Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Febrëru de 2017

Teytapa mas alli kaq qarënin

Teytapa mas alli kaq qarënin

‘Llapan alli qarëkuna y chaskinqantsik chipyëpa allikunaqa Teytapitam urämun’ (SANTIÄGU 1:17).

CANCION: 148 Y 109

1. ¿Imakunachötaq Jesus chaninta pagakunqanqa yanapakun?

JESUS chaninta pagakunqanrëkurmi atska bendicionkunata chaskishun. Tantiyarinapaq, alli kaq rurëta kuyaq Adanpa llapan tsurinkuna imëllapis Diospa familian kayänampaqmi yanapakun (rikäri “Maslla entiendinapaq” neq recuadruta). Jinamampis, imëyaqpis kushishqa kawakïta puëdinapaqmi yanapamantsik. Peru Jesus chaninta pagakunqanqa manam tsëllatatsu logran. Sinöqa, ciëluchö y Patsachö kawaqkunapaq precisaq asuntukuna altsakänampaqmi yanapakun (Hebrëus 1:8, 9).

2. (1) ¿Ima precisaqkunapaqtaq padrenuestru nishqan mañakïchö Jesus parlarqan? (Rikäri kë yachatsikïpa qallananchö këkaq dibüjuta). (2) ¿Imapitataq yachakushun kë yachatsikïchö?

2 Wanunampaq ishkë watanö pishikaptinmi, Jesusqa qateqninkunata yachatsirqan imanö mañakuyänampaq kaqta, kënömi nirqan: “Ciëluchö këkaq Teytalläkuna, jutiki alläpa respëtuwan rikashqa katsun. Gobiernïki shamutsun. Ciëluchö y patsachö munëniki rurakätsun” (Mateu 6:9, 10). Kë yachatsikïchöqa, Jesus chaninta pagakunqan kë kiman asuntukunachö imanö yanapakunqantam yachakushun: 1) Jehoväpa jutin alläpa respëtuwan rikashqa kanampaq, 2) Diospa Gobiernunchö y 3) Diospa munënin rurakänampaq.

 “JUTIKI ALLÄPA RESPËTUWAN RIKASHQA KATSUN”

3. (1) ¿Imatataq rikätsikun Diospa jutin? (2) ¿Imanötaq Satanasqa Jehoväpa jutinta rakchatarqan?

3 Puntataqa, padrenuestru nishqan mañakïchöqa, Diospa jutin alläpa respëtuwan rikashqa kanampaqmi Jesusqa mañakurqan. Tsënö nirqa, Diospa jutin santu karnin respëtuwan rikashqa kanampaqmi mañakïkarqan. Kë jutiqa, kikin Jehoväta y imanö Dios kanqantam rikätsikun. Pëqa ciëluchö y Patsachö alläpa puëdeq y alli kaqta ruraq Diosmi. Jesusqa, “Santu Teyta” kanqantam Jehoväpaq nirqan (Juan 17:11). Jehovä santu kaptinmi, llapan ruranqampis santu kayan, hasta leyninkunapis. Tsënö kaptimpis, nunakunapaq leykunata churanampaq Dios derëchuyoq kanqampitam, Satanasqa mana allita parlarqan. Jehoväpaq ulikurninmi (llullakurninmi) jutinta rakchatarqan, juk parlakïchöqa, mana allichö quedatsirqan (Genesis 3:1-5).

4. ¿Imanötaq Jesusqa rikätsikurqan Diospa jutinta alläpa respëtuwan rikanqanta?

4 Jesusqa manam Satanasnötsu karqan, pëqa Jehoväpa jutinta kuyarqanmi. Tsëmi alläpa respëtuwan rikashqa kanampaq imëkanöpa kallpachakurqan (Juan 17:25, 26). ¿Imanötaq tsëta rurarqan? Rurëninwan y yachatsikïninwanmi. Tsënöpam, Jehoväpa mandakïninkuna alli y biennintsikllapaq kanqanta rikäyänampaq wakinkunata yanaparqan (leyi Salmus 40:8-10 *). Jesusqa Diosta sirwita manam jaqirqantsu alläpa sufritsir wanïkätsiyaptimpis. Tsënöpam pëqa rikätsikurqan, juk jutsannaq nunaqa Jehoväta chipyëpa cäsukïta puëdinqanta.

