Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Septiembri de 2016

“Diospa palabranqa kawëkaqmi”.

Leyeqkuna tapukuyanqan

Leyeqkuna tapukuyanqan

¿Imapaqtaq parlëkan Hebrëus 4:12 (NM) textu “Diospa palabranqa kawëkaqmi, y alläpa poderyoqmi” nirqa?

“Diospa palabranqa kawëkaqmi” nirqa, apostol Pablu parlëkarqan Diospa munënin rurakänampaq willakïkunapitam. Tsëtaqa entiendintsik qepan kaq y puntan kaq versïculukuna ninqanwanmi.

Hebrëus 4:12 (NM) textu ninqantaqa utilizantsik, nunakunapa kawëninta Biblia cambiëta puëdinqanta yachatsikunapaqmi. Y tsënö yachatsikunqantsikqa allillam. Peru alläpam precisan kë versïculuta qellqarnin Pablu imapaq parlëkanqanta musyanantsikpis. Pëqa hebreu cristiänukunata animëkarqan Diospa munënin cumplikänampaq yanapakuyänampaqmi. Diospa munënin ima kanqanqa qellqarëkarqannam. Kë kutichöqa Pablu yarpätsikurqan Egiptupita israelïtakuna librashqa kayanqantam. Israelïtakunaqa shuyaräyarqan Dios äninqan “lichiyoq y mielyoq patsaman” yëkïtam, tsëchömi rasumpa jamakïchö kawakuyänan karqan (Exodu 3:8; Deuteronomiu 12:9, 10).

Tsëmi Diospa munëninqa karqan. Peru israelïtakunaqa manam Jehoväman markäkuyarqantsu ni cäsukuyarqantsu, tsënöpam “Diospa jamakïninman” mëtsikaq yëkuyarqantsu (Nümerus 14:30; Josuë 14:6-10). Tsënö këkaptimpis apostol Pabluqa nirqan, noqantsikpis “änimashqantsic jamaquininta” tarita puëdinqantsiktaraqmi (Hebrëus 3:16-19; 4:1). Tsë änikïpis Diospa munëninmi karqan. Hebrëu cristiänukunanömi tsë änikïpita leyita puëdintsik y tsë änikï cumplikänampaq yanapakïta puëdintsik. Kë änikï Diospa Palabranchö qellqarëkanqanta rikätsikunampaqmi, Pabluqa Genesis 2:2 y Salmu 95:11 textukunata utilizarqan.

Diospa jamakïninman yëkïta puëdinqantsiktaraq musyëqa alläpam kushitsimantsik. Biblia ninqannömi tsëman yëkïta puëdinqantsikmanqa alläpa markäkuntsik, tsërëkurmi yëkunapaqqa sinchikuntsik. Dios chaskimänapaqqa manam Moises qellqanqan leytatsu cumplinantsik ni allikunata rurëllatatsu procurantsik. Tsëpa rantinqa, Diospa munënin cumplikänampaqmi kushishqa yanapakuntsik y Diosman markäkurmi yanapakur sïguintsik. Entëru Patsapam mëtsikaq nunakuna Bibliapita yachakïkäyan y Diospa munënin ima kanqanta musyëkäyan. Tsënöpam kawëninkunata mëtsikaq cambiayashqa, markäkuyashqa y bautizakuyashqa. Këkunam rikätsikun ‘Diospa palabranqa kawëkaq y alläpa poderyoq’ kanqanta. Munëninta Palabranwan musyatsikunqanqa kawënintsikta cambiashqanam y cambiarmi sïguinqa.