Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juniu de 2017

Mas precisaq kaqtaqa ama qonqashuntsu

Mas precisaq kaqtaqa ama qonqashuntsu

“Tsënöpa, qampa jutikiqa Jehovä kanqanta, y entëru patsachöqa qamlla llapampa janampa këkanqëkita nunakuna musyayänampaq” (SAL. 83:18).

CANCION: 46 Y 136

1, 2. (1) ¿Ima asuntutaq nunakunapaqqa mas precisanman? (2) ¿Imanirtaq tsëta entiendinantsikqa alläpa precisan?

MËTSIKA nunakunapaqqa qellë asuntum masqa precisan. Tsëmi, imëkanöpapis imëkayoq këta tïrayan o kayäpunqankunata oqrëtapis munayantsu. Wakinkunapaqnam masqa precisan familiankuna, salorninkuna o kikinkunapaq imatapis logrëta munayanqan.

2 Peru tsë llapankunapitapis juk mas precisaq asuntum kan; tsëqa, Jehovälla ciëluchö y Patsachö autoridäyoq kanqan respetakänanmi. Tsëtaqa manam imëpis qonqanantsiktsu. Mana cuidakurninqa, cada junaq rurënintsikkunawan ocupädu karnin o problëmantsikkunaman yarpachakurllaqa, tsë precisaq asuntuta qonqarishwanmi. Peru Jehovä Dioslla mandakoq kanqanta respetë, imanir precisanqanta mas entiendirninqa, listum këkäshun problëmakunata pasarnin alleq tsarakunapaq y pëwan amïgu kënintsikpis mas sinchim kanqa.

¿IMANIRTAQ TSË ASUNTUQA ALLÄPA PRECISAN?

3. ¿Imatataq Satanasqa nishqa Jehovä imanö gobernanqampita?

3 Jehovälla gobernanampaq derëchuyoq kanqampitam, Satanasqa mana allita parlashqa. Mana alli Gobernanti kanqanta, noqantsikpaq alli kaqta mana munanqanta y nunakunaqa kikinkuna gobernanakurnin mas kushishqa kayänampaq kaqtam nirqan (Gen. 3:1-5). Jina ni  mëqan nunapis shonqupita patsëqa Diosta adorëta mana puëdinqanta, y mana allikunapa pasarninqa Jehoväpa contran churakäriyänampaq kaqtapis nirqanmi (Job 2:4, 5). Tsëmi, Gobiernumpa contran churakëqa mana alliman chätsikunqanta nunakuna musyayänampaq, Jehoväqa jaqishqa tiempu pasanantaraq.

4. ¿Imanirtaq Jehovälla gobernanampaq derëchuyoq kanqanqa cläru rikakänan?

4 Jehoväqa alleqmi musyan Satanas ninqankunaqa mana rasumpa kanqanta. Tsëqa, ¿imanirtaq tsë asuntuta ras altsanampa rantin tiempu pasanantaraq Jehoväqa jaqishqa? Tsëtaqa angelkuna y nunakunarëkurmi rurashqa (leyi Salmus 83:18 *). Adanwan Ëva rurayanqannöllam, mëtsika nunakunaqa Jehoväpa Gobiernumpa contran churakäyashqa. Itsa tsërëkur wakinkunaqa Diablu rasumpa kaqta ninqanta pensayanman. Tsëmi, tsë asuntu nunakunapaq y angelkunapaq cläru manaraq kaptinqa nacionkuna, kastakuna y familiakunaqa problëmallachömi kayanqa. Peru Jehovälla ciëluchö y Patsachö autoridäyoq kanqan cläru rikakäriptinqa, llapantsikmi Gobiernunchö imëyaqpis yamë kawakushun (Efes. 1:9, 10).

5. ¿Imanötaq Jehovälla gobernanampaq derëchuyoq kanqanta rikätsikushwan?

5 Jehoväpa Gobiernunlla mas alli kanqanmi cläru rikakärinqa, peru Satanaspa y nunakunapa gobiernunqa mana alli kashqa karninmi chipyëpa ushakäyanqa. Y Diospa Gobiernun llapampitapis mas alli kanqanqa rikakärinqa, Jesus gobernamuptinmi. Jehoväta mana jaqipa sirweqninkunaqa, Gobiernunman nunakuna qaqëta puëdiyanqantam rikätsikuyanqa (Is. 45:23, 24). ¿Pëkunanöllaku noqantsikpis këta munantsik? Awmi. Tsëta logranapaqqa, Jehovälla gobernanampaq derëchuyoq kanqan imanir precisanqantam yarpänantsik y alleqmi entiendinantsik.