5. ¿Imanötaq rikätsikushwan Jehoväpa jutinta alläpa respëtuwan rikanqantsikta?

5 Y noqantsikqa, ¿imanötaq rikätsikuntsik Jehoväpa jutinta kuyanqantsikta? Tsëtaqa rurënintsikkunawanmi rikätsikuntsik. Jehoväqa shuyaran santu nunakuna kanantsiktam (leyi 1 Pëdru 1:15, 16). Tsëmi pëllata adorantsik y shonqupita patsë cäsukuntsik. Chikir sufritsimashqapis, Jehovä munanqannö kawakunapaqmi kallpachakuntsik. Jehoväpa mandakïninkunata cäsukurninqa, jutintam alläpa precisaqpaq churëkantsik (Mateu 5:14-16). Jinamampis, Jehoväpa leyninkuna alli kanqanta y Satanas ulikoq kanqantam rikätsikuntsik. Tsënö kaptimpis, jutsasapa karninmi höraqa imallachöpis pantarintsik. Peru pantanqantsikkunapitam arrepentikuntsik y Jehoväpa jutinta rakchataq rurëkunata mana ruranapaqmi kallpachakuntsik (Salmus 79:9).

6. Jutsasapa këkashqapis, ¿imanirtaq Jehoväqa alli kaqta ruraqtanö rikämashwan?

6 Ciëlupaq akrashqa o Patsachö kawaqpaq kashqapis, Jesus chaninta pagakunqanman markäkushqam (yärakushqam), Jehoväqa jutsantsikkunapita perdonamantsik. Pëqa, llapan kawëninkunachö sirwiyänampaq änikushqa kaqkunatam adorayänampaq chaskin. Ciëlupaq akrashqakunataqa alli kaqta ruraqtanömi rikan y tsurinkunatanömi chaskin. Jinamampis, Patsachö kawaqpaq kaqkunatapis alli kaqta ruraqtanömi rikan y amïgunkunatanömi chaskin (Juan 10:16; Romänus 5:1, 2; Santiägu 2:21-25). Jesus chaninta pagakunqanrëkurmi, kanampis Teytantsikwan amïgu këta, y jutin alläpa respëtuwan rikashqa kanampaq yanapakïta puëdintsik.

“GOBIERNÏKI SHAMUTSUN”

7. ¿Ima bendicionkunatataq Diospa Gobiernun apamunqa Jesus chaninta pagakunqanrëkur?

7 Padrenuestru nishqan mañakïchöqa, Jesusqa “Gobiernïki shamutsun” nirqanmi. ¿Imanötaq Jesus chaninta pagakunqan yanapakun  Diospa Gobiernunchö? Musyanqantsiknöpis, 144.000 kë Patsapita akrashqa nunakunam, Diospa Gobiernunchöqa Jesuswan gobernayämunqa. Jesus chaninta pagakunqanrëkurmi, tsë nunakunaqa ciëluchö kawayänampaq kawariyanqa (Revelacion 5:9, 10; 14:1). Tsëchöqa, gobernaqkuna y sacerdötikunam kayanqa, y Jesuswanmi waranqa watapa gobernayämunqa. Tsë witsanmi Jehoväqa Gobiernunta utilizanqa, kë Patsata juk shumaq huertaman tikratsinampaq. Jina llapan nunakunatam jutsannaq këman chäyänampaq yanapanqa. Tsënam Jehoväta sirweqkunaqa, ciëluchö y Patsachö kaqkunapis juk familiallana kayanqa (Revelacion 5:13; 20:6). Jesusqa, Satanasta y apamunqan llapan problëmakunatam chipyëpa ushakätsinqa (Genesis 3:15).

