Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juliu de 2016

Alläpa alli kënimpita Diosta agradecikushun

Alläpa alli kënimpita Diosta agradecikushun

“Alläpa alli këwan [...] junta kanqampitam, alläpa alli këninta imëpis llapantsik chaskintsik” (JUAN 1:16, NM).

CANTICU: 95 Y 13

1, 2. (1) Üvas chakrayoq nuna imata ruranqampita, willakaramï. (2) ¿Imanötaq kë willakï rikätsikun shonqupita qarakoq këta y alläpa alli këta?

JUK nunapam üvas chakran kapurqan. Y juk junaqmi qoya qoyalla ëwarqan peonkunata asheq. Ëkata paganampaq kaqta niriptinmi, peonkunaqa acuerdu karnin trabajaq ëwayarqan. Mas tardinam, chakrayoq nunaqa mas peonkunata wanarnin atska kutipa asheq ëwarqan. Llapankunatam paganampaq kaqta änirqan. Junaq ushariptinnam, llapan peonkunata igualpa pagarqan. Tsënam qoyapita trabajashqa kaqkunaqa quejakur qallëkuyarqan. Peru tsë nunaqa yarpätsirqanmi, ëkata paganampaq kaqta niptin acuerdu kashqa kayanqanta. Jina qellëninwanqa munanqannö ëkatapis paguëta puëdinqantam nirqan. Tsëpitanam tapurqan alli kanqampita imanir chikikuyanqanta (Mateu 20:1-15).

2 Jesusqa kë willakïta parlarqan, Diospa alläpa “alli queninta” rikätsikunampaqmi (leyi 2 Corintius 6:1) [1] (rikäri  kë yachatsikïpa ushananchö këkaq willakïta). Itsa wakinkuna kënö nir pensayanman: “Qoyapita trabajashqa nunakunatam masta paganman karqan”. Peru trabajatsikoq nunaqa alläpa alli karmi, wakinkunatawan igual pagarqan juk höralla trabajaq nunakunatapis. “Alläpa alli këpaq” Biblia parlanqampaqmi juk yachaq nuna nin, “imatapis grätislla y mana ruranqantsikpita chaski” y “pï nunatapis mana ruranqampita allikunata qoy” kanqanta.

JEHOVÄPA MAS JATUN QARËNIN

3, 4. (1) ¿Imanirtaq Diosqa alläpa alli këninta nunakunata rikätsishqa? (2) ¿Imanötaq tsëtaqa rurashqa?

3 Bibliaqa nimantsik, Diospa alläpa alli këninqa juk “qarë” kanqantam (Efesius 3:7, NM). Llapanchö Jehoväta wiyakïta mana puëdirninmi, alli këninta chaskita merecintsiktsu, sinöqa wanïtam. Rey Salomonmi kënö nirqan: “Kë Patsachöqa manam kantsu allikunata rurëkarpis mana jutsallakoq nunaqa” (Eclesiastes 7:20). Jina apostol Pablupis kënömi nirqan: “Llapantsicmi jutsayoqqa quecantsic. Tsenopam Diospa shumaq queninpita melanepaq caquicantsic”. Jina nirqanmi, ‘jutsa rurëpa pägunqa wanï’ kanqanta (Romänus 3:23; 6:23a, NM).

4 Nunakunata alläpa kuyarninmi, Jehoväqa japallan Tsurinta kachamurqan noqantsikrëkur wanunampaq. Alli kënimpitaqa, këmi mas jatun kaq qarënin (Juan 3:16). Pablum nirqan, “wanonqanrecur puedeq y presisaq cananpaq [Jesusta] Dios churarenqanta”. Jesusqa ‘Diospa alli queninrecurmi’ llapantsikpaq wanurqan (Hebrëus 2:9, noqakunam yanayätsiyarqü). Awmi, “Diospa qarëninqa mana wanushpa kawëmi Señornintsik Jesucristurëkur” (Romänus 6:23b, NM).