TSËQA SALVACIONNINTSIKPITAPIS MASMI PRECISAN

6. ¿Imataq kushikïnintsikpitapis masqa precisan?

6 Yachakunqantsiknömi, Jehovälla ciëluchö y Patsachö autoridäyoq kanqan rikakänanqa, kushikïnintsikpitapis masmi precisan. Tsëqa, ¿kawënintsik mana precisanqantaku o Jehovä mana kuyamanqantsiktaku rikätsikun? Manam. ¿Imanirtaq tsëta nintsik? Rikärishun.

7, 8. Jehovälla gobernanampaq derëchuyoq kanqan rikakänampaqqa, ¿imanirtaq änikunqankunata cumplinan precisan?

7 Jehoväqa nunakunata alläpam valoramantsik. Pëqa alläpa kuyamarnintsikmi, hasta Tsurintapis salvamänantsikrëkur wanunampaq mandamurqan, tsënöpa imëyaqpis kawakïta tarinapaq (Juan 3:16; 1 Juan 4:9). Änikunqanta Jehovä mana cumpliptinqa, Diabluqa masran ulikoq y mana alli gobernanti karnin nunakunata alli cösaskunata michanqanta nirnin acusanman. Jina chikeqnin nunakunam pëpita burlakur kënö tapukuyan: “¿Mëtaq këkämunampaq kaqta änikunqan? Porqui unë awiluntsikkuna wanukuyanqan junaqpita patsëqa, llapan imëkapis nunakunata Dios kamanqampita patsë kanqannöllam këkan”. Tsënö niyanqanqa rasumpachi kanman änikunqanta Jehovä mana cumpliptinqa (2 Pëd. 3:3, 4). Tsëmi Jehoväqa gobernanampaq derëchuyoq kanqanta rikätsikunanrëkur cäsukoq nunakunata salvanqa (leyi Isaïas 55:10, 11 *). Jinamampis, Jehovä Diosqa kuyakïwanmi gobernamunqa. Tsëmi, mana jaqipa sirweqninkunata imëyaqpis kuyanampaq y alläpa valoranampaq kaqtaqa següru kantsik (Ex. 34:6).

8 Jehovälla gobernanampaq derëchuyoq kanqanta precisaqpaq churanqantsikqa, manam salvakunapaq kaqta mana kaqpaq churëtsu nï  Diospa rikënimpaq mana precisanqantsik ninantsu. Tsëpa rantinqa, mëqan mas precisaq kanqanllatam nikantsik. Tsëtaqa alleq clärum entiendinantsik, tsënöpa precisaq kaqta mana qonqanapaq y Jehoväpa Gobiernunman qaqänapaq.

JOBQA IMANÖ PENSANQANTAM CAMBIARQAN

9. ¿Imatataq Satanasqa Jobpita nirqan? (Rikäri kë yachatsikïpa qallananchö këkaq dibüjuta).

9 Bibliachö këkaq Job libruqa clärum rikätsikun, Dios rikanqannö imatapis rikëqa alläpa precisanqanta. Tsëchöqa, Job alläpa sufrirnin Diospa contran churakärinampaq kaqta Satanas ninqantam leyintsik. Jobta kikin sufritsinampaqmi Satanasqa Jehoväta nirqan, peru pëqa manam tsëta rurarqantsu. Peru Jobta Satanas pruëbaman churanantaqa permitirqanmi. Y kënömi nirqan: “Llapan kapunqanmi makikichö këkan” (leyi Job 1:7-12 *). Wallka tiempullachömi Jobqa oqrarirqan sirweqninkunata, llapan kapunqankunata y chunka kuyashqa wamrankunatapis. Tsë llapampita Dios culpayoq kanqantanömi, Satanasqa rikätsikurqan (Job 1:13-19). Tsëpitanam, alläpa melanëpaq y nanatsikoq qeshyawan Jobta qeshyaratsirqan (Job 2:7). Tsëlla kaptinnöpis, warmin y kimaq amïgun tukoqkunam alläpa llakitsiyarqan (Job 2:9; 3:11; 16:2).

10. (1) ¿Imanötaq Jobqa rikätsikurqan Diosllapaq kanqanta? (2) Peru ¿imachötaq pantashqa këkarqan?