8. (1) ¿Imanötaq Jesusqa qateqninkunata yanaparqan, Diospa Gobiernun alläpa precisanqanta entiendiyänampaq? (2) ¿Imanötaq rikätsikuntsik Diospa Gobiernunchö yanapakunqantsikta?

8 Jesusqa, Diospa Gobiernun alläpa precisanqanta entiendiyänampaqmi qateqninkunata yanaparqan. ¿Imanötaq yanaparqan? Bautizakurirllam, ‘Diospa Gobiernumpita alli willakïkunata’ më tsëchö yachatsikur qallëkurqan (Lücas 4:43). Jinamampis, pëpita musyatsikur “patsapa mas karu kuchunyaq” ëwayänampaqmi qateqninkunata nirqan (Hëchus 1:6-8). Kanan witsanqa, Diospita yachatsikurmi Jesus chaninta pagakunqampita yachakuyänampaq y Diospa Gobiernunchö kawakuyänampaq nunakunata yanapantsik. Diospa Gobiernunchö mana jaqipa yanapakunqantsiktaqa rikätsikuntsik, entëru Patsapa ciëlupaq akrashqakuna yachatsikuyanqanchö yanapakurninmi (Mateu 24:14; 25:40).

“MUNËNIKI RURAKÄTSUN”

9. ¿Imanirtaq markäkushwan nunakunapaq Jehovä munanqan cumplikänampaq kaqta?

9 Jina Padrenuestru nishqan mañakïchöqa, “munëniki rurakätsun” nirmi Jesusqa mañakurqan. ¿Ima nitataq munëkarqan? Imapis rurakänampaq Jehovä niptinqa, tsënö rurakänampaq kaqtam (Isaïas 55:11). Satanas contran churakanqanqa manam Jehoväpa munëninta cambiashqatsu. ¿Imatataq Diosqa kë Patsapaq munarqan? Adanwan Ëvapa jutsannaq wamrankunawan kë Patsa juntanantam pëqa munarqan (Genesis 1:28). Wamrankuna manaraq kaptin Adanwan Ëva wanuyaptinqa, Dios munanqanqa manam cumplikanmantsu karqan. Tsëmi Jehoväqa, wamrayoq kayänantaraq jaqirqan. Jesus chaninta pagakunqanqa, markäkoq nunakunatam yanapan jutsannaq këman chäyänampaq y imëyaqpis kawakuyänampaq. Jehoväqa kuyanmi nunakunata y qallananchö munanqannömi kushishqa kawakuyänanta munan.

10. Jesus chaninta pagakunqanqa, ¿imanöraq wanushqakunata yanapanqa?

10 Mëtsikaq nunakunam, Jehoväta manaraq reqirnin wanuyashqa. ¿Imaraq pasanqa pëkunawan? Nunakuna kawayänanta munarninmi, Diosqa pëkunata kawaritsimunqa. Jesus chaninta pagakunqanrëkurmi wanushqakunaqa kawariyämunqa. Y kawariramurqa, Jehoväpita yachakïta y imëyaqpis kawakïtam puëdiyanqa (Hëchus 24:15). Jehoväqa kawëta qokoq karmi, kawaritsimoq nunakunapa Teytan tikrarinqa (Salmus 36:9). Rasuntachi Jesusqa padrenuestru nishqan mañakïchö, “ciëluchö këkaq Teytalläkuna” nirqan (Mateu 6:9). Jehoväqa, wanushqakunata kawaritsimunampaqmi Jesusta cargun qoshqa. Tsëmi Jesusqa, “noqam wanushqakunata kawaritseq y kawëta qokoq kä” nirqan (Juan 6:40, 44; 11:25).

11. ¿Imataq ‘mëtsikaq nunakunapaq’ Diospa munënin?

11 Jina Jesusqa kënömi nirqan: “Pipis Diospa munëninta ruraq kaqmi wawqï, panï y mamänï” (Marcus 3:35). Jehoväqa munan llapan nacionkunapita, kastakunapita y idiömakunapita nunakuna adorayänantam. Y pëkunapaqmi Bibliaqa nin “ni pï nunapis yupëta mana puëdinqan” mëtsikaq nunakuna kayanqanta.  Pëkunaqa Jesus chaninta pagakunqanmanmi markäkuyan y Diosta cäsukïtam munayan. Jina Diosta alabarninmi kënö niyan: “Salvacionqa Diosnintsikpitam shamun, gobernar täkunachö tëkaqpita, y Achkaspita” (Revelacion 7:9, 10).

