Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Octubri de 2017

Shumaq tratayanqampitam

Shumaq tratayanqampitam

JOHNQA India nacionchö këkaq Gujarat nishqan markachömi familiankunawan täräyaq. 1959 wata witsanmi teytanqa Jehoväpa testïgun tikrarirqan. Peru John, mamänin, wawqinkuna y paninkunaqa alläpa catölicum kayarqan, y Testïgu kanqanrëkurmi teytampa contran churakäriyarqan. Tsë witsankunaqa, Johnqa 13 watayoqnömi karqan.

Juk junaqmi, teytanqa congregacionchö amïgumpaq juk sobrita apanampaq Johnta mandarqan. Peru tsë qoyaqa lätapita bidonta kichëkarninmi dëdunta roqukurirqan. Tsënö këkarpis, teytanta wiyakurmi makinta juk ratashwan watarkur ëwarqan.

Chärirqa manam teytampa amïguntaqa tarirqantsu, tsëmi apanqan sobrita warminllata entreguëkurqan, y pëpis Testïgum kanaq. Y pëqa Johnpa makinta rikärirmi dëdunta jampipur vendapurqan. Tsëpitanam upunampaq qoñoq yakuta qararirnin, Bibliapita shumaq parlakuyarqan.

Tsënö shumaq tratanqampitam, Jehoväpa testïgunkunataqa allipana rikar qallëkurqan. Johnqa creeq Jesus Dios kanqantam, y Marïaman mañakuna kanqantam. Peru teytanqa manam tsënötsu creeq. Tsëmi tsëkunapaq tsë panita tapurirqan. Pëqa guajarati idiömata yachakushqa karmi, tapukïninkunata contestar Johnta idiömanchö Bibliawan yacharatsirqan, y tsëpitanam “Estas buenas nuevas del reino” nishqan follëtuta qararirqan.

Tsë follëtuta leyirirqa, Johnqa cuentatam qokurirqan rasumpa kaqta yachatsikunqanta. Tsëpitanam iglesiata ëwarqan cüra asheq, y panita tapunqan tapukïkunallatam tapurqan. Peru cüraqa alläpa piñakurmi Bibliawan qompëkur qayaparnin kënö nirqan: “¡Diablumanmi tikrarirqunki! ¿Mëchötaq Bibliaqa nin Jesus Dios mana kanqanta? ¿Mëchötaq virgen Marïaman mana mañakunapaq willakun? Mä tsëta rikätsimë” nishpa. Johnqa manam ni ichikllapis pensarirqantsu cüra tsënö ninampaq kaqtaqa. Tsëmi, “manam ni imëpis catölica iglesiamanqa shamushaqnatsu” nishpa ëwakurqan. Y tsënömi karqan.

Johnqa Testïgukunawanmi Bibliapita yachakur qallëkurqan y Jehoväpa sirweqninmi tikrarirqan. Y wakin familiankunapis tsënöllam rurayarqan. Derëcha kaq makinchö sirata cadalla rikarmi, shumaq tratayanqanrëkur rasumpa kaqpita yachakunqanta kuyakïwan yarpan (2 Cor. 6:4, 6). Y tsëpitaqa 60 watakunanam pasarishqa.