“Sïguiyë santu espïritu pushayäshunqëkimannö kawarnin” (GÄL. 5:16).

CANCION: 22 Y 75

1, 2. (1) ¿Imanö këkanqantataq juk wawqi cuentata qokurirqan? (2) ¿Y imatataq rurarqan tsënölla mana sïguinampaq?

ROBERTQA jövinllam bautizakurqan, peru Diospa kaqkunataqa manam precisaqpaqtsu churarqan. Kënömi nin: “Manam ima jutsatapis rurarqätsu, peru Jehovätaqa sirwinallanmi sirweq kä. Llapan reunionkunamanmi ëwaq kä, y watachö atska kutim precursor auxiliarpis sirweq kä. Peru Diospa kaqchö sinchinö rikakurpis, manam allitsu këkarqa”.

2 Imachö mana alli këkanqantaqa entiendirirqan casakurir-raqmi. Höraqa warminwanmi Bibliapita tapunakuyaq. Warminqa Bibliata alleq estudiaq karmi tapukïkunataqa alli contestaq, peru Robertqa respuestankunata mana musyarmi penqakoq. Tsëmi, “Diospa kaqchö warmïta yanapanäpaq carguyoq këkarqa, manam kënöllaqa kakunätsu” nir pensarirqan. Tsëpitanam Bibliata alleq estudiar qallëkurqan, tsëmi Dios imanö pensanqanta entiendir qallëkurqan y Jehoväwan mas amïgu tikrarirqan.

3. (1) ¿Imatataq rikätsimantsik Robert-ta pasanqan? (2) ¿Ima tapukïkunapa respuestantataq contestashun?

3 Itsa Robert-tanö noqantsiktapis pasëkämashwan. Bibliapita musyanqantsikllawan, reunionkunaman ëwanqantsikllawan  y congregacionwan yachatsikoq yarqunqantsikllawanqa, manam Diosnintsik munanqannö pensaq nunaman tikrashuntsu. Imanö këkanqantsikta rikäkurqa itsa cuentata qokurishun maslla mejoranantsik pishinqanta (Filip. 3:16). Diosnintsik munanqannö pensar sïguinapaqqa yanapamäshun kë tapukïkunata rurakunqantsikmi: “¿Imaraq yanapamanqa Dios munanqannö pensëkanqäta o mana pensëkanqäta cuentata qokunäpaq? ¿Imatataq ruranä Dios munanqannö mas pensanäpaq? ¿Imanöraq cada junaq yanapamanqa Dios munanqannö pensanqäqa?”. Kë tapukïkunata contestarishun.

IMANÖ KËKANQANTSIKTA RIKÄKUSHUN

4. ¿Pikunataq wiyakuyanman Efesius 4:23, 24 textu consejakunqanta?

4 Diospa sirweqnin kanapaqqa imëka cambiukunatam rurarqantsik, y bautizakurirpis cambiukuna rurëtaqa sïguikantsikllam. Tsëmi Bibliaqa, “pushayäshoqniki pensënikikunachömi mushoq tikrarnin sïguiyänëki” nir consejamantsik (Efes. 4:23, 24). Jutsasapa karninmi cambiukunata rurëtaqa sïguikänantsiklla. Y hasta atska watapana Jehoväta sirwikaqkunapis tsënöllam rurarnin sïguiyänan (Filip. 3:12, 13).

5. ¿Ima tapukïkunataq yanapamäshun imanö këkanqantsikta musyanapaq?

5 Diosnintsik munanqannö pensanqantsikta musyanapaqqa, llapantsikmi kënö tapukunantsik: “¿Dios mandakunqankunata cada junaq masku kuyëkä? ¿Jesusnöku mas yachanëpaq nuna tikrëkä? ¿Reunionkunachö shumaqku portakü y alleqku wiyakü? ¿Diospa kaqkunapaq o juk cösaskunapaq parlëku mas gustaman? ¿Dios munanqannöku vestikü y altsapäkü? ¿Consejayämanqanta shumaqku chaskikü? Bibliata y publicacionkunata estudiëqa, ¿gustamanku? ¿Alleqku tsarakü tentacionkunapa pasarnin? ¿Punta yachakunqällawanku këkä o mas poqu cristiänuku tikrarqö?” (Efes. 4:13). Kë tapukïkunata imanö contestanqantsikmi imanö nuna kanqantsikta rikätsikunqa.

6. ¿Ima mastataq wanantsik Diosnintsik munanqannö pensaq nuna kanapaq?

