Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Octubri de 2017

¿Musyarqëkiku?

¿Musyarqëkiku?

¿Imanirtaq judïukuna jurakuyanqantaqa Jesus condenarqan?

MOISES qellqanqan Leychöqa, juramentu rurë höraqa alli kanqantam nin. Peru Jesus kë Patsachö kawanqan witsan judïukunaqa, parlayanqankunata välinampaqmi imallapaqpis juramentutaraq rurayaq. Tsëmi Jesusqa tsënö rurayanqanta condenar ishkë kutipa kënö nirqan: “‘Awmi’ ninqëkiqa, awmi katsun, y ‘Manam’ ninqëkiqa, manam katsun” (Mat. 5:33-37; 23:16-22).

Jina juk diccionarium willakun, parlayanqanta välitsiyänanrëkur judïukuna imëpis jurayanqanta Talmud libru rikätsikunqanta. Tsë Talmud libruchöqa, mëqan juramentuta cumpliyänampaq kaqta y mëqanta mana cumpliyänampaq kaqtam cläru willakun.

Tsënö costumbrinkunataqa manam Jesusllatsu condenarqan. Pasakunqankunata qellqaq Flaviu Josëfu jutiyoq nunapis, juk grüpu judïukunapaq parlarninmi kënö nirqan: “Pëkunaqa manam juramentuta rurayantsu, porqui ulikïpitapis (llullakuypitapis) mas mana allitanömi rikäyan. Jukkuna creiyänanrëkur Diospa jutinchöraq juraq nunakunaqa ulikoq kayanqantam niyan”. Jina judïukunapa librun Eclesiástico o Sabiduría de Jesús Ben Sirá nishqampis kënömi nin: “Imëkapaq juraq nunaqa, alläpa mana alli ruraqmi” (23:11). Awmi, tsënö rurayanqanta condenarqa, llutalla imëkapaqpis jurëqa mana alli kanqantam Jesusqa cläru rikätsikïkarqan. Tsëqa, ¿creimänantsikrëkur jurakunantsik precisanku? Imëpis rasumpa kaqllata parlakushqaqa, manam.