Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Octubri de 2017

Kuyakoq kanqantsikta rikätsikushun

Kuyakoq kanqantsikta rikätsikushun

“Ama [...] shimillapaqa kuyakoq kashuntsu, sinöqa rurënintsikwan y shonqupita patsë” (1 JUAN 3:18).

CANCION: 72 Y 124

1. ¿Pillapitataq rasumpa kuyakoq këta yachakïta puëdintsik y imanir? (Rikäri kë yachatsikïpa qallananchö këkaq fötukunata).

JEHOVÄLLAPITAM rasumpa kuyakoq këtaqa yachakïta puëdintsik (1 Juan 4:7). Porqui pëqa manam shimillapatsu “kuyaqmi” nimantsik, sinöqa yanapamënintsikta munarmi imëkata ruramun, y manam kutitsinantsikta shuyarantsu. Tsënö kuyakïpaqmi griëgu idiömachöqa agäpe nin. Y juk diccionariunam nin, agäpe nishqan kuyakïtaqa rurënintsikwanraq rikätsikuna kanqanta. Tsënö kuyakïyoq karninqa kushishqa y shumaqmi kawakushun.

2, 3. ¿Imanötaq nunakunata alläpa kuyanqanta Jehovä rikätsikushqa?

2 Adantawan Ëvata manaraqpis kamarninmi Jehoväqa nunakunata kuyamanqantsikta rikätsikurqan. Tsëmi kë shumaq Patsata imëkayoqta kamarqan. Manam kikimpaqtsu rurarqan, sinöqa nunakuna kushishqa kawakuyänanta munarmi. Jina mana wanushpa kawayänantapis munarqanmi.

3 Adanwan Ëva jutsata rurariyaptimpis, Jehoväqa imatapis mana shuyarashpam alläpa kuyakoq kanqanta rikätsikurqan. Tsëmi pëkunapita miraq wakin nunakuna kuyayänampaq  kaqta següru karnin, jutsankunapita pagakunampaq juk Salvakoqta änikurqan (Gen. 3:15; 1 Juan 4:10). Y änikunqampita patsëqa, Jehoväpaqqa pagakushqanönam karqan. Y tsëpita chusku waranqa wata pasariptinqa, alläpa llakikïkarpis japallan Tsurintam noqantsikrëkur wanunampaq mandamurqan (Juan 3:16). ¿Manaku tsëtaqa alläpa agradecikuntsik?

4. ¿Puëdintsikku imatapis mana shuyarashpa kuyakoq kanqantsikta rikätsikïta?

4 Diosnintsik kikin niraqta kamamashqantsik kaptinmi, kuyakoq karnin, kutitsimänata mana shuyarashpa wakinkunata yanapëta puëdintsik. Höraqa jutsasapa kashqam fäciltsu kanman, peru puëdintsikmi. Pensarishun, Abelqa Jehoväta alläpa kuyarmi kapunqampita mas allin kaqninta qoykurqan (Gen. 4:3, 4). Abrahanpis tsurin Isaacta ofrendatanö qonampaqmi decidïdu këkarqan (Sant. 2:21). Y Noënam nuna mayinkunata kuyarnin, mana cäsukïkäyaptimpis mëtsika watakunapa Diospita parlaparqan (2 Pëd. 2:5). Noqantsikpis pëkunanöllam kuyakoq kanqantsiktaqa rikätsikïta puëdintsik.

RASUMPA KUYAKÏ Y JANAN SHONQULLA KUYAKÏ

5. ¿Imanötaq rasumpa kaq kuyakïtaqa mas alli rikätsikushwan?

5 Bibliaqa entienditsikun, rasumpa kaq kuyakïtaqa “rurënintsikwan y shonqupita patsë” rikätsikuna kanqantam (1 Juan 3:18). Parlakïnintsikchöpis rikätsikïtaqa puëdintsikmi (1 Tes. 4:18). Peru tsëpitapis masqa, rurënintsikwan rikätsikunqantsikmi mas alliqa. Këllaman pensarishun, juk cristiänu mayintsik mallaqëkaptin o röpannaq këkaptin kuyakïpa parlapärinqantsikllaqa manam yanapanqatsu (Sant. 2:15, 16). Jina tsënöllam, Diosta y nuna mayintsikta kuyarninqa, manam mas yachatsikoqkunata mandamunanllapaqtsu mañakushun, sinöqa llapan puëdinqantsikmannömi yachatsikïta procurashun (Mat. 9:38).