5, 6. (1) ¿Imamantaq jutsa chätsimantsik? (2) ¿Imamantaq chätsimantsik Diospa alläpa alli kënin?

5 ¿Imanirtaq jutsata rurantsik y wanuntsik? Bibliam nimantsik Adan jutsata ruranqanrëkur wanunqantsikta. Adanpita shamushqa karmi jutsayoqllana kantsik y wanuntsik (Romänus 5:12, 14, 17). Tsënö këkaptimpis, Jesucristuman markäkunqantsikrëkurmi, jutsapa munëninchönatsu kantsik. Tsëpa rantinqa, Diospa alläpa alli kënin kawënintsikchö yanapamänatam jaqintsik. Bibliam kënö nin: “Jutsasapa quecashqapis Diosmi mas alli queninwan perdonecamashqantsic. Imanomi jutsa tsararämantsic munenincho condenamänantsicpaq; tsenollam Diosnintsic alli queninwan Jesucristurecur alli ruraqta ticratsimarnintsic pushamantsic wiñe caweta qoycamantsicpaq” (Romänus 5:20, 21).

6 Jutsasapa karpis, manam jutsapa munëninchötsu kantsik. Tsëmi mana allita rurarqa, Jehoväta mañakuntsik perdonëkamänapaq. Apostol Pablum kënö nirqan: “Mananam jutsa rurecuna wataräyäshunquinatsu. Porqui qamcunaqa manam leypa esclabunatsu cayanqui, sinoqa Diospa alli queninchonam quecayanqui” (Romänus 6:14). Diospa alläpa alli këninmannö kawakurninqa, mananam ‘quiquintsicpa munenintsiccunallataqa’ rurashunnatsu. Tsëpa rantinqa, ‘que patsacho cawashqantsicyaqqa alli tantiyecurmi imatapis’ ruranantsik, “cabal nuna” kanantsik y ‘Teyta Diosta cäsucurnin’ kawakunantsik (Tïtu 2:11, 12, noqakunam yanayätsiyarqü).

 JEHOVÄQA TUKÏNÖPAM ALLÄPA ALLI KËNINTA RIKÄTSIMANTSIK

7, 8. ¿Imataq alläpa alli këninwan Jehovä tukïnöpa qomanqantsikkunaqa? (Rikäri kë yachatsikïpa qallananchö këkaq dibüjuta).

7 Apostol Pablum nirqan, “alläpa alli këninta tukïnöpa Diosnintsik qomanqantsikkunawan” juknintsik juknintsik yanapanakunantsikpaq (1 Pëdru 4:10, NM). ¿Imataq alläpa alli këninwan tukïnöpa Jehovä qomanqantsikkunaqa? Tsëqa, imëka problëmakunapa pasashqapis wananqantsikkunata Jehovä qomanqantsikkunam (1 Pëdru 1:6). Awmi, ima problëmatapis vencinapaqmi wananqantsikkunata imëpis qomantsik.

Imëka problëmaku napa pasashqapis wananqantsikkunata, Jehovä qomantsik alleq tsarakunapaq

8 Rikanqantsiknömi, Jehoväqa tukïnöpa alläpa alli këninta rikätsimantsik. Apostol Juanmi kënö qellqarqan: “Porqui alläpa alli këwan y rasumpa kaqwan junta kanqampitam, alläpa alli këninta imëpis llapantsik chaskintsik” (Juan 1:16, NM). Alläpa alli këninta tukïnöpa Jehovä rikätsimashqam, imëka bendicionkunata chaskintsik. Wakinllata rikärishun.

9. (1) ¿Imanötaq Diospa alläpa alli kënin yanapamantsik? (2) ¿Imanötaq tsëpita agradecïdu kanqantsikta rikätsintsik?

