“Manam yamë këta apamoqtsu shamurqö, sinöqa rakikëta apamoqmi” (MAT. 10:34).

CANCION: 125 Y 135

1, 2. (1) ¿Pillataq alli kawakïtaqa kanan witsan qomantsik? (2) ¿Imanirtaq chipyëpa alli kawakïtaqa puëdintsikraqtsu? (Rikäri kë yachatsikïpa qallananchö këkaq fötuta).

LLAPANTSIKMI yarpachakïninnaq y kushishqa kawakïtaqa munantsik. Tsëmi alläpa agradecikuntsik yamë kawakïta, o alli kawakïta Diosnintsik qomanqantsikpita. Porqui tsënöpam alläpa yarpachakïkunapita y llakikïkunapitaqa libri kantsik (Filip. 4:6, 7). Jina Jehovällatana sirwinapaq decidishqa karninmi, pëwan alli amïgu këtapis puëdintsik (Rom. 5:1).

2 Tsënö kaptimpis, chipyëpa alli kawakunapaq tiempuqa manaran chämunraqtsu. Ushanan junaqkunachömi kawantsik, tsëmi imëka problëmakuna kan, y problëmata asheq nunakunapis kayan (2 Tim. 3:1-4). Jina Satanaspis imëka trampakunatam churamun (2 Cor. 10:4, 5). Peru tsëpitapis masqa, mana creikoq familiantsikwan problëma kaptinmi yamë kawakïtaqa puëdintsiktsu. Itsa wakinqa creenciantsikpita burlakuyanman, o kënö nimashwan: “Qamqa familiantsiktam rakikätsir ushanki”, o “mananam familiätanöqa rikashqëkinatsu” nishpa. Peru  ¿imanirtaq familiantsik tsënö tratamashwan? Y tsënö tratamashqa, ¿imataraq rurashwan?

¿MANTSAKASHWANKU FAMILIANTSIKKUNA MICHÄKUYAPTIN?

3, 4. (1) Jesuspa yachatsikïninkunata chaskikoqkunaqa, ¿imakunapataq pasayänan karqan? (2) Jesuspa qateqnin këqa, ¿imëtaq mas sasa kanan karqan?

3 Jesusmi kënö nirqan: “Manam yamë këta apamoqtsu shamurqö, sinöqa rakikëta apamoqmi. [...] Tsëmi tsuriqa teytampa contran kanqa, y warmi wamranam mamampa contran kanqa, y lumtsïnam suegrampa contran kanqa. Rasumpa kaqchöqa, wayinchö täraqkunallam nunapa chikeqninkunaqa kayanqa” (Mat. 10:34-36). Pëqa musyarqanmi yachatsikïninqa familiachöpis nunakunata rakikätsinampaq kaqta. Tsëmi qateqninkunaqa valienti kayänan karqan.

4 Jesusqa manam nunakunata rakikätseqtsu shamurqan, sinöqa rasumpa kaqpita yachatsikoqmi (Juan 18:37). Tsëqa, ¿imanirtaq “manam yamë këta apamoqtsu shamurqö” nirqan? Porqui pëpa qateqnin këta munaqkunapaqqa manam fäciltsu kanan karqan Diosta sirwiyänan, y masran familiankuna y amïgunkuna michäkuyaptinnäqa.

5. ¿Imakunatataq aguantayashqa Jesuspa qateqninkuna këta decideqkuna?

5 Jesusqa qateqninkunatam nirqan, familiankuna michäkuyaptimpis aguantayänan precisanqanta (Mat. 10:38). Tsëmi familiankuna neguëkäyaptin y burlakïkäyaptimpis Diosta sirwitaqa jaqiyashqatsu. Tsënö kayanqampitam mëtsika familiata Diospa markanchö tariyashqa (leyi Marcus 10:29, 30).

6. ¿Imatataq yarpänantsik Jehoväta sirwinata familiantsik michäkuyaptin?

6 Jehoväta sirwinata familiantsik michäkuyaptimpis, pëkunataqa kuyëkänantsikllam. Peru yarpänantsikmi pëkunapitapis masqa, Jehoväta y Jesusta kuyanantsik precisanqanta (Mat. 10:37). Porqui Satanasqa, familiantsikta kuyanqantsiktam utilizärinman Jehoväta jaqiratsimänapaq. Tsëqa, ¿ima problëmakunataq kanman? Y ¿imatataq rurashwan? Rikärishun.

MAJANTSIK MANA TESTÏGU KAPTIN

7. ¿Imatataq Jehoväpa sirweqninkuna rurayanman majankuna mana creikoq kayaptimpis?

7 Bibliaqa willakun casakoqkunaqa problëmakunapa pasayänampaq kaqtam (1 Cor. 7:28). Y majantsik mana Testïgu kaptinnäqa, höraqa mas problëmakunaran kanman. Tsënö kaptimpis Jehoväqa mandamantsik, mana creikoq majantsikpita mana rakikäkurinapaq o mana divorciakurinapaqmi (1 Cor. 7:12-16). Jehoväta sirweq warmiqa, mana creikoq kaptimpis qowantaqa respetananmi. Jina tsënöllam ollqupis, mana creikoq warminta shumaq cuidanan y kuyanan (Efes. 5:22, 23, 28, 29).

8. ¿Ima tapukïkunatataq rurakushwan mana creikoq majantsik controlamashqa?

8 Höraqa itsa mana creikoq majantsik Diospaq ruranqantsikkunachö controlamashwan. Juk panitam mana creikoq qowan nirqan semänachö mëqan junaqkunalla yachatsikoq yarqunampaq kaqta. Tsënö pasamashqaqa kënö tapukushun: “¿Jehoväpa sirweqnin kanätaku jaqitsimëta munëkan? Y tsënö mana kaptinqa, ¿manatsuraq nimanqanta cäsuküman?”. Pëkunawan comprendinakurqa manam alläpa problëmamanqa chäshuntsu (Filip. 4:5).

9. ¿Imanötaq Jehoväpa juk sirweqninqa wamrankunata yachatsinman mana creikoq teytanta o mamanta respetayänampaq?

9 Majantsik Jehoväta mana sirwiptinqa,  Biblia ninqannö teytanta y mamanta respetayänampaq wamrakunata yachatsiqa manam fäciltsu kanman (Efes. 6:1-3). Peru majantsik Biblia ninqanta mana wiyakuptimpis, manam wamrantsikkunapa jananchöqa pëpaq mana allita parlashwantsu. Tsëpa rantinqa, imakunachö alli kanqampita y familiantsikpaq trabajamunqampitam shumaq parlashwan. Jina entienditsinantsikmi Diosta sirwitaqa cada ünu akrakïta puëdinqantsikta. Wamrakuna shumaq portakuyaptinqa itsa teytanqa Jehoväta sirwita munarinqa.

Wamrëkikunata imëkanöpa Bibliapita yachatsita procurë. (Rikäri 10 kaq pärrafuta).

10. ¿Majankuna michäkuyanqanrëkurtsuraq wamrankunata Bibliapita yachatsiyanmannatsu?

10 Höraqa itsa mana Testïgu kaq teytaqa munanman wamrankuna fiestakunaman ëwayänanta o religionnimpa mana alli yachatsikïninta yachakuyänanta. Wakin ollqukunaqa itsa warminkunata michäyanqa wamrankunata Bibliapita yachatsiyänanta o reunionkunaman apayänanta. Tsënö michäkïkäyaptimpis, wamrankunataqa imëkanöpam Bibliapita yachatsita puëdiyan (Hëch. 16:1; 2 Tim. 3:14, 15). Qowan ninqanta respetarnimpis, wamrankunata Jehoväpita yachatsitaqa manam jaqiyänantsu (Hëch. 4:19, 20). Peru tiempuwanqa kikin wamrakunanam decidiyänan Jehoväta sirwita o mana sirwitapis (Deut. 30:19, 20). *

 TESTÏGU KANATA FAMILIANTSIKKUNA MICHÄKUYAPTIN

11. ¿Imanirtaq höraqa familiantsikwan problëma kanman?

11 Bibliapita yachakur qallarninqa itsa familiantsikkunata parlaparqantsiktsu yachakïkanqantsikkunapita. Peru Jehoväman mas confiakurnam, parlapar qallëkurqantsik (Mar. 8:38). Itsa tsërëkur familiantsikwanqa problëmachö këkantsik. Peru ¿imatataq rurashwan pëkunawan alli kawakunapaq y Jehoväta sirwirnin sïguinapaq? Juk ishkë yanapakïkunata rikärishun.

12. ¿Imanirtaq wakin familiantsikkunaqa michäkuyanman Testïgu kanantsikta, peru imatataq rurashwan?

12 Imanir michäkuyanqanta entiendita procurashun. Bibliapita rasumpa kaqta yachakurir alläpa kushishqa sientikushqapis, familiantsikkunaqa manachi tsënötsu sientikuyan. Itsa pensayan engañamashqantsikta, wanurishqa Dios castigamänapaq kaqta, o fiestankunata mana celebranqantsikrëkur manana kuyanqantsikta. Imanir yarpachakuyanqanta entiendinapaqqa parlapämanqantsiktam respëtuwan wiyanantsik (Prov. 20:5). Apostol Pablunömi kanantsik, pëqa Diospa Palabrampita yachatsinanrëkurmi, nunakunata entiendita procuraq. Tsënö ruranqantsikmi noqantsiktapis yanapamäshun, familiantsikkunata shumaq parlapärinapaq (1 Cor. 9:19-23).

13. ¿Imanötaq familiantsikkunata parlapashwan?

13 Pacienciawan shumaq parlapäshun. Bibliaqa, “parlakïnikikuna imëpis shumaq katsun” nimantsikmi (Col. 4:6). Familiantsikkunata pacienciawan y kuyëpa parlapänapaqqa Jehovätam mañakunantsik. Manam creenciankunapita discutipänantsiktsu, y ofendimashqaqa apostolkunanömi ruranantsik. Apostol Pablum nirqan: “[Insultayämaptimpis] bendiciyämi; chikir sufritsiyämaptimpis, pacienciakurmi alli tsarakuyä; mana kaqpita tumpayämaptimpis, pacienciakurmi contestayä” (1 Cor. 4:12, 13).

14. ¿Imanötaq alli portakunqantsik yanapakun?

14 Alli portakushun. Alli portakunqantsikpis alläpam yanapakun familiantsikwan shumaq kawakunapaq (leyi 1 Pëdru 3:1, 2, 16). Tsëmi Dios munanqannö kawakïta procurashqaqa, pëkuna rikäyanqa Testïgukunaqa casädu kawakïchö shumaq kawakunqantsikta, wamrantsikkunata shumaq cuidanqantsikta, y rakchakunata mana rurarnin kushishqa kawakunqantsikta. Familiantsikkuna Testïgu mana tikrayaptimpis, Jehovä munanqanta rurarninqa kushishqam sientikushun.

15. ¿Imakunatataq rurashwan familiantsikwan discutiman mana chänapaq?

15 Imata ruranapaq kaqta puntallapitana pensashun. Familiantsikkunawan discutiman imakuna chätsikunqanta alleq tantiyashun, y imata ruranapaq kaqta alleq pensashun (Prov. 12:16, 23). Australiapita juk panim kënö nin: “Suegrüqa Testïgu kayanqäpitam alläpa piñakoq, tsëmi imanö këkanqanta musyayänäpaq manaraq qayarnin, Jehoväman mañakuyaq kayä imatapis niyämaptin mana piñakushllapa contestayänäpaq. Y imakunapita parlayänäpaqmi pensayaq kayä, tsënöpa shumaq parlakuriyänäpaq. Jinamampis unëpa parlakïqa religion asuntupita discutimanmi chätsikun, tsëmi qayarninqa wallka tiempulla parlayaq kayä”.

16. ¿Imatataq yarpänantsik familiantsikwan discutinqantsikpita mana alli sientikurqa?

16 Peru mana creikoq familiantsikwan  discutitaqa höraqa manam evitëta puëdishuntsu. Tsënö pasamashqaqa itsa mana alli sientikuntsik, porqui familiantsiktaqa alläpam kuyantsik y kushitsinqan kaqtam rurëta munantsik. Peru familiantsikpitapis masqa, Jehoväta kushitsinantsik precisanqantam yarpänantsik. Itsa tsënöpa cuentata qokuriyanqa Biblia ninqanta mana wiyakïqa wanïman apakunqanta. Jina yarpänantsikmi, Jehoväta sirwiyänampaqqa pitapis obliguëta manam puëdinqantsikta. Peru imatam sïqa puëdintsik, Jehovä ninqanta wiyakunqantsik imanö yanapamanqantsikta rikätsita. Jehoväqa alläpa kuyakoq karmi pëkunatapis sirwiyänampaq invitan (Is. 48:17, 18).

