Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Marzu de 2016

Congregacion juknölla kanampaq yanapakushun

Congregacion juknölla kanampaq yanapakushun

“Jesucristopa cuyacuyninwan imayca juc cuerputa llapan ancucuna alli chachac següru tsarangannö, rasumpa cuyacuyyog [kashun]” (EFESIUS 4:16, NTCN).

CANTICU: 53 Y 107

1. ¿Imatataq kikin Jehovä y sirweqninkuna imëpis rurayashqa?

JEHOVÄQA Jesustam puntata kamarqan. Tsëpitanam Jesusqa teytanwan juntu “obra ruraq maestrunö lädunchö” trabajarqan. Awmi, Jehoväwan Jesusqa imëpis juntum trabajayashqa (Proverbius 8:30). Jina tsënöllam Jehoväpa sirweqninkunapis yanapanakur pë mandanqanta cumpliyashqa. Tantiyarinapaq, Noëwan familianmi arca rurëchö yanapanakuyarqan. Israelïtakunapis yanapanakuyarqanmi Diospa carpa wayinta rurëchö, juk lädupa apayänampaq paskëchö y apëchö. Y templu kanqan witsannam, Jehoväta alabarnin israelïtakunaqa müsicata juntu tocayarqan y cantayarqan. Jehoväpa sirweqninkunaqa kë llapanta rurëta puëdiyarqan imëpis juk shonqulla yanapanakurninmi (Genesis 6:14-16, 22; Nümerus 4:4-32; 1 Crönicas 25:1-8).

2. (1) ¿Imanötaq apostolkuna kawayanqan witsanchö cristiänukuna kawayaq? (2) ¿Imapitataq kë yachatsikïchö yachakushun?

2 Apostolkuna kawayanqan witsampis cristiänukunaqa llapanmi juknölla yanapanakur kawayaq. Tsëmi apostol Pablu nirqan  cristiänukunaqa jukläya jukläya karnimpis, Jesucristuta qatiyanqanrëkur juknölla kayanqanta. Tsëmi Pabluqa juk cuerputawan igualatsirnin nirqan juk cuerpunö imëkayoq karpis llapankuna juknölla yanapanakuyanqanta (leyi 1 Corintius 12:4-6, 12 *). Y noqantsikqa, ¿imanötaq Diospita yachatsikïchö, congregacionchö y familiachö juknölla kanqantsikta imëpis rikätsikushwan? Rikärishun.

DIOSPITA YACHATSIKÏCHÖ JUKNÖLLA KANQANTSIKTA IMËPIS RIKÄTSIKUSHUN

3. ¿Imatataq apostol Juan rikarqan?

3 Juk kutim Jehovä permitirqan, trompëta toquëcaq qanchis angelkunata apostol Juan rikänanta. Pitsqa kaq angel trompëtanta tocariptinmi, Juanqa rikarqan ciëlupita juk qoyllur ishkiramoqta. Y tsë qoyllurqa juk lläviwanmi kicharirqan alläpa ampeq jatun uchkuta. Tsëpitanam mëtsika qoyë (qoshni) jatun uchkupitaqa yarqur qallëkamurqan. Y tsë qoyë rurimpitanam chukllushnö kurukuna mëtsika yarqarayämurqan. Peru kë kurukunaqa manam mikuyarqantsu plantakunata, sinöqa urkunkunachö Diospa señalninta mana katseq nunakunatam kanikacharkuyarqan (Apocalipsis 9:1-4, NM). Juanqa musyarqanmi, kë kurukunaqa Egiptuchö ruranqannö imëkata ushakätsita puëdiyanqanta (Exodu 10:12-15). ¿Pikunatataq kë chukllushnö kurukuna rikätsikun? Ciëluta ëwaqpaq kaq cristiänukunatam, pëkunam llapan mana alli religionkunapa contran willakïkäyashqa. Jina Patsachö kawëta shuyaraq kaqkunapis pëkunatam yanapëkäyan. Kë ishkan grüpum juntu yanapanakur trabajayan y mëtsika nunakunata mana alli religionpita y Satanaspita librakäyänampaq yanapayan.

Llapantsik juknölla yanapanakurninqa, mëtsika millon nunakunatam Jehoväpita yachatsita puëdishun

4. (1) ¿Ima jatun trabäjutataq Jehovä qomarquntsik? (2) Tsë trabäjuta cumplita munarqa, ¿imatataq ruranantsik?

4 Jehoväqa, ushakë manaraq chämuptin entëru Patsapa yachatsikunapaqmi mandamarquntsik. Kë rurëqa alläpa jatun trabäjum (Mateu 24:14; 28:19, 20). Llapan nunakunatam invitanantsik “kawatsikoq yakuta” upuyänampaq, juk parlakïchöqa, Bibliapita yachakïta munaqkunatam yachatsinantsik (Apocalipsis 22:17, NM). Kë rurëta cumplita munarqa llapantsikmi juknölla kanantsik y yanapanakunantsik (Efesius 4:16, NTCN).

5, 6. ¿Imanötaq yachatsikïchö llapantsik juknölla kantsik?

5 Alli willakïta llapan nunakunaman chätsinapaqqa, alli churanakushqam kanantsik y Diospa markan imanö yachatsikunapaq nimanqantsiktam ruranantsik. Tsë yachatsikïtaqa mas chaskintsik yachatsikoq yarqunantsikpaq reunionchömi. Tsëchö imanö yachatsikunapaq nimanqantsikmi yanapamantsik entëru Patsachö nunakunaman yachatsikïta chätsinapaq y  mëtsika publicacionkunata jaqipunapaq. Jina höraqa wakin killakunachöqa maslla yachatsikunapaqmi nimantsik. Tsë rurëkunachö yanapakurqa, entëru Patsachö cristiänu mayintsikkunawanmi juntu trabajëkantsik. Jina angelkunawampis juntum trabajëkantsik, porqui pëkunam yanapamantsik yachatsikunqantsikchö (Apocalipsis 14:6).

6 Alläpam kushikuntsik entëru Patsachö yachatsikunqantsikpita willakïkunata Anuario libruchö cada wata leyirnin. Jina jatun asamblëakunapis juknölla kanapaqqa yanapamantsikmi. Asamblëa qallanampaq atska junaqkuna pishikaptinmi llapantsik juntu nunakunata invitantsik. Y asamblëa hörapis tsë yachatsikïllatam llapantsik wiyantsik. Discursukuna, demostracionkuna y actuacionkunam yanapamantsik Jehoväta maslla sirwinapaq. Jina Jesus wanunqanta cada wata yarpanqantsikpis juknölla kanapaqmi yanapamantsik (1 Corintius 11:23-26, NM). Tsëta yarpänapaq atska semänakuna pishikaptinmi entëru Patsachö yarquntsik invitakoq. Y 14 Nisan junaqnam Inti jeqarkuptin llapantsik juntakantsik. Tsënömi Jesus mandamanqantsikta cumplikanqantsikta y noqantsikrëkur ruramunqampita Jehoväta agradecikunqantsikta rikätsikuntsik.

7. ¿Imatataq rurëta puëdintsik llapantsik yanapanakurninqa?

7 Chukllush niraq kuruqa, jukllëllaqa manam imatapis alläpaqa rurëta puëdintsu. Jina tsënöllam noqantsikpis jukllaqllaqa entëru Patsachö yachatsikïta puëdishwantsu. Peru chukllush niraq kurukunanö juknölla yanapanakurmi mëtsika millon nunakunata Jehoväpita yachatsintsik respetayänampaq y alabayänampaq.

CONGREGACIONCHÖ JUKNÖLLA KANQANTSIKTA IMËPIS RIKÄTSIKUSHUN

8, 9. (1) ¿Ima igualatsikïwantaq apostol Pablu yachatsikurqan congregacionchö juknölla kanantsik alläpa precisanqanta? (2) ¿Imanötaq yanapakushwan congregacion juknölla kanapaq?

8 Ëfesu cristiänukunatam apostol Pablu entienditsirqan congregacion imanö patsätsishqa kanqanta, y kënömi consejarqan: ‘Cada junag mas imaycanöpis Señor Jesucristo cawacungannölla cawacushun’ (leyi Efesius 4:15, 16 *). Apostol Pablum congregacionta igualatsirqan juk cuerputawan y Jesustanam peqatawan. Juk cuerpuchöqa llapanninkunam juknölla yanapanakuyan y tsëpaqqa ankukunam alläpa yanapakun llapanta juntu katsir. Tsënömi Jehoväpa markanchöpis, mayor kar o jövin kar, alli saloryoq kar o qeshyapäkurpis llapantsik sinchikunantsik juknölla kanantsikpaq.

¿Imatataq rurashwan congregacion juknölla imëpis kanampaq?

9 Jesusmi anciänukunata churashqa congregacionta dirigiyänampaq. Y respetanantsikta  y mandamanqantsikta wiyakunantsiktam munan (Hebrëus 13:7, 17). Awmi, höraqa manam fäciltsu wiyakunan. Peru yanapamänapaq Jehoväta mañakushqaqa, santu espïrituntam qomäshun y wiyakoq kanapaqmi yanapamäshun. Humildi kar y anciänukunawan juntu yanapanakurqa congregacionpaqmi juk bendicion kashun. Y llapantsikmi juknölla kashun y cada junaq pasanqanmannömi mas kuyanakushun.

10. ¿Imanötaq congregacion juknölla kanampaq siervu ministerialkuna yanapakuyan? (Rikäri kë yachatsikïpa qallananchö këkaq dibüjuta).

10 Jina congregacion juknölla kanampaqqa siervu ministerialkunapis yanapakuyanmi. Pëkunaqa allipam y kushishqam anciänukunata yanapayan. Pëkunam rikäyan yachatsikunapaq publicacionkuna mana pishinampaq, reunionman ëwaqkunata kushishqa chaskiyan y Diosta adoranantsik wayi altsashqa y limpiu kanampaq yanapakuyan. Siervu ministerialkuna nimanqantsikta wiyakushqaqa congregacion juknölla kanampaq y Jehoväta shumaq ordenädu sirwinapaqmi yanapakuntsik (igualaratsi Hëchus 6:3-6 textutawan).

11. ¿Imatataq jövinkuna rurayänan congregacion juknölla kanampaq?

11 Wakin anciänukunaqa mëtsika watapanam congregacionchö allipa trabajayashqa. Peru itsa mayorna kayan y puntatanöqa rurëta puëdiyannatsu. Tsëmi jövin kaqkunaqa alläpa yanapakïta puëdiyan. Imanö rurayänampaq kaqta yachatsiyaptinqa imëka rurëkunachömi yanapakuyanqa. Y siervu ministerialkunapis alleqmi sinchikuyänan anciänu këman chäyänampaq (1 Timoteu 3:1, 10, NM). Wakin jövin anciänukunaqa Diospa kaqchö allipam poquyashqa, y kananqa congregacionta watukaqnömi yanapakïkäyan, y tsënöpam mëtsikaq wawqikunata y panikunata yanapëkäyan. Llapantsikmi alläpa agradecikuntsik wawqikunata y panikunata yanapayänampaq listu këkaq jövinkunapita (leyi Salmu 110:3 * y Eclesiastes 12:1 *).

FAMILIACHÖ JUKNÖLLA KANQANTSIKTA IMËPIS RIKÄTSIKUSHUN

12, 13. ¿Imakunataq yanapakun familiakuna juknölla kayänampaq?

12 ¿Imataq yanapamashwan familiantsikwan juknölla kanapaq? Familiachö Diosta Adorana Hörata cada semäna ruranqantsikmi. Teytakuna wamrankunawan Jehoväpita yachakurninqa masmi kuyanakuyanqa. Itsa yachatsikoq yarqurnin imanö parlayänampaq kaqta yachakuyanman, tsënöpam listu këkäyanqa shumaq yachatsikuyänampaq. Jina Jehoväta kuyanqampita y mandakunqanta imanö rurëta munayanqampita parlakurninmi familiakunaqa juknölla kayanqa.

Casädukuna Jehoväta kuyayaptin y juntu sirwiyaptinqa casädu kawakïninkuna sinchi y kushikïpaqmi kanqa

 13 ¿Imataq casädukunata yanapanqa juknölla kayänampaq y yanapanakuyänampaq? (Mateu 19:6). Jehoväta kuyayanqan y juntu sirwiyanqanmi. Abrahanwan Säranö, Isaacwan Rebëcanö y Elqanäwan Änanö kuyanakuyänan y shumaq tratanakuyänan (Genesis 26:8; 1 Samuel 1:5, 8; 1 Pëdru 3:5, 6). Tsënöpam juknölla kayanqa y Diospa alli amïgun kayanqa (leyi Eclesiastes 4:12 *).

Familiachö Diosta Adorana Hörata rurayanqanmi mayorkunata y jövinkunata yanapanqa juknölla kayanampaq. (Rikäri 12 y 15 kaq pärrafukunata).

14. Majantsik Jehoväta mana sirwiptimpis, ¿imaraq yanapamäshun casädu kawakïnintsik sinchi kanampaq?

14 Bibliaqa clärum mandakun Jehoväta mana sirweqkunawanqa mana casakunapaq (2 Corintius 6:14). Tsënö këkaptimpis, wakinqa mana Testïguwanmi casädu këkäyan. Tsënöqa këkäyan itsa casädu këkarna Testïgu tikrashqa kar. O itsa juk Testïguwan casakuyarqan y tsëpitana Jehoväta sirwita majan jaqirirqan. Tsënö kaptinqa, sasaraq ruranan kaptimpis Biblia consejakunqanta wiyakuyanqanmi casädu kawakïninkuna sinchi kanampaq yanapanqa. Tantiyarinapaq Marywan qowan David pasayanqanta rikärishun. Ishkanmi Testïgu kayarqan, peru tsëpitam Davidqa reunionkunaman ëwëta jaqirirqan. Maryqa alli warmi kanqanta y alli cristiäna kanqantam rikätsirqan. Joqta wamrankunatam Jehoväpita yachatsirqan, y reunionkunaman y asamblëakunaman ëwëtapis manam jaqirqantsu. Wamrankuna poqurirnam wayipita ëwakuyarqan. Tsëmi Marypaqqa mas sasa karqan Jehoväta japallan sirwinan, peru sirwitaqa manam jaqirqantsu. Hasta revistakunatam wayinchö atska sitiuchö jaqeq qowan tarirnin leyinampaq. Tsëmi juk kutiqa qowan revistata leyir qallëkurqan y tiempuwannam reunionkunaman ëwar qallëkurqan. Juk willkanmi reunionkunachö awilumpaq asientuta imëpis rakeq. Y David reunionman mana chaptinqa wayiman chärirmi awilunta kënö neq: “Papächi, alläpam reunionchö llakirqoq”. 25 watataran Davidqa Jehoväta sirwir yapë qallëkurqan. Y kananqa warminwan juntum Diosta sirwiyan y alläpa kushishqam kawakuyan.

15. ¿Imatataq rurayanman edäna kaq casädukuna jövin kaq casädukunata yanapayänampaq?

 15 Satanasqa familiakunatam imëka mana allikunaman ishkikätsin. Tsëmi Jehoväta sirweq casädukunaqa juknölla kayänan y yanapanakuyänan. Mëtsika watapana casädu karnimpis, casädu kawakïninkunata mas sinchiyätsiyänampaqmi alleq sinchikuyänan. Edäna kaq casädukunam jövin kaq casädukunata yanapëta puëdiyan. Itsa Diosta Adorayänan Höraman invitayanman. Tsënöpam jövin kaq casädukuna rikäyanqa, edäna këkarpis juknölla kayanqanta y kuyakïwan tratanakuyanqanta (Tïtu 2:3-7).

“WITSÄSHUN JEHOVÄPA JIRKANMAN”

16, 17. ¿Imataraq rikäshun llapantsik imëpis juknölla këkarqa?

16 Fiestapaq Jerusalenta viajarninqa, israelïtakunaqa llapankuna juntum yanapanakuyaq. Llapan wanayanqantam juntu alistapakuyaq, y viäjichöpis yanapanakuyaqmi. Y templuman chärirnam Jehoväta juntu alabayaq y adorayaq (Lücas 2:41-44). Noqantsikpis juk shumaq Patsachö kawanapaqmi alistakïkantsik, tsëmi alläpa precisan imëpis juknölla kanantsik y yanapanakunantsik. ¿Pensëkantsikku cristiänu mayintsikta imanöllapapis yanaparinapaq kaqman?

17 Diosta mana sirweq nunakunaqa chipyëpa rakikashqam këkäyan y imëkapitapis piñatsinakurllam kakuyan. Peru Jehovä yanapamashqam noqantsikqa kushishqa kawakuntsik y Biblia yachatsikunqankunata entiendintsik. ¿Manaku tsëpitaqa Jehoväta alläpa agradecikuntsik? Mëchö tärarpis Jehoväpa sirweqninkunaqa pë munanqannömi adorantsik. Y kë ushanan junaqkunachönäqa masran juknölla yanapanakur kantsik. Isaïaswan Miquëas niyanqannömi llapantsik juntu ‘Jehoväpa jirkanman’ witsëkantsik (Isaïas 2:2-4; leyi Miquëas 4:2-4 *). Imëpis juknölla këkarqa, ichikllachönam rikärishun llapan nunakuna Jehoväta juk shonqulla adorayaqta. ¡Imanö shumaq kawakïmi shuyarämantsik!

^ par. 2 1 Corintius 12:4-6, 12 (NM): “Peru rurë yachëqa mëtsikam kan, peru espïrituqa jukllëllam; y mëtsika rurëkunam kan, peru Señorqa jukllëllam; peru mëtsikam milagru rurëkuna kan, peru tsë Diosllam llapan milagrukunata ruran. [...] Porqui imanömi imëkayoq këkarpis cuerpuqa jukllëlla y llapanninkuna juk cuerpullapa kayan, tsënömi Cristupis”.

^ par. 8 Efesius 4:15, 16 (NTCN): “Tsaypa rantinga rasumpacagllata parlarnin alli shongoyog cuyapäcug carga, cada junag masmi imaycanöpis Señor Jesucristo cawacungannölla cawacushun. Payga llapan criyicugcunapa imayca umancunanö llapanpa mandacugninmi. Tsaymi Señor Jesucristopa cuyacuyninwan imayca jucllayllanö, cada junag mas firmi tsaracur imaycachöpis jucnin jucninwanpis yanapanacurnin shumag cawacushun. Tsaynöga cawacuntsic Señor Jesucristopa cuyacuyninwan imayca juc cuerputa llapan ancucuna alli chachac següru tsarangannö, rasumpa cuyacuyyog carmi”.

^ par. 11 Salmu 110:3: “Markëkiqa, guërraman yarquptiki, kikinkuna munarmi qatishurniki yarqayämunqa. Markëkichöqa imëka shullya shutoqnöran, inti yarqunqampita hasta inti ullunqanyaq jövin sirwishoqnikikuna kan”.

^ par. 11 Eclesiastes 12:1: “Kanan jövin kënikichö yarpë Kamashoqnikipaq mana alli tiempukuna manaraq chämuptin, o ‘mananam kallpä kannatsu’ ninëki watakuna manaraq chämuptin”.

^ par. 13 Eclesiastes 4:12: “Jukllaqllataqa venciriyanmanmi, peru manam ishkaqtaqa. Kimapashqa waskaqa, manam ishkëman rasllaqa rachirinmantsu”.

^ par. 17 Miquëas 4:2-4: “Më tsë nacionkunapitam nunakuna ëwayanqa y niyanqa: ‘Shayämï y witsäshun Jehoväpa jirkanman y Jacobpa Diosnimpa wayinman; y pëmi yachatsimäshun näninkunapita, y tsë näninkunachömi purishun’. Porqui Sionpitam ley yarqamunqa y Jerusalenpitanam Jehoväpa parlakïnin. Pëmi juzganqa llapan markakunata, y karuchö puëdeq nacionkunapa mana alli rurëninkunatam altsanqa. Y espädankunatam takllapa puntanman tikratsiyanqa, y lanzankunatanam planta rutukuna tijëraman tikratsiyanqa. Y mananam juk nacion juk nacionpa contran espädata tsarinqanatsu, ni mananam guërrapaq yachakuyanqanatsu. Üvas y hïgus plantankuna jawanchömi täkuyanqa, y manam pipis mantsakätsinqatsu; porqui tröpakunata mandaq Jehoväpa shiminmi parlashqa”.