. Tsënö kaptimpis, jutsata, arrepentikoqkunata y jutsa ruraqkunata Jehovä imanö rikanqanta musyanapaqmi yanapamantsik. Tsëmi puntataqa yachakurishun, tsë markakunata imanir patsätsikanqanta y imanö yanapakunqanta.

ESCAPAYÄNËKIPAQ MARKAKUNATA AKRAYË

3. ¿Imataq pasaq juk wanutsikoq israelïtata?

3 Pitapis wanutsiyanqanqa Jehoväpaqqa pasëpa mana allim kaq. Tsëmi mëqan israelïtapis juk nunata wanuratsiptinqa, kastampa yawarnimpita vengakoq nuna kikintapis wanuratsinan karqan, y rasmi ruranan karqan (Nüm. 35:19). Porqui Jehovämi nirqan nunapa yawarninqa patsata rakchatanqanta. Tsëmi mana rakchatäyänampaq mandakurqan (Nüm. 35:33, 34).

4. Accidentipa pitapis wanuratseq israelïtaqa, ¿imatataq rurëta puëdeq?

4 ¿Peru imataq pasakoq juk israelïta accidentipa pitapis wanuratsiptinqa? Culpayoqmi tikrareq (Gen. 9:5). Peru accidentipa kaptinmi Jehoväqa tsë nunata llakipaq. Jina kastampa yawarnimpita vengakoq mana wanuratsinampaqmi, escapar ëwakuyänan markaman escapananta permiteq. Y tsëchömi täränan karqan mandakoq kaq sacerdöti wanunqanyaq (Nüm. 35:15, 28).

5. ¿Imanötaq escapar ëwakuyänan markakuna Jehoväta mas reqinapaq yanapamantsik?

5 Tsë markakuna kanampaqqa kikin Jehovämi mandakurqan. Y Josuëtam kënö nirqan: “Escapar ëwayänëkipaq markakunata akrayë” (Jos. 20:1, 2, 7, 8). Escapakuyänampaq akrayanqan markakunaqa, ¿imanötaq rikätsikun Jehovä alläpa llakipäkoq kanqanta? Y ¿imanötaq kanan tiempuqa Jehovä dispuninqanta provechashwan?

RESPETASHQA NUNAKUNATAM WILLANAN

6, 7. (1) Pipis accidentipa juk nunata wanuratsiptinqa, ¿imatataq rurayänan karqan respetashqa nunakuna? (Rikäri kë yachatsikïpa qallananchö këkaq dibüjuta). (2) ¿Imanötaq wanutsikoq nunata yanapaq respetashqa nunakunawan parlanqan?

6 Pitapis accidentipa wanupakurqa, juk israelïtaqa escapar ëwakuyänan markamanmi ëwanan karqan. Y tsëchö këkaq respetashqa nunakunatam pasakunqanta willanan karqan. Y pëkunaqa shumaqmi chaskiyänan karqan (Jos. 20:4). Tsëpitanam accidenti pasanqan sitiuman mandayänan karqan, tsëchö respetashqa nunakuna juzgayänampaq (leyi Nümerus 35:24, 25 *). Y accidentipa kanqanta cläru musyarirqa, escapanqan markaman kutinantam permitiyaq.

7 ¿Imanirtaq wanutsikoq nunaqa respetashqa nunakunata willanan karqan? Porqui pëkunam Jehoväpa markanta limpiuta katsiyaq, y Jehoväpa yanapakïninta chaskinampaq yanapayaq. Juk yachaq nunam kënö nin: “Respetashqa nunakunata mana willaptinqa, kastampa yawarnimpita vengakoq nunam wanuratsita puëdeq. Jina wanutsiyaptinqa, kikimpa culpannam kaq, porqui salvakunampaq Dios dispunishqantam provechëkaqtsu”. Awmi, mana wanutsiyänampaqqa Jehovä dispuninqantam provechanan karqan.

8, 9. Pipis jatun jutsata rurashqa karninqa, ¿imanirtaq anciänukunapa yanapakïninta ashinan?

 8 Tsënöllam juk cristiänupis jutsata rurarninqa, yanapayänampaq anciänukunata ashinan. Porqui, Jehovämi Palabranchö mandakun jutsata ruraqkunata anciänukuna yanapayänampaq (Sant. 5:14-16). Jina, anciänukunam carguta chaskiyashqa arrepentikoqkunata yanapayänampaq, tsënöpa Jehoväpa rikëninchö alli kayänampaq y mana alli rurëninkunata jaqiyänampaq (Gäl. 6:1; Heb. 12:11). Jina anciänukunatam yachatsiyan, arrepentikoqkunata imanö shoqayänampaq y alli sientikuyänampaq imanö yanapayänampaq. Tsëmi Jehoväqa nin, anciänukunaqa tamyapita tsapäkoq machënö kayanqanta (Is. 32:1, 2). Awmi, Jehoväqa alläpa llakipäkoqmi.

9 Mëtsikaqmi anciänukunawan parlarirqa allina sientikuyashqa. Daniel jutiyoq wawqim jutsata ruranqampita anciänukunata willarqantsu, y tiempuna pasashqa kaptinmi yanapëta manana puëdiyänampaq kaqta pensarqan. Peru pipis musyarinantam alläpa mantsapakoq. Jina Jehoväman cada mañakurninqa puntataqa perdontaran mañakoq. Peru tsëpitaqa anciänukunawan parlanampaqmi decidirirqan. Y kënömi nin: “Anciänukunata willarirqa, juk lasaq qepita janäpita jorqareqnömi sientikurqä. Kananqa limpiu concienciawannam Jehovämampis mañakïta puëdï” nishpa. Tsëllaraqmi Danielqa siervu ministerial kanampaq carguta chaskishqa.

“TSË MARKAKUNAMANMI MËQANMAN KARPIS ESCAPAR ËWANAN”

10. Wanutsikoq nuna salvakïta munarqa, ¿imatataq ruranan karqan?

10 Accidentipa pitapis wanutseq nunaqa, mas amänunchö këkaq escapayänampaq kaq markamanmi raslla escapanan karqan (leyi Josuë 20:4 *). Y chärirqa tsëchömi quedakunan karqan hasta mandakoq kaq sacerdöti wanunqanyaq. Peru tsë markapita yarqurninqa, wanutsinqan  nunapa vïdanta mana valoranqantam rikätsikoq y kikimpa vïdantapis peligrumanmi churaq. Tsë markachö quedakurnin, cösasninkunata, trabäjunta o wayinta jaqirpis y libri viajëta mana puëdirpis, tsë llapanta ruranqanqa biennimpaqmi kaq (Nüm. 35:25). *

11. ¿Imatataq juk cristiänu ruranman Jehovä dispuninqanta valorarninqa?

11 Kanampis, jutsata ruraqkunaqa rasmi Jehoväpa yanapakïninta ashiyänan. Mana alli rurëninkunatam jaqiyänan y jutsaman imapis chätsinampaq kaqkunapitam cuidakuyänan. Corintuchö cristiänukunatam apostol Pablu nirqan, rurayanqampita rasumpa llakikuyanqanqa culpayoq këpita libranqanta y mana alli rurëninkunata raslla altsayänampaq yanapanqanta (2 Cor. 7:10, 11). Noqantsikpis rurëkanqantsik jutsata jaqinapaqmi kallpachakunantsik, tsënömi rikätsikushun ruranqantsikpita mana alli sientikunqantsikta y yanapamänapaq Jehovä dispunimunqanta valoranqantsikta.

12. ¿Imakunatataq juk cristiänu jaqinan Diospa yanapakïninta chaskinampaq?

12 Dios yanapananta munarqa, juk cristiänuqa jutsaman chätsikoq rurëkunapitam cuidakunan, jina rurëta gustanqankunatapis jaqinanmi (Mat. 18:8, 9). Amïguïkikuna mana alliman chätsiyäshuptikiqa, mananam pëkunawan juntakunëkinatsu. Washku upyë gustashuptikiqa, tsëman mana ishkinëkipaqmi alleq cuidakunëki. Piwampis oqllanakïta alläpa munarqa, manam tsëta munatsikoq cösaskunata ni pelïculakunata rikänëkitsu. Jehoväta kushitsita munarnin gustamanqantsik kaqkunata jaqiqa allipaqmi kanqa. Rasumpa kaqchöqa, ruranqantsikunapita Diosnintsik kuyamänantsiktam munantsik y manam condenamänantsiktaqa (Is. 54:7, 8).

TSË MARKAKUNAM TSAPANQA

13. ¿Imanirtaq wanutsikoq nunaqa següru y kushishqa kawakïta puëdeq?

13 Wanutsikoq nuna tsë markachöna karqa, wanutsiyänampaq kaqpitam salvakoq. Porqui Jehoväqa, ‘tsë markakunam tsapanqa’ nirqanmi (Jos. 20:2, 3). Y manam yapëqa tsë asuntupita juzgayaqnatsu. Jina manam permitiyaqtsu vengakoq nuna tsë markaman yëkunanta. Y tsë markapita mana yarqurqa, Jehovä cuidaptinmi següru kawakïta puëdeq. Jina trabajëta, wakinkunata yanapëta y Jehoväta sirwitam puëdeq, porqui manam carcelchönötsu llawiraq. Awmi, shumaq y kushishqam kawakïta puëdeq.

Jehoväqa chipyëpam perdonashurqunki. (Rikäri 14-16 kaq pärrafukunata).

14. Jutsampita arrepentikushqana cristiänuqa, ¿imapitataq següru kanan?

14 Diospa mëtsikaq sirweqninkunam jutsankunapita arrepentikushqana karpis, mana alli sientikur sïguiyan. Y wakinqa jutsankunata Jehovä yarparëkanqantam pensayan. Tsënö sientikurqa Jehovä chipyëpa perdonashunqëkitam yarpänëki. 9 kaq pärrafuchömi Danielpaq parlarqantsik. Pëtaqa anciänukunam corregiyarqan y limpiu concienciayoq kanampaq yanapayarqan. Tsëmi yanaparqan alli concienciayoqna kanampaq. Pëmi kënö nin: “Kananqa allinam sientikü. Y kikin Jehovä ninqannöpis, pëqa chipyëpam perdonamantsik. Mananam precisannatsu ruranqantsikman yarparänantsikqa”. Wanutsikoq nunaqa escapanqan markachöna këkarqa manam mantsaqnatsu vengakoq nuna  wanutsinanta. Tsënöllam jutsantsikta Jehovä perdonamashqantsikna këkaptinqa, mantsanantsiknatsu yapë juzgamänataqa (leyi Salmus 103:8-12 *).

15, 16. ¿Imanötaq sientikuntsik Jesus noqantsikrëkur wanunqampita y Mandakoq kaq Sacerdötintsik kanqampita?

15 Israelïtakunapitapis masmi, Jehovä llakipämänapaq kaqmanqa confiakïta puëdintsik. Kë yachatsikïpa qallananchö rikanqantsiknöpis, Jehovä llapan ninqanta cäsukïta mana puëdirmi apostol Pabluqa alläpa llakikoq. Peru tsënö këkarpis, “¡Diostam agradecikü! ¡Pëmi Señornintsik Jesucristurëkur libramanqa!” nirqanmi (Rom. 7:25). Jutsampita arrepentikushqa karninmi següru karqan Jehoväqa Jesucristurëkur perdonashqa kanqanta. Awmi, Cristuqa noqantsikrëkurmi wanurqan, tsëmi yanapamantsik limpiu concienciayoq kanapaq y alli sientikunapaq (Heb. 9:13, 14). Y kananqa Mandakoq kaq Sacerdötintsik karninmi, Diosman rogakur salvamënintsikta puëdin (Heb. 7:24, 25). Unë witsanqa mandakoq kaq sacerdötikunam, israelïtakunata yanapayaq Jehoväpa perdonninta chaskiyänampaq. Tsënöllam Mandakoq kaq Sacerdöti Jesuspis yanapamäshun, Jehoväpa perdonninta chaskinapaq (Heb. 4:15, 16).

16 Tsëmi Jehovä yanapashunëkita munarqa, Jesus wanunqan yanapashunëkipaq kaqman llapan shonqïkiwan confiakunëki. Ama pensëtsu Jesus wanunqanqa wakin nunakunallata yanapanqanta. Porqui Jesusqa qampaqmi wanushqa. Tsërëkurmi ruranqëki jutsakunapita Dios perdonashunki, y mana wanushpa kawakïtapis puëdinki (Gäl. 2:20, 21). Awmi, Jesus wanunqanqa, Jehovä qoshunqëki qarëmi.

17. ¿Imanirtaq qamqa yanapamänapaq Jehovä dispuninqanta provechëta munanki?

17 Escapakuyänampaq akrayanqan markakunaqa rikätsikun, Jehovä llakipäkoq kanqanta y juk nunapa vïdanta precisaqpaq churanqantam. Jina rikätsikunmi, anciänukuna yanapamanqantsikta, rasumpa arrepentikunqantsikta imanö rikätsikunqantsikta y Jehovä alläpa perdonakoq kanqanta. ¿Yanapamänapaq Jehovä dispuninqanta provechëkantsikku? ¡Tsëmi mas alli kaq yanapakïqa! (Sal. 91:1, 2). ¿Peru imanötaq Jehoväpita yachakushwan llakipäkoq këta y alli kaqllata rurëta? Tsëtam qateqnin kaq yachatsikïchö yachakushun.

^ par. 2 Salmus 34:22: “Jehovämi sirweqninkunata salvëkan; pëpa salvacionninta asheq kaqqa culpannaqmi quedanqa”.

^ par. 6 Nümerus 35:24, 25: “Llapan nunakunam juntakëkurnin tsë wanutsikoq nunapa y kastampa yawarnimpita vengakoq nunapa cäsunta rikäyänan. Y llapan juntakaqkunam, vengakoq nunapa makimpita tsë wanutsikoq nunata librayanqa. Y tsëpitanam escapakunqan markaman kutitsiyanqa, y tsëchömi täränan, peqanman aceitita jichar akrayanqan mandakoq kaq sacerdöti wanunqanyaq”.

^ par. 10 Josuë 20:4: “Y pëqa tsë markakunamanmi mëqanman karpis escapar ëwanan, y punkunman chärirmi tsëchö këkaq respetashqa nunakunata ima pasakunqanta willanan; y respetashqa nunakunaqa tsë markamanmi yëkatsiyänan, y pëkunawan tsëchö täränampaqmi juk sitiun qoyänan”.

^ par. 10 Judïukunapa librunkunachömi willakun, accidentipa wanutsikoq nunapa familiampis pëwan täräyänampaq escapanqan markaman ëwakuyanqanta.

^ par. 14 Salmus 103:8-12: “Jehoväqa alläpa llakipäkoq y alläpa allim, mana ras piñakoq y alläpa kuyakoqmi. Mana allita ruranqantsikkunataqa manam imëpis yarparäkïkanqatsu, jina manam resentïduqa quedakunqatsu. Jutsata ruranqantsikpita feyupa castigashqa këta merecishqapis, manam tsënötsu castigamarquntsik. Jina mana allita ruranqantsikkunapitapis, manam feyupatsu tratamarquntsik. Imanömi ciëlupis patsapitaqa alläpa altuchö këkan, jina tsënöllam pëta respetaqkunapaqqa kuyakïnimpis alläpa jatun. Imanömi Inti ullumunan lädu karuchö këkan Inti jeqanan lädupita, tsënöllam jutsa ruranqantsikkunata karuman churashqa”.