12. Padrenuestru nishqan mañakïqa, ¿imatataq yachatsimantsik nunakunapaq Jehovä munanqampita?

12 Padrenuestru nishqan mañakïqa, Jehoväpita y nunakunapaq munënimpitam mëtsikata yachatsimantsik. Puntataqa, Diospa jutin alläpa respëtuwan rikashqa kanampaq y pëta alabanapaq llapan puëdinqantsikmannö kallpachakunapaqmi yanapamantsik (Isaïas 8:13). Jesus chaninta pagakunqanqa, salvacionta tarinapaq y Diospa jutin alabashqa kanampaqmi yanapakun. Jina, Jesuspa jutinqa “Jehovächömi salvakïqa këkan” ninanmi. Ishkë kaqchöqa, cäsukoq nunakuna Jesus chaninta pagakunqampa yanapakïninta chaskiyänampaqqa, Gobiernunta Jehovä utilizänampaq kaqtam yachakuntsik. Y kima kaqchönam, Jehoväpa munënin cumplikänantaqa ni imapis mana michänampaq kaqta yachakuntsik (Salmus 135:6; Isaïas 46:9, 10).

JESUS CHANINTA PAGAKUNQAMPITA AGRADECIKUSHUN

13. ¿Imanirtaq bautizakuntsik?

13 Jesus chaninta pagakunqantaqa, kawënintsikchö Jehovällatana sirwinapaq änikurnin y bautizakurninmi agradecikunqantsikta rikätsikuntsik. Tsëta rurarmi, Jesus chaninta pagakunqanman markäkunqantsikta y ‘Jehoväpa kanqantsikta’ rikätsikuntsik (Romänus 14:8). Jinamampis, bautizakurninmi “alli concienciayoq” këta Jehoväta mañakuntsik (1 Pëdru 3:21). Y Jehoväqa contestamantsik, Jesus chaninta pagakunqanrëkur bendicimarnintsikmi. Tsëmi següru këkantsik, llapan änimanqantsikta qomänapaq kaqta (Romänus 8:32).

¿Imanötaq rikätsikuntsik Jesus chaninta pagakunqampita agradecikunqantsikta? (Rikäri 13 y 14 kaq pärrafukunata).

14. ¿Imanirtaq Jehoväqa wakinkunata kuyanapaq mandamantsik?

14 Jehoväqa imatapis ruran kuyakoq karninmi, y pëta adoraqkunapis pënölla rurayänanta y kuyanakuyänantam munan (1 Juan 4:8-11). Nunakunata kuyarninqa, ‘ciëluchö këkaq Teytantsikpa’ tsurinkuna kanqantsiktam cläru rikätsikuntsik (Mateu 5:43-48). Bibliachö mas precisaq kaq mandakïqa, Jehoväta kuyëmi. Y juknin kaqnam, nuna mayintsikta kuyë (Mateu 22:37-40). Nuna mayintsikta kuyanqantsiktaqa rikätsikuntsik, Diospa Gobiernumpita alli willakïkunata yachatsirninmi. Wakinkunata y masqa cristiänu mayintsikta kuyanapaq Dios mandamanqantsikta cäsukushqaqa, pëta kuyanqantsikmi ‘chipyëpa rikakunqa’ (1 Juan 4:12, 20).

 JESUS CHANINTA PAGAKUNQANRËKUR BENDICIONKUNA

15. (1) ¿Ima bendicionkunatataq kanan witsan chaskintsik? (2) ¿Ima bendicionkunatataq shamoq tiempuchöqa chaskishun?