9 Jutsantsikkunatam perdonamantsik. Alläpa alli këninrëkurmi, Jehoväqa jutsantsikkunapita perdonamantsik. Peru tsëtaqa ruran, rasumpa arrepentikushqa y mana allikunata manana ruranapaq sinchikushqallam (leyi 1 Juan 1:8, 9). Jehovä perdonakoq kanqanta entienditsirninmi ciëlupaq akrashqakunata Pablu kënö nirqan: “Diablupa munenincho caquicashqam, Diosnintsic libramarqontsic cuyë tsurin Jesucristupa muneninchona canantsicpaq. Y Jesucristurecurmi Diosnintsic llapan jutsantsiccunapita perdonamarnintsic salbamarqontsic” (Colosensis 1:13, 14). Diosnintsik noqantsikrëkur ruranqanta agradecikurqa, alabarninmi rikätsishun. Jutsantsikkunata perdonamashqam mëtsika bendicionkunata chaskita puëdishun.

10. Diospa alläpa alli këninrëkur, ¿imapitataq kushikuntsik?

10 Dioswan yamë y amïgun kanqantsikpitam kushishqa këta puëdintsik. Jutsasapa karninmi, yurinqantsikpita patsë Jehoväpa chikeqnin kantsik. Tsënö këkashqapis apostol Pablum kënö nirqan: “Contran quecashqapis tsurin Jesucristu wanonqanrecurmi Dioswan amishtarqontsic” (Romänus 5:10). Juk parlakïchöqa, Dioswan yamë y amïgun këtam puëdintsik. Peru ¿imanötaq yamë y amïgun kanapaq yanapakun Diospa alläpa alli kënin? Pablum entienditsikurqan ciëlupaq akrashqakunata kënö nirnin: “Jesucristuman creyir marcäconqantsicrecurmi allitanopis Diosnintsic ricamarqontsic pewan shumaq cawacunantsicpaq. Tsemi Jesucristuman marcäcushqalla, Diosnintsic ancupämashqa allapa cushicuntsic” (Romänus 5:1, 2). Tsëmi, Dioswan amïgun kanqantsikpita alläpa agradecikunantsik.

Jehovä alläpa alli këninta rikätsikoq wakin rurëkuna: Alli willakïkunata yachakunatam permitimantsik. (Rikäri 11 kaq pärrafuta).

11. ¿Imanötaq ciëlupaq akrashqakuna pushayan alli rurëman ‘juk kaq üshäkunata’?

 11 Diospa rikënimpaqmi alli nuna këta puëdintsik. Profëta Danielmi nirqan, ushakë junaqkunachö ciëlupaq akrashqakuna “alli rurëman atska nunakunata” pushayänampaq kaqta (leyi Daniel 12:3 *). ¿Imanötaq tsëta rurayan? ‘Juk kaq üshäkunata’ Diospa Gobiernumpita y leyninkunapita yachatsirninmi (Juan 10:16, NM). Tsënömi kë üshakunata yanapayan, Diospa rikëninchö alli nunana kayänampaq. Y tsëtaqa rurayan Diospa alläpa alli këninrëkurllam. Tsëmi Pablu kënö nirqan: “Diosnintsicmi alli queninrecur, Jesucristurecurlla libraramarqontsic y manam imatapis ruranqantsicrecurtsu allipa ricamantsic” (Romänus 3:23, 24).

Pëman mañakunatam permitimantsik. (Rikäri 12 kaq pärrafuta).

12. ¿Imanötaq Diospa alläpa alli kënin mañakïnintsikchö yanapamantsik?

12 Mañakurmi Diosman witita puëdintsik. Diospa alläpa alli këninrëkurmi, pëman mañakïta puëdintsik. Kuyakïwan mandakoq kaptinmi, Pablu nirqan Jehoväpa täkunanqa ‘ancupäcoq Diosllantsicpa’ täkunan kanqanta, y “mana mantsashpa” pëman witinapaqmi invitamantsik (Hebrëus 4:16a). Jesuspa jutinchömi, imë höra karpis Jehovämanqa mañakïta puëdintsik. Tsëwanqa manam imapis igualantsu. Tsëmi Pablu kënö nirqan: “Mana mantsacushpana[m] chärishun. Tsetam Jesucristuman marcäcurlla shuyarantsic” (Efesius 3:12).

