Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Agostu de 2016

Diospa kaqchö poquyänampaq yanapanantsikqa precisanmi

Diospa kaqchö poquyänampaq yanapanantsikqa precisanmi

“Rasumpëpam alli yachatsikïkunata qoyashqëki” (PROVERBIUS 4:2).

CANTICU: 93 Y 96

1, 2. ¿Imanirtaq wakinkunata yachatsinantsik congregacionchö cargukunata chaskiyänampaq?

JESUSQA alleqmi sinchikurqan nunakunata Diospa Gobiernumpita yachatsinampaq. Jina tiemputam jorqarqan discïpulunkunata yachatsinampaqpis. Alli yachatsikoq kayänampaq y Diospa sirweqninkunata imanö cuidayänampaqmi yachatsirqan (Mateu 10:5-7). Felïpiqa yachatsikurninmi alläpa ocupädu karqan, peru warmi wamrankunatapis alleqmi yachatsirqan alli yachatsikoq kayänampaq (Hëchus 21:8, 9). Tsënöllam noqantsikpis wakinkunata yanapanantsik. ¿Imanir?

2 Entëru Patsapa këkaq congregacionkunachömi mëtsikaq nunakuna kayan Bibliapita tsëllaraq yachakushqakuna, peru manaran bautizakuyashqaraqtsu. Kë nunakunam yanapanantsikta wanayan. Entienditsinantsikmi kikinkuna Bibliata leyiyänan y estudiayänan imanir precisanqanta. Jina yachatsinantsikmi wayin wayin yachatsikuyänampaq y estudiuta qoyänampaqpis. Tsëllaraq bautizakushqa wawqikunapis, siervu ministerial y anciänu kayänampaqmi yanapanantsikta  wanayan. Llapantsikmi yanapëta puëdintsik mushoq kaqkunata (Proverbius 4:2).

YACHATSISHUN BIBLIATA KIKINKUNA ESTUDIAYÄNAMPAQ

3, 4. (1) ¿Imanötaq Pablu rikätsikurqan Bibliata alleq estudiëqa yachatsikunqantsikchö alläpa yanapakunqanta? (2) Wakinkunata Bibliata estudiayänampaq yanapëta munarqa, ¿imatataq kikintsik puntata ruranantsik?

3 Diospa munënin ima kanqanta entiendinapaqmi, Jehoväpa sirweqninkunaqa wanantsik Bibliata leyita y estudiëta. Tsëta rurayänan alläpa precisanqantam Colösas cristiänukunata Pablu entienditsirqan kënö nirnin: “Imepis Diosta mañaquicayä qamcunapaq [...] boluntaninta musyayänequipaq”. ¿Imanirtaq precisarqan kë cristiänukuna Bibliata leyiyänan y estudiayänan? Porqui tsëmi yachëta qonan karqan Dios munanqannö imëpis kawakuyänampaq. Jina yanapananmi karqan Diospita yachatsikurnin allikunata rurayänampaqpis (Colosensis 1:9, 10). Tsëmi estudiantikunataqa entienditsinantsik, Bibliata seguïdu leyiyanqan y estudiayanqanqa Jehoväta sirwiyänampaq yanapanampaq kaqta.

4 Estudiantikunata Bibliata leyiyänampaq y estudiayänampaq yanapëta munarqa, kikintsikmi puntataqa leyinantsik y estudianantsik. Seguïdu leyinqantsik y leyinqantsikman yarpachakunqantsikmi yanapamäshun, imanö kawakunapaq y yachatsikunapaq. Tantiyarinapaq, sï yachatsikïkashqa pillapis sasa (aja) tapukïta tapuramashqaqa Bibliawanmi contestëta puëdishun. Jina Jesus, Pablu y wakinkunapis yachatsikïta mana qelanäriyanqampita willakïkunata leyirqa, mas kallpatam tarishun y fäcil mana kaptimpis yachatsikïkäshunllam. Bibliachö yachakunqantsik imanö yanapamanqantsikta wakinkunata willashqaqa, itsa pëkunapis alleq estudiëta munariyanqa.

5. ¿Imanötaq juk estudiantita yanapashwan Bibliata estudiëta yachakänampaq? Willakaramï.

5 Itsa kënö tapukuntsik: “¿Imanötaq estudiantïkunata yanapäman Bibliata estudiëta yachakäyänampaq?”. Tsëpaqqa yachakïkanqantsik publicacionta imanö preparakuyänampaqmi yachatsinantsik. Tantiyarinapaq, cada pärrafuchö këkaq llapan textukunata leyinampaqmi nirishwan. Yachatsikun libruwan yachëkätsirninqa apendice nishqanchö këkaq yachatsikïkunata leyinampaqmi nirishwan. Tsëpitanam reunionkunapaq preparakunampaq y tsëchö parlakurinampaq yanaparishwan. Jina cada yarqamoq Täpakoq y ¡Despertad! revistakunata leyinampaqmi  nirishwan. Jinamampis, tapukïninkunapa respuestanta tarinampaqmi Watchtower Library progrämata computadöranchö utilicëta yacharatsishwan o Internetchö LLAPAN PUBLICACIONKUNA Watchtower nishqanta. Tukïnöpa yachakïta puëdinqanta tantiyarirqa gustarinqam y masmi yachakïta munanqa.

6. (1) ¿Imanötaq estudiantikita yanapankiman Diospa Palabranta kuyanampaq? (2) Diospa Palabranta kuyarninqa, ¿imataraq rurëta munanqa?

6 Bibliapita pitapis yachatsirninqa, Jehoväta reqinampaq Biblia alläpa yanapakunqanta entiendinantam munantsik. Kushi kushilla yachakunanta jaqishun y ama obligashuntsu. Bibliapita mas yachakurninqa, masmi estudiëta munanqa. Tsëqa itsa salmu qellqaq nunanö sientikunqa. Pëmi kënö nirqan: “Noqapaqqa alläpa allim Diosman witï. Ciëluchö y Patsachö Autoridäyoq Teyta Jehovächömi tsapäkïnï ashirqö” (Salmu 73:28). Santu espïritum yanapanqa Jehoväpa amïgun këta munanampaq.

YACHATSIKUYÄNAMPAQ Y ESTUDIUTA QOYÄNAMPAQ YANAPASHUN

7. ¿Imanötaq apostolninkunata Jesus yachatsirqan Diospita yachatsikuyänampaq? (Rikäri kë yachatsikïpa qallananchö këkaq dibüjuta).

7 Apostolninkunata Jesus yachatsinqampitam yachakïta puëdintsik. Apostolninkunawanmi yachatsikoq yarqurqan y pëkunanam rikäyarqan nunakunata imanö yachatsinqanta. Jina Jesusqa yachatsikuyanqan höra imata rurayänampaq kaqta y imata mana rurayänampaq kaqtam cläru willarqan (Mateu 10 kaq capïtulu) [1] (rikäri kë yachatsikïpa ushananchö këkaq willakïta). Pëkunaqa ichik tiempullachömi Diospita alli yachatsikoq tikrariyarqan (Mateu 11:1). Mushoqkuna yachatsikoq yanaqämashqa imanö yanapanapaq kaqta ishkëta rikärishun.

8, 9. (1) ¿Imanötaq Jesus nunakunata parlaparqan? (2) ¿Imanötaq mushoqkunata yanapashwan Jesus ruranqannö nunakunata parlapäyänampaq?

8 Nunakunawan parlayänampaq. Jesusqa manam mëtsikaq nunakuna juntarëkäyaptinllatsu parlapaq, sinöqa cada ünutam masqa parlapaq. Y imëpis kuyëpam parlapaq. Tantiyarinapaq, juk kutin Sicar nishqan pözuchö juk warmita shumaq parlaparqan (Juan 4:5-30). Juk kutinam Mateu Levï jutiyoq impuestu cobrakoq nunata parlaparqan y qateqnin kanampaq invitarqan, y Mateuqa qateqninmi tikrarirqan. Tsëpitanam Mateuqa Jesusta y mas nunakunata wayinman mikoq invitarqan. Y tsëchömi Jesusqa llapanta parlaparqan (Mateu 9:9; Lücas 5:27-39).

Nunakunata kuyëpa tratashqaqa pëkunaqa wiyamäshunmi

9 Natanael jutiyoq nunanam, Jesus täranqan Nazaret nunakunapaq mana allikunata parlarqan. Y tsënö kaptimpis Jesusqa kuyëpam tratarqan. Tsënam Natanaelqa Jesusta jukläyapana rikarqan y pëpita masta musyëta munarqan (Juan 1:46-51). ¿Imatataq yachakuntsik Jesus ruranqampita? Nunakunata kuyëpa  tratashqaqa pëkunaqa wiyamäshunmi [2] (rikäri kë yachatsikïpa ushananchö këkaq willakïta). Mushoqkunata yachatsishun nunakunata kuyëpa parlapäyänampaq. Tsënö rurarqa kushishqam yachatsikuyanqa.

10-12. (1) ¿Imakunatataq Jesus rurarqan nunakuna mas yachakïta munayänampaq? (2) ¿Imanötaq mushoqkunata yanapashwan mas alli yachatsikoq kayänampaq?

10 Yachakïta munaqkunata yachatsiyänampaq. Jesusqa atska rurëyoqmi karqan. Peru parlapanqan nunakuna masllata musyëta munayaptinqa pëqa yachatseqmi. Tantiyarinapaq, juk kutin mëtsikaq nunakuna qocha kuchunman chäriyarqan Jesus yachatsikunqanta wiyakïta munar. Jesusqa Pëdruwan ishkanmi juk barcuman lloqariyarqan y tsëpitam yachatsikurqan. Tsëpitanam juk yachatsikïta Pëdruta yachatsita munarnin, atska pescäduta tsariyänampaq juk milagruta rurarirqan. Tsëpitanam Pëdruta kënö nirqan: “Cananpitam nunacunata noqapaq pescamunqui”. Tsënö niriptinmi Pëdruwan yanaqinkunaqa, raslla barcunkunata tsaki patsaman jorqaramur llapanninkunata jaqirir Jesusta qatiyarqan (Lücas 5:1-11).

11 Nicodëmu jutiyoq nunapis masllatam Jesuspita musyëta munarqan. Peru judïukunapa cortimpita precisaq nuna karmi, Jesuswan parlëkaqta rikarnin wakinkuna ima niyänampaq kaqta mantsapakoq. Tsëmi paqasllapa Jesus kaqta ëwarqan. Jesusqa kushishqam chaskirqan, parlakuyänampaq tiemputa jorqarqan y precisaq yachatsikïkunata entienditsirqan (Juan 3:1, 2). Jesusqa imëpis listum këkarqan nunakunata yachatsinanrëkur y markäkïninkunata sinchiyätsinanrëkur tiemputa jorqanampaq. Noqantsikpis tiempuntsikta jorqanapaqmi listu këkänantsik, tsënöpa yachakïta munaq nunakunaman tiempunkuna kanqan hörachö kutirnin Bibliata entienditsinapaq.

12 Mushoqkunawan yachatsikurninqa, chaskikushqa kaq nunakunaman kutinantsikpaqmi yachatsinantsik. Jina invitanantsikmi yachakïta munaq nunakunaman y estudiuta qoykanqantsik nunakunaman yanaqämänantsikpaq. Tsënöpam Bibliapita alli yachatsikoq kayanqa, y Jehoväta reqiyänampaq wakinkunata yanapayanqampitam kushikuyanqa. Tsëpitaqa kikinkunallanam nunakunata yachatseq kushishqa kutiyanqa. Jinamampis pacienciakoq këtam yachakuyanqa y wayinkunachö nunakunata mana tariyanqanrëkurqa manam qelanäkuriyanqatsu (Gälatas 5:22) (rikäri “ Manam qelanäkurirqantsu” neq recuadruta).

YACHATSISHUN CRISTIÄNU MAYINTSIKKUNATA CUIDAYÄNAMPAQ

13, 14. (1) ¿Imatataq yachakuntsik cristiänu mayinkunata yanapaq cristiänukunapita? (2) ¿Imanötaq jövinkunata y mushoqkunata yachatsishwan cristiänu mayintsikkunata kuyayänampaq?

13 Jehoväqa munan cristiänu mayintsikkunawan kuyanakunantsikta y yanapanakunantsiktam (leyi Lücas 22:24-27 y 1 Pëdru 1:22). Bibliam willakun wakinkunata yanapananrëkur Jesus imëkata ruranqanta. Hasta noqantsikrëkurmi wanurqan (Mateu 20:28). Dorcas jutiyoq cristiänam wakinkunata imëpis yanapaq (Hëchus 9:36, 39). Y Marïa jutiyoq cristiänapis Römachö këkaq cristiänu mayinkunatam  imëkanöpa yanaparqan (Romänus 16:6). ¿Imanötaq mushoqkunata entienditsishwan cristiänu mayintsikkunata yanapë alläpa precisanqanta?

Mushoqkunata yachatsishun cristiänu mayinkunata kuyayänampaq y yanapayänampaq. (Rikäri 13 y 14 kaq pärrafukunata).

14 Mushoqkunatam invitashwan mayorna o qeshyëkaq cristiänu mayintsikkunata watukaq ëwashqa yanaqämänapaq. Puëdikaptinqa teytakunapis wamrankunatam pushëta puëdiyan. Anciänukunapis jövinkunata o mushoq kaqkunatam niriyanman, mayorna kaq cristiänukunapaq mikïnin apapuyänampaq o wayinkunachö imallapis altsëpaq kaptinqa altsarapuyänampaq. Imanö cuidanakunqantsikta rikämarnintsikqa jövinkuna y mushoqkunapis tsënöllam rurayanqa. Juk anciänu ruranqanta rikärishun. Chakrakunapa yachatsikoq ëwarninmi, tsëchö täraq cristiänu mayinkunata imëpis watukaq imanö këkäyanqanta musyanampaq. Tsënö ruranqampitam juk jövin yachakurqan cristiänu mayinkunata imanö yanapanampaq (Romänus 12:10).

15. ¿Imanirtaq precisan mas poquyänampaq ollqu kaqkunata anciänukuna yanapayänan?

15 Jehoväqa ollqu kaqkunatam utilizan congregacionchö yachatsikuyänampaq. Tsëmi ollqu kaqkunaqa alli discursaq këta yachakuyänan. Anciänukunam yanapëta puëdiyan, itsa tsëtaqa rurayanman juk siervu ministerial discursunta yachakuptin wiyarnin (Nehemïas 8:8) [3] (rikäri kë yachatsikïpa ushananchö këkaq willakïta).

16, 17. (1) ¿Imanötaq Pablu rikätsikurqan Timoteu alleq yachakunanta munanqanta? (2) ¿Imanötaq anciänukuna ollqu kaq cristiänukunata yachatsiyanman congregacionta cuidayänampaq?

16 Congregacionta cuidayänampaq ollqukunataqa alläpam wanëkuntsik (rikäri “Maslla entiendinapaq” neq recuadruta). Pabluqa Timoteutam alleq yachatsirqan, y jukkunata yachatsinampaqmi kënö nirqan: “Callpata tsarï Jesucristu imachopis yanapashunequipaq caqta marcäcur. Atscaq wauqintsiccuna nopancho yachatsenqaqta, qampis marcäconqequi yachatsicoqcunata ninqui pecunapis waquincunata yachatsiyänanpaq” (2 Timoteu 2:1, 2). Pabluqa anciänu y apostolmi karqan, tsëmi Timoteuqa imëkata pëpita yachakurqan, wakin yachakunqankunaqa karqan alli yachatsikoq kanampaq y cristiänu mayinkunata imanö yanapanampaqmi (2 Timoteu 3:10-12).

17 Alleq yachakunanta munarmi, Pabluqa atska tiemputa rakirqa Timoteuta yachatsinampaq (Hëchus 16:1-5). ¿Imanötaq Pablu ruranqanta anciänukuna  qatiyanman? Siervu ministerialkunatam, pushayanman cristiänu mayinkunata watukayanqan hörakuna. Tsënöpam pëkunapis yachakuyanqa alli yachatsikoq këta, pacienciakoq këta y kuyakoq këta. Jina yachakuyanqam cristiänu mayinkunata cuidayänampaq Jehoväpa yanapakïninta ashitapis (1 Pëdru 5:2).

ALLÄPAM PRECISAN WAKINKUNATA ALLEQ YACHATSINANTSIK

18. ¿Imanirtaq precisan Jehoväpa kaqchö yanapakuyänampaq wakinkunata yachatsinantsik?

18 Kë ushanan junaqkunachöqa, alli yachatsikoq kayänampaq mushoqkunata yachatsiqa alläpam precisan. Jinamampis, congregacionta cuidayänampaq wawqikunata yachatsinantsikpis alläpam precisan. Jehoväqa munan sirweqninkuna alli yachatsikoq kayänantam y noqantsiktam churamarquntsik mushoqkunata yanapanapaq. Tsëmi Jesuswan Pablu rurayanqannö alleq sinchikunantsik yachatsinantsikpaq. Llapan puëdinqantsikmannömi mushoqkunata yachatsinantsik, porqui ushakë chämunqanyaqqa mëtsikaq nunakunataran Diospita yachatsinantsik pishin.

19. ¿Imanirtaq següru këkanki cristiänu mayintsikkunata yachatsinapaq kallpachakunqantsik alli yarqunampaq kaqta?

19 Mushoqkunata yachatsinapaqqa tiemputaran jorqanantsik y kallpachakunantsikran. Peru segürum këkantsik imanö yachatsinapaq Jehoväwan Jesus yanapamänapaq kaqta. Alläpam kushikushun mushoqkuna congregacionchö y yachatsikïchö yanapakuyänampaq kallpachakoqta rikarninqa (1 Timoteu 4:10). Tsënö kaptimpis, kallpachakur sïguishun Diospa kaqchö poqunapaq, mas alli cristiänu kanapaq y Dioswan alli amïgu kanapaq.

^ [1] (7 kaq pärrafu): Jesusmi discïpulunkunata nirqan këkunata rurayänampaq: 1) Diospa Gobiernumpita yachatsikuyänampaq; 2) wanayanqan mikïta y röpata Jehovä qonampaq kaqman markäkuyänampaq; 3) nunakunawan pleytukur mana kayänampaq; 4) chikir qatikachäyaptin Jehoväman markäkuyänampaq, y 5) nunakuna ima mana allita rurëta munayaptin mana mantsapakuyänampaq.

^ [2] (9 kaq pärrafu): Rikäri Benefíciese de la Escuela del Ministerio Teocrático nishqan librupa 62-64 kaq päginankunata. Tsëchömi nunakunata imanö parlapänapaq yachatsikïkunata tarinki.

^ [3] (15 kaq pärrafu): Rikäri Benefíciese de la Escuela del Ministerio Teocrático nishqan librupa 52-61 kaq päginakunata. Tsëchömi congregacionchö imanö yachatsikuyänampaq yanapakïkuna këkan.