Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Octubri de 2016

Juk idiömachö yanapakïkarqa Dioswan amïgu kënikita cuidë

Juk idiömachö yanapakïkarqa Dioswan amïgu kënikita cuidë

“Tesörutanömi palabrëkikunata shonqüman churarqö” (SALMU 119:11).

CANTICU: 142 Y 92

1-3. (1) ¿Imataq masqa precisanman Diospa sirweqninkunapaqqa? (2) ¿Ima maskunatataq rurayänan juk idiömata parlaq congregacionchö yanapakïkaqkuna? (3) ¿Ima tapukïkunatataq kë yachatsikïchö contestashun? (Rikäri kë yachatsikïpa qallananchö këkaq dibüjuta).

REVELACION 14:6 textu ninqan cumplikänampaqmi kanan witsan mëtsikaq Testïgukuna yanapakïkäyan. Kë textum willakun “llapan nacionkunata, kastakunata, idiömakunata y markakunata” Diospa alli willakïninkunata musyatsiyänampaq kaqta. Y mëtsikaqmi juk idiömata yachakïkäyan mas yachatsikuyänanrëkur. Wakinqa misionërunömi juk nacionkunachö yanapakïkäyan. Wakinkunanam nacionninkunallachö juk idiömata parlaq congregacionman ëwëkäyan.

2 Juk idiömachö yanapakïkarpis, llapantsikmi Jehoväwan amïgu kënintsiktaqa mas precisaqpaq churanantsik (Mateu 5:3) (rikäri “Maslla entiendinapaq” neq recuadruta). Alläpa ocupädu karninmi höraqa Bibliata alleq estudianantsikpaq tiemputa tarintsiktsu. Peru juk idiömata parlaq congregacionchö yanapakoqkunaqa maskunataran rurayänan.

3 Juk idiömata yachakïta procurëkarpis, kë cristiänukunaqa  Bibliapa pakarëkaq yachatsikïninkunata entiendiyänampaqmi alleq estudiayänan (1 Corintius 2:10). ¿Imatataq rurayanman reunionkunachö mana entiendiyanqan Bibliapa pakarëkaq yachatsikïninkunata estudiayänampaq? ¿Imanirtaq juk idiömata parlaq congregacionchö yanapakïkaq teytakuna segurakuyanman Diospa yachatsikïninkuna wamrankunapa shonqunman chänanta? Rikärishun.

¿IMANIRTAQ DIOSWAN AMÏGU KËNINTSIK USHAKÄRINMAN?

4. ¿Imanirtaq Jehoväwan amïgu kënintsik ushakärinman? Unë pasakunqanwan entienditsikaramï.

4 Juk idiömachö Diospa yachatsikïninkunata alleq mana entiendishqaqa Jehoväwan amïgu kënintsikmi ushakärinman. Tantiyarinapaq unë pasakunqanta rikärishun. Nehemïas Jerusalenta kutirirqa, wakin wamrakunata taririrqan judïu idiömata parlëta mana yachaqtam (leyi Nehemïas 13:23, 24 *). Tsërëkurmi tsë wamrakunaqa Diospa yachatsikïninkunata entiendiyarqantsu, y tsënöpanam Dioswan amïgu këninkuna ushakar qallëkurqan (Nehemïas 8:2, 8).

5, 6. ¿Imatataq cuentata qokuyashqa juk idiömata parlaq congregacionchö yanapakoq teytakuna y imanirtaq tsëqa pasakïkan?

5 Juk idiömata parlaq congregacionchö yanapakïkaq teytakunam cuentata qokuyashqa wamrankunapa markäkïninkuna ushakëkaqta. ¿Imanirtaq tsënö pasakïkan? Reunionchö yachatsikïkunata mana entiendiyaptinmi. Tsëmi wiyayanqan yachatsikïkunaqa shonqunman chantsu, ni Dios ninqanta rurayänampaq yanapantsu. Tsëmi Pëdru jutiyoq wawqi kënö nin: “Diospita yachatsikayämuptinqa shonquntsikmanmi chänan y y kushitsimänantsikmi”. Pëdruqa, Sudamëricapitam Australia nacionman familianwan ëwakurqa [1] (rikäri kë yachatsikïpa ushananchö këkaq willakïta) (Lücas 24:32).

6 Musyanqantsiknöpis idiömantsikchö leyishqaqa shonquntsikmanmi chärin, peru juk idiömachö leyishqaqa manam tsënötsu. Jinamampis juk idiömachö parlëqa manam fäciltsu. Tsërëkurmi utishqa sientikushwan y Jehoväta sirwitapis qelanärishwan. Tsëmi juk idiömata parlaq congregacionchö alleq yanapakïta munarpis Dioswan amïgu kënintsikta cuidanantsik (Mateu 4:4).

JEHOVÄWAN AMÏGU KËNINKUNATAM CUIDAYARQAN

7. ¿Imatataq babiloniukuna rurayarqan costumbrinkunata y religionninkunata Danielta creitsita munarnin?

7 Danielta y amïgunkunata Babiloniata aparqa, babiloniukunaqa costumbrinkunata y religionninkunatam mälas yachatsita munayarqan. ¿Imanötaq tsëta rurayarqan? Idiömankunata yachatsirnin y babiloniu jutikunata churarninmi (Daniel 1:3-7). Danielpa mushoq jutinqa karqan, babiloniukunapa Bel jutiyoq precisaq diosninkunapitam. Babiloniapa reyninqa itsa Danielta creitsita munarqan Jehoväpita mas puëdeq diosninkuna kanqanta (Daniel 4:8).

Danielqa Jehoväwan amïgu kënin mana ushakänampaqmi, hebreu idiömachö qellqarëkaq Diospa Palabranta alleq estudiaq

8. ¿Imatataq Daniel rurarqan Jehoväwan amïgu kënin mana ushakänampaq?

8 Babiloniachöqa Danielta munatsiyarqan reypa mishki mikïninkunatam. Peru Danielqa Diospa leyninta wiyakunampaqmi listu këkarqan (Daniel 1:8). Danielqa  juk nacionchö këkarpis Jehoväwan amïgu kënin mana ushakänampaqmi alli tsarakurqan. ¿Imanirtaq alleq tsarakurqan? Hebreu idiömachö qellqarëkaq Diospa Palabrantam alleq estudiaq (Daniel 9:2). Tsëmi 70 wata pasariptimpis pëtaqa reqiyarqan hebreu jutimpa, Daniel nirnin (Daniel 5:13).

9. ¿Imanötaq Diospa Palabran yanaparqan Salmu 119 qellqaqta?

9 Jina Salmu 119 qellqaqpitapis yachakïta puëdintsikmi. Reypa kastankuna pëpita mana allita parlayaptimpis pëqa alleqmi tsarakurqan. Peru alleq tsarakunampaqqa Diospa Palabranchömi yanapakïta ashirqan y tsëmi yanaparqan wakinkunapita jukläya kanampaq (Salmu 119:23, 61). Pëqa Diospa yachatsikïninkuna shonqunman chänantam permitirqan (leyi Salmu 119:11, 46 *).

JEHOVÄWAN AMÏGU KËNINTSIKTA CUIDASHUN

10, 11. (1) ¿Imamantaq pensashwan Bibliata estudiarninqa? (2) ¿Imanötaq tsëta rurashwan? Juk igualatsikïwan willakaramï.

10 Congregacionchö y trabäjuntsikchö imëka rurëyoq karpis, llapantsikmi tiemputa jorqanantsik japallantsik o familiantsikwan Bibliata alleq estudianapaq (Efesius 5:15, 16). Estudiarninqa, manam Bibliata o publicacionkunata leyita miratsinantsikrëkurllatsu o reunionkunachö parlakunantsikllapaqtsu leyinantsik. Tsëpa rantinqa shonquntsikman chänanta y markäkïnintsikta sinchiyätsinantam procuranantsik.

11 Y tsëta logranapaqqa, yachakunqantsik höraqa manam jukkunata yanapanapaq kaqllamantsu pensanantsik, sinöqa kikintsikta imanö yanapamänapaq kaqmanmi pensanantsik (Filipensis 1:9, 10). ¿Imanirtaq precisan kikintsikman pensanantsik? Porqui yachatsikoq yarqunapaq, reunionpaq, juk discursuta o juk demostracionta ruranapaq preparakurninqa, höraqa manam noqantsikta imanö yanapamänapaq kaqman pensëkantsiktsu. Këta entiendirinapaq juk cocinëruman pensarishun. Juk cocinëruqa wakinkunata manaraq sirwirninmi mikï imanö kanqanta musyanampaq llamirin (yawarin), peru manam tsëllawantsu pachan juntarin. Alli saloryoq këta munarqa alleqmi mikunan, y mana dañakoq mikïkunatam kikimpaq seguïdu preparanan. Jina tsënöllam Jehoväwan amïgu kënintsik sinchi kanampaqpis, Bibliata seguïdu estudianantsik kikintsik alli kanantsikpaq.

12, 13. ¿Imanirtaq mëtsikaq cristiänukuna niyan idiömankunachö Bibliata estudiëqa alläpa yanapakunqanta?

12 Juk idiömata parlaq congregacionchö yanapakoq mëtsikaq cristiänukunam cuentata qokuyashqa idiömankunachö Bibliata estudië alläpa yanapanqanta (Hëchus 2:8). Hasta misionërukunapis niyanmi reunionchö wiyayanqanllawan  conformakuyänampa rantin, idiömankunachö Bibliata estudiëqa alläpa yanapakunqanta.

13 Alain jutiyoq wawqim puwaq watapana persa idiömata yachakïkan. Pëmi kënö nin: “Persa idiömachö reunionkunapaq preparakurninqa, tsë idiömamanmi masqa yarparä. Tsë idiömallaman yarpararnin yachakuptïmi, yachakunqäqa shonquman chantsu. Tsëmi Bibliata y publicacionkunataqa idiömächöraq imëpis yachakü”.

TEYTAKUNA WAMRËKIKUNAPA SHONQUNMAN CHÄYË

14. ¿Imapitataq cristiänu teytakuna segurakuyänan y imanir?

14 Teytakunaqa alleqmi segurakuyänan wamrankuna Diospa yachatsikïninkunata entiendiyänanta y kuyayänanta. Tantiyarinapaq rikärishun wawqi Sergiwan warmin Murielta pasanqanta. Pëkunaqa kima watapitapis masnam juk idiömata parlaq congregacionchö yanapakïkäyarqan. Tsënö këkarmi cuentata qokuriyarqan 17 watayoq ollqu wamrankunataqa yachatsikoq ëwë ni reunionkunaman ëwëpis manana gustanqanta. Pani Murielmi kënö nin: “Juk idiömachö yachatsikïqa piñatseqmi, peru puntataqa, frances idiömachö yachatsikïta alläpam gustaq, idiöman kaptin”. Sergim willakun juk idiömata parlaq congregacionchö karnin wamranqa Diospa kaqchö poqur sïguita mana puëdinqanta. Tsëmi punta congregacionninkunaman kutikuyarqan.

Bibliapa yachatsikïninkuna wamrëkipa shonqunman chänampaq segurakï. (Rikäri 14 y 15 kaq pärrafukunata).

15. (1) ¿Imakunatataq teytakuna cuentachö katsiyänan wamrankunarëkur juk congregacionman pasakïta pensëkarqa? (2) ¿Ima consëjutaq Deuteronomiu 6:5-7 textuchö teytakunapaq këkan?

15 Wakin teytakunaqa itsa pensëkäyan  wamrankuna mas entiendiyanqan idiömata parlaq congregacionman pasakïta. Peru juk congregacionman pasakïta pensëkarninqa, ¿imakunatataq cuentaman churayanman? Tsëpaqqa kënömi tapukuyänan: “¿Wamräkunata yanapëta puëdïku Jehoväta kuyayänampaq y juk idiömata yachakuyänampaq? ¿Imanötaq wamräkuna rikäyan juk idiömachö yachatsikïta y reunionkunaman ëwëta?”. Kë tapukïkunata alleq rikärir itsa wakin teytakunaqa wamrankuna mas entiendiyanqan idiömata parlaq congregacionman pasakïta munayanqa, y tsëqa allillam kanqa. Y wamrankuna Jehoväwan mas amïgu tikrariyaptinna, itsa teytakunaqa decidiyanqa juk idiömata parlaq congregacionman yapë yanapakoq pasakïta (leyi Deuteronomiu 6:5-7 *).

16, 17. ¿Imatataq wakin teytakuna rurayashqa wamrankunata Jehoväpita yachatsiyänampaq?

16 Wakin teytakunaqa juk idiömata parlaq congregacionchö o grüpuchö yanapakïkarpis, wamrankunataqa idiömankunachömi yachatsita puëdiyashqa. Rikärishun Charles jutiyoq teyta ruranqanta. Pëpaqa kima warmi wamrankunam kan, menor kaqmi 9 watayoq y mayor kaqnam 13 watayoq. Llapankunam yanapakïkäyan  lingala idiömata parlaq grüpuchö. Wawqi Charlesmi kënö nin: “Decidiyarqä idiömäkunachö Bibliata estudiëta y Familiachö Diosta Adorana Hörata rurëtam. Jina lingala idiömata mas yachakuyänampaqmi tsë idiömachö demostracionkunata rurayä y pukllayä”.

Këkanqëki congregacion parlanqan idiömata yachakïta procurë y reunionkunachö parlakï. (Rikäri 16 y 17 kaq pärrafukunata).

17 Jina wawqi Kevin ruranqantapis rikärishun. Pëpaqa ishkëmi warmi wamrankuna kan, menor kaqmi kima watayoq y mayor kaqnam puwaq watayoq. Kevinqa alleqmi sinchikun parlayanqan idiömachö wamrankunata Bibliapita yachatsita, porqui yanapakïkäyanqan idiömataqa manam wamrankunaqa alleqllaqa entiendiyantsu. Kevinmi kënö nin: “Warmïwanqa wamräkunata yachatsiyä parlayanqan frances idiömachömi. Jina killachö juk kuti frances idiömachö reunionkunaman ëwayänäpaqmi decidiyarqö. Jina vacacionkunatam provechayä frances idiömachö rurakanqan jatun asamblëaman ëwayänäpaq”.

18. (1) ¿Imanötaq Romänus 15:1, 2 textu ninqan teytakunata yanapanman wamrankunapaq alli kaqta decidiyänampaq? (2) ¿Ima niyantaq wakin teytakuna? (Rikäri kë yachatsikïpa ushananchö këkaq willakïta).

18 Cada familiam decidinan wamrankuna Jehoväwan amïgu kayänampaq imanö yanapayänampaq kaqta [2] (rikäri kë yachatsikïpa ushananchö këkaq willakïta) (Gälatas 6:5). 14 kaq pärrafuchömi parlarqantsik wawqi Sergipita y warmin Murielpita. Murielmi willakun qowanwan ishkan juk idiömata parlaq congregacionchö yanapakïta sïguita munayanqanta. Tsënö këkarpis Jehoväpa amïgun wamrankuna kananta munarmi juk congregacionman pasakuyarqan (leyi Romänus 15:1, 2). Sergiqa nin alli kaqta akrashqa kayanqantam. Frances idiömata parlaq congregacionman pasakuriyaptin Jehoväpa amïgun wamrankuna mas tikranqanta y bautizakunqantam willakun. Kananqa, wamranqa precursor regularmi y juk idiömata parlaq grüpuman yanapakoq kutitam pensëkan.

DIOSPA PALABRAN SHONQUNTSIKMAN CHÄNANTA PERMITISHUN

19, 20. ¿Imanöraq Diospa Palabranta kuyanqantsikta rikätsikushun?

19 Jehoväqa llapan nunakunatam kuyan. Tsëmi permitishqa rasumpa kaq yachatsikïninta tukïläya nunakuna idiömankunachö wiyayänanta (1 Timoteu 2:4). Jehoväqa musyanmi pëwan amïgu kënintsiktaqa, idiömantsikchö Bibliata leyinqantsik sinchiyätsinqanta.

20 Llapantsikmi alleq sinchikunantsik Dioswan amïgu kënintsik sinchi kanampaq. Tsëpaqqa mas entiendinqantsik idiömachömi Bibliata alleq estudianantsik. Tsënöpam sinchi markäkïyoq kayänampaq familiantsikta cuidashun y Diospa Palabranta kuyanqantsikta rikätsikushun (Salmu 119:11).

^ [1] (5 kaq pärrafu): Kë yachatsikïchöqa jutinkunaqa jukmi.

^ [2] (18 kaq pärrafu): Rikäri 2002 wata 15 de octubri La Atalaya revistapa “La crianza de los hijos en un país extranjero: desafíos y galardones” neq yachatsikïninta. Tsëchömi tarinki familiëkita yanapanëkipaq shumaq consëjukunata.

[Päginapa ura kuchunchö willakïkuna]

^ par. 4 Nehemïas 13:23, 24: “Jina tsë witsankunam rikarqä judïukunaqa asdodïtakunata, ammonïtakunata y moabïtakunata warminkunapaq apashqa kayanqanta. Y wamrankunaqa pullan kaqmi asdodeu idiömata parlayaq, y wakinnam juk markakunapa idiömankunata parlayaq, peru judïu idiömataqa manam ni mëqampis parlayaqtsu”.

^ par. 9 Salmu 119:11, 46: “Tesörutanömi palabrëkikunata shonqüman churarqö, qampa contrëki jutsata mana ruranäpaq [...]. Jina yarpätsikïnikikunataqa reykunapa puntankunachöpis parlashaqmi, y manam penqakushaqtsu”.

^ par. 15 Deuteronomiu 6:5-7: “Jehovä Diosnikitam kuyanëki llapan shonqïkiwan, llapan kawënikiwan y llapan kallpëkiwan. Kanan qoykanqaq kë mandamientukunaqa, shonqïkichömi kanan; y wamrëkitam kutin kutin yachatsinëki, y tsëkunapitam parlapänëki wayikichö jamakurnin, nänipa purirnin, patsäkurnin y shärikurnin”.