“Ama mantsakïtsu, porqui noqam qamwan këkä. Ama llakikur yarpachakïtsu, porqui noqam Diosniki kä. Noqam kallpayoqta tikratsishqëki. Awmi, noqam yanapashqëki” (IS. 41:10).

7 KAQ CANCION Jehovämi kallpata qoman

KËPITAM YACHAKUSHUN *

1, 2. (1) ¿Imanötaq Isaïas 41:10 textuqa panintsik Yoshïkuta yanaparqan? (2) Y noqantsiktaqa, ¿yanapamënintsikta puëdinku?

YOSHÏKU jutiyoq juk panitam, juk ishkë killakunallana kawanampaq kaqta juk doctöra nirirqan. ¿Imatataq kë panintsik rurarqan tsë mana alli noticiata wiyarir? Tsë höram Isaïas 41:10 * (leyi) textu ninqanman yarpärirqan. Y doctöratam kënö nirqan: “Manam mantsakashqatsu këkä, porqui Jehovä Diosmi makïpita tsararëkäman”. * Kë panintsiktaqa tsë textum alläpa yanaparqan Jehoväman chipyëpa confiakunampaq. Jina tsënöllam noqantsiktapis yanapamäshun problëmakunapa pasanqantsik hörakuna. Isaïas textu imanö yanapamanqantsikta maslla entiendinapaq, puntata rikäshun imanir tsëta escribinampaq Isaïasta Jehovä mandanqanta.

2 Isaïasta ninqan palabrakunataqa, Jehoväqa puntata utilizarqan Babilonia markaman israelïtakuna prësu apashqa kayanqan tiempuchö yanapanampaqmi. Jinamampis llapan sirweqninkunata yanapanampaqmi Palabran Bibliachö escribitsirqan (Is. 40:8; Rom. 15:4). Kanan witsanqa ‘alläpa mana alli tiempukunachömi’ kawëkantsik. Tsëmi imëpitapis masqa Isaïas libruchö këkaq Diospa palabran shoqamänata wanantsik (2 Tim. 3:1).

3. (1) ¿Imatataq Jehoväqa änimantsik 2019 watapaq kaq textuchö? (2) ¿Imanirtaq tsë änikïkunata wanantsik?

 3 Kë yachatsikïchömi yachakushun Jehoväman mas markäkunapaq kima änikïninkunapita (awnikuyninkunapita). Tsëqa këkan 2019 watapaq Isaïas 41:10 textuchömi. Punta kaq änikïqa, Jehovä noqantsikwan imëpis këkanqanmi. Ishkë kaq änikïqa, Jehovä Diosnintsik kanqanmi. Y kima kaq änikïqa *, imëpis yanapamänapaq Jehovä nimanqantsikmi. ¿Imanirtaq tsë änikïkunata wanantsik? Porqui noqantsikpis panintsik Yoshïkunömi imëka mana allikunapa pasantsik. Jinamampis mana allita ruraq nunakuna kawayanqan tiempuchömi këkantsik. Y wakintsiktaqa Diospita yachatsikunqantsikrëkur gobiernukunam chikimarnintsik imëka mana allikunata rurëkämantsik.

“NOQAM QAMWAN KËKÄ”

4. (1) ¿Mëqan änikïpitataq puntata yachakushun? (Rikäri päginapa ura kuchunchö nötata). (2) ¿Imanötaq Jehoväqa kuyamanqantsikta rikätsimantsik? (3) Y tsëqa, ¿imanötaq qamta yanapashunki?

4 Puntataqa kënö nirmi Jehoväqa mana mantsakunapaq yanapamantsik: “Ama mantsakïtsu, porqui noqam qamwan këkä”. * Jina noqantsikwan këkanqanta rikänapaqmi kënö nimantsik: “Rikënïchö alläpa alli nuna kashqa kaptikim, alläpa väleqtanö rikä, y alläpam kuyaq” (Is. 43:4). Sirweqninkunata Jehovä kuyanqantaqa manam imapis ushakätsinqatsu. Porqui pëqa imëpis cuidëkanqallam (Is. 54:10). Jehovä amïguntsik kanqanta y kuyamanqantsikta musyanqantsikmi yanapamantsik, mas valoryoq kanapaq. Unë witsanchö amïgun Abranta Jehovä cuidanqannöllam, noqantsiktapis cuidamäshun. Y mana mantsakänampaq kaqtam nirqan, porqui escüdu cuentam cuidamäshun (Gen. 15:1).

Jehovä yanapamashqam imëka problëmakunapa pasarpis tsarakïta puëdishun. (Rikäri 5 y 6 kaq pärrafukunata). *

5, 6. (1) ¿Imanirtaq següru këkantsik problëmakunapa pasarpis Jehovä yanapamänapaq kaqta? (2) ¿Imatataq yachakuntsik Yoshïku panipita?