10 ¿Rasumpa kaqtaku Satanasqa nikarqan? Manam, paqwë pantashqam këkarqan porqui Jobqa manam Jehoväta sirwita jaqirqantsu (Job 27:5). Tsënö kaptimpis, juk tiempupaqa Jobqa rasumpa precisaq kaqtaqa qonqarirqanmi. Alli kaqta ruraq kanqantam imëkanöpa rikätsikïta tïrarqan, y imanir sufrikanqanta entienditsiyänantam munarqan (Job 7:20; 13:24). Itsapis pensashwan imëkata sufrishqa karnin tsënö ninqanqa entiendipaq kanqanta. Peru Diosqa rikarqanmi Jobqa pensëninta cambianan precisanqanta. ¿Imanötaq yanaparqan?

11, 12. (1) ¿Imatataq Job cuentata qokurirqan Jehoväpa yanapakïninwan? (2) ¿Imanötaq Jobqa consejayanqanta chaskikurqan?

11 Jehovä imanö yanapanqantaqa tarintsik Job librupa 38 a 41 kaq capïtulunkunachömi. Peru imanir sufrikanqanta entienditsishqa kanqantaqa manam ni mëchöpis nintsu. Porqui Jehoväpaqqa manam tsëtsu masqa precisarqan. Pëqa, alläpa puëdeq këninwan Jobqa ichikllapis mana igualanqanta cuenta qokunantam munarqan.  Tsënömi yanaparqan sufrinqampitapis mas precisaq asuntukuna kanqanta entiendinampaq (leyi Job 38:18-21 *). Tsërëkurmi Jobqa pensëninta cambiarirqan.

12 Tsëläya sufrishqa këkaptin Jobta tsënö parlaparninqa, ¿Jehoväqa mana allipaku tratëkarqan? Manam, y Jobpis manam tsëtatsu pensarqan. Tsëläya sufrishqa këkarnimpis, ima precisaq kanqantam cuentata qokurirqan. Tsëmi kënö nirqan: “Parlanqäta qonqëkullë, peqämampis allpata y uchpata winarmi rasumpa arrepentikü”. Awmi, Jehovä parlapanqanqa Jobta alläpam yanaparqan y shoqarqan (Job 42:1-6). Jina Elihü jutiyoq juk jövinpis Jobtaqa parlapashqanam karqan (Job 32:5-10). Consejayanqanta Job shumaq chaskikunqantaqa Jehovä rikarqanmi, tsëmi pëllata sirwinqampita kushikunqanta nirqan (Job 42:7, 8).

13. ¿Imanötaq Jehovä ninqankunaqa sufrimientunkuna ushakärishqana kaptimpis Jobtaqa yanapëkarqanllaraq?

13 Jehovä ninqankunaqa sufrimientunkuna ushakäriptimpis, Jobtaqa yanapëkarqanllaran. Rasunmi, “qallananchö kapunqampitapis masmi Jehoväqa Jobta bendicirqan”. Peru manachi rastsu llapan pasanqankunataqa qonqarirqan, porqui “qanchis tsurinkuna y kima warmi wamrankuna” kapunampaqqa tiempuran pasarqan (Job 42:12-14). Itsachi Satanaspa culpanrëkur wanoq wamrankunataqa Jobqa llakikarqanllaraq. Y atska watakunapachi llapan sufrinqankunataqa yarparqan. Jina imarëkur pruëbakunata pasanqanta entiendishqa karpis, itsa höra höraqa tapukurqanraq imanir tsëläya sufrimientukunapa pasanan precisashqa kanqanta. Imanö kashqa kaptimpis, Jehovä ninqanmanmi yarpararqan. Tsëmi shoqarqan y yanaparqan Dios rikanqannö imatapis rikänampaq (Sal. 94:19).

¿Mana allikunapa pasëkarnimpis Jehovälla gobernanampaq derëchuyoq kanqanman yarparëta puëdintsikku? (Rikäri 14 kaq pärrafuta).

14. ¿Imatataq yachakuntsik Jobta pasanqampita?