Mas wananqantsik höram yanapamantsik. (Rikäri 13 kaq pärrafuta).

13. ¿Imanötaq Diospa alläpa alli këninqa wananqantsik hörachö yanapamantsik?

13 Wananqantsik höram yanapakïninta  chaskita puëdintsik. Pablum nirqan, wananqantsik höra Diosman mañakunapaq. “Mañacushqaqa ancupämarnintsicmi, alli queninwan yanapecamäshun llapan nesidanintsiccunacho” (Hebrëus 4:16b). Problëmantsikkuna kaptinqa, Jehoväpa yanapakïnintam mañakïta puëdintsik. Pëqa wiyamänapaq manam obligädutsu këkan, tsënö kaptimpis wiyamantsikmi. Imëpis cristiänu mayintsikkunawanmi yanapamantsik. Mañakïnintsikta wiyamashqam kënö nintsik: “Diosmi yanapaman y manam mantsacushaqtsu. Tseno quecaptin ¡manam nuna ni imata ruramanqatsu!” (Hebrëus 13:6).

14. ¿Ima bendicion mastataq chaskintsik Jehovä alli kanqanrëkur?

14 Shoqashqam kantsik. Juk mas bendicionqa, Jehoväpa shoqakïninta alläpa llakishqa këkarnin chaskita puëdinqantsikmi. Tesalönica markachö cristiänukuna qatikachashqa këkäyaptinmi, Pablu kënö qellqarqan: “Jesucristum y Dios Yayantsicmi alli queninwan cuyamarnintsic, alli marcäcoqta wiñepa wiñenin cushishqata catsimantsic. Pe yanapecuyäshï shonqiquicunacho callpata tsarir alli tsaracur cayänequipaq” (2 Tesalonicensis 2:16, 17). Jehovä kuyamanqantsikta y alläpa alli këninrëkur cuidamanqantsikta musyëqa alläpam shoqamantsik.

15. ¿Ima shuyäkïnintsiktaq kapamantsik Diospa alläpa alli këninrëkur?

15 Mana wanushpa kawakïtam shuyäkïta puëdintsik. Jutsasapa kashqam, Jehoväpa mana yanapakïninwanqa ima shuyäkïnintsikpis kapamashwantsu (leyi Salmu 49:7, 8 *). Peru pëqa juk alläpa shumaq shuyäkïtam qomantsik. ¿Imataq tsë shuyäkïqa? Jesusmi kënö nirqan: “Papänïqa munan tsurin canqäta cuentata qocur, noqaman marcäcur, wiñepa cawayänantam” (Juan 6:40). Tsëmi, Diospa alläpa alli këninrëkur mana wanushpa kawakïta shuyarantsik. Pablum kënö nirqan: “Diosmi alli queninrecur musyatsimarqontsic tsurin Jesucristuwan llapan nunacunata salbamänantsicpaq cashqanta” (Tïtu 2:11).

DIOSPA ALLÄPA ALLI KËNIMPITA MANAM PROVECHAKUNANTSIKTSU JUTSATA RURANAPAQ

16. ¿Imanötaq unë witsan cristiänukuna Diospa alläpa alli kënimpita provechakuyarqan?

16 Rikärinqantsiknömi, Jehoväpa alläpa alli këninrëkur mëtsika bendicionkunata chaskintsik. Peru manam tsë alli kënintaqa provechanantsiktsu jutsata ruranapaq. Apostolkuna kawayanqan witsanqa “Diosqa ancupäcoqmi” nirmi, wakin cristiänukunaqa llutanta rurakur kawakuyaq (Jüdas 4). Itsa kë jutsata ruraq cristiänukunaqa pensayaq jutsata rurariyaptimpis, Jehoväqa imëpis perdonanampaq kaqta. Jina wakin cristiänukunapis, pëkunanölla jutsata rurayänantam munayaq. Mëqantsikllapis tsëta rurarninqa, ‘santu espiritupa’ alli kënintam mana kaqpaq churëkashwan (Hebrëus 10:29).