6 Imanö këkanqantsikta musyanapaqqa höraqa wakinkuna yanapamänantsiktaraqmi wanashun. Porqui apostol Pablum nirqan munëninmannö kawakoq nunaqa rurëkanqankunata Dios chikinqanta cuentata mana qokunqanta. Peru Diosnintsik munanqannö pensaq nunaqa imëkatapis Dios rikanqannömi rikan y mana alli rurëkunataqa chikinmi (1 Cor. 2:14-16; 3:1-3). Jesus pensanqannö pensaq nunakunaqa anciänukunam kayan, y pëkunaqa rasllam cuentata qokuriyan imanö këkanqantsikta. Y imanö këkanqantsikpita consejamashqaqa, ¿wiyakushuntsuraq? Wiyakurqa, Diosnintsik munanqannö pensaq nunam tikrashun (Ecl. 7:5, 9).

¿IMATATAQ RURANANTSIK DIOSNINTSIK MUNANQANNÖ MAS PENSANAPAQ?

7. ¿Bibliapita alleq musyanqantsikllawanku Diosnintsik munanqannö pensaq nuna këta puëdintsik? Willakaramï.

7 Manam Bibliapita alleq musyanqantsikllawanqa Diosnintsik munanqannö pensaq nunaman tikrarishuntsu. Porqui rey Salomonpis alleqmi Jehoväpita musyarqan y wakin parlanqankunaqa hasta Bibliachömi qellqarëkan. Peru tsënö këkarpis Jehovätam jaqirirqan (1 Rëy. 4:29, 30; 11:4-6). Tsëmi Bibliapita alleq musyarnimpis, Dios munanqannö pensëta mas procuranantsik (Col. 2:6, 7). Y tsëpaqqa, ¿imatataq ruranantsik?

8, 9. (1) ¿Imaraq yanapamäshun creikïnintsikchö alleq patsakashqa kanapaq? (2) ¿Imarëkurtaq Bibliataqa alleq estudianantsik y yachakunqantsikman alleq pensanantsik? (Rikäri kë yachatsikïpa qallananchö këkaq fötukunata).

 8 Apostol Pablum punta cristiänukunata nirqan poqu cristiänu këta procurayänampaq (Heb. 6:1). Y noqantsikpis tsë consëjutam wiyakunantsik. Tsëpaqqa Dios Yayapa kuyakïninchö imëpis kawakuyëneq librutam alleq estudianantsik. Tsëmi yanapamäshun Bibliachö consëjukuna ninqanmannö cada junaq kawakunapaq. Tsë libruta yachakur ushashqana karqa juk publicacionkunatapis estudiarmi sïguinantsik (Col. 1:23). Jina tsë consëjukunamanmi alleq pensanantsik y tsëmannö kawanapaqmi Jehoväman mañakunantsik.

9 Bibliapitaqa yachakunantsik, Jehovä mandamanqantsikta cäsukunapaqmi y manam musyanallapaqtsu (Sal. 40:8; 119:97). Jina Diospa amïgun kanata michämaqnintsik rurëkunatam jaqinantsik (Tïtu 2:11, 12).

10. ¿Imatataq jövinkuna rurayänan Diosnintsik munanqannö pensaq nuna kayänampaq?

10 Jövin, ¿qamqa pensarqunkinaku Diospa markanchö imanö yanapakunëkipaq kaqta? Betelchö yanapakoq juk wawqim bautizakoqpaq kaq jövinkunawan asamblëakunachö parlëta gustan. Diospa markanchö imanö yanapakïta munayanqanta tapuriptinqa, mëtsikaqmi niyan llapan tiempunkunawan yanapakïta munayanqanta o Diospita yachatsikoqkunata wanayanqan markakunaman ëwakïta munayanqanta. Peru wakinkunaqa manam musyayantsu imata rurayänampaq kaqta. Tsëqa rikätsikun Diospa kaqchö yanapakïtaqa mana precisaqpaq churëkäyanqantam. Tsëmi jövinkunaqa kënö tapukuyänan: “¿Teytäkuna niyämaptinllaku reunionkunaman ëwä y yachatsikoq yarqü? O ¿Jehoväwan rasumpa amïgu karku?”. Jövin kar o mayor karpis llapantsikmi Diospa markanchö masta ruranapaq decidinantsik, porqui tsëmi yanapamäshun Diosnintsik munanqannö pensaq nuna kanantsikpaq (Ecl. 12:1, 13).

11. (1) Imachöpis mejoranantsik pishinqanta cuentata qokurirqa, ¿imatataq ruranantsik? (2) ¿Pipa ejempluntataq qatinantsik?