6, 7. (1) ¿Imanötaq shonqupita patsë kuyakïqa? (2) ¿Pikunataq janan shonqulla kuyakuyarqan?

6 Apostol Juanqa, “rurënintsikwan y shonqupita patsë” kuyakunapaqmi nirqan. Juk parlakïchöqa, manam ‘janan shonqullaqa’ kuyakunantsiktsu (Rom. 12:9; 2 Cor. 6:6). Pensarishun, imatapis chaskita munarlla pitapis yanaparinqantsik o alli shimintsikpa parlapärinqantsikqa, ¿rasumpa kuyakïtsuraq kanman? Manam. Tsënö alli tukunqantsikqa manam rasumpa kuyakïtsu y manam imapaqpis välintsu.

7 ¿Pikunataq janan shonqulla kuyakoq kayarqan? Jukqa karqan Satanasmi. Pëqa munëninta logrëta munarllam Ëvata pasëpa alli tukur parlaparqan (Gen. 3:4, 5). Jina Ahitofelpis ardëllam rey Davidpa amïgun tukurqan, peru munëninta logranampaq tiempu chäriptinqa traicionarirqanmi (2 Sam. 15:31). Kanan witsampis Diospa contran churakashqakuna y wakin nunakunaqa, cristiänukunatam congregacionpita rakirita munayan alli shiminkunapa parlaparnin. Tsëtaqa rurayan kushishqa kawakuyanqampita chikikurninmi, y manam rasumpa kuyarnintsu (Rom. 16:17, 18).

8. ¿Ima tapukïkunatataq rurakunantsik?

8 Janan shonqulla kuyakunqantsikqa alläpa penqakïpaqmi. Nunakunata creitsirpis Jehovätaqa manam engañëta puëdintsiktsu. Tsëmi Jesusqa nirqan, janan shonqulla kuyakoqkunaqa ‘feyupa castigashqa’  kayänampaq kaqta (Mat. 24:51). Noqantsikqa manam janan shonqulla kuyakoq këta munantsiktsu. Tsëmi kënö tapukunantsik: “¿Kuyakïnïqa rasumpaku shonqupita patsë? O ¿imatapis logrëta munarllaku kuyakoq tukü?”. Rikärishun rasumpa kuyakïta imanö rikätsikunapaq kaqta.

RASUMPA KUYAKOQ KANQANTSIKTA RURËNINTSIKWAN RIKÄTSIKUSHUN

9. Cristiänu mayintsikta rasumpa kuyarqa, ¿imanötaq yanapashwan?

9 Ruranqantsikta jukkuna mana rikäyaptimpis voluntäwan rurashun. Cristiänu mayintsikkunata yanapanapaqqa listum këkänantsik, y tsëtaqa manam musyatsikunantsiktsu (leyi Mateu 6:1-4). Ananïaswan Safïraqa rurëkäyanqanta jukkuna musyayänantam munayarqan, y hasta alabayänanta munarmi llullakuyarqan. Y tsënö kayanqampitam Diosqa castigarqan (Hëch. 5:1-10). Cristiänu mayintsikkunata rasumpa kuyarninqa, ruranqantsikta mana musyatsikushllapam yanaparishun. Tsëtaqa yachakushwan Jehoväpa Testïgunkunata Pushaqkunapa yanapaqninkunapitam. Pëkunaqa manam willakuyantsu ni alabakuyantsu imanö yanapakuyanqampita.

10. ¿Imanötaq wakinkunata respetanqantsikta rikätsikushwan?

10 Wakinkunata respetashun (leyi Romänus 12:10). Jesusqa humildi karmi apostolninkunapa chakinkunata paqapurqan (Juan 13:3-5, 12-15). Pëkunaqa, Jesus tsëta imanir ruranqantaqa entiendiyarqan santu espïrituta chaskirir-ran (Juan 13:7). Noqantsikpis Jesusnö humildi këta y wakinkunata respetëtam procuranantsik. Manam pensanantsiktsu mas estudiashqa kanqantsikrëkur, kapoqyoq kanqantsikrëkur o Jehoväpa markanchö carguyoq kanqantsikrëkur wakinkunapita mas alli kanqantsiktaqa (Rom. 12:3). Jina yanapakushqa këkashqapis, wakinkunallata alabayaptin chikikunantsikpa rantinqa kushikunantsikmi.

11. ¿Imanirtaq wakinkunata rasumpa felicitashwan?

11 Janan shonqullaqa ama felicitäshuntsu. Alkäbum këkänantsik wakinkunata imallapitapis felicitärinapaq, porqui tsëqa alläpam yanapakun (Efes. 4:29). Peru manam janan shonqullaqa, ni alabëta munarllaqa felicitänantsiktsu, sinöqa shonquntsikchö sientinqantsikpitam kanan. Jina precisaptinqa consejanantsikmi (Prov. 29:5). Pitapis shumaq alabapärir jukkunachö malnin parlëqa traicionëru këmi kanman. Rasumpa kuyakoq këtaqa apostol Pablupitapis yachakïta puëdintsikmi. Juk kutim Corintu markachö këkaq cristiänukunata rurayanqampita shumaq felicitarqan (1 Cor. 11:2). Tsënö karpis, mana allita rurëkäyanqampitaqa alleq clärum consejarqan (1 Cor. 11:20-22).

Yanapanantsikta wanaqkunata yanaparninmi, kuyakoq y alli kanqantsiktaqa rikätsikuntsik. (Rikäri 12 kaq pärrafuta).

12. ¿Imanötaq rasumpa kuyakoq kanqantsikta rikätsikuntsik?

12 Llapankunawan alli kashun. Jehoväqa mandamantsik llapan cristiänu mayintsikkunawan alli kanantsikpaqmi (leyi 1 Juan 3:17). Peru alli shonquwan rurëkanqantsikta musyanapaqqa kënömi tapukunantsik: “¿Amïgü kaqkunallataku o congregacionchö mas precisaqtanö rikanqä kaqkunallataku wayïman invitä? ¿Kutitsimänanta munarllaku pitapis invitä? ¿O mana reqinqä kaqkunawampis y kutitsimëta mana puëdeqkunawampis alli këtaku procurä?” (Lüc. 14:12-14). Jina  këman pensarishun, wakinkunaqa mana allita decidiyanqanrëkurmi sufriyan, y wakinkunanam yanaparishqapis agradecikuyantsu. ¿Manatsuraq alli kanqantsikrëkur pëkunata yanapar sïguishwan? Awmi. Apostol Pëdrupis, mana piñakushllapa ‘alli nuna kayë’ nirmi consejamantsik (1 Pëd. 4:9). Kë consëjuta wiyakurninqa kushishqam sientikushun (Hëch. 20:35).

13. (1) ¿Ima cäsukunachötaq mas pacienciayoq kanantsik? (2) ¿Imanötaq dëbil kaqkunata yanapashwan?

13 Dëbil kaqkunata yanapashun. Rasumpa kuyakoq kanqantsiktaqa rikätsikuntsik, pishipëkaqkunata yanaparnin y llapankunawan pacienciakoq karninmi (1 Tes. 5:14). Mëtsikaq cristiänukunam Diospa kaqchö dëbil këkarnimpis tiempuwanqa poqu cristiänu këman chäriyan. Peru wakinkunaqa pacienciawan yanapar sïguinatam wanayan. ¿Imanötaq yanapashwan? Bibliawan animarnin, pëkunawan yachatsikoq yarqurnin y parlapämanqantsikkunata pacienciawan wiyarninmi. Jinamampis wakin cristiänukunata dëbiltanö y wakintana poqutanö rikänantsikpa rantinqa, llapantsikpis imallachöpis fallëkanqantsiktam cuentachö katsinantsik. ¿Manaku apostol Pablupis pishipanqanta nirqan? (2 Cor. 12:9, 10). Llapantsikmi pillapis shumaq parlapäramänataqa wanantsik.

14. ¿Imatataq ruranantsik cristiänu mayintsikkunawan shumaq kawakunapaq?

14 Shumaq kawakunapaq yanapakushun. Mana alli tratamashqa o ima pasakuptimpis cristiänu mayintsikkunawanqa shumaq kawakïtam procuranantsik (leyi Romänus 12:17, 18). Tsëmi pitapis ofendishqa karqa perdontam mañakunantsik. “Parlarinqäta mana entiendirmi piñakurqunki” ninantsikpa rantinqa, “cuentata mana qokur parlarinqäpita disculpëkamë” ninantsikmi. Casädu kawakïchöpis shumaq kawakïqa alläpam precisan. Mana allim kanman, allquwan mishinö wayintsikchö mana alli kawakïkar nunakuna rikämänallapaq alli tratanakunqantsikqa.

15. ¿Imanötaq rasumpa perdonakoq kanqantsikta rikätsikuntsik?

15 Perdonakoq kashun. Pipis ofendiramashqaqa perdonëkunantsikmi, y ruramanqantsiktam qonqëkunantsik. Porqui Diospa Palabranmi mandamantsik juknintsik juknintsik aguantanakunapaq (Efes. 4:2, 3). Rasumpa perdonakoq karninqa, manam ofendimanqantsikta yarparänantsiktsu (1 Cor. 13:4, 5). Peru yarparäkurqa, ofendimaqnintsik cristiänuwan y Jehoväwanmi amïgu kënintsikta oqrarishwan (Mat. 6:14, 15). Jina perdonakoq kanqantsiktaqa rikätsikuntsik,  ofendimaqnintsikpaq Diosnintsikman mañakurninmi (Lüc. 6:27, 28).

16. ¿Imapaqtaq utilizashwan chaskinqantsik carguta?

16 Wakinkunapa biennin ashishun. Jehoväpa markanchö pipis carguta chaskirninqa, wakinkunata yanapanampaqmi tsë carguta utilizänan, y manam kikimpa provëchumpaqtsu (1 Cor. 10:24). Këllaman pensarishun, asamblëachö pipis acomodador karninqa, manam tsë cargumpita provechakuntsu puntata chärirnin familiankunapaq o amïgunkunapaq alli kaq asientukunata rakinampaq. Tsëpa rantinqa, wakinkuna alli jamakuyänanta munarmi kikinqa mëllamampis jamakun. Tsënöpam rikätsikun rasumpa kuyakoq kanqanta.

17. Pipis jutsata rurarirqa, ¿imanirtaq willakunman?

17 Jutsaman ishkirqa willakushun y amana rurashunnatsu. Wakin cristiänukunaqa jutsata rurarirmi, penqapäyänanta mantsar o wakinkunata llakitsita mantsarnin willakuyantsu (Prov. 28:13). Peru mana willakurqa manam kuyakoqtsu kayan, porqui kikinkunata y wakinkunatam mana allita rurëkäyan. Jina Jehoväpa santu espïritumpis manam congregacionchö yanapakunqanatsu, y tsërëkurmi shumaq kawakïqa kanqanatsu (Efes. 4:30). Jutsata ruraq cristiänu rasumpa kuyakoq karninqa, anciänukunatam willanan yanapayänampaq (Sant. 5:14, 15).

18. ¿Imataq imëkapitapis masqa precisan y imanir?

18 Kuyakoq këmi imëkapitapis masqa precisan (1 Cor. 13:13). Jehovänö rasumpa kuyakoq këta procurarninqa, Jesuspa qateqninkuna kanqantsiktam rikätsikushun (Efes. 5:1, 2). Apostol Pablum nirqan mana kuyakoq karninqa imapaqpis mana välinqanta (1 Cor. 13:2). Tsënö këkaptinqa, kuyakoq kanqantsikta “rurënintsikwan y shonqupita patsë” imëpis rikätsikushun.