17. ¿Imatataq consejakurqan apostol Pëdru?

17 Wakin cristiänukunatam Satanasqa creitsin, jutsata rurëta puëdiyanqanta y Jehovä perdonanampaq kaqta. Rasumpa kaqchöqa, Jehoväqa listum këkan jutsa ruraqkuna arrepentikuyaptin perdonanampaq. Tsënö kaptimpis, shuyaranmi mana alli rurë munënintsikkunata vencinantsikta. Tsëmi apostol Pëdru kënö nirqan: “Diosnintsicman alli marcäcuyashqequipita cuidadu qepaman cutiyanquiman.  Peru noqantsicqa Salbamaqnintsic Teyta Jesucristupa alli queninta shumaq yachacur yachacur cäyicushun” (2 Pëdru 3:17, 18).

DIOSPA ALLÄPA ALLI KËNINTA ALLEQ UTILIZÄSHUN

18. Alli këninta Jehovä rikätsimashqantsik këkaptinqa, ¿imata ruranapaqtaq kallpachakunantsik?

18 Jehoväpa alläpa alli kënimpita agradecïdu karninqa, llapan qomanqantsiktam utilizänantsik respetanapaq y wakinkunata yanapanapaq. ¿Imanötaq tsëta rurantsik? Pablum kënö nirqan: “Diosmi alli queninrecur cada unuta tuquilaya yachenintsiccuna qomarqontsic”. Tsëmi këkunata ruranapaq nirqan: “Sitsun nuna mayintsicta yanapecunapaq yachenintsic can, yanapecushun. Sitsun yachatsicoq canantsicpaq yacheta qomarqontsic, yachatsicushun. Callpata qor yanapacoq caqqa, jina callpata qorllana yanapatsun”. Jina nirqanmi: “Ancupäcoq caqqa cushi cushilla yanapecutsun” (Romänus 12:6-8). Jehovä alläpa alli këninta rikätsimashqantsik kaptinmi, Diospita willakunantsik, Bibliapita yachatsikunantsik, cristiänu mayintsikkunata animanantsik y ofendimaqnintsikkunatam perdonanantsik.

19. ¿Imapitataq qateqnin kaq yachatsikïchö yachakushun?

19 Alläpa alli këninrëkur mëtsika bendicionkunata Jehovä qomashqantsik këkaptinmi, kallpachakunantsik ‘alli queninwan cuyamanqantsicta ushanqantsicyaq willacur siguinapaqmi’ (Hëchus 20:24). Qateqnin kaq yachatsikïchömi këpita masta yachakushun.

^ [1] (2 kaq pärrafu): Rikäri Perspicacia, volumen 1 nishqan librupa, “Bondad”, o “Bondad inmerecida” nishqan yachatsikïkunata. Jina 2013 wata Traducción del Nuevo Mundo en inglés nishqan revisashqa Bibliachö Glosariutapis.

^ par. 11 Daniel 12:3: “Yachëyoq nunakunaqa atsikyaq ciëlunömi atsikyäyanqa, alli rurëman atska nunakunata apamoqkunanam atsikyaq qoyllurkunanö imëyaqpis kayanqa”.

^ par. 15 Salmu 49:7, 8: “Manam pillapis imanöpa wawqinta salvëta puëdintsu, y manam përëkur juk salvakoqta Diosta qoyta puëdintsu 8 (y pëkunapa almanta salvanampaq kaqpa chaninqa alläpa valoryoqmi y tsëqa manam kantsu imëyaqpis)”.