11 Imachöpis mejoranantsik pishinqanta cuentata qokurirqa, rasmi cambiukunata ruranantsik. Porqui tsëta rurar-ran salvakïtaqa puëdishun (Rom. 8:6-8). Jehoväqa manam perfectu kanatatsu shuyaran, tsëmi santu espïritunwan yanapamantsik. Peru tsënö yanapamashqapis kallpachakurmi sïguinantsik. Jehoväpa Testïgunkunata Pushaqkunapita John Barr wawqim Lücas 13:24 textupita entienditsikurnin nirqan, imatapis raslla mana ruraq cristiänukunaqa mana allichö ushayanqanta. Tsëmi noqantsikqa Jacobnö kanantsik, pëqa bendicionta chaskinqanyaqmi juk angelwan tsaränakur sutanakurqan (Gen. 32:26-28). Bibliata leyï alläpa shumaq kaptimpis, manam juk cuentutanöllatsu leyinantsik. Tsëpa rantinqa imata yachëkätsimanqantsikmanmi alleq pensanantsik.

12, 13. (1) ¿Imaraq yanapamäshun Cristu pensanqannö pensanapaq? (2) ¿Imanötaq Pëdrupa ejemplun y consejamanqantsik yanapamantsik? (3) ¿Imatataq ruranantsik Diosnintsik munanqannö pensaq nuna kanantsikpaq? (Rikäri “ Diosnintsik munanqannö pensaq nuna kanapaq rurëkuna” neq recuadruta).

12 Diosnintsik munanqannö pensaq nuna kanapaq kallpachakushqaqa, santu espïritum yanapamäshun. Tsënöpam Cristu pensanqannö cada junaq mas pensar qallëkushun (Rom. 15:5). Jina santu espïrituqa yanapamäshunmi munanqantsikllata  ruranapa rantin Dios munanqannö nuna kanapaq (Gäl. 5:16, 22, 23). Munënintsikllata rurëta munanqantsikta o imëkayoq këllapaq yarparanqantsikta cuentata qokurirqa, Jehoväta mañakur sïguishun tsënö pensëta cambianapaq. Y pëqa yanapamäshunmi (Lüc. 11:13). Jina yarpäshun, apostol Pëdrupis höra höraqa manam Dios pensanqannötsu pensarqan (Mat. 16:22, 23; Lüc. 22:34, 54-62; Gäl. 2:11-14). Peru manam tsërëkurqa qelanäkurirqantsu. Diospa yanapakïninwanmi ichikllapa ichikllapa Cristunö pensar qallëkurqan. Noqantsikpis kallpachakurqa lograshunmi.

13 Tsëpitanam apostol Pëdruqa nirqan peqata tsarëta, tsarakoq këta y familianö estimanakïta yachakunantsik alläpa precisanqanta (leyi 2 Pëdru 1:5-8). Tsënö kanapaq kallpachakunqantsikmi yanapamäshun Diosnintsik munanqannö pensaq nuna kanapaq. Tsëmi cada junaq kënö tapukunantsik: “¿Imakunachötaq kanan junaq mejorashaq?”.

BIBLIA CONSEJAKUNQANNÖ KAWASHUN

14. Diosnintsik munanqannö pensaq nuna kanqantsikqa, ¿imakunachötaq yanapamäshun?

14 Cristu pensanqannö pensanqantsikqa yanapamäshun trabäjuchö y escuëlachö alleq portakunapaq, parlakïnintsik allilla kanampaq y imëkachöpis cada junaq allita decidinapaqmi. Jina Jehoväpita rakimaqnintsik mana alli rurëkunatam chikishun. Tentacionkunapa pasarpis allim tsarakushun. Y imatapis manaraq decidirmi kënö tapukushun: “¿Bibliapa mëqan consëjunkunataq kë asuntuchö yanapamanqa? ¿Kënö asuntuchöqa imataraq Jesus ruranman karqan? ¿Imata decidinqäwanraq Jehovä kushikunqa?”. Tsënö pensëta yachakänantsikqa alläpam precisan. Maslla entiendirinapaq rikärishun Bibliapa consëjunkuna cada cäsuchö decidinapaq imanö yanapamanqantsikta.

15, 16. (1) ¿Ima consëjutaq yanapamashwan casakïta pensëkashqaqa? (2) ¿Ima consëjutaq yanapamashwan amïguta akrëchö?