15 Jesus chaninta pagakunqanman markäkushqaqa, jutsantsikkunata paqwë ‘perdonamänapaqmi’ Jehoväqa änimantsik (leyi Hëchus 3:19-21). Puntata rikanqantsiknöpis, Jesus chaninta pagakunqanqa, tsurinkunanö ciëluchö kawayänampaq wakin nunakunata Jehovä chaskinampaqmi yanapakun. Pëkunam ciëlupaq akrashqakuna kayan (Romänus 8:15-17). Jina ‘juk üshakunatapis’ Jehoväqa invitanmi kë Patsachö familiannö kayanampaq. Pëkuna jutsannaq këman chärirninqa, ushanan kaq pruëbatam pasayanqa. Y tsëchö Jehovällapaq kayanqanta rikätsikurninqa, pëkunapis Jehoväpa tsurinkunanam kayanqa (Romänus 8:20, 21; Revelacion 20:7-9). Jehoväqa llapan tsurinkunatam imëpis kuyanqa. Y Jesus chaninta pagakunqanrëkurmi, imëyaqpis bendicionkunata chaskishun (Hebrëus 9:12). Tsë väleq qarëtaqa Jehovämi qomarquntsik y manam pipis qochimënintsikta puëdinqatsu.

16. ¿Imanötaq Jesus chaninta pagakunqanqa libramantsik?

16 Jutsantsikkunapita arrepentikushqaqa, Diabluqa manam ni imanöpapis puëdinqatsu Jehoväpa familian kanata michämënintsikta. Jesusqa “imëyaqpis kanampaq[mi] juk kutilla” wanurqan. Tsë ninanqa, yapëqa chaninta pagakunan manam precisanqanatsu (Hebrëus 9:24-26). Adanqa wanïtam pasamarquntsik, peru Jesusqa imëyaqpis kawakïtam qomäshun. Jesus chaninta pagakunqanqa, Diosta mana cäsukoq nunakunapa mana alli rurëninkunapita y wanïta mantsëpitam libramäshun (Hebrëus 2:14, 15).

17. ¿Imanötaq sientikuntsik Jehovä alläpa kuyamanqantsikman pensarnin?

17 Jehovä änikunqankuna cumplikänampaq kaqtaqa segürum kantsik. Imanömi ciëluchö y Patsachö imëkapis imanö patsätsishqa këkanqanqa imëpis cambiantsu, tsënöllam Jehoväqa ni imëpis cambianqatsu. Tsëmi pëman markäkurqa, ni imëpis llakikïchöqa ushashuntsu (Malaquïas 3:6). Jehoväqa manam kawënintsikllatsu qaramantsik, sinöqa kuyakïnintapis qomantsikmi. Awmi, “noqantsikqa Dios kuyamanqantsiktam musyarquntsik y creirquntsik. Diosqa kuyakïmi” (1 Juan 4:16). Jehoväqa änikunqanta imëpis cumpleq karmi, ichikllachöna kë Patsata juk shumaq huertaman tikratsimunqa. Tsëchöqa Jehovänömi llapan nunakunapis kuyanakuyanqa. Tsëqa, ciëluchö y Patsachö Diosta llapan sirweqkunam Diosta alabarnin kënö niyanqa: “Alabashqa kë, alläpa precisaqpaq churashqa kë, yachëyoq kë, agradecishqa kë, respetashqa kë, poderyoq kë y kallpayoq kë Diosnintsikpa imëyaqpis katsun. Tsënö katsun” (Revelacion 7:12).

^ par. 4 Salmus 40:8-10: “Teyta Diosllä, munanqëkita rurarmi alläpa kushikurqö, y shonqüpa rurinchömi leynikikuna këkan. Jatun congregacionchömi willakurqö alli kaq rurënikipita. ¡Rikë! Manam qallüta tsarätsu. Oh Jehovä, tsëtaqa kikikipis allim musyanki. Manam alli kënikita shonqu rurinllachö pakarätsikurqötsu. Alli kënikipita y salvakoq kanqëkitam willakurqö. Manam jatun congregacionchö pakarätsikurqötsu kuyakïnikita y rasumpa kaqta parlakunqëkita”.