14 Jobta pasanqanqa, noqantsiktapis shoqamäshunmi y Jehovä rikanqannö imatapis rikänapaqmi yanapamäshun. Porqui tsë pasakunqankunaqa “yachakunapaqmi qellqashqa kayarqan, tsënöpa alli tsarakur y Diospa Palabran shoqamashqa, shuyäkïyoq kanapaq” (Rom. 15:4). Jehovälla ciëluchö y Patsachö autoridäyoq kanqan rikakänan mas precisanqantam, Jobta pasanqanqa yachatsimantsik. Tsëmi pasamanqantsikkunallamanqa yarparäkunantsiktsu. Y ama qonqashuntsu, Diospa Gobiernunta mas precisaqpaq churanqantsiktaqa rikätsikuntsik, imëka mana allikunapa pasëkarnimpis Job ruranqannö Jehovällapaq karninmi.

15. Mana allikunapa pasarnin alli tsarakunqantsikqa, ¿imanötaq yanapamantsik?

15 ¿Imanirtaq kallpata qomantsik Jehovällapaq kanqantsikman pensanqantsikqa? Porqui envänulla mana sufrinqantsiktam rikätsimantsik.  Mana allikunata pasanqantsikkunaqa manam Jehovä noqantsikwan piñashqa këkanqantatsu rikätsimantsik, tsëpa rantinqa pë gobernamänata munanqantsikta rikätsikunapaqmi yanapamantsik (Prov. 27:11). Tsëkunachö alli tsarakushqaqa Jehoväpa rikëninchömi alli kashun y shuyäkïnintsikmi mas sinchiyanqa (leyi Romänus 5:3-5). Jobta pasanqanmi rikätsimantsik “Jehoväqa shonqupita patsë kuyakoq y ankupäkoq kanqanta” (Sant. 5:11). Tsëmi següru kantsik Jehovälla ciëluchö y Patsachö autoridäyoq kanqanta rikätsikoqkunataqa, pë bendicinampaq kaqta. Tsëman yarpanqantsikqa, mana allikunapa pasarpis pacienciawan tsarakunapaq y kushishqa kanapaqmi yanapamäshun (Col. 1:11).

JEHOVÄLLA GOBERNANAMPAQ DERËCHUYOQ KANQANTAQA AMA QONQASHUNTSU

16. ¿Imanirtaq Jehovälla ciëluchö y Patsachö autoridäyoq kanqanman yarpänantsik alläpa precisan?

16 Rasumpa kaqchöqa, Jehovälla ciëluchö y Patsachö autoridäyoq kanqanman imëpis yarpëqa manam fäciltsu, y masran imëka problëmakunawan nitipakashqa sientikushqanäqa. Mana precisaq problëmakunapis tsëkunallaman yarparäkushqaqa mas jatunmi tikrakuriyanman. Tsëmi imëka mana allikunapa pasanqantsik hörakuna Jehovälla ciëluchö y Patsachö autoridäyoq kanqanman imëpis yarpänantsikqa alläpa precisan.

17. Jehovä qomanqantsik rurëchö ocupädu kanqantsikqa, ¿imapaqtaq yanapamantsik?

17 Jehovälla gobernanampaq derëchuyoq kanqanta mana qonqanapaqqa, qomanqantsik rurëchö ocupädu kanqantsikmi yanapamäshun. Renë jutiyoq panintsikta pasanqanta rikärishun. Pëtaqa derrami cerebral nishqanmi qoykurqan, imëpis alläpam nanapäkoq y cancer qeshyawampis sufrirqanmi. Hospitalman jampikoq ëwarqa tsëchö trabajaqkunata, wakin qeshyëkaqkunata y pëta watukaq ëwaqkunatam Diospita parlapaq. Juk kutichöqa, ishkë semäna pullanmi hospitalchö karqan, tsëchöqa 80 hörakunam Diospita yachatsikurqan. Wanunampaqna këkarpis, Jehovälla gobernanampaq derëchuyoq kanqantaqa manam qonqarqantsu. Y tsënö ruranqanqa, sufrikanqanman alläpa mana yarparänampaqmi yanaparqan.