15 Majata akrëchö. Tsëpaqqa 2 Corintius 6:14, 15 (leyiri) textuchömi consëjuta tarintsik. Tsëchömi apostol Pablu nirqan, Diosnintsik munanqannö pensaq nunawan munëninllata rurakoq nunaqa alläpa jukläya kayanqanta. Tsëqa, ¿imanöraq kë consëjuta wiyakushwan casakïta pensëkarqa?

16 Amïguta akrëchö. Tsëpaqqa 1 Corintius 15:33 (leyiri) textuchö consëjuta rikärishun. Diosnintsik munanqannö pensaq nunaqa manam munëninllata rurakoq nunakunawanqa amïgu kanantsu, porqui manam Diosnintsik munanqannö pensar sïguinampaq yanapanqatsu. Tsëqa, ¿allitsuraq kanman piwampis mana reqinqantsikwan Internetpa parlanqantsik, mensäjita mandanakunqantsik o pukllanqantsik?

¿Imatapis decidinqantsikqa yanapamäshuntsuraq Diosnintsik munanqannö pensanapaq, Diospa markanchö mas yanapakunapaq y piwampis piñatsinakur shumaq altsanapaq? (Rikäri 17 kaq pärrafuta).

17-19. Diosnintsik munanqannö pensaq nuna karqa: (1) ¿ima rurëkunataraq evitashun? (2) ¿imataraq mas puntaman churashun? (3) ¿imataraq rurashun piwampis problëmachö karqa?

17 Dioswan amïgu kanapaq mana yanapamaqnintsik rurëkuna. Tsëpaqqa  Hebrëus 6:1 (leyiri) textuchömi shumaq consëjuta tarintsik. Pablu ninqannömi Diosnintsikwan mas amïgu kanapaq mana yanapamaqnintsik kaq rurëkunataqa evitanantsik. Tsëmi tsë consëjuman pensarnin imatapis manaraq decidirnin kënö tapukunantsik: “¿Tsëta ruranqäqa yanapamanqatsuraq Dioswan mas amïgu kanäpaq? ¿Kë änïkäyämanqan trabäjuqa alli pagayämaptimpis yanapamanqatsuraq Dioswan amïgu kanäpaq? ¿Nunakunapa problëmankunata altsëta procuraq grüpuman mëtikunqäqa allitsuraq kanman?”.

¿Imatapis decidinqantsikqa yanapamäshuntsuraq Diosnintsik munanqannö pensanapaq, Diospa markanchö mas yanapakunapaq y piwampis piñatsinakur shumaq altsanapaq? (Rikäri 18 kaq pärrafuta).

18 Diospa markanchö mas yanapakunapaq. Jesusqa Mateu 6:33 textuchömi nimantsik imakunata mas puntaman churanantsikpaq kaqta. Diosnintsik munanqannö pensaq nunaqa Diospa Gobiernuntam mas precisaqpaq churan. Tsëmi tsë consëjuta cuentachö katsirnin decidinantsik universidäman ëwanapaq o mana ëwanapaq, o ima trabäjutapis chaskinapaq o mana chaskinapaq.

¿Imatapis decidinqantsikqa yanapamäshuntsuraq Diosnintsik munanqannö pensanapaq, Diospa markanchö mas yanapakunapaq y piwampis piñatsinakur shumaq altsanapaq? (Rikäri 19 kaq pärrafuta).

19 Piwampis piñatsinakurnin. Tsëta altsanapaqqa yanapamäshun Romänus 12:18 textuchö këkaq consëjum. Jesuspa qateqninkunaqa llapan nunakunawan shumaq kawakïtam procuranantsik. Tsëqa, ¿imatataq rurantsik piwampis problëmachö karnin? ¿Rasku altsantsik o mas problëmataku rurarintsik? (Sant. 3:18).

20. ¿Imanirtaq qamqa Diosnintsik munanqannö pensëta munanki?

20 Rikärinqantsiknömi, Diospa consëjunkunaman alleq pensanqantsikqa yanapamäshun imatapis alli kaqta decidinapaq. Y tsënöpam kushishqa kawakïta puëdishun. Kë yachatsikïpa qallananchö parlanqantsik Robertmi kënö nin: “Dioswan mas amïgu tikrarirqa mas alli qowa y alli teytam tikrarirqä, y alläpa kushishqam sientikurqä”. Noqantsikpis, Diosnintsik munanqannö pensanapaq mas kallpachakurqä, kushishqam kanan witsan kawakushun y shamoq tiempuchönam imëyaqpis kushishqa kawakïta puëdishun (1 Tim. 6:19).