Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Marzu de 2016

Jövin, ¿listunaku këkanki bautizakunëkipaq?

Jövin, ¿listunaku këkanki bautizakunëkipaq?

“Pipis wayita rurananpäga shumagrämi yarpachacun tsay wayita ushananpä gastun aypanganta o mana aypangantapis” (LÜCAS 14:28, MTCS).

CANTICU: 120 Y 64

Kë yachatsikïwan qateqnin kaq yachatsikïqa bautizakïta pensëkaq jövinkunapaqmi.

1, 2. (1) ¿Imata rikartaq alläpa kushikuntsik? (2) ¿Imata entiendiyänampaqtaq teytakuna y anciänukuna jövinkunata yanapayanman?

CHRISTOPHERQA 12 watayoqllaran karqan y bautizakïta munanqantam juk anciänuta willarqan. Tsëmi kë anciänu kënö nirqan: “Llullu kanqëkipitam reqeq, y bautizakïta munanqëkipitaqa alläpam kushikü. Peru jukta tapurishqëki: ¿imanirtaq bautizakïtaqa munanki?”. Tsënö tapunqanqa alläpam precisarqan. Awmi, llapantsikmi kushikuntsik mëtsikaq jövinkuna cada wata bautizakoqta rikarnin (Eclesiastes 12:1). Peru teytankuna y anciänukunam alleq següru kayänan, rasumpa Jehoväta kuyar bautizakïta munayanqanta y rurëkäyanqanta alleq entiendishqa kayanqanta.

2 Bibliaqa yachatsikun Jehovällata sirwinapaq änikurir y bautizakurirqa, Diospa sirweqninna kanqantsiktam. Tsëqa rikätsikun Jehoväpita mëtsika bendicionkunata chaskinapaq kaqtam. Tsënö kaptimpis, Satanasqa imëka tentacionkunatam churamunqa (Proverbius 10:22; 1 Pëdru 5:8).  Tsëmi Testïgu teytakunaqa tiempunkunata alleq rakiyänan, Jesuspa qateqnin këqa ima kanqanta wamrankunata alleq entienditsiyänampaq. Y juk jövinpa teytankuna Testïgu mana kaptinqa, anciänukunam shumaq entienditsiyänan Diosllatana sirwinapaq änikï y bautizakï ima kanqanta (leyi Lücas 14:27-30 *). Juk wayita pipis rurëta munarqa, alleqran gastukunata alistan tsë wayita qeshpitsinampaq. Jina tsënöllam, bautizakïta munarpis juk jövinqa alleqraq entiendinan imata rurëkanqanta. Tsënöpam Jehovä munanqanllata imëyaqpis rurëkanqa (Mateu 24:13). ¿Imaraq juk jövinta yanapanqa Jehoväta imëyaqpis sirwinampaq? Rikärishun.

3. (1) ¿Ima niyarqantaq Jesuswan Pëdru bautizakï asuntupaq? (Mateu 28:19, 20; 1 Pëdru 3:21). (2) ¿Ima tapukïkunapitaraq kë yachatsikïchö yachakushun? (3) ¿Imanirtaq precisan tsë tapukïkunata rurakunantsik?

3 Jövin, ¿listunaku këkanki bautizakunëkipaq? Tsëqa, ¡alläpa allim! Bautizädu kë y Jehoväpa testïgun këqa manam imawampis igualantsu. Jesusmi cristiänukuna bautizakuyänampaq mandakurqan. Y apostol Pëdrunam nirqan, bautizakïqa jatun sufrimientuchö salvakunapaq yanapakunqanta (Mateu 28:19, 20; 1 Pëdru 3:21). Tsëmi bautizakunëkipaq listuna këkanqëkita o mana këkanqëkita musyanëkipaq këkunata tapukunëki: “¿Poqu nunana kanqätaku rikätsikü? ¿Imanirtaq bautizakïta munä? ¿Alleqku entiendï Diosllata sirwinapaq änikï ima kanqanta?”. Kë kiman tapukïkunapitam këchö yachakushun y alläpam precisan tapukunëki. Porqui bautizakurqa Jehovällata imëyaqpis sirwinëkipaq änikunqëkitam rikätsikunki. Y kë tapukïkunam tsëta cumplinëkipaq yanapashunki.

“¿POQU NUNA KANQÄTAKU RIKÄTSIKÜ?”

4, 5. (1) ¿Imanirtaq bautizakïqa mayor nunakunallapaqtsu? (2) ¿Ima ninantaq poqu nuna këqa?

4 Bibliaqa manam nimantsiktsu bautizakunapaqqa ëka watayoqraq kanantsikta. Proverbius 20:11 textum kënö nin: “Juk jövinqa rurëninkunawanmi rikätsikun, imatapis ruranqan alli o limpiu kanqanta”. Rikanqantsiknömi, juk jövinqa wamralla karpis musyëta puëdin ima alli y ima mana alli kanqanta y Diosllatana sirwinapaq änikï ima kanqanta. Tsëmi poquna kanqanta juk jövin rikätsikurqa y Jehovällatana sirwinampaq änikushqana karqa bautizakïta puëdinna (Proverbius 20:7).

 5 Poqu nuna këqa, manam mayorna o atska watayoq këtsu. Sinöqa Biblia ninqannömi, alleq cläru musyanan ima alli y ima mana alli kanqanta, y shonqupita patsëmi alli kaqta rurëta munanan (Hebrëus 5:14). Poqu nunana kanqanta rikätsikoqqa tentacionkunachömi alli tsarakun, y manam wanantsu alli kaqta ruranampaq pipis nikänantaraqqa. Y bautizakurqa, teytëkikuna y juk nunakuna mana rikëkäyäshuptikipis alli kaqllatam imëpis rurëta procuranëki. Y tsëtam juk bautizakushqapitaqa Jehovä shuyaran (igualaratsi Filipensis 2:12 textuwan).

6, 7. (1) ¿Ima tentacionpataq Babiloniachö Daniel pasarqan? (2) ¿Imanötaq poqu nuna kanqanta rikätsikurqan?

6 ¿Juk jövin poqu nuna kanqanta rikätsikïta puëdinku? Musyarinapaq rikärishun profëta Daniel ruranqanta. Pëqa jövinllachi karqan teytankunapita rakirir Babilonia markata apayanqan witsanqa. Babiloniachöqa imëka tentacionkunapam pasarqan. Tantiyarinapaq, Diosta mana sirweq nunakunawanmi kawarqan, jina alläpa precisaqtanömi tratar qallëkuyarqan y reypa sirweqnin kanampaqmi akrayarqan (Daniel 1:3-5, 13). Alli kawakïta y precisaq këta tarishqanömi karqan.

7 Peru Danielqa poqu nunanömi tsë tentacionkunachö tsarakurqan. ¿Imanötaq rurarqan? Manam permitirqantsu pensëninta cambiatsiyänanta y Dios michanqan rurëkunata ruratsiyänanta. Bibliam Danielpaq kënö nin: “Shonqunchömi alleq churakarqan mana alli rurëkunata mana ruranampaq”. Manam ni imanöpapis mana alli religionkunapa rurëninkunataqa rurëta munarqantsu  (Daniel 1:8). Tsënömi rikätsikurqan poqu nuna kanqanta.

Poqu nunanö portakoq jövinkunaqa, manam Yachatsikunantsik Wayichö Diospa amïgunnö y Diosta mana sirweq nunakunawan këkarna, pëkunapa amïgunnöqa portakuyantsu. (Rikäri 8 kaq pärrafuta).

8. ¿Imatataq Danielpita yachakïta puëdinki?

8 ¿Imatataq Danielpita yachakïta puëdinki? Sasakunapa pasëkarpis Jehoväta wiyakïtam. Manam camaleonnöqa kanëkitsu, kë animalqa mëchöpis kanqanmannömi colorninta cambiarin. Manam allitsu kanman Yachatsikunantsik Wayichö Diospa amïgunnö portakurir, Diosta mana sirweq nunakunawan kanqëki höraqa pëkunapa amïgunnöna portakunqëkiqa. Tsëpa rantinqa, mëchö këkarpis y tentacionkunapa pasëkarpis Jehovä Diospa sirweqnin kanqëkitam rikätsikunëki (leyi Efesius 4:14, 15).

Poqu jövin karqa sasakunapa pasëkarpis Jehovätam wiyakunki

9, 10. (1) ¿Imanirtaq precisan tentacionpa pasanqëki höra imata rurashqa kanqëkiman pensanëki? (2) ¿Bautizakurninqa imatataq rikätsikuntsik?

9 Awmi, jövin kar o mayor karpis, pantantsikmi (Eclesiastes 7:20). Peru bautizakïta munarqa, Jehoväpa munëninta shonqupita patsë rurëta munanqëkita o mana munanqëkitam alleq tapukunëki. ¿Atska tiempupanaku Jehovä ninqanta wiyakïkanki? Tsëqa, ¿imatataq rurarqunki tentacionkunapa pasanqëki höra? ¿Alli kaqllata imëpis ruranëkipaqku tsarakurqëki? O itsa Daniel pasanqannö pasëkanki. Itsa pipis nikäshunki mas alli kawakunëkipaq yachënikita utilizänëkipaq. Tsënö tentacionkunapa pasanqëki höra, ¿cläruku katsinki qampita Jehovä imata shuyaranqanta? (Efesius 5:17).

10 Alläpam precisan kë tapukïkunata rurakunëki, tsënöpam entiendinki bautizakïqa juk puklla mana kanqanta. Bautizakurqa Jehovällatana llapan shonquntsikwan imëyaqpis sirwinapaq änikushqa kanqantsiktam rikätsikuntsik (Marcus 12:30). Llapan bautizakoqkunam Jehoväta äniyanqanta cumpliyänan (leyi Eclesiastes 5:4, 5 *).

“¿IMANIRTAQ BAUTIZAKÏTA MUNÄ?”

11, 12. (1) Bautizakïmanna pensëkarqa, ¿imapitataq següru kanëki? (2) ¿Imaraq yanapashunki Jehovä rikanqannö bautizakïta rikänëkipaq?

11 Bibliaqa nin, Diospa sirweqninkunaqa mayorpis y jövinpis, kikinkuna munar sirwiyänampaq kaqtam (Salmu 110:3). Tsëmi jövin, bautizakïta pensëkarqa alleq segurakunëki kikiki munar rurëkanqëkita. Testïgu familiachö winashqa karnäqa masran precisan tsë asuntuta alleq musyanëki.

12 Winanqëkimannö itsa rikarqunki nunakuna bautizakoqta. Itsa amïguïkikuna, wawqikikuna o panikikunapis bautizakuyashqana. Peru manam pensanëkitsu pëkuna bautizakushqana kaptin o yashqana karnin bautizakunëkipaq tiempuna kanqanta. ¿Imaraq yanapashunki Jehovä rikanqannö bautizakïta rikänëkipaq? Tsëpaqqa, bautizakï imanir precisanqanta alleq pensanëkipaqmi tiemputa rakinëki. Kë yachatsikïchö y qateqninchömi maslla rikärinki bautizakï imanir precisanqanta.

13. ¿Imanötaq musyankiman Jehoväta rasumpa kuyarnin bautizakïta munanqëkita?

 13 Jehoväta rasumpa kuyarnin bautizakïta munanëkipaqqa yanapashunki, Diosman mañakïniki imanö këkanqanta alleq rikanqëkim. Kënö tapukï: “¿Siguïduku o höra hörallaku Jehoväman mañakü? ¿Imatapis mañakurqa cläruku willä munanqäta?” Tsënö tapukurmi musyanki Jehoväpa alli amïgun kanqëkita o mana kanqëkita (Salmu 25:4). Jehoväqa Palabran Bibliawanmi mañakïnintsikta masqa contestamun. Tsëmi alläpa precisan Bibliata imanö estudiëkanqëkita alleq rikänëki (Josuë 1:8). Kënö tapukï: “¿Llapan semänaku Bibliata mana jaqipa estudiä? ¿Familiachö Diosta Adorana Hörachö yanapakï gustamanku?”. Tsënö tapukunqëkim yanapashunki, Jehoväta rasumpa kuyarnin bautizakïta munanqëkita rikänëkipaq. Juk parlakïchöqa, Jehoväpa amïgun këta y shonqupita patsë sirwita imanir akranqëkita rikänëkipaq.

“¿ALLEQKU ENTIENDÏ DIOSLLATA SIRWINAPAQ ÄNIKÏ IMA KANQANTA?”

14. ¿Imachötaq jukläya Jehovällatana sirwinapaq änikïwan bautizakïqa?

14 Wakin jövinkunaqa niyan Jehovällata sirwiyänampaq änikushqana kayanqantam, peru bautizakuyänampaqqa manaraq listu këkäyanqanta. Tsënö neq jövinkunaqa rikätsikïkäyan, Jehovällatana sirwiyänampaq änikïwan bautizakï ima kanqanta alleq mana entiendiyanqantam. Jehovällatana sirwinapaq änikïqa, pëllata imëyaqpis sirwinapaq juk mañakïchö änikïmi. Y tsëta rurarirnam bautizakuntsik, Jehovällatana sirwinantsikpaq änikunqantsikta nunakuna rikäyänampaq. Rikanqantsiknömi, manaraq bautizakur alleq entiendinëki Jehovällata sirwinëkipaq änikïqa ima kanqanta.

15. ¿Imanirtaq alleq pensëkur-raq Jehovällatana sirwinëkipaq änikunkiman?

15 Jehovällatana sirwinëkipaq änikurqa, tsë hörapita patsëmi kawënikita Jehoväta entreguëkanki. Y llapan kawënikichö pëta sirwita mas precisaqpaq churanëkipaqmi änikïkanki (leyi Mateu 16:24 *). Tsëmi, Jehovällatana sirwinapaq änikïqa juk pukllatsu; alleq pensëkurmi ruranëki (Mateu 5:33). ¿Imanötaq rikätsikunkiman kawëniki Jehoväpana kanqanta? (Romänus 14:8).

16, 17. (1) Juk igualatsikïwan entienditsikaramï kawënikiqa qampana imanir mana kanqanta. (2) Juk nuna Diosllatana sirwinampaq änirqa, ¿imatataq kawëninwan rurëkan?

16 ¿Imanötaq rikätsikunkiman kawëniki Jehoväpana kanqanta? Këman pensarishun. Juk amïguïki kënö nishunkiman: “Kë cärrutaqa qamtam qarëkaq, y kanampita witsëpaqa qampanam kanqan. Peru llävintaqa noqallam katsikamushaq y noqallam manejamushaq”. ¿Rasumpatsuraq qarëkäshunki? Manam. Porqui llävinta këkätsiptinllaqa y kikinlla manejakïkaptinqa cärruqa manam qamparaqtsu.

17 Juk nuna Jehovällatana sirwinampaq änirqa kënömi nikan: “Kawënïqa qampanam”. Tsëmi, Jehoväqa shuyaran änikunqanta cumplinanta. Peru Jehoväta tsënö änirir, juk mana Testïguwan enamorädu karqa o reunionman ëwananta michaq trabäjuman yëkurqa, ¿cumplikanmantsuraq Jehoväta äninqanta? Manam.  Amïgunta cärruta qararir llävinwan quedakoq nunanömi këkanman. Tsëmi Jehoväta kawënikita entregashqana këkarqa, sasa ruranan kaptimpis Jehovä ninqanta imëpis ruranëki. Tsëtam Jesuspis rurarqan, tsëmi kënö nirqan: “Shamushqa cä manam quiquï munashqäcunata ruranäpaqtsu, sinoqa cachamaq Papänïpa muneninta ruranäpaqmi” (Juan 6:38).

Bautizakunëkipaqqa alleqran pensanëki, y Jehoväpa sirweqnin këwanqa manam imapis igualantsu

18, 19. (1) ¿Ima niyantaq Rosewan Christopher bautizakïpaq? (2) ¿Y qamqa ima ninkitaq bautizakïpaq?

18 Rikanqantsiknömi, bautizakunëkipaqqa alleqran pensanëki. Rasumpa kaqchöqa Jehoväpa sirweqnin këwanqa manam imapis igualantsu. Jehoväta kuyarqa, y pëllatana sirwinëkipaq änikï ima kanqanta entiendirqa manam bautizakïta mantsankitsu. Y tsëta ruranëkipaq akranqëkipitaqa manam imëpis llakikunkitsu. Rose jutiyoq shipashmi kënö nin: “Jehovätaqa alläpam kuyä y pëta sirwir kushikunqäwanqa manam imapis igualantsu. Y bautizakunäpaq decidinqä höraqa, imëkapitapis mas alli kanqantam següru këkarqä”.

19 Qallanan kaq pärrafuchö parlanqantsik Christopher jutiyoq jövinqa, 12 watayoq këkarmi bautizakurqan. ¿Imanötaq sientikun bautizakunampaq decidinqampita? Alläpa kushishqa këkanqantam nin. 17 watayoq këkarmi precursor regular tikrarqan y 18 watayoq këkarnam siervu ministerial tikrarirqan y kananqa Betelchömi yanapakïkan. Kënömi nin: “Bautizakurqa, kawënïchö mas alli kaqtam akrarqä. Jehoväpa y markampaqmi trabajä, tsënö kushikïtaqa manam mëchöpis tarïtsu”. Y qamqa jövin, ¿listunaku këkanki bautizakunëkipaq? Tsënö kaptinqa, ¿imataq yanapashunki següru kanëkipaq? Qateqnin kaq yachatsikïchömi tsëpita rikärishun.

^ par. 2 Lücas 14:27-30 (MTCS): “Imaycachö ñacarpis nogaman criyicamur cawayätsun. Wanunganyag noga ningäcunata mana cäsumag cagcunaga manam rasunpatsu discïpulü. Nogaman manana criyicamogcunaga juc runa wayi rurayta gallaycatsir dejaregnömi cayanqui. Pipis wayita rurananpäga shumagrämi yarpachacun tsay wayita ushananpä gastun aypanganta o mana aypangantapis. Pipis wayita gallar cimientuycullar dejasquiptinga llapan ricagcunam jamuräyan [penqapäyan]: ‘Tagay runaga mana puëdiycar wayita rurar gallaycatsishga manapis ushananpä’ nir”.

^ par. 10 Eclesiastes 5:4, 5: “Diosta imatapis änirqa imëpis cumplï, porqui upakunachöqa manam kushikïqa kantsu. Änikunqëkitaqa pagakï. Änikurir mana pagakunqëkipitaqa, mas alliqa mana änikunqëkim”.

^ par. 15 Mateu 16:24 (MTCS): “Nisquirmi discïpuluncunata nirgan: ‘Pipis discïpulü cayta munarga imayca ñacacuyman charpis noga munangänölla imaypis cawatsun. Quiquinpa munayllanchöga amana cawatsuntsu[’]”.