Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juniu de 2017

¿Yarpankiku?

¿Yarpankiku?

¿Shumaq yachakurku leyirqunki tsëllaraq yarqamoq Täpakoq revistakunata? ¿Puëdinkimantsuraq kë tapukïkunata contestëta?

¿Imatataq congregacionkunata watukaqkuna, anciänukuna y wakinkunapis rurayänan Jehoväpa markampita mandakïkunata chaskirirqa?

Jehoväpa markan mandakunqantam raslla cäsukuyänan. Kënömi tapukuyänan: “¿Cristiänu mayïkunata yanapäku Jehoväta imëpis mana jaqiyänampaq? ¿Jehoväpa markan nimanqankunata rasku cäsukü?” (w16.11, pägina 11).

¿Imëtaq cristiänukunaqa Alläpa Puëdeq Babiloniachö prësu cuenta kayarqan?

Apostolkuna wanuriyaptinmi. Cristiänu tukoqkunam yurir qallëkuyarqan. Tsënöpam Catölicu religionwan gobiernuqa, trïgu cuenta cristiänukunata rasumpa kaq yachatsikïkunapita rakir qallëkuyarqan. Peru 1914 wata manaraq kaptinmi, ciëlupaq akrashqakunaqa Alläpa Puëdeq Babiloniapita rakikar qallëkuyarqan (w16.11, päginakuna 23 a 25).

Lefèvre d’Étaples nuna ruranqanqa, ¿imanirtaq alläpa precisarqan?

1520 watakunam, Lefèvre nunaqa frances idiömaman Bibliata tikratsirqan, llapan nunakuna Bibliata entiendiyänanta munar. Bibliapita textukunata entienditsikunqanqa Martin Lutëruta, William Tyndalita y Juan Calvïnutapis yanaparqanmi (wp16.6, päginakuna 10 a 12).

‘Jutsasapa ëtsapa munëninman yarparäkï’ y “santu espïritupa kaqkunaman yarparëqa”, ¿imachötaq jukläya kayan? (Rom. 8:6)

“Jutsasapa ëtsapa munëninmannö” kawakoqqa, mana alli munëninkuna dominaptin mana allikunata rurarninmi kawakun y tsëllapitam imëpis parlakun. Y santu espïritupa kaqkunaman yarparaq kaqqa, Dios munanqanmanmi yarparan y pë pensanqannömi pensëta yachakun. Jutsasapa ëtsapa munëninman yarparëqa wanïmanmi apakun, peru santu espïritupa kaqman yarparëqa kawëman y yamë këmanmi chätsikun (w16.12, päginakuna 11 a 13).

¿Ima consëjukunataq yanapakun alläpa mana llakikunapaq?

Puntataqa mas precisaq kaqtaraq rurë, llapantaqa rurëta mana puëdinqëkita yarpë, Diosnintsik kamanqankunata rikapakï, piñakunëkipa rantin asikuri, ejerciciuta rurë y alleq punïta procurë (w16.12, päginakuna 18 y 19).

¿Imanötaq Enocqa ‘sufrir mana wanunampaq apashqa karqan’? (Heb. 11:5)

Itsachi Jehoväqa shumaqllapa kawëpita wanïman chäratsirqan, tsënöpa sufritsir mana wanutsiyänampaq (wp17.1, päginakuna 12 y 13).

¿Imanirtaq humildi këqa alläpa precisan?

Humildi karninqa, mëyaqlla rurëta puëdinqantsiktam cuentaman churashun, y manam pantanqantsikkunapita tsapäkushuntsu. Y yarpänantsikmi ruranqantsikkunaqa wakinkunapaq allipaq o mana allipaq kanampaq kaqta, y jukkuna parlayanqampitaqa manam ras piñakushuntsu (w17.01, pägina 16).

Punta cristiänukunata pushaqkunata Jehovä diriginqannölla kanampis Testïgukunata Pushaqkunata dirigikanqantaqa, ¿imanirtaq següru këkantsik?

Santu espïritum yanaparqan Diospa Palabranchö rasumpa kaq yachatsikïta entiendiyänampaq, angelkunam yanapakuyarqan yachatsikuyänampaq y Diospa Palabranmanmi confiakuyarqan. Y tsënöllam kanampis alli juiciuyoq y markäkïpaq sirwipakoqta Jehoväqa yanapëkan (w17.02, päginakuna 24 a 26).

¿Ima tapukïkunataq yanapamäshun Jesus wanunqanta mas valoranapaq?

Këkunam: ¿pitaq qaramarquntsik?, ¿imarëkurtaq qaramarquntsik?, ¿imakunata rurananraq precisarqan?, ¿rasumpa wananqantsik qarëku karqan? Tsë tapukïkunamanmi yarpachakunantsik (wp17.2, päginakuna 4 a 6).

¿Juk cristiänuqa decidinqanta cambiëta puëdinku?

Imatapis decidinqantsik alli o mana alli kanqanta musyanapaqqa, höraqa yapëraqmi pensanantsik. Jehoväqa, Nïnivi markapita nunakuna mana alli rurëninkunata jaqiriyanqanta rikarmi, pëkunata ushakätsinampaq decidinqanta cambiarirqan. Yachakïkarnin juk mushoq yachakïta tarirqa y precisaptinqa decidinqantsikta cambianantsikmi (w17.03, pägina 13).

Jukpaq mana allita parlëqa, ¿imanirtaq alläpa mana alli kanman?

Porqui tsëqa mas problëmamanmi chätsimäshun. Rasonyoq o mana rasonyoq karpis, mana allita parlanqantsikwanqa manam imatapis lograshuntsu (w17.04, pägina 19).