5 Jehoväqa yanapamënintsiktam munan. Tsëmi kënö nimantsik: “Imëka problëmakunapa pasëkaptikipis, noqaqa qamwanmi këkäshaq; mayupa pasaptikipis manam apashunkitsu, nina chowpimpa puriptikipis manam rupashunkitsu” (Is. 43:2). ¿Tsëqa ima ninantaq?

 6 Jehoväqa manam problëmantsikkunata chipyëpa ushakätsinampaq kaqtatsu nimantsik, tsënö karpis tsë problëmakuna para siempri sufritsimänataqa manam permitinqatsu. Tsëpa rantinqa alli tsarakunapaq yanapamänapaq kaqtam nimantsik. Jinamampis alläpa mana yarpachakunapaq, y ima pasakuptimpis wanunqantsikyaq sirwir sïguinapaqmi yanapamäshun (Is. 41:13). Tsëmi pasarqan qallananchö parlanqantsik panintsik Yoshïkuwampis. Wamranmi kënö cuentakun: “Mana creipaqmi karqan mamänïta tranquïlulla kanqanta rikëqa. Tsëqa clärum rikätsiyämarqan alli sientikunampaq Jehovä yanapashqa kanqanta. Y hasta wanunqan junaqyaqmi enfermërakunata y wakin qeshyëkaqkunata Jehoväpita parlapëkarqanlla”. Y noqantsikqa, ¿imatataq yachakuntsik Yoshïku panipita? Jehovä yanapamänapaq kaqman confiakurqa, ima problëmapa pasarpis alli fuertim kashun.

“NOQAM DIOSNIKI KÄ”

7, 8. (1) ¿Mëqan ishkë kaq änikïpitataq yachakushun, y ima ninantaq llakikur yarpachakï palabrakuna? (2) ¿Imanirtaq Jehoväqa prësurëkaq markanta nirqan llakikur mana yarpachakuyänampaq? (3) Isaïas 46:3, 4 textuchöqa, ¿imatataq Jehoväqa markanta nirqan yanapanampaq?

7 Kananqa rikäshun Isaïas libruchö këkaq ishkë kaq änikïta. Kënömi nin: “Ama llakikur yarpachakïtsu, porqui noqam Diosniki kä”. Puntata escribiyanqan idiömachöqa, yarpachakï neq palabraqa mantsakur wakman këman rikachakïtam rikätsikun.

8 Babiloniachö prësurëkaq judïukunata, ¿imanirtaq Jehoväqa llakikur mana yarpachakuyänampaq nirqan? Porqui Jehoväqa musyarqanmi Medopersiapa puëdeq tröpankuna Babiloniata ushakätsiyanqan tiempuchö nunakuna alläpa mantsakäyänampaq kaqta. Awmi, Jehoväqa kë puëdeq tröpatam utilizänan karqan markanta libranampaq (Is. 41:2-4). Babilonia nacion nunakuna y juk nacionpita tsëchö täraq nunakunaqa chikeqnin tröpakuna ushakätsiyänampaq alistakïkäyanqantam musyariyarqan. Tsëmi alläpa mana mantsakäyänampaq kikinkunapura kënö ninakuyarqan: “Ama mantsakäshuntsu, fuerti kashun”. Jinamampis tsapänampaq kaqta pensarninmi, mas imäginkunata rurar qallëkuyarqan (Is. 41:5-7). Peru Jehoväqa mana mantsakuyänampaqmi markanta kënö nir yanaparqan: “Qam Israel, sirwimaqnïmi kanki. [...] Ama mantsakïtsu, porqui noqam qamwan këkä. Ama llakikur yarpachakïtsu, porqui noqam Diosniki kä” (Is. 41:8-10). “Noqam Diosniki kä” nirninqa, Jehoväqa markanta nikarqan imëpis mana jaqinampaq kaqtam. Jinamampis nirqanmi pushanampaq kaqta y chikeqninkunapita libranampaq kaqta. Jehovä tsënö ninqanqa Babiloniachö prësurëkaq sirweqninkuna valorta tsariyänampaqmi yanaparqan (leyi Isaïas 46:3, 4 *).

9, 10. ¿Imanirtaq alläpaqa yarpachakunantsiktsu? Juk ejempluwan willakaramï.

9 Entëru Patsachö imëka mana allikuna pasakoqta rikarmi nunakunaqa imëpitapis mas llakishqa sientikuyan. Tsëqa noqantsiktapis alläpam llakitsimantsik. Peru tsënö karpis noqantsikqa manam alläpa mantsakunantsiktsu, porqui Jehovämi kënö nimantsik “Noqam Diosniki kä”. Tsënö nimanqantsikmi yanapamantsik alläpa mana yarpachakunapaq. Juk ejempluta rikärishun.

10 Juanwan Brünum juk cärruchö viajëkäyanman, y llanu feyu carretërapa cärru jeqanar ