“Tsë precisaq autoridäyoq nuna y Felïpim yakuman yarpuriyarqan, y pëmi bautizarirqan” (HËCH. 8:38).

52 KAQ CANCION Jehovä Diosllä munënikitam rurashaq

KËPITAM YACHAKUSHUN *

1. Adanwan Ëva mana allita decidiyanqanqa, ¿imamantaq pëkunata y nunakunata chätsishqa?

IMA alli y ima mana alli kanqantaqa Jehovällam decidita puëdin. Alli kaqta y mana alli kaqta rikätsikoq montipa frütanta mikurmi, Adanwan Ëvaqa rikätsikuyarqan Jehoväman y mandakunqankunaman mana confiakuyanqanta. Kikinkunallam decidita munayarqan ima alli y ima mana alli kanqanta (Gen. 3:22). Tsëmi Dioswan amïgu këninkunata y mana wanushpa kawakïninkunata oqrariyarqan. Jinamampis, wamrankunatam wanïman y jutsaman chätsiyarqan (Rom. 5:12). Adanwan Ëva mana allita decidiyanqampitam alläpa sufrimientuman nunakunata chätsishqa.

Jesuspita Felïpi entiendiratsiptinmi, precisaq autoridäyoq eunücu niyanqan nunaqa jinan höram bautizakïta munarirqan. (Rikäri 2 y 3 kaq pärrafukunata).

2, 3. (1) Precisaq autoridäyoq eunücu niyanqan nunaqa, ¿imatataq rurarqan Diospita Felïpi yacharatsiptin? (2) Bautizakurqa, ¿ima bendicionkunatataq chaskintsik? (3) ¿Ima tapukïkunapitataq yachakushun?

2 Adanwan Ëvaqa manam agradecikuyarqantsu imëkata pëkunapaq Jehovä ruranqampita, peru precisaq autoridäyoq eunücu niyanqan nunaqa, Diospita Felïpi yachatsinqantam chaskikurqan. Tsëmi Jehoväwan Jesus pëpaq rurayanqampita alläpa agradecikurnin jinan höra bautizakurirqan (Hëch. 8:34-38). Noqantsikpis Jehovällatana sirwinapaq änikurnin y bautizakurninqa, Jehoväwan Jesus noqantsikpaq rurayanqampita agradecikunqantsiktam rikätsikuntsik. Jinamampis Jehoväman confiakunqantsikta y ima alli y ima mana alli kanqanta pëlla decidita puëdinqantam rikätsikuntsik.

3 Jehoväta sirwirnin bendicionkunata chaskinqantsikman pensarishun. Adanwan Ëvaqa imëkatam oqrayarqan, hasta mana wanushpa kawakïninkunatam. Y tsë llapanta yapë chaskinapaq kaqtam Jehoväqa änimantsik. Jina noqantsikrëkur  Jesus wanunqampitam, Diosqa jutsantsikkunata perdonamantsik y limpiu concienciayoq kanapaqmi yanapamantsik (Mat. 20:28; Hëch. 10:43). Jinamampis, entëru patsachömi juk familianölla Jehoväta sirwintsik y shamoq tiempuchö alläpa shumaq kawakïtam shuyarantsik (Juan 10:14-16; Rom. 8:20, 21). Tsë llapan bendicionkunata cläru rikëkar y Jehoväta reqikarpis, wakinqa manam bautizakuyänampaq decidiyantsu. ¿Imanirtaq bautizakuyänampaq decidiyantsu? Y ¿imataq yanapanqa tsëta decidiyänampaq?

¿IMAKUNATAQ MICHÄSHUNKI MANA BAUTIZAKUNËKIPAQ?

Bautizakuyänampaqqa wakinqa pasëkäyanqan problëmakunatam venciyänan.

Següru mana kanqëki (Rikäri 4-5 kaq pärrafukunata). *

4, 5. Avery jutiyoq jövin y Hannah jutiyoq shipashqa, ¿imanirtaq bautizakïta munayaqtsu?

4 Següru mana kanqëki. Avery jutiyoq jövinpa teytankunaqa Testïgum kayan. Jina papäninqa alli nuna y alli anciänum, tsënö kaptimpis pëqa manam bautizakïta munarqantsu. Kënömi nin: “Papänïnö alli cristiänu mana kanäpaq kaqtam pensaq kä”. Jinamampis kë jövinqa pensaq, congregacionchö rurëkunata cumplita mana puëdinampaq kaqtam. Y kënömi nin: “Llapankunapa puntanchö mañakunäpaq, discursuta ruranäpaq y predicacionchö grüputa diriginäpaq kaqta niyämänantam mantsaq kä”.

5 Jina 18 watayoq Hannah jutiyoq shipashnam imatapis decidinampaq kaqta musyaqtsu. Jehoväta sirweq familiachö wätashqa këkarpis, imapaqpis mana väleqnö sientikurmi, Dios munanqannö kawëta mana puëdinampaq kaqta pensaq. Y höraqa alläpa mana alli sientikurmi cuerpunta dañakoq. Kënömi nin: “Manam pitapis cuerpüta dañakunqätaqa willaqtsu kä. Tsëmi ruranqäpita Jehovä imëpis mana perdonamänampaq kaqman pensaq kä”.

Mana alli amïgukuna (Rikäri 6 kaq pärrafuta). *

6. ¿Imanirtaq Vanëssaqa bautizakurqantsu?

6 Mana alli amïgukuna. 22 watayoq Vanëssa shipashmi kënö nin: “Juk alli amïgämi kapamarqan, pëwanqa chunka watapanam reqinakuyarqä”. Peru amïganqa manam Vanëssa creinqanman interesäkoqtsu y bautizakunampaqpis manam yanapaqtsu, tsëmi alläpa llakikur kënö nin: “Amïgata rurëqa mana fäciltsu noqapaq karqan, tsëmi ‘pënö amïgataqa mananachi tarishaqtsu’ nir pensaq kä”.

Jutsaman ishkita mantsanqëki (Rikäri 7 kaq pärrafuta). *

7. ¿Imatataq Makayla mantsapakoq, y imanir?

7 Jutsaman ishkita mantsanqëki. Makayla jutiyoq shipash pitsqa watayoq këkaptinmi, congregacionpita turinta qarquriyarqan. Tiempuwanqa rikarqanmi turin ruranqankunapita teytankuna alläpa sufriyanqanta. Kënömi nin: “Noqaqa jutsaman ishkita mantsar, congregacionpita qarquyämänanta y teytäkunata sufritsita mantsarmi bautizakurqätsu”.

Chikiyänanta mantsar (Rikäri 8 kaq pärrafuta). *

8. ¿Imatataq mantsaq Miles jutiyoq jövin?

 8 Chikiyänanta mantsar. Rikärishun Miles jutiyoq jövinta ima pasanqanta. Papänin y mädrastanqa Jehoväpa testïgunmi kayan, peru mamäninqa manam. Tsëmi Milesqa kënö nin: “Mamänïwanqa 18 watapam tärarqä. Y papänï testïgu tikrariptinmi mamänïqa alläpa piñakurqan, tsëmi noqawampis piñakunanta mantsar, bautizakïta munanqäta willaqtsu kä”.

¿IMATAQ YANAPASHUNKI BAUTIZAKÏTA MANA MANTSAKUNËKIPAQ?

9. Jehoväta mas reqirninqa, ¿imata ruranëkipaqtaq yanapashunki?

9 Adanwan Ëvaqa manam Jehoväta kuyayarqantsu, tsëmi manana sirwiyänampaq decidiyarqan. Tsënö kaptimpis, Jehoväqa atska watapa kawayänanta y wamrankuna kayäpunantam permitirqan. Jina kikinkunam wamrankunata imanö wätayänampaq decidiyänan karqan. Peru Adanwan Ëvaqa cuentatam qokuriyarqan, Jehoväta mana cäsukï alläpa mana alli kashqa kanqanta. Mayor kaq tsurinkuna Cainmi wawqinta wanuratsirqan, y tsëpita tiempuwanqa llapan nunakunam alläpa mana alli y chiki tikrakuriyarqan (Gen. 4:8; 6:11-13). Peru sirwita munaq nunakunata salvanampaqmi Jehoväqa juk yanapakïta dispunirqan (Juan 6:38-40, 57, 58). Tsëqa rikätsimantsik Jehovä alläpa kuyakoq y pacienciakoq kanqantam. Salvamänapaq imata ruranqanta yachakurqa masmi kuyashun. Y Adanwan Ëva rurayanqantaqa manam rurëta munashuntsu, sinöqa imëyaqpis Diosta sirwitam munashun.

¿Imataq yanapashunki kë problëmakunata vencinëkipaq?

(Rikäri 9 y 10 kaq pärrafukunata). *

10. Salmus 19:7 textu ninqanman yarpachakunqëkiqa, ¿imachötaq yanapashunki? Willakaramï.

10 Jehoväpita yachakurnin sïgui. Jehoväta mas reqirninqa, pëmanmi mas confiakunki y tsëmi yanapashunki sirwinëkipaq. Avery jutiyoq jövinmi willakun, Salmus 19:7 * (leyi) textu ima ninqanta mas yachakunqan y tsëman pensanqan Diosman mas confiakunampaq yanapashqa kanqanta. Y Biblia ninqan kawëninchö cumplikanqanta rikarmi, Jehoväta mas kuyar qallëkurqan. Jehoväta kuyanqantsikqa, manam pëman  confiakunallapaqtsu yanapamantsik, sinöqa voluntäninta rurar ocupädu kanapaqpis yanapamantsikmi. Hannah jutiyoq shipashnam kënö nin: “Bibliata leyinqä y estudianqämi entienditsimashqa cuerpüta dañakurqa Jehoväta alläpa llakitsinqanta” (1 Pëd. 5:7). Hannahqa Palabran Bibliachö Jehovä ninqanta ruranampaqmi kallpachakurqan (Sant. 1:22). Tsënö ruranqanqa alläpam yanapashqa, y kënömi cuentakun: “Jehoväta cäsukï alläpa yanapakunqanta rikanqämi, mas kuyanäpaq yanapamashqa. Kananqa segürum këkä imëpis Jehovä yanapamänampaq kaqta”. Hannahqa manam kananqa cuerpunta dañakunnatsu y Diosta sirwinampaqmi bautizakushqa.

(Rikäri 11 kaq pärrafuta). *

11. (1) ¿Imanötaq Vanëssaqa alli amïgukunata tarirqan? (2) Noqantsikqa, ¿imatataq yachakuntsik?

11 Amïguïkikunata alleq akrë. Tiempuwanqa Vanëssaqa cuentatam qokurirqan Jehoväta sirwinampaq amïgan mana yanapëkanqanta. Tsëmi amïgan këta jaqirirqan y congregacionchö amïgukunata ruranampaqmi kallpachakurqan. Jina, Noëpa y familiampa ejemplun yanapashqa kanqantam nin. Y kënömi nin: “Noëwan familianqa, Jehoväta mana kuyaq nunakunawanmi kawayarqan, tsëmi kikinkunapura juntakurnin kushishqa sientikuyaq”. Vanëssaqa bautizakushqanam y kananqa precursöranömi yanapakïkan. Y imanö sientikunqampitam kënö cuentakun: “Precursöra kanqämi yanapamashqa alli amïgukunata tarinäpaq, y hasta juk congregacionkunachöpis”. Jövin, qampis nunakunata yachatsinëkipaq Jehovä mandakunqanta cäsukurqa alli amïgukunatam tarinki (Mat. 24:14).

(Rikäri 12-15 kaq pärrafukunata). *

12. ¿Imanirtaq Adanwan Ëvaqa Jehoväpa contran churakäyarqan y tsëta rurayanqanqa imamantaq chätsirqan?

12 Mantsakïnikikunata venci y Jehoväta mantsë. Këqa manam kikin Jehoväta mantsë ninantsu, sinöqa mana allita rurarnin Diosta llakitsita mantsëmi (Sal. 111:10). Adanwan Ëvaqa manam Diosta llakitsita mantsayarqantsu, tsëmi pëpa contran churakäyarqan. Y tsëta rurarmi cuentata qokuriyarqan jutsasapa tikrashqa kayanqanta y llapan wamrankunata wanïman y jutsaman chätsishqa kayanqanta. Jina qalapächu kayanqampitam penqakur tsapakuyarqan (Gen. 3:7, 21).

13, 14. (1) 1 Pëdru 3:21 textu ninqannö, ¿imanirtaq wanïta mantsashwantsu? (2) ¿Imanirtaq Jehoväta kuyantsik?

 13 Mana allita rurarnin Diosta llakitsita mantsëqa allillam, peru wanïtaqa manam mantsanantsiktsu. Porqui Jehoväqa mana wanushpa kawanapaqmi juk yanapakïta qomashqantsik. Tsëmi jutsata ruranqantsikpita arrepentikushqaqa, Jesusman confiakunqantsikpitam Jehoväqa perdonamäshun. Jina Jesus wanunqanman confiakunqantsiktaqa rikätsikuntsik Jehovällatana sirwinapaq änikurnin y bautizakurninmi (leyi 1 Pëdru 3:21).

14 Imëkata Jehovä noqantsikpaq ruramunqankunapitam kuyantsik. Manam cada junaq imëka allikunallatatsu qomantsik, sinöqa pëta mas reqinapaq y munënin ima kanqanta musyanapaqmi yachatsimantsik (Juan 8:31, 32). Tsëpaqqa congregacionkunatam patsätsimushqa, tsëchö yachatsimänantsikpaq y yanapamänapaq. Jina problëmakunapa pasashqapis aguantanapaqmi yanapamantsik y shamoq tiempuchö mana wanushpa alli kawakïtam änimantsik (Sal. 68:19; Rev. 21:3, 4). Awmi, kuyamarnintsikmi Jehoväqa imëkata noqantsikpaq ruramushqa. Tsëkunaman pensanqantsikmi pëtapis mas kuyanapaq yanapamäshun. Tsëmi Diosta kuyarninqa llakitsita munashuntsu.

15. ¿Imataq Makaylataqa yanapashqa jutsa rurëman ishkita alläpa mana mantsakunampaq?

15 Makayla jutiyoq shipashqa, Jehovä imëpis perdonanampaq listu këkanqantam cuentata qokurirqan, tsëmi yanaparqan jutsa rurëman ishkita alläpa mana mantsanampaq. Kënömi nin: “Cuentatam qokurirqä jutsasapa karnin imallachöpis llapantsik pantarinqantsikta. Jina yachakurqämi Jehoväqa alläpa kuyamanqantsikta y Jesus wanunqanrëkur perdonamanqantsikta”. Makaylaqa Jehovällatana sirwinampaqmi änikurqan y bautizakurqan, y tsëta decidinampaqqa Jehoväta kuyanqanmi yanapashqa.

(Rikäri 16 kaq pärrafuta). *

16. ¿Imataq Milestaqa yanaparqan michëkäyaptimpis bautizakunampaq?

16 Bautizakunanta mamänin michäkunampaq kaqta mantsaq Miles jutiyoq jövinmi, congregacionkunata watukaq wawqita yanaparinampaq nirirqan. Kënömi nin: “Congregacionkunata watukaq wawqipapis mamäninqa manam Testïgutsu karqan. Pëmi yanapamarqan mamänïta imanö parlapänapaq kaqta. Y kikï decidinqäta y papänï mana obliguëkämanqanta mamänïta rikätsinäpaq kaqtam nimarqan”. Milespa mamänintaqa manam gustarqantsu. Tsëmi wayimpita ëwakurqan, porqui bautizakïtam munarqan. Y kënömi willakun: “Noqantsikrëkur Tsurin wanunanta Jehovä permitinqampita yachakunqämi shonqüyaq chärirqan. Y tsëman pensanqämi, Jehovä alläpa kuyamanqanta cuentata qokunäpaq yanapamarqan, tsëmi Jehoväta sirwinäpaq y bautizakunäpaq decidirqä”.

 DECIDINQËKITA CUMPLI

Noqantsikpaq Jehovä ruranqankunapita agradecikoq kanqantsiktaqa rikätsikïta puëdintsikmi. (Rikäri 17 kaq pärrafuta).

17. Llapantsikpis, ¿imatataq rikätsikïta puëdintsik?

17 Eden huertachö këkaq frütata Ëva mikurirqa, teytan Jehoväpa contranmi churakärirqan. Y Adanpis tsë frütata mikurirqa, pëpaq Jehovä imëkata ruranqampita mana agradecikoq kanqantam rikätsikurqan. Adanwan Ëvanö mana kanqantsiktam llapantsikpis rikätsikïta puëdintsik. ¿Imanö? bautizakurninmi rikätsikuntsik ima alli y ima mana alli kanqantaqa Jehovälla decidita puëdinqanta. Jinamampis, kuyanqantsikta y pëman confiakunqantsiktam rikätsikuntsik.

18. ¿Imatataq ruranëki cada junaq Jehovä ninqannö kawanëkipaq?

18 Bautizakurirqa manam noqantsik munanqantsiknönatsu kawanantsik, sinöqa Jehovä mandakunqannömi cada junaq kawanantsik. Tsënö kawakïqa manam fäciltsu, peru cada watam mëtsikaq millonyëpayan nunakuna tsënö kawakuyan. Qampis Jehovä munanqannö kawakïtaqa puëdinkim. Peru tsëpaqqa Bibliapitam mas yachakur sïguinëki, wawqikunawan y panikunawanmi mas tiemputa pasanëki y wakinkunatam Diospita yachakunqëkita parlapänëki (Heb. 10:24, 25). Jina imatapis decidirninqa Palabran Bibliawan y markanwan Jehovä consejashunqëkitam cäsukunëki (Is. 30:21). Tsëta ruraptikiqa imata decidinqëkipis allillam yarqapushunki (Prov. 16:3, 20).

19. ¿Imatataq imëpis yarpänëki y imanir?

19 Jehoväpa consëjunkuna vïdëkichö alläpa yanapashunqëkita imëpis yarparqa, masmi pëta kuyanki y leyninkunatapis cäsukïtam munanki. Y imëkata rurarpis Satanasqa manam Jehoväta sirwinëkita jaqitsishunkitsu. Waranqa wata pasariptin bautizakunqëkiman yarparninmi kënö ninki: “Tsëmi vïdachö mas alli kaq decisionqa kashqa”.

28 KAQ CANCION ¿Imanöraq Jehoväpa amïgun kashwan?

^ par. 5 Bautizakunëkipaq o mana bautizakunëkipaq decidinqëkim vïdëkichöqa masqa precisan. ¿Imanirtaq precisan? Kë yachatsikïchömi tsëta yachakushun. Jinamampis, bautizakïta mantsapakïkaqkunatam yanapanqa, imanir mantsapakuyanqanta venciyänampaq.

^ par. 10 Salmus 19:7: “Jehoväpa leyninqa chipyëpa allim, kawëtam kutikätsin. Jehoväpa yarpätsikïninqa markäkïpaqmi, mana yachaqtapis yachaqtam tikraratsin”.

^ par. 57 FÖTUKUNATA Y DIBÜJUKUNATA MAS ENTIENDINAPAQ. Següru mana kanqëki: Juk jövinmi reunionkunachö parlakïta mantsakun.

^ par. 59 FÖTUKUNATA Y DIBÜJUKUNATA MAS ENTIENDINAPAQ. Mana alli amïgukuna: Juk shipashmi mana alli amïganwan ëwëkarnin yachatsikïkaq panikunata rikëkur penqakun.

^ par. 61 FÖTUKUNATA Y DIBÜJUKUNATA MAS ENTIENDINAPAQ. Jutsa rurë: Juk shipashmi congregacionpita turin qarqushqa kaptin y wayimpita ëwakuptin, pëpis jutsaman ishkinampaq kaqman pensar mantsakun.

^ par. 63 FÖTUKUNATA Y DIBÜJUKUNATA MAS ENTIENDINAPAQ. Chikiyänanta mantsë: Juk jövinmi mana Testïgu mamäninwan këkarnin mantsakïkarpis Jehoväman mañakïkan.

^ par. 66 FÖTUKUNATA Y DIBÜJUKUNATA MAS ENTIENDINAPAQ. Següru mana kanqëki: Juk jövinmi mas preparakunampaq kallpachakïkan.

^ par. 68 FÖTUKUNATA Y DIBÜJUKUNATA MAS ENTIENDINAPAQ. Mana alli amïgukuna: Juk shipashmi Jehoväpa testïgun kanqampitam orgullösu sientikun.

^ par. 70 FÖTUKUNATA Y DIBÜJUKUNATA MAS ENTIENDINAPAQ. Jutsa rurë: Juk shipashmi Jehoväta kuyarninmi bautizakurin.

^ par. 72 FÖTUKUNATA Y DIBÜJUKUNATA MAS ENTIENDINAPAQ. Chikiyänanta mantsë: Juk jövinmi mana mantsakushpa Bibliachö yachakunqampita mamäninta willëkan.