Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Tinta winakunata katseq nunaqa Jesustam rikätsikun, pëmi salvakoqpaq kaq nunakunata señalan.

Leyeqkuna tapukuyanqan

Leyeqkuna tapukuyanqan

Juk visionchömi Ezequiel rikarqan, tinta winaränanta tsarakushqa juk nunata y armayoq joqta nunakunata, ¿pikunatataq tsë nunakuna rikätsikuyan?

Tsë nunakunaqa, ciëluchö këkaq tröpatam rikätsikun, tsë tröpam Jerusalen markata ushakätsichö yanapakurqan y Satanaspa makinchö këkaq nunakunata Armagedonchö ushakätsichöpis yanapakunqam. Kë entienditsikïqa mushoqmi. Rikärishun puntata entiendinqantsikpita imanir jukläya kanqanta.

Jerusalenqa 607 watachömi ushakarqan, peru tsë manaraq pasakuptinmi Jehoväqa Ezequielta permitirqan imakuna pasakunampaq kaqta rikänampaq. Tsë visionchömi Ezequielqa rikarqan, Jerusalenchö nunakunaqa imëka mana allikunata rurëkäyanqanta. Y tsëpitanam rikarqan joqta nunakunata ‘ushakätsikoq armankunawan’ këkäyaqta. Jina rikarqanmi, lïnu tëlawan vistishqa juk nuna ‘tinta winaränanta’ këkätseqtapis (Ezequiel 8:6-12; 9:2, 3). Y tsë tinta winaränanta këkätseq nunatam Jehovä kënö nirqan: “Jerusalen chowpimpa pasë y wakinkuna mana allikunata rurayanqanta rikarnin waqakïkaqkunata y sufrikaqkunata urkunchö señalë”. Y armankunawan këkaq joqta nunakunatanam nirqan, mana señalashqa kaq nunakunata chipyëpa wanutsiyänampaq (Ezequiel 9:4-7). ¿Imatataq kë visionpita yachakuntsik? ¿Pitaq tinta winaränanta katseq nunaqa?

Kë profecïataqa Ezequiel willakurqan 612 watakuna Jesus shamunampaq pishikaptinmi. Y tsëqa cumplikarqan tsë watapita pitsqa wata pasariptinmi, Babiloniapa tröpankuna Jerusalenta ushakätsiyänampaq Jehovä jaqiriptin. Tsënömi Jehoväqa Babiloniata utilizarqan mana wiyakoq markanta castiganampaq (Jeremïas 25:9, 15-18). Peru ¿imataq pasarqan  wakinkuna mana allita rurayaptin waqëkaq y Dios munanqanta ruraq judïukunawanqa? Pëkunataqa manam ushakätsiyarqantsu.

Rikanqan visionchöqa, manam Ezequieltsu nunakunaman señalta churarqan ni manam Jerusalenta ushakätsichöpis yanapakurqantsu, sinöqa angelkunam tsëtaqa dirigiyarqan. Kë profecïam rikätsimantsik ciëluchö ima pasakïkanqanta musyanapaq: Jehovämi angelkunata nirqan mana wiyakoqkunata ushakätsiyänampaq y wiyakoq kaqtana salvayänampaq. *

Kë profecïaqa manam tsë kutillachötsu cumplikänan karqan, sinöqa yapëpis cumplikänanmi karqan. ¿Imanöraq y imëraq kanqa? Punta publicacionnintsikkunaqa yachatsikamurqan tsë tinta winaränanta katseq nunaqa, kë patsallachöraq këkaq ciëlupaq akrashqakuna kayanqantam. Jina yachatsikamurqanmi Diospa palabranta wiyakur y chaskikurnin salvakuyänampaq juk señalta nunakuna chaskiyanqanta. Peru kananqa precisanmi kënö entienditsikïtaqa juknöpana entiendinantsik. ¿Imanir? Porqui pasaqkunallachöran Mateu 25:31-33 textupita yachakurnin rikarquntsik nunakunata juzgaqqa Jesucristu kanqanta y jatun sufrimientu witsanraq ruranampaq kaqta. Tsë tiempuchömi, pëqa decidinqa pikuna üshanö kayanqanta y pikuna cabranö kayanqanta. Üsha kaqmi salvakuyanqa y cabra kaqmi ushakäyanqa.

