Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juliu de 2017

Leyeqkuna tapukuyanqan

Leyeqkuna tapukuyanqan

¿Allitsuraq kanman Diospa sirweqninkunaqa pistölata o juk armakunata wakinkunapita cuidakuyänampaq katsiyänan?

Diospa sirweqninkunaqa, cuidakïta y defendikïta puëdiyanmi. Peru tsëpaqqa Bibliapa musyatsikïninkunatam cuentaman churayänan. Tsëmi yanapanqa wakinkunapita cuidakuyänampaq pistölata y juk armakunata utilicëqa, mana alli kanqanta cuentata ­qokuyänampaq. Tsë asuntuchö alli decidinapaq imakuna yanapamänapaq kaqta rikärishun.

Jehoväpaqqa nunakunapa kawënin alläpa valoryoqmi. Davidqa alleqmi musyarqan “kawëqa” Jehovällachö këkanqanta (Sal. 36:9). Tsëmi juk cristiänu defendikunampaq y kapunqankunata cuidanampaq armakunata katsita munarqa, “yawarpita culpayoq mana kanampaq” nunakunata wanutsinmantsu (Deut. 22:8; Sal. 51:14).

Nunakunataqa tukïwanmi wanutsita puëdiyan. Peru armawanqa, munëkar o mana munëkarpis mas fäcilmi wanuratsiyanman. * Itsapis juk suwakoqqa mantsaq mantsaq këkanman; y suwëkanqan nunata armayoqta rikarqa illapanakurmi qallëkuyanqa. Y tsë pasakuptinqa mëqan karpis wanurinmanmi.

Wanutsiyänampaqna këkaptinmi Jesusqa qateqninkunata nirqan espädankuna ashiyänampaq, peru tsëqa manam defendikuyänampaqtsu karqan (Lüc. 22:36, 38). Tsëpa rantinqa, juk precisaq yachatsikïtam tsëwanqa yachatsikïta munarqan: mëtsikaq nunakuna tukïwan ataquëkäyaptimpis, mana pelyayänampaqmi nirqan (Lüc. 22:52). Mandakoq kaq sacerdötipa sirwipaqninta apostol Pëdru espädanwan atakaptinmi, Jesusqa kënö  nirqan: “Espädëkita sitiunman kutitsi”. Tsëpitanam kënö yachatsikurqan: “Espädata tsareq kaqkunaqa, espädawanmi wanutsishqa kayanqa” y kë yachatsikïqa kananyaqmi mëtsika cristiänukunata yanapëkan (Mat. 26:51, 52).

Miquëas 4:3 textu ninqannöllam, Diospa sirweqninkunaqa ‘espädankunata takllapa puntanman y lanzankunatanam planta rutukuna tijëraman tikratsiyan’. Cristiänukunaqa yamë kawakuyanqampitam reqishqa kayan. Apostol Pablu kënö consejakunqantam cäsukuyan: “Pipis mana allita rurayäshoqnikikunata ama mana allipa kutitsiyëtsu” y “llapan nunakunawan yamë kawakuyë” (Rom. 12:17, 18). Pëqa tukïpam pasarqan, hasta ‘suwakoqkunapita peligrukunachömi’ karqan (2 Cor. 11:26). Peru manam tsëkunapita cuidakunanrëkurtsu, Bibliapa yachatsikïninkunapa contran imatapis rurarqan. Tsëpa rantinqa, Jehoväman y Biblia ninqanmanmi chipyëpa confiakurqan, porqui tsëqa “pelyayänampaq tukïta utilizäyanqampitapis mas allim” (Ecl. 9:18).