JUK FAMILIANTSIK JEHOVÄTA JAQIPTIN

17, 18. ¿Imatataq rurashwan juk familiantsik Jehoväta jaqiriptin?

17 Juk familiantsik congregacionpita qarqushqa kaptin, o kikin munar Jehoväta jaqiptinqa alläpam llakikuntsik. Peru ¿imatataq rurashwan?

18 Ama jaqishuntsu imëpis ruranqantsikkunata. Diosnintsikman confiakur sïguinapaqqa seguïdum Bibliata leyinantsik, reunionkunaman ëwanantsik, alleq preparakunantsik, yachatsikoq yarqunantsik y Diosnintsikman mañakunantsik (Jüd. 20, 21). Tsë llapanta rurëkaptikipis llakikïniki mana pasaptinqa, ama qelanäkuritsu. Tsëpa rantinqa rurëkanqëkita rurarnin sïgui, porqui tsëmi yanapashunki llakikïnikita y yarpachakïnikita vencinëkipaq. Salmus librupa 73 kaq capïtulunta qellqaqpis, ruranqankunata mana allipa rikarmi alläpa llakikurqan. Peru tsënö pensënintaqa vencirqan, Jehoväpa rurëninkunachö mas ocupädu karninmi (Sal. 73:16, 17). ¿Manatsuraq qamtapis tsënö ruranqëkiqa yanapashunkiman?

19. ¿Imanötaq sirweqninkunata Jehovä corriginqanta respetantsik?

19 Sirweqninkunata Jehovä corriginqanta respetashun. Jehovä corrigimanqantsik alläpa llakikïpaq kaptimpis yanapamantsikmi, hasta jutsata rurashqa kaqkunatapis (leyi Hebrëus 12:11). Jehoväqa mandamantsik, mana arrepentikoqkunawan mana juntakunapaqmi (1 Cor. 5:11-13). Tsëta ruranan llakikïpaq kaptimpis, congregacionpita qarqushqa familiantsikwanqa, alläpa mana precisaptinqa manam juntakunantsiktsu. Manam telëfunupa ni Internetpa qayanakunantsiktsu ni mensäjikunata mandanakunantsiktsu, ni cartanakunantsiktsu.

20. ¿Imatataq pensanantsiktsu?

20 Manana kutiyämunampaq kaqtaqa ama pensashuntsu. Kuyakoq kanqantsikmi yanapamantsik Jehoväta jaqishqakuna kutiyämunampaq kaqta shuyararnin sïguinapaq (1 Cor. 13:7). Congregacionpita qarqushqa familiantsik cambiëkanqanta rikarninqa, Jehoväman mañakushun Palabranwan yanapëkunampaq y “kutikallämï” nir invitanqanta chaskikunampaq (Is. 44:22).

21. ¿Imatataq rurashwan Jesuspa qateqnin kanqantsikrëkur familiantsik rakikashqa kaptinqa?

21 Jesusqa nirqan nunapitapis masqa pëta kuyanapaqmi. Confiakurqanmi familiankuna michäkïkäyaptimpis qateqninkunaqa pëta mana jaqiyänampaq kaqta. Jesuspa qateqnin kanqantsikrëkur familiantsikchö problëma kaptinqa, yanapamänapaq Jehoväta mañakushun (Is. 41:10, 13). Jehoväwan Jesusqa mana jaqipa sirwinqantsikpita alläpam kushikuyan, y bendicimäshunmi. ¿Manaku tsëta musyanqantsikpitaqa alläpa kushikuntsik?

^ par. 10 Majëki mana Testïgu kaptin, wamrëkikunata imanö yachatsinëkipaq kaqta maslla musyarinëkipaqqa, rikäri 2002 wata 15 de agostu La Atalaya revistachö “Preguntas de los lectores” nishqan yachatsikïta.