18. Mas precisaq kaqta puntaman churanqantsik imanö yanapakunqanta, juk panita pasanqanwan willakaramï.

18 Awmi, llapan junaqkunam ima problëmallapapis pasantsik y tsë hörakunapis Jehovälla ciëluchö y Patsachö autoridäyoq kanqantam yarpänantsik. Jennifer panim, aeropuertuchö kima junaq karqan markanman ëwaq avionkuna mana yarquyaptin. Utishqa y japallan këkarqa fäcilchi llakishqalla kakunman karqan, peru manam tsëtatsu rurarqan. Jehovätam santu espïritunwan yanapëkunapaq mañakurqan, tsënöpa pënölla këkaq wakin pasajërukunata Diospita parlapänampaq. ¿Imanötaq yarqapakurqan? Mëtsikaqtam Diospita parlaparqan y mëtsika publicacionkunatam qarakurqan. Pëmi kënö willakun: “Tsë pasamanqan fäcil mana kashqa kaptimpis, Jehovä bendicimanqanta y pëpa jutinta alabanäpaq kallpata qomanqantam cuentata qokurqä”. Awmi, Jehovä imata munanqantaqa manam qonqarqantsu.

19. Jehoväpa markanqa, ¿imanötaq rikätsikun pëlla gobernanampaq derëchuyoq kanqanta?

19 Jehoväpa markanqa, pëlla ciëluchö y Patsachö autoridäyoq kanqantam imëpis musyashqa y rikätsikushqam. Tsëmi mana alli religionkunapita jukläya kanqanta rikätsikushqa. Llapantsikmi tsënö rurëkanqantsikta o mana rurëkanqantsikta rikänantsik, porqui rasumpa kaq adoracionmanmi qaqëta munantsik.

20. ¿Imanötaq Jehoväqa sientikun pëlla ciëluchö y Patsachö autoridäyoq kanqanta rikätsikushqa?

20 Alli tsarakurnin y mana jaqipa sirwirnin, Jehovälla ciëluchö y Patsachö autoridäyoq kanqanta rikätsikushqaqa, pëqa alläpam kushikun (Sal. 18:25). Qateqnin kaq yachatsikïchömi rikäshun, Jehovälla ciëluchö y Patsachö autoridäyoq kanqanta rikätsikunantsik imanir alläpa precisanqanta y tsëta imanö ruranapaq kaqta.

^ par. 4 Salmus 83:18: “Tsënöpa, qampa jutikiqa Jehovä kanqanta, y entëru patsachöqa qamlla llapampa janampa këkanqëkita nunakuna musyayänampaq”.

^ par. 7 Isaïas 55:10, 11: “Porqui imanömi tamyawan rashtapis ciëlupita shikwamurqa, patsata manaraq oqutsir wayutsirnin, y murukoqta murun y mikunan manaraq qorninqa ciëluta kutintsu, tsaq tsënöllam noqa parlanqäwampis pasakunqa. Mana rurakarqa manam noqaman kutimunqatsu, tsëpa rantinqa munanqänöllam rurakanqa, y llapan ninqäkunam chipyëpa cumplikanqa”.

^ par. 9 Job 1:7-12: “Tsënam Jehoväqa Satanasta kënö nirqan: ‘¿Mëpitataq shamïkanki?’. Tsënö niptinnam Satanasqa Jehoväta kënö nir contestarqan: ‘Patsapa puriramur y rikapakaramurmi shamïkä’. Jehovänam Satanasta nirqan: ‘¿Cuentata qokurqunkiku sirwimaqnï Jobnöqa Patsachö pipis mana kanqanta alli y jutsata mana ruraq, mana alli rurëkunapita rakikashqa y llapan shonqunwan sirwimaqnï kanqanta?’. Tsënam Satanasqa Jehoväta kënö nirqan: ‘¿Debaldillaku Jobqa Diosta mantsashqa? ¿Manaku pëta, wayinta y llapan kapunqantapis tsapänampaq jiruroq cercutanö tsapäkïnikita churarqunki? Llapan ruranqantam bendicirqunki y animalninkunatapis miratsirqunkim. Peru llapan kapunqanta qochiri, mä manakush cärëkichö maldecïkushunki’. Tsënam, Jehoväqa Satanasta kënö nirqan: ‘Llapan kapunqanmi makikichö këkan. ¡Peru kikintaqa ama imanankitsu!’. Tsënam Satanasqa Jehoväpa puntampita yarqur ëwakurqan”.

^ par. 11 Job 38:18-21: “¿Alleqku musyanki patsa imanö jatun kanqanta? Tsë llapanta musyarninqa mä willaramë. ¿Mëpataq këkan aktsiman ëwaq näni? Y ampiraqqa, ¿mëchötaq këkan, ushananyaq apanëkipaq y mëpa nänin kanqanta musyanëkipaq? ¿Tsë tiempuchö yurikushqa karnin, y mëtsika watakunana kawashqa karninku tsëkunata musyanki?”.