Tsëqa, ¿imatataq yachakuntsik Ezequiel rikanqan visionpita? Pitsqata rikärishun:

  1.  Jerusalen manaraq ushakaptinmi Jehoväqa imëka täpakoqkunatanö Ezequielta, Isaïasta y Jeremïasta utilizarqan ima pasakunampaq kaqta nunakunata willatsinampaq. Jina kanampis, Jehoväqa ciëlupaq akrashqa ichiklla grüputam utilicëkan sirweqninkunata yachatsinampaq y jatun sufrimientu manaraq qallaptin, alli willakïta nunakunata willanampaq. Rasumpa kaqchöqa, Diospa llapan sirweqninkunam kë willakïchöqa yanapakïkäyan (Mateu 24:45-47, NM).

  2.  Ezequielqa manam ni ima señaltapis churarqantsu salvakoqpaq kaq nunakunaman. Jina tsënöllam, Diospa kanan witsan sirweqninkunapis ni ima señalta nunakunaman churayantsu. Pëkunaqa nunakunata willayan shamoq tiempuchö ima pasakunampaq kaqkunallatam. Y këtaqa angelkunapa yanapakïninwanmi entëru Patsapa yachatsikïkäyan (Apocalipsis 14:6).

  3.  Ezequiel kawanqan witsanqa, salvakoq kaqkunaqa manam urkunkunachö rasumpa señaltatsu chaskiyarqan. Jina tsënöllam kanan witsampis, jatun sufrimientuta pasaqkunapis urkunkunachö rasumpa señaltatsu chaskiyanqa. Tsëqa, ¿imatataq salvakïta munaq nunakunaqa rurayänan? Yachatsikunqantsikta chaskikurmi Cristu ruranqanta qatiyänan, Diosllata sirwiyänampaq änikuyänan y Cristupa wawqinkunata Diospa Gobiernumpita willakïchö yanapayänan (Mateu 25:35-40, NM). Tsëta ruraq kaq nunakunam Jatun sufrimientu witsanchö juk señalta chaskiyanqa, juk parlakïchöqa, salvashqa kayänampaqmi akrashqa kayanqa.

  4.  Tinta winaränanta katseq nunaqa rikätsikun Jesustam. Jatun sufrimientu witsanmi, juzgarnin y üsha kayänampaq decidirnin Patsachö kawaqpaq kaqkunata Jesus señalnin churanqa. Tsënam pëkunaqa Patsachö imëyaqpis kawakïta puëdiyanqa (Mateu 25:34, 46). *

  5.  Kanan witsanqa, armankunawan këkaq joqta nunakunaqa rikätsikun, Jesus diriginqa ciëluchö këkaq tröpatam. Pëkunam ichik tiempullachöna llapan nacionkunata y imëka mana allikunata ushakäratsiyämunqa (Ezequiel 10:2, 6, 7; Apocalipsis 19:11-21).

Këkunata yachakunqantsikmi rikätsimantsik, mana allita ruraqkunataqa Jehovä ushakätsinampaq kaqman y alli ruraq kaqkunata salvanampaq kaqman markäkunapaq (2 Pëdru 2:9; 3:9). Jina Diospita yachatsikunantsik alläpa precisanqantam rikätsimantsik, porqui ushakë manaraq shamuptinmi llapan nunakuna alli willakïta wiyayänan (Mateu 24:14).

^ par. 6 Tsë salvakoqkunachömi këkäyarqan recabïtakuna, Etiopïa markapita Ebed-melec y Jeremïaspa secretariun Baruc (Jeremïas 35:1-19; 39:15-18; 45:1-5). Peru pëkunaqa manam rasumpatsu urkunkunachö señalashqa kayarqan. Tsëpa rantinqa, salvakuyänampaq aprobashqa kayanqanmi juk señal cuenta karqan.

^ par. 12 Diosta mana jaqipa sirweq ciëlupaq akrashqakunaqa, manam wanayantsu salvakuyänampaq tsë señalta chaskita. Pëkunaqa manaraq wanurmi chipyëpa aprobashqa kayan o jatun sufrimientu manaraq qallaptinmi chipyëpa aprobashqa kayanqa (Apocalipsis 7:1, 3).