Cristiänukunapaqqa, kawëqa imëka cösaskunapitapis masmi precisan. Nunapa kawëninqa manam “imëkan kapunqampitatsu” (Lüc. 12:15). Juk armashqa nuna cösasnintsikkunata suwamashqaqa, tranquïlullam parlapashwan. Tsënö parlapëkashqapis sïguiptinqa, Jesus kënö consejakunqantam cäsukunantsik: “Ama alläpa mana alli nunapa contranqa churakäyëtsu”. Itsa tsëqa llapan kapamanqantsikta apakunanta jaqirishwan (Mat. 5:39, 40; Lüc. 6:29). * Peru mas alliqa kanman puntallapitana alistakunqantsikmi. Chaniyoq cösasnintsikkunata mana rikätsikushllapa purishqa y Jehoväpa testïgun karnin yamë kawakunqantsikta vecïnuntsikkuna musyayaptinqa, manam suwapämäshuntsu (Prov. 18:10; 1 Juan 2:16).

Cristiänukunaqa wakinkunapa concienciankunatam respetantsik (Rom. 14:21). Congregacionchö mëqanllapis armayoq kanqanta musyarirqa, itsa wakin wawqikunaqa espantakuyanqa o hasta ofendikuyanqapis. Kuyakoq karmi munënintsikllata ruranantsikpa rantin, wakinkuna pensayanqantapis cuentaman churashun, armayoq kanapaq leykuna permitimashqapis (1 Cor. 10:32, 33; 13:4, 5).

Cristiänukunaqa alli kaqta ruranapaqmi kallpachakuntsik (2 Cor. 4:2; 1 Pëd. 5:2, 3). Juk cristiänu kikin cuidakunampaq armayoq kanqanman pensarishun. Bibliawan consejashqa këkäyaptimpis armanta katsir sïguiptinqa, manam wakinkunapaq ejemplutsu kanqa. Jinamampis, manam congregacionchö yanapakïta ni carguyoq këta puëdinqatsu. Tsënöllam nishwan trabajanqanchö armata utilizaq wawqikunapaqpis. Trabäjunrëkur armata utilizänampaq niyaptinqa, mas alliqa kanman juk trabäjuta ashinanmi. *

Yachakurinqantsiknöpis cada cristiänum kawëninta, familianta, kapunqankunata imanö cuidanampaq kaqta decidinan y ima trabäjuta akranampaq kaqtapis. Peru imatapis manaraq decidirninmi, Bibliapa musyatsikïninkunata cuentaman churanan; porqui tsëchöqa Jehoväpa kuyakïnin y yachaq këninmi këkan. Bibliapa musyatsikïninta cuentaman churarninmi, poqu cristiänukunaqa wakinkunapita cuidakuyänampaq armata mana utilizäyänampaq decidiyan. Porqui pëkunaqa alleqmi musyayan, Jehovä Diosman confiakurnin y Bibliapa musyatsikïninkunata cäsukurninlla kushishqa kayänampaq kaqta (Sal. 97:10; Prov. 1:33; 2:6, 7).

Jatun sufrimientuchöqa Jehovämanmi cristiänukuna confiakuyanqa y manam defendikïtatsu tïrayanqa.

^ par. 3 Itsapis juk cristiänuqa chukaru animalkunapita cuidakunampaq o mikunanrëkur animalkunata wanutsinampaq juk escopëtata o juk armakunata utilizänampaq decidinman. Tsëta decidirqa, itsa mas alliqa kanman armankunapa bälanta jipirirnin y shoqllirirnin següru guardëkunan. Täranqantsik markachö armakunata mana utilizänapaq leykuna mandakuptinqa cäsukunantsikmi (Rom. 13:1).

^ par. 2 Violadorkunapita imanö defendikunëkipaq kaqta musyëta munarqan, “Cómo evitar una violación” nishqan yachatsikïta, 1993 wata 8 de marzu killa ¡Despertad! revistachö ashiri.

^ par. 4 Juk trabäjuchö armata utilizänëkipaq niyäshuptiki tsë trabäjuta chaskinëkipaq o mana chaskinëkipaq kaqta decidinëkipaqqa, rikäri 2005 wata 1 de noviembri La Atalaya nishqampaq 31 kaq päginanta, y 1983 wata 1 de noviembri nishqampaq 25 y 26 kaq päginankunatapis.