ALLITA ruraq nunatanö rikämänantsiktaqa llapantsikmi munantsik. Peru kanan witsan nunakuna ‘alli kaqta mana kuyayaptinmi’, tsënö rikämänantsikqa fäciltsu (2 Tim. 3:3). Tsënö nunakunaqa kikinkunam ima alli kanqanta y ima mana alli kanqantapis decidikuyan, y tsëtaqa rurayan “alli kaqta mana allitanö y mana alli kaqtana allitanö” rikarmi (Is. 5:20). Jutsata ruraq karnin y kawënintsikchö mana allikunapa pasashqa karninmi, alliraq kallpachakunantsik allikunata ruranapaq. Tsëmi höraqa, unëpana Jehoväta sirwishqa juk paninö sientikuntsik, pëmi kënö nin: “Noqapaqqa alläpa sasam allikunata ruraq kanqäta creiqa”.

Llapantsikmi alli këtaqa puëdintsik, y tsëqa ¡alläpa kushikïpaqmi! Alli këqa Diospa santu espïritumpa wayïninmi, tsëmi imëka mana allikunapa pasanqantsikchö y imanö sientikunqantsikchö yanapamantsik. Alli kë ima kanqanta y kawënintsikchö imanö rikätsikunapaq kaqta yachakurishun.

¿IMATAQ ALLI KËQA?

Alli këtaqa, allita ruraq nunakunallam rikätsikïta puëdiyan y mana allikunata ruraqkuna y mana alli portakoqkunaqa manam rikätsikïta puëdiyantsu. Allita ruraq nunakunaqa, imëkanöpam wakinkunata yanapëta procurayan y yanapayänampaqmi imëkata rurayan.

Familiankunapaq y amïgunkunapaq imëka allikunata rurë munaq nunakunataqa itsa reqinki. Peru Diospa rikëninchö allita ruraq nunaqa, manam familianta y amïgunkunallatatsu yanapan. Tsënö kaptimpis, manam qonqanantsiktsu jutsasapa kanqantsikta. Tsëmi Bibliaqa kënö nimantsik: “Kë Patsachöqa manam kantsu allikunata rurëkarpis mana jutsallakoq nunaqa” (Ecl. 7:20). Y apostol Pablupis kënömi nirqan: “Musyämi noqachöqa, juk parlakïchöqa jutsasapa ëtsächöqa, ni ima allipis mana kanqanta” (Rom. 7:18). Tsëmi allikunata rurëta munarqa, Jehovä ruranqankunapita yachakunantsik, porqui pëmi chipyëpa alli këtaqa yachatsimantsik.

“JEHOVÄQA ALLÄPA ALLIM”

Jehovämi ima alli kanqantaqa decidin. Tsëmi Salmusta escribeqqa kënö nirqan: “Qamqa alläpa allim kanki y allikunatam imëpis rurëkanki. Mandakïnikikunata yachëkatsillämë” (Sal. 119:68). Kë textuqa Dios alläpa alli kanqantam ishkënöpa rikätsikun, tsëta yachakurishun.

Jehoväqa alläpa allim. Alli këqa, Jehoväpa imanö këninchömi cläru rikakun. Moisesta parlapanqan witsanmi, kënö nirqan: “Noqaqa llapan ruranqäkunachömi, alläpa alli kanqäta rikätsishqëki”. Alläpa puëdeq këninta y alläpa alli këninta rikëkarninmi, Moisesqa kënö neqta wiyarqan: “Jehovä, Jehoväqa alläpa alli, alläpa llakipäkoq, mana ras piñakoq, alläpa kuyakoq y rasun kaqllata parlaq Diosmi, waranqëpayan nunakunata kuyakïninta rikätseq y llutanta rurayanqanta, mana allita rurayanqanta y jutsallakuyanqanta perdonaq Dios. Peru castïguta mereceq kaqkunataqa manam castïgunnaqta jaqirintsu” (Ex. 33:19; 34:6, 7). Jehovä alläpa alli kanqantaqa, imanö këninchömi cläru rikantsik. Tsënöllam Jesuspis, Patsachö kawanqan witsan alli nuna kanqanta rikätsikurqan. Tsënö alli nuna këkarpis kënömi nirqan: “Manam pipis alliqa kantsu, sinöqa jukllaqllam, Dioslla” (Lüc. 18:19).

Jehovä alli kanqantaqa kamanqankunachömi rikantsik.

 Jehoväqa allikunatam imëpis ruran. Diosnintsikpa alli kënintaqa, llapan ruranqankunachömi rikantsik. Bibliam kënö nin: “Jehoväqa llapankunapaqmi alli, y llakipäkïninkunaqa llapan kamanqankunachömi këkan” (Sal. 145:9). Jehoväqa alli këninta rikätsikun llapankunata igualpa rikanqanchö, nunakunata kawënin qonqanchö y llapan wanayanqankunata qonqanchömi (Hëch. 14:17). Jina jutsantsikkunata perdonamarnintsikmi tsëtaqa rikätsikun, tsëmi Bibliaqa kënö nin: “Jehovä Dioslläkuna, qamqa alläpa allim kanki y perdonakunëkipaqpis listum këkanki” (Sal. 86:5). Sirweqninkunapaq allikunata ruranampaq kaqtaqa segürum këkantsik (Sal. 84:11).

“ALLI KAQTA RURËTA YACHAKUYË”

Jehoväqa pë niraqtam kamamashqantsik, tsëmi alli nuna këta puëdintsik y allikunata rurëta yachantsik (Gen. 1:27). Tsënö kaptimpis, Bibliaqa Diospa sirweqninkunata kënömi nin: “Alli kaqta rurëta yachakuyë” (Is. 1:17). ¿Imakunatataq ruranantsik mas alli nuna kanapaq? Kimata rikärishun.

Puntataqa santu espïritutam mañakunantsik. Tsëqa Diospa rikëninchö allikunata ruranapaqmi yanapamantsik (Gäl. 5:22). Jina alli kaqta kuyanapaq y mana alli kaqta chikinapaqmi yanapamantsik (Rom. 12:9). Bibliaqa nin, “imëpis alli kaqta rurayänëkipaq y alli kaqta parlayänëkipaq alli tsarakoqta” Jehovä tikratsikunqantam (2 Tes. 2:16, 17).

Ishkë kaq, Diospa Palabrantam leyinantsik. Alli kaqta ruranapaqmi Jehoväqa Palabranchö yachatsimantsik, tsëmi “imëka alli rurëpaq listu këkänapaq” yanapamäshun (Prov. 2:9; 2 Tim. 3:17). Diospita y munanqampita alli musyanapaqqa, Palabrantam leyinantsik y ninqanmanmi yarpachakunantsik. Y tsëkunaqa, tesöru cuentam mas wananqantsik höra yanapamäshun (Lüc. 6:45; Efes. 5:9).

Kima kaq, ‘alli kaqta ruraqkunanö’ ruranapaqmi kallpachakunantsik (3 Juan 11). Bibliachöqa allita ruraq nunakunapita atska willakïkunam kan, y pëkuna rurayanqampitaqa yachakïta puëdintsikmi. Jehoväwan Jesusmi alli këtaqa mas alli yachatsimantsik. Peru Biblia parlanqan juk nunakunapitapis yachakïtaqa puëdintsikmi. Tabïtawan Bernabëqa alli nuna kayanqantam rikätsikuyarqan, y pëkunapitapis yachakïta puëdintsikmi (Hëch. 9:36; 11:22-24). Wakinkunata yanapayänampaq rurayanqankunapita yachakunqantsik y ima bendicionkunata chaskiyanqanman pensanqantsikmi yanapamäshun. Tsënöllam noqantsikpis, familiantsikta y congregacionchö cristiänu mayintsikkunata imëkanöpa yanapanapaq kallpachakunantsik, y tsëta rurarqa atska bendicionkunatam chaskishun.

 Jina wakinkunata yanapëkaqkunamanmi pensanantsik. Congregacionchö anciänukunaqa imëkatam rurayan y alli kaqtaqa kuyayanmi. Y kuyashqa panintsikkunatapis manam qonqanantsiktsu, pëkunaqa parlëninkunawan y rurëninkunawanmi “alli kaqta yachatsikoq” kayan (Tïtu 1:8; 2:3). Roslyn jutiyoq panim, juk amïgampaq kënö willakun: “Amïgäqa, congregacionchö cristiänukunata yanapananrëkur y kallpata qonanrëkurmi imëkata ruran. Imapa pasëkäyanqanmanmi yarpachakun, imallatapis qarakïmi gustan y juknöpapis yanapakunmi. Noqapaqqa, pëqa alläpa alli warmim”.

Jehoväqa sirweqninkunatam nin “alli kaqta ashiyänampaq” (Amos 5:14). Tsëta rurarninqa manam mandakïninkunallatatsu kuyashun, sinöqa rikëninchö alli kaqta ruranapaqmi tukïnöpa kallpachakushun.

¿Kallpachakuntsikku alli nuna kanapaq y allikunata ruranapaq?

Alli këtaqa, manam jatusaq rurëta ruranqantsikkunallawantsu rikätsikïta puëdintsik. Këllaman pensarishun, juk pintaqqa jawa jawëkurmi dibüjun shumaq yarqunampaq pintan. Tsënöllam noqantsikpis, wakinkunataqa puëdinqantsikmannö yanapëta puëdintsik.

Bibliaqa nimantsik, llapan nunakunapaq allikunata ruranapaqmi (2 Tim. 2:21; Tïtu 3:1). Nuna mayintsik imakunapa pasëkäyanqanta altantu këkarninqa, imakunata rurarnin “kallpata qonapaq” kaqtam alleq musyashun (Rom. 15:2). Itsa imantsikllawampis pëkunata yanaparishwan (Prov. 3:27). Wayintsikchö imallatapis rurarinapaq y noqantsikwan imallatapis mikuriyänampaqmi invitarita puëdintsik. Y pipis qeshyëkanqanta musyarqa juk tarjëtata o mensäjitam aparatsinantsik, watukaqmi ëwanantsik o telëfunupam qayarinantsik. Rasumpa kaqchöqa, tukïnöpam “alli kaqlla, precisanqanmannö kallpata qokoq kaqlla” parlakïnintsikwan yanapakïta puëdintsik, tsëta rurarninqa wakinkunatam yanapëkäshun (Efes. 4:29).

Jehovänömi llapan nunakunawan alli këta procurantsik, tsëmi llapankunata igualpa rikantsik. Alli kanqantsiktaqa, Diospa Gobiernumpita alli willakïkunata yachatsikurnimpis rikätsikuntsikmi. Jesus mandakunqannömi, hasta chikimaqnintsikkunawampis alli këta procuranantsik (Lüc. 6:27). Kuyakoq y wakinkunawan alli karninqa, alli kaqtam rurëkäshun, porqui “tsëkunapa contranqa manam ni ima leypis kantsu” (Gäl. 5:22, 23). Mana allikunapa pasëkar o chikishqa këkarpis allikunata rurashqaqa, itsa wakinkuna rasumpa kaqta yachakïta munayanqa y Jehoväta alabayanqa (1 Pëd. 3:16, 17).

ALLI KËQA PRECISANMI

Bibliachöqa nimantsik, “alli nunaqa” allikuna ruranqanrëkur bendicionkunata chaskinampaq kaqtam (Prov. 14:14). ¿Ima bendicionkunatataq chaskishun? Itsa wakinkuna alli tratamäshun (Prov. 14:22). Peru mana alli tratamashqapis alli këtaqa manam jaqinantsiktsu, porqui tsënö rurashqaqa manam alläpa piñakuyanqanatsu y yapëchöqa itsapis allina tratamäshun (Rom. 12:20).

Mëtsikaqmi willakuyan, allikunata rurayanqan y mana allita chikiyanqanqa yanapashqa kanqanta. Nancy jutiyoq pani pasanqanta rikärishun, pëmi kënö willakun: “Imatapis mana ruraq, rakchakunata ruraq y alläpa malkidiädam tikrakurirqä. Peru alli këpaq Dios mandakunqanta yachakurir y tsëmannö kawarqa, mas kushishqanam sientikurqä. Kananqa wakinkuna respetayämanmi y kikïpis kuyakümi”.

Jehovä Diosnintsik kushishqa sientikuptinmi alli këqa masraq precisan. Wakinkuna mana rikäyaptimpis, Jehoväqa rikanmi allikunata ruranqantsikta. Pëqa imakunata ruranqantsikta y imakunaman pensanqantsiktam alleq musyan (Efes. 6:7, 8). Peru ¿imapaqtaq tsëkunata rikan? Bibliam kënö nin: “Alli kaqta ruraq nunaqa Jehoväpa rikëninchömi alli këkan” (Prov. 12:2). Tsëqa, ¡imëkanöpa alli nuna kanqantsikta rikätsikur sïguishun! Jehoväqa këtam änimantsik: ‘Allita ruraq kaqkunapaqqa, alläpa precisaqpaq churashqa kë, respëtu y yamë këmi kanqa’ (Rom. 2:10).