Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juliu de 2016

‘Ama mantsakïtsu. Noqam yanapashqëki’

‘Ama mantsakïtsu. Noqam yanapashqëki’

CÄLLIPA paqasna ëwarëkanqantsikman pensarishun. Ëwarëkarmi illaqpita cuentata qokurintsik juk nuna qatikämanqantsikta. Shäkushqaqa pëpis shäkukïkunmi, y mas ras ëwashqanam pëpis mas ras shamur qallëkun. Tsë hörachömi yarpärintsik amänullachö juk amïguntsikpa wayin këkanqanta y cörrillapam wayinman ëwakuntsik. Amïguntsik wayinman yëkaratsimashqaqa, alläpam kushikuntsik, porqui mananam peligruchönatsu këkantsik.

Itsa imëllapis tsënöpaqa pasarquntsiktsu, peru kawënintsikchöqa llakitsimaqnintsikkuna kashqachi. Itsa mana alli rurënintsikta vecïnapaq kallpachakïkarpis, atska kutipa tsë jutsamanqa ishkirquntsik. Itsa unëna trabäjunnaq këkantsik y tarita puëdintsiktsu. Itsa mas edäna tikrakïkanqantsikman y qeshyakurkunapaq kaqman yarpachakuntsik. Itsa maskunamampis yarpachakuntsik.

Juk amïguyoq këqa alläpa allim, problëmakunapa pasashqa wiyamänapaq y yanapamänapaq. ¿Kapamantsikku tsënö juk amïguntsik? Awmi. Jehovämi tsë amïguntsikqa. Pëqa sirweqnin Abrahanpa alli amïgunmi karqan. Isaïas 41:8-13 textum rikätsikun Jehoväqa alli amïgu kanqanta. 10 kaq versïculuchömi Jehovä kënö nimantsik: “Qamwanmi noqaqa këkä, ama imatapis mantsëtsu. Ama wakman këman rikachakïtsu, porqui noqam Diosniki kä. Noqam kallpata qoshqëki. Noqam rasumpa yanapashqëki. Awmi, noqam alli kaqta rurëkunawan chachaq tsararashqëki”. Y 13 kaq versïculuchönam kënö nin: “Porqui noqa, Jehovä Diosnikim, derëcha makikipita tsararëkaq, kënö Nishoqniki: ‘Ama mantsakïtsu. Noqam rasumpa yanapashqëki’”.

“NOQAM CHACHAQ TSARARASHQËKI”

Isaïas libruchö leyinqantsikqa alläpam shoqamantsik. ¿Jehovä änimanqantsik imanö kanampaq kaqman pensarquntsikku? Leyinqantsik textuchöqa manam Jehoväpa lädunchö ëwëkanqantsiktatsu ni makintsikpita tsarïkur apëkämanqantsiktatsu nikan. Tsënö kaptinqa, derëcha kaq makinwanmi izquierda kaq makintsikta tsararëkanman. Sinöqa, “alli kaqta rurëkunawan” derëcha kaq makintsikta tsararëkanqantam nimantsik. Tsë ninanqa, sasa problëmapa pasashqa libramënintsikta munanqanmi. Jehoväqa derëcha kaq makintsikpita tsarirkurmi kënö nimantsik: “Ama mantsakïtsu. Noqam rasumpa yanapashqëki”.

¿Juk amïgutanö y kuyamaqnintsik teytatanöku Jehoväta rikantsik? ¿Problëmakunapa pasarqa yanapamänapaq kaqmanku markäkuntsik? Jehoväqa noqantsikman alläpam yarpachakun y yanapamënintsiktam munan. Tsëmi, problëmakunapa pasarpis tranquïlu kanata munan. “Diosqa noqantsikpaq tsapäkïnintsik y kallpantsikmi, llakikï hörakunachö raslla tarina yanapakïmi” (Salmu 46:1).

 JUTSA RURANQANTSIKPITA MANA ALLI SIENTIKUSHQA

Unë rurayanqan jutsankunamanmi wakin cristiänukunaqa alläpa yarparäyan. Tsëmi, “Diosqa perdonamashqatsuraq” nirnin tapukuyan. Tsënö pensarqa, Job pasanqanman pensarishun. Jövin kanqan witsan jutsata ruranqantam nin (Job 13:26). Davidpis nirqan, jövin kanqan witsanqa jutsata ruranqantam. Tsëmi Jehoväta mañakurqan jutsankunata mana yarpänampaq (Salmu 25:7). Bibliam kënö nimantsik: “Llapantsicmi jutsayoqqa quecantsic. Tsenopam Diospa shumaq queninpita melanepaq caquicantsic” (Romänus 3:23).

Isaïas librupa 41 kaq capïtulunqa, israelïtakunapaqmi qellqakarqan. Pëkunaqa jatun jutsakunatam rurayarqan, tsëmi Jehoväqa Babilonia markaman prësu apakuyänampaq kaqta nirqan (Isaïas 39:6, 7). Peru jutsankunapita arrepentikuyaptin y pëman kutiyaptinqa, salvëkunampaq kaqtam änirqan (Isaïas 41:8, 9; 49:8). Kanan witsampis Jehoväqa, rasumpa arrepentikoqkunata y kushitsiyänampaq kallpachakoqkunataqa ankuparninmi perdonëkun (Salmu 51:1).

Takuya * jutiyoq cristiänuta pasanqanta rikärishun. Pëtaqa alläpam gustëkoq pornografïata rikarë y partinta yatarnin o kuparnin kushikïta tari. Tsëkunata vencinampaq kallpachakïkarnimpis, tsë jutsamanqa ishkireqmi. Tsëmi imapaqpis mana sirwinqanta nirqan. Peru Diosta mañakuriptinqa, ishkinqampita shäritsikanqantanö sienteq. ¿Imanötaq Jehoväqa tsëta rurarqan? Anciänukunawanmi. Pëkunam Takuyata niyarqan, tsë rakcha rurëkunaman ishkirqa telëfunupa qayarinampaq kaqta. Takuyapaqqa manam fäciltsu karqan anciänukunata qayë, peru qayarninqa mas allim sientikoq. Juk junaqmi congregacionkunata watukaq wawqita anciänukuna niyarqan, Takuyata watukanampaq. Y kë wawqiqa Takuyata nirqan, anciänukuna niyashqa kaptin watukëkanqantam. Tsëmi Takuyaqa nin jutsata rurëkaptimpis, anciänukunata utilizarnin Jehovä yanapanqanta. Tiempuwanmi, tsë rakcha rurëkunata vencirirqan y precursor regularmi karqan. Kananqa juk Betel wayichömi yanapakïkan. Awmi, kë wawqita yanapanqannömi noqantsiktapis Jehovä yanapamäshun.

TRABÄJUTA TARINAN FÄCIL MANA KAPTIN

Wakinkunaqa trabäjunkunapita qarquyaptin y jukta tariyänan sasa kaptinmi, alläpa yarpachakuyan. Trabäjuta ashishqa mana chaskimashqam alläpa llakikuntsik. Tsëmi imapaqpis mana sirwiyanqanta mëtsikaq pensayan. Tsënö sientikushqaqa, ¿imanöraq Jehovä yanapamäshun? Itsa rasllaqa juk alli trabäjuta tarinapaq yanapamäshuntsu, peru David kënö ninqantam yarpätsimäshun: “Jövinmi karqa, kananqa awkinyärirqönam, peru manam ni imëpis alli nuna llakipëpaq pureqta, ni tsurinkuna tantata mañakur pureqtapis rikarqötsu” (Salmu 37:25). Awmi, Jehoväpaqqa alläpam precisantsik, tsëmi yanapamäshun kapamanqantsikllawan sirwir sïguinapaq.

¿Imanötaq Jehovä yanapamantsik trabäjunnaq quedakushqa?

Colombiachömi, Sära jutiyoq panintsik rikarqan Jehovä imanö yanapanqanta. Pëmi juk precisaq  emprësachö llapan tiempunwan trabajarqan y atska qellëtam ganaq. Peru Jehoväta mas sirwita munarninmi, trabäjunta jaqirïkur precursöra karqan. Pullan junaqlla trabäjuta tarinan sasa kaptinmi, helädusta rantikunampaq tiendan churarirqan. Y qellënin mana tinkuptinnam rantikïta jaqirirqan. Kima qateqnin watakuna alläpa sasa kaptimpis, Jehovä yanapanqantam nin. Yachakurqanmi wananqankunallawan kawakïta y warë ima pasakunampaq kaqman mana yarpachakïta (Mateu 6:33, 34). Tiempuwannam, trabajanqan emprësachö patronnin trabäjuta qonampaq qayarirqan. Y pënam nirqan “pullan junaqlla trabajanäpaq, reunionnïkunaman y asamblëäkunaman ëwanampaq permïsuta qomaptikillam trabajashaq”. Patronninqa änirqanmi. Atska qellëta mana ganarnimpis, Säraqa precursöranö sirwirmi sïguin. Y tsë sasa tiempukunachö kuyakïwan Jehovä makipita puritsinqantam nin.

EDÄYËKANQANTSIKMAN YARPACHAKUSHQA

Edäna tikrëkäyanqanman y ichikllachöna trabäjunkunapita jubilakuyänampaq kaqmanmi wakinkunaqa yarpachakuyan. Itsa tranquïlu kawayänampaq qellëninkuna tinkunampaq kaqman o mana tinkunampaq kaqman yarpachakuyan. Jina salorninkunamampis yarpachakuyanmi. Itsa Diosta kënö mañakoqqa rey David karqan: “Ama qonqaramëtsu awkinyënïchö; y kallpannaqna këkaptï ama jaqiramëtsu” (Salmu 71:9, 18).

¿Imataq edäyashqakunata yanapanqa kawëninkunaman alläpa mana yarpachakuyänampaq? Jehoväman markäkïninkunata mas sinchiyätsiyanqan y llapan wanayanqankunata qonampaq kaqman markäkuyanqanmi. Wakinkuna itsa mas qellëyoq karnin, imëkayoq kayarqan. Peru kananqa itsa wanayanqanllawan kushishqa kawëta yachakuyänan. Itsa cuentata qokuriyanqa “imëka qorallatapis” mikuyanqan salorninkunapaq mas alli kanqanta (Proverbius 15:17). Jehoväta sirwita puntaman churashqaqa, pëmi edäyënintsikchö llapan wananqantsikkunata qomäshun.

Josëwan Rosem, Tonywan y Wendywan këkäyan

Josëman y Roseman pensarishun. Pëkunaqa Jehoväta llapan tiempunkunawan 65 watanam sirwikäyan. Tsë watakunachöqa atska problëmakunapam pasayarqan. Tantiyarinapaq, Rosepa teytankunatam paqasta y junaqta atiendiyarqan. Jina Josëpis, cancer qeshyapitam operakurqan y quimioterapiawanmi tratakurqan. ¿Imanötaq kë casakushqakunata Jehovä yanaparqan? Tony y Wendy casädu cristiänukunawanmi. Pëkunapam juk wayinkuna kayäpurqan y Jehoväta llapan tiempuwan sirweqtaqa, pita karpis grätisllam qoyta munayarqan. Tonym yarpärirqan escuëlachö kanqan witsan wayimpa ventänampita imëpis rikachakurnin, Diospita kushishqa yachatsikïkaqta Josëwan Roseta rikarnin alläpa espantakunqanta. Josëwan Rose llapan kawëninkunawan Jehoväta sirwiyanqanrëkurmi, Tonywan Wendyqa tsë wayinkunachö täkuyänampaq niyarqan. Y 15 watapanam Josëtawan Roseta yanapëkäyan. Kananqa 85 watayoqnönam kayan, y Tonytawan Wendytaqa Jehoväpa qarënintanömi rikäyan.

Këtam Jehovä änimantsik “ama mantsakïtsu. Noqam rasumpa yanapashqëki”. Jinamampis, ‘alli kaq rurëkunawan’ yanapamänapaqmi änimantsik. ¿Jehoväpa makimpita tsarapakïkantsikku?

^ par. 11 Kë yachatsikïchöqa wakinkunapa jutinkunaqa jukmi.