Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Mäyu de 2016

‘Ëwayë, jinantin markakunachö nunakunata yachatseq’

‘Ëwayë, jinantin markakunachö nunakunata yachatseq’

“Ëwayë, jinantin markakunachö qateqnïkuna kayänampaq nunakunata yachatsiyë, bautizarnin [...], yachatsirnin, käyiyänampaq llapan noqa yachatsiyanqaqta” (MATEU 28:19, 20, NM).

CANTICU: 141 Y 97

1, 2. Mateu 24:14 (NM) textuta leyirnin, ¿imakunatataq tapukuntsik?

JESUSQA willakurqan kë ushanan junaqkunachö Diospa Gobiernumpita jinantin Patsachö nunakunata yachatsiyänampaq kaqtam (Mateu 24:14, NM). Kanan witsanqa, Jehoväpa testïgunkunaqa jinantin Patsachö yachatsikunqantsikpitam reqishqa kantsik. Wakinkunataqa yachatsikunqantsik gustanmi, peru wakinkunataqa manam. Tsënö kaptimpis, ruranqantsikpitam respetamantsik. ¿Jehoväpa testïgunkunallaku Jesus willakunqanta cumplikantsik? ¿Imanirtaq tsëpita següru kantsik?

2 Mëtsikaq religionkunam Jesus willakunqanta yachatsikïkäyanqanta niyan. Pëkunapaqqa Diospita yachatsikïqa, iglesiankunachö, televisionchö y Internetchö yachatsikïllam. Wakin nunakunapaqnam Diospita yachatsikïqa Jesusta imanö reqiyanqanta willakïlla kanqanta niyan. Y wakinnam Diospita yachatsikïqa doctornö, enfermëranö y profesornö wakinkunata wanayanqanchö yanapë kanqanta niyan. Peru ¿tsënö yachatsikuyänampaqku Jesus discïpulunkunata nirqan?

3. Mateu 28:19, 20 (NM) textu ninqannö, ¿imatataq Jesuspa qateqninkuna rurayänan?

 3 ¿Jesusqa munarqantsuraq nunakuna discïpulunkunata asheq ëwayänanta? Manam. Porqui kawariramurninmi atskaq qateqninkunata kënö nirqan: “Ëwayë, jinantin markakunachö qateqnïkuna kayänampaq nunakunata yachatsiyë, bautizarnin [...], yachatsirnin, käyiyänampaq llapan noqa yachatsiyanqaqta” (Mateu 28:19, 20, NM). Rikanqantsiknöpis, nunakunata qateqnin kayänampaq, yachatsiyänampaq y bautizayänampaqmi Jesusqa discïpulunkunata mandarqan. Tsëpaqqa nunakunata asheqmi puntataqa ëwayänan karqan. Juk yachaq nunam nirqan, juk creikoq nunaqa, markanchö o më nacionchö këkaq nunakunata asheq ëwanqanta (Mateu 10:7; Lücas 10:3).

4. ‘Nunacunata noqapaq pescayamunqui’ nirqa, ¿imata ruranapaqtaq Jesus nikarqan?

4 ¿Discïpulunkuna japallankunalla yachatsikuyänantatsuraq Jesus shuyararqan? ¿O shumaq ordenädu llapankuna juntu yachatsikuyänantatsuraq? Juk cristiänu japallanlla “jinantin nacionchö” yachatsikïta mana puëdinqanqa clärum këkan. Tsërëkurmi cristiänukunaqa shumaq ordenädu kayänan. Tsëmi Jesusqa discïpulunkunata nirqan ‘nunacunata noqapaq pescayämunqui’ nir (leyi Mateu 4:18-22). ¿Ima nitataq munarqan? Cada discïpulu pescäduta pescaq nunanö japallanlla y pescädukuna anzuëluta amuyänampaq shuyaraqnö kayänampaqtsu manam nikarqan. Sinöqa jatun mällawan pescaq nunakunanö kayänampaqmi. Tsënö pescayänampaqqa atskaq nunakuna sinchi trabajayänanta, juntu kayänanta y shumaq ordenädu kayänantam wanakaq (Lücas 5:1-11).

5. ¿Ima tapukïkunapa respuestantataq musyanantsik y imanir?

5 Pikuna Diospa Gobiernumpita yachatsikïkäyanqanta musyëta munarninqa, kë tapukïkunatam contestanantsik:

  • ¿Imapitataq cristiänukuna yachatsikuyanman?

  • ¿Imarëkurtaq Diospita yachatsikuyanman?

  • ¿Imanötaq tsëta rurayanman?

  • ¿Diospita yachatsikïqa mëyaqtaq chanman y imëyaqtaq kanman?

Kë tapukïkunapa respuestanmi yanapamäshun, nunakuna salvakuyänampaq pikuna yanapakïkäyanqanta musyanapaq. Y yanapamäshunmi Diospita yachatsikur sïguinapaqpis (1 Timoteu 4:16).

¿IMAPITATAQ CRISTIÄNUKUNA YACHATSIKUYANMAN?

6. ¿Imanirtaq següru këkantsik Jehoväpa testïgunkunalla Jesus mandakunqannö yachatsikïkäyanqanta?

6 (Leyi Lücas 4:43 *). Jesusqa yachatsikurqan ‘Diospa Gobiernumpita alli willakïkunatam’. Y tsë willakïllata discïpulunkuna yachatsikuyänantam pëqa munan.  ¿Mëqan religiontaq llapan nunakunaman tsë willakïta chëkätsin? Jehoväpa testïgunkunallam. Këtaqa cuenta qokuyanmi hasta yachatsikunqantsikta mana gustaq nunakunapis. Tantiyarinapaq, juk cüram juk Testïguta nirqan, atska nacionkunachö Testïgukunata imapita yachatsikuyanqanta tapuptinmi kaqllata contestayanqanta, tsëmi kënö nirqan: “Llapampis alläpa upam kayan, porqui Diospa Gobiernumpita yachatsikuyanqanllatam niyan”. Kë nuna ninqanqa manam upa kanqantsiktatsu rikätsikun, sinöqa rasumpa cristiänu karnin juknölla kanqantsiktam (1 Corintius 1:10). Kë revistantsikpa mas precisaq yachatsikïnimpis Diospa Gobiernunmi, tïtulunqa Täpakoq Jehovä Diospa Gobiernumpita Willakoq ninmi. Tsëqa jorqakämun 254 idiömakunachömi y 59 millon revistakuna rurakan. Täpakoq revistatam masqa entëru Patsachö nunakunaman jaqintsik.

Jehoväpa testïgunkunallam Diospa Gobiernumpitaqa yachatsikïkäyan

7. ¿Imanirtaq nintsik mana alli religionkunapa pushaqninkuna Jesus mandakunqannö mana yachatsikuyanqanta?

7 Mana alli religionkunapa pushakoqninkunaqa Diospa Gobiernumpitatsu manam yachatsikuyan (rikäri “Maslla entiendinapaq” neq recuadruta). Y tsë Gobiernupaq parlarnimpis shonquntsikllachö kanqantam niyan (Lücas 17:21). Manam yachatsikuyantsu Diospa Gobiernun ciëluchö këkanqanta ni Jesucristu tsë gobiernupa reynin kanqanta, ni Diospa Gobiernunlla entëru Patsachö llapan problëmakunata altsamunampaq y mana alli rurëkunata ushakätsinampaq kaqtapis. Pëkunaqa navidächö o semäna santallachömi Jesuspaq parlayan (Apocalipsis 19:11-21). Clärum këkan, Diospa Gobiernunchö Jesucristu Rey karnin imata ruranampaq kaqta mana musyayanqanqa. Y manam entiendiyantsu Jesuspa willakïnin ima kanqanta, ni imanir yachatsikuyänampaq kaqtapis.

¿IMARËKURTAQ CRISTIÄNUKUNA DIOSPITA YACHATSIKUYANMAN?

8. ¿Imanö Diospita yachatsikunqantsiktaq mana alli kanman?

8 Jesuspa qateqninkunaqa manam qellëta ganayänampaqtsu o jatusaq wayita rurayänampaqtsu yachatsikuyanman. Jesusqa, ‘debaldillam chasquiyarqonqui, y paqtam cobrecayanquiman’ nirqan (Mateu 10:8). Tsëmi, yachatsikïqa juk negociutsu kanman (2 Corintius 2:17). Jesuspa qateqninkunaqa yachatsikuyanqampita manam cobrakuyanmantsu (leyi Hëchus 20:33-35). Jesus mandakunqan cläru këkaptimpis, cäsi llapan religionkunam qellëta mañakuyan iglesiankunata altsayänampaq, pushaqninkunata y tsëchö trabajaqkunata pagayänampaq. Tsënö rurayanqampitam mëtsikaq religionkunapa pushaqninkuna kapoqyoq tikrayashqa (Apocalipsis 17:4, 5).

Yachatsikïqa manam juk negociutsu kanman

9. ¿Imarëkurtaq Jehoväpa Testïgunkuna yachatsikuyan y imanötaq tsëtaqa rikätsikuyan?

9 Peru ¿imatataq nishwan Jehoväpa testïgunkunapita? ¿Qellëtaku mañakuyan Diospita Yachatsikuyänan Wayinkunachö o asamblëankunachö? Manam. Pëkunaqa gastunkunata pagakuyan shonqupita patsë qellëninkunata winakuyanqanwanmi (2 Corintius 9:7). Bibliapita  yachatsikuyanqanta mana pagayaptimpis, pasaq watachöqa 1.930 millon hörakunam yachatsikuyashqa y 9 millonpitapis mastam nunakunata Bibliapita cada killa yachatsiyashqa. Kushishqam qellëninkunata utilizäyan yachatsikuyänampaq. Juk yachaq nunam nirqan, Testïgukunapa mas precisaq rurëninkunaqa Diospita willakï y yachatsikï kanqanta. Jina nirqanmi pushaqninkunata mana pagayanqanta. Tsëqa Jehoväpa testïgunkuna qellërëkur mana yachatsikurninqa, ¿imarëkurtaq yachatsikuntsik? Jehoväta y nunakunata kuyarninmi. Tsënömi Salmu 110:3 * (leyi) textu ninqan cumplikärin.

¿IMANÖTAQ CRISTIÄNUKUNA YACHATSIKUYANMAN?

Nunakuna kayanqanmanmi ëwantsik. (Rikäri 10 kaq pärrafu).

10. ¿Imanötaq yachatsikuyarqan Jesuswan discïpulunkuna?

10 ¿Imanötaq yachatsikuyarqan Jesuswan discïpulunkuna? Nunakuna kayanqanmanmi yachatsikoq ëwayarqan. Tantiyarinapaq, cällikunachö, mercädukunachö y wayin wayinmi Diospita yachatsikuyaq (Mateu 10:11; Lücas 8:1; Hëchus 5:42; 20:20). Tsënö shumaq ordenädu yachatsikurninmi, tukïläya nunakunaman chëta puëdiyaq.

11, 12. ¿Imachötaq jukläya kayan Testïgunkuna rurayanqanwan mana alli religionkuna rurayanqan?

11 Peru ¿imatataq mana alli religionchö këkaqkunaqa rurayan? ¿Jesusnöku Diospa Gobiernumpita alli willakïta yachatsikuyan?  Cäsi llapanmi pushaqninkunata paguëllata munayan pëkunalla yachatsikuyänampaq. Peru pushaqninkunaqa manam Jesuspa qateqnin kayänampaqtsu yachatsikuyan. Tsëpa rantinqa, religionninchö kaqkuna mana jaqiriyänanllatam munayan. Höraqa religionnikunachö kaqkuna yachatsikuyänampaqmi animëta procurayashqa. Tantiyarinapaq, 2001 watachömi Juan Pablu II catölicukunapaq juk cartata qellqarnin yachatsikuyänampaq kaqta nirqan, “allaw noqallä rasumpa kaq alli willakïta mana willakuptïqa” apostol Pablu ninqanta cumpliyänampaq. Jina nirqanmi yachaq kaqkunalla mana yachatsikuyänampaq, sinöqa llapan iglesiaman ëwaqkuna tsëta rurayänampaq. Peru wallkaqllam cäsukuyarqan.

12 Jehoväpa testïgunkunallam yachatsikïkäyan, 1914 watapita Diospa Gobiernunchö Jesucristu Rey kanqanta. Pëkunapaqqa kawëninkunachö mas precisaqqa Jesus mandakunqannö yachatsikïmi (Marcus 13:10). Religionkunapaq parlaq juk librum nirqan, Jehoväpa testïgunkunapaqqa Diospita yachatsikï alläpa precisanqanta. Jina nirqanmi mallaq këkaqkunata, japallan këkaqkunata o qeshyëkaq nunakunata yanapëta procurarnimpis, manam qonqayantsu ushakë junaqpita y imata rurarnin salvakunapaq kaqta willakïtaqa. Awmi, Jehoväpa testïgunkunaqa alli willakïta y Jesuswan discïpulunkuna rurayanqannöllam yachatsikurnin sïguintsik.

¿DIOSPITA YACHATSIKÏQA MËYAQTAQ CHANMAN Y IMËYAQTAQ KANMAN?

13. ¿Mëyaqtaq Diospita yachatsikï chänan karqan?

13 Jesusqa discïpulunkuna “jinantin” Patsachö Diospa Gobiernumpa alli willakïninkunata yachatsikuyänampaqmi nirqan. Jina mandarqanmi, “jinantin markakunachö” qateqnin kayänampaq nunakunata yachatsiyänampaqpis (Mateu 24:14; 28:19, 20). Tsëmi rasumpa cristiänukunaqa Diospa Gobiernumpita entëru Patsachö yachatsikuyänan karqan (rikäri “Maslla entiendinapaq” neq recuadruta).

14, 15. ¿Imanirtaq nishwan Jehoväpa testïgunkunalla Jesus willakunqannö yachatsikïkäyanqanta? (Rikäri kë yachatsikïpa qallananchö këkaq dibüjuta).

14 Rikärinqantsiknöpis, Diospa Gobiernumpaq Jesus willakunqanqa entëru Patsamanmi chänan karqan. ¿Imanirtaq nishwan Jehoväpa testïgunkunalla tsë yachatsikïwan cumplikäyanqanta? Estädus Unïdus nacionchömi, 600 milnö mana alli religionkunapa pushaqninkuna kayan. Peru tsë nacionllachömi mas de 1.200.000 Jehoväpa testïgunkuna Jesus willakunqanta yachatsikïkäyan. Entëru Patsachöqa 400 milnömi catölicu cürakuna kayan, peru Jehoväpa testïgunkunaqa 8 millonpitapis masmi 240 nacionkunachö y sitiukunachö yachatsikïkäyan. Clärum këkan, ¡Jehoväpa testïgunkunalla entëru Patsachö yachatsikïkäyanqanqa! Këqa yanapakun Jehovä alläpa respëtuwan alabashqa kanampaqmi (Salmu 34:1; 51:15).

15 Manaraq ushakë chämuptinmi Jehoväpa testïgunkunaqa mas nunakunata yachatsita procurantsik. Tsërëkurmi millonyëpayan librukunata, revistakunata, tratädukunata y invitacionkunata 700 idiömapitapis maschö traducishqantsik y nunakunata jaqipushqantsik. Y publicacionnintsikkunata nunakunata jaqipurqa manam imëpis cobrantsiktsu. Pasaq  watallachömi 4.500 millon Bibliapita yachatsikoq publicacionkunata jorqantsik. Jina 200 millonpitapis mastam, Traducción del Nuevo Mundo de las Santas Escrituras nishqan Bibliata 130 idiömapitapis maschö jorqashqantsik. Y Internetchö päginantsikqa 750 idiömapitapis maschömi këkan. Kë llapantaqa Jehoväpa testïgunkunallam rurëkantsik.

16. ¿Imanötaq musyantsik Jehoväpa testïgunkunalla santu espïrituyoq kayanqanta?

16 ¿Imëyaqtaq Jesus willakunqanta yachatsikushun? Pëqa nirqan ushakë junaq chämunqanyaq kanampaq kaqtam (Mateu 24:14). Jehoväpa testïgunkunaqa santu espïritu yanapamashqam, kë ushanan junaqkunachö yachatsikur sïguikantsik (Hëchus 1:8; 1 Pëdru 4:14). Mana alli religionchö kaq nunakunapis santu espïritu yanapanqantam niyan. Peru ¿Jehoväpa testïgunkunanöku kë ushanan junaqkunachö yachatsikïkäyan? Wakinkunaqa, noqantsiknömi yachatsikïta munayashqa, peru manam puëdiyashqatsu. Wakinnam yachatsikïta munayan, peru juk tiempullapa. Y wakinkunanam wayin wayin yachatsikoq yarqikäyan, peru manam Diospa Gobiernumpitatsu yachatsikuyan. Awmi, Jesus yachatsikunqannötsu manam rurëkäyan.

¿PIKUNATAQ DIOSPA GOBIERNUMPITA YACHATSIKÏKÄYAN?

17, 18. (1) ¿Imanirtaq Jehoväpa testïgunkunalla Diospa Gobiernumpita yachatsikïkäyanqanta següru kantsik? (2) ¿Imanötaq tsëta rurantsik?

17 Tsëpenqa, ¿pikunataq Diospa Gobiernumpita yachatsikïkäyan? Jehoväpa testïgunkunallam. ¿Imanirtaq tsëta nintsik? Këkunarëkurmi: 1) Jesus ninqannömi alli kaq willakïta yachatsikïkantsik, tsëqa Diospa Gobiernunmi. 2) Jesus ruranqannömi nunakunata asheq ëwantsik. 3) Jesus imarëkur ruranqannömi yachatsikïkantsik, Jehoväta y nunakunata kuyarnin. 4) Jesus ruranqannömi jinantin nacionkunachö y idiömakunachö nunakunata yachëkätsintsik. Y 5) ushakë junaq chämunqanyaqmi yachatsikurnin sïguikäshun.

18 Kë ushanan junaqkunachö, Jehoväpa testïgunkuna Diospa Gobiernumpita yachatsikïkäyanqanta rikëqa alläpa kushikïpaqmi. ¿Imanötaq tsëtaqa rurantsik? Apostol Pablum nirqan, tsë rurë munëyoq kanapaq y tsëta ruranapaq kallpata qomarnintsik Dios yanapëkämanqantsikta (Filipensis 2:13). Tsërëkurmi llapan puëdinqantsikmannö yachatsikur sïguinapaqqa, Jehovä kallpata qomänantsikpaq mañakuntsik (2 Timoteu 4:5).

^ par. 6 Lücas 4:43 (NM): “Tsëmi pë kënö nirqan: ‘Jina juk markakunatapis ëwanämi Diospa Gobiernumpita alli willakïkunata yachatsikunäpaq, porqui tsëpaqmi Dios kachamashqa’”.

^ par. 9 Salmu 110:3: “Markëkiqa, guërraman yarquptiki, kikinkuna munarmi qatishurniki yarqayämunqa. Markëkichöqa imëka shullya shutoqnöran, inti yarqunqampita hasta inti ullunqanyaq jövin sirwishoqnikikuna kan”.