Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Noviembri de 2017

Diosnintsikpaq kushishqa cantashun

Diosnintsikpaq kushishqa cantashun

“Cantarnin Diosnintsikta alabëqa alläpa allim” (SAL. 147:1).

CANCION: 9 Y 138

1. ¿Imanötaq cancionkunaqa yanapamantsik?

CANCIONKUNATA patsätseq juk nunam kënö nirqan: “Palabrakunaqa pensatsimantsikmi, müsicaqa sientitsimantsikmi, peru cancionkunaqa pensanqantsikta sientinapaqmi yanapamantsik” nishpa. ¡Dios Yayantsikpaq pensanqantsikkunata sientiqa alläpa shumaqmi! Tsëtaqa rikätsikuntsik cancionëruntsikchö cancionkunata cantarninmi. Awmi, noqantsikpaqqa cantarnin Jehoväta adorëqa alläpam precisan.

2, 3. (1) ¿Imanirtaq wakinkunaqa congregacionchö cantëta mantsapakuyan? (2) ¿Ima tapukïkunapitataq yachakushun?

2 ¿Gustantsikku fuertipa cantëta o penqakuntsikku? Wakin markakunachöqa, ollqukunaqa cantëta penqakuyanmi. Tsënö markachö täraq anciänukunaqa itsa gänaswantsu reunionchö cantayanqa, o cantë hörachö juk cösaskunata rurar këkäyanqa. Tsënö kayaptinqa, itsa wakinkunaqa gänaswannatsu cantayanqa (Sal. 30:12).

3 Cantarnimpis Jehoväta adorëkanqantsikta musyarninqa, manam tsë hörachöraq purikachar këkäshuntsu. Kënömi tapukunantsik: “¿Reunionkunachö cantëta precisaqpaqku churä? ¿Imatataq ruräman mantsapakurnimpis shonqupita patsë y kushishqa cantanäpaq?”.

 UNËPITA PATSËMI ALLÄPA PRECISASHQA

4, 5. ¿Imanirtaq nintsik israelïtakunapaqqa cantarnin Jehoväta alabayänan alläpa precisanqanta?

4 Jehoväpa sirweqninkunaqa, pëta alabayänampaqmi müsicata unëpita patsë utilizäyashqa. Israelïtakunapaqqa alläpam precisarqan cantarnin Jehoväta adorayänan. Tsëmi rey Davidpis 4.000 levïtakunata Diospa carpa wayinman churarqan müsicawan Jehoväta alabayänampaq, y pëkunapita 288 kaqqa alli cantaqmi kayarqan (1 Crön. 23:5; 25:7).

5 Jina templuta inaguräyaptimpis müsicawan cantayanqanmi alläpa precisaq karqan. Bibliam willakun Jehoväta agradecikurnin y alabarnin, trompëtatawan wakin instrumentukunata tocar qallëkuyaptin y cantaqkuna cantar qallëkuyaptin, templuta pukutëwan Jehovä juntaratsinqanta. Tsëta rikarninqa, israelïtakunaqa maschi Jehoväman confiakuyarqan (2 Crön. 5:13, 14; 7:6).

6. Nehemïas Jerusalenchö gobernador kanqan witsan, ¿imanötaq Jehoväta alabayarqan y agradecikuyarqan?

6 Jina Jerusalenpa perqankunata israelïtakuna altsayaptimpis gobernador Nehemïasmi levïtakunata churarqan tocayänampaq y cantayänampaq. Y usharirnin inaguräyanqanchöpis müsica kaptinmi llapan nunakuna kushishqa sientikuyarqan. Ishkë grüpum karqan, juk kaq grüpum juk kaq lädu perqapa tocarëkar y cantarëkar ëwarqan, y juk kaq grüpunam juk kaq lädumpa, hasta templu lädunchö tinkuyanqanyaq. Jehoväta agradecikurninmi fuertipa cantayarqan y karuyaqmi wiyakarqan (Neh. 12:27, 28, 31, 38, 40, 43). Clärum këkan, sirweqninkuna kushishqa cantarnin alabayaptinqa, Jehoväqa alläpam kushikun.

7. ¿Imanötaq Jesusqa qateqninkunata rikätsirqan Diosta adorarnin cantayänan precisanqanta?

7 Jesus kë Patsachö kawanqan witsampis, Diosta adorayänampaq müsicaqa alläpam precisarqan. Señorpa Cënanta patsäratsirmi Jesusqa, tsë alläpa precisaq paqaschö qateqninkunawan cantayarqan (leyi Mateu 26:30).

8. ¿Imatataq apostolkuna kawayanqan witsan cristiänukunapita yachakuntsik?

8 Apostolkuna kawayanqan witsan cristiänukuna, Diosta adorarnin juntu cantayanqampitapis yachatsikïtam puëdintsik. Templuchö mana ëllukarpis, juntakäyanqan wayikunachöqa kushishqam cantayaq. Apostol Pablum cristiänu mayinkunata nirqan, “salmukunawan, Diospaq alabanzakunawan, Diosta adorana cancionkunawan agradecikurnin” cantayänampaq (Col. 3:16). Noqantsikpis tsënömi shonqupita patsë agradecikurnin cantanantsik. Porqui tsëpis “alli juiciuyoq y markäkïpaq sirwipakoq” qomanqantsik Diospa yachatsikïninllam (Mat. 24:45).

¿IMATATAQ RURASHWAN CANTËTA MANTSAPAKURNINQA?

9. (1) ¿Imanirtaq wakinkunaqa reunionkunachö o asamblëakunachö fuertipa cantëta mantsapakuyan? (2) ¿Imanötaq Jehoväta kushitsinapaq cantashwan, y pikunataq ejempluta qoyanman? (Rikäri kë yachatsikïpa qallananchö këkaq fötuta).

9 Itsa wakinkunaqa cantëta mantsapakuyan, familiankunachö o markanchö tsë costumbrikuna mana kashqa kaptin. O itsa penqakuyan radiupa o televisionpa yarqamoq alli cantaqkunanö mana cantarnin. Tsënö kaptimpis Jehoväpaq cantëtaqa manam jaqinantsiktsu. Tsëpa rantinqa, cancionëruntsikta alleq pallarkur, y peqantsikta pallarkurmi shonqupita patsë cantanantsik (Esd. 3:11; leyi  Salmus 147:1 *). Kananqa, Diosta adoranantsik wayikunachö këkaq pantällakunachömi cancionkunapa letrankuna yarqamun. Y tsëqa fuertipa cantanapaqmi yanapamantsik. Jina kananqa Anciänukunapaq y Siervu Ministerialkunapaq Escuëlachöpis cantayannam. Tsëmi rikätsimantsik reunionkunachö cantanqantsik höraqa, anciänukuna ejempluta qoyänan precisanqanta.

10. Fuertipa cantëta mantsapakurninqa, ¿imamantaq pensanantsik?

10 Wakinkunaqa fuertipa cantëta mantsapakuyan, wakinkuna wiyayänanta penqakurnin o vozninkuna mana alli kanqanta pensarninmi. Këman pensarishun: ¿manaku parlakurnimpis seguïdu pantantsik? Peru manam tsërëkurtsu parlakïta jaqirintsik (Sant. 3:2). Tsënöllam, voznintsik mana alli kanqanrëkurqa Jehoväpaq cantëta jaqirinantsiktsu.

11, 12. ¿Imaraq yanapamäshun mas alli cantanapaq?

11 O itsa cantëtaqa mantsapakuntsik imanö cantana kanqanta mana yacharnin. Tsëqa, juk ishkë yanapakïkunata rikärishun. *

12 Mas alli y fuerti cantanapaqqa yanapamäshun alleq shütëta yachanqantsikmi. Imanömi electricidäpis föcuta yanapan fuerti atsikyänampaq, tsënöllam shütëta alleq yachanqantsikpis kallpata qomantsik alleq parlanapaq y cantanapaq. Bäjulla cantarnimpis, imëpis parlakunqantsikpita mas bäjuqa manam cantanantsiktsu (rikäri Benefíciese de la Escuela del Ministerio Teocrático nishqan  librupa 181 a 184 päginankunachö këkaq, “Control del volumen de aire” nishqan yachatsikïninta). Y Bibliaqa nimantsik kushishqa y fuertipa cantanapaqmi (Sal. 33:1-3).

13. ¿Imatataq rurashwan mana mantsapakïpa cantanapaq?

13 Familiachö Diosta Adoranantsik Hörachö o japallantsikpis këkunata rurashun: mas gustamanqantsik cancionta akrarirnin fuertipa y cläru llapanta leyishun; tsëpitana qallananman kutïkur alli shütëkur, puntuta tarinqantsikyaq mana pärëpa fuertipa leyishun; y nïkurna tsëllata fuertipa cantashun (Is. 24:14). Tsënö rurashqaqa mas fuertim voznintsik wiyakanqa. ¡Cantëtaqa ama penqakushuntsu!

14. (1) ¿Imanirtaq cantarninqa shimintsikta maslla kichanantsik? (Rikäri “ Alli cantanapaq këkunata rurashun” neq recuadruta). (2) ¿Imakunatataq ruranantsik voznintsikta alliyätsinapaq? Willakaramï.

14 Jina voznintsik fuertipa wiyakänampaqqa, parlanqantsikpita masllam shimintsikta kichanantsik. Y vozniki alläpa bäju kaptin y alläpa llanu wiyakaptinqa, Benefíciese de la Escuela del Ministerio Teocrático nishqan librupa 184 päginanchö këkaq “Cómo superar problemas específicos” nishqan recuadruta rikäri.

SHONQUPITA PATSË CANTASHUN

15. (1) ¿Imatataq willakayämurqan 2016 wata juk precisaq reunionchö? (2) ¿Imanirtaq juk mushoq cancionëru yarqamunan precisarqan?

15 Jehoväpa testïgunkuna cada wata octubri killachö rurayanqan reunionchömi, 2016 watachö wawqi Stephen Lett willakamurqan juk mushoq cancionëru yarqamunampaq kaqta. Jutinqa Cantemos con gozo a Jehová ninanmi karqan. Wawqi Lettmi nirqan 2013 watachö Traducción del Nuevo Mundo de las Santas Escrituras Biblia ingleschö revisashqa yarqamunqanrëkur, cancionëruntsiktapis revisayämunan precisanqanta. Tsëmi tsë Biblia ninqannöna letrankunata churayämushqa. Jina Diospita yachatsikunapaq  y Jesus wanunqampita agradecikunapaqmi mushoq cancionkuna yapakämushqa. Y Diosta adoranqantsikchö cancionkuna alläpa precisaptinmi, Jehoväpa Testïgunkunata Pushaqkunaqa decidiyarqan 2013 watachö yarqamoq Bibliapa qarannölla tsë cancionërupa qarampis kanampaq.

16, 17. ¿Imakunataq cambiakashqa mushoq cancionëruchö?

16 Tsë mushoq cancionëru fäcil utilizänalla kanampaqmi, qallanan listachö këkanqannö, cancionkunataqa tëmapa churayämushqa. Qallanan 12 cancionkunaqa Jehoväpaqmi parlan y qateqnin 8 cancionkunanam Jesuspaq y jutsantsikpita pagakunqampaq. Tsënö rakishqam wakinkunapis këkäyan. Tsëqa, discursaqkunatam yanapanqa munayanqan cancionta raslla tariyänampaq.

17 Jina shonqupita patsë cantanapaqmi, mas fäcil-lla entiendina palabrakunata churayämushqa y manana utilizanqantsik palabrakunata joqariyashqa. Këllaman pensarishun: “Acción de gracias” nishqan cancionqa, “Una oración para dar gracias a Dios” ninnam. Jinamampis mëtsika cancionkunapa letrankunam cambiakashqa. Jina “Protege tu corazón” nishqan cancionpa tïtulunqa, “Cuidemos nuestro corazón” ninnam. Y kikin cancionpa letrankunapis cambiashqam. Tsënöqa cambiakashqa panikunata, jövinkunata, Bibliapita tsëraq yachakïkaqkunata y reunionkunaman o asamblëakunaman shamoqkunata cuentaman churarninmi. Porqui tsë cancionta cantayaptinqa, wakin kaqkunata consejëkaqnömi wiyakaq, tsëmi höraqa mana alli sientikuyaq.

Diosta Adoranantsik Hörachö cantëta yachakushun. (Rikäri 18 kaq pärrafuta).

18. ¿Imanirtaq precisan mushoq cancionëruntsikchö cancionkunata alleq yachakunantsik? (Rikäri päginapa ura kuchunchö këkaq willakïtapis).

18 Cantemos con gozo a Jehová nishqan cancionëruchö wakin cancionkunaqa Jehoväman mañakïkaqnö cantanapaqmi qellqakämushqa. Tsëmi yanapamantsik imanö sientikunqantsikta musyatsinapaq. Y wakin cancionkunanam cristiänu mayintsikkunata animanapaq y kuyanqantsikta rikätsinapaq qellqakämushqa (Heb. 10:24). Tsëmi alläpa precisan müsicapa tönunta y cancionkunapa letranta alleq musyanantsik. Y tsëpaqqa yanapamäshun jw.org päginachö këkaq cöruyoq müsicakunata wiyanqantsikmi. Wayichö cantëta yachakurninqa, mana mantsapakushpa y shonqupita patsëmi cantëta puëdishun. *

19. ¿Imanötaq Diosnintsikta llapantsik adorëta puëdintsik?

19 Rikärinqantsiknöpis, cantarnin Jehovä Diosnintsikta adorëqa alläpam precisan. Porqui tsënömi kuyanqantsikta y agradecikunqantsikta rikätsikuntsik (leyi Isaïas 12:5 *). Kushishqa y shonqupita patsë cantashqaqa, wakinkunapis tsënömi rurayanqa. Tsëmi congregacionchöqa llapantsik, jövin kar o mayor karpis, cantarnin Jehoväta alabanantsik. Porqui Bibliam mandamantsik Jehovä Diospaq cantanapaq. Tsëqa, ¡mana mantsapakushpa Jehovä Diosnintsikpaq cantashun! (Sal. 96:1).

^ par. 9 Salmus 147:1: “¡Jähta alabayë! Porqui cantarnin Diosnintsikta alabëqa alläpa allim. ¡Imanö shumaq y allim pëta alabëqa!”.

^ par. 11 Voznikita mas alliyätsinëkipaqqa rikäri, “Listos para cantar las nuevas canciones” nishqan videuta. Tsëqa këkan JW Broadcasting, VIDEOS > DESDE NUESTRO ESTUDIO > DISCURSOS nishqanchömi.

^ par. 18 Asamblëakunachöqa, manaraq qallaptinmi 10 minütupa müsicata churayämun. Tsëmi yanapamantsik shonqupita patsë cantanapaq y yachatsikayämunqanta shumaq wiyakunapaq. Tsëmi müsica manaraq qallaptin, shumaq wiyanapaq jamarëkänantsikna.

^ par. 19 Isaïas 12:5: “Cantarnin Jehoväta alabayë, porqui espantëpaq rurëkunatam rurashqa. Entëru patsachö nunakuna tsëta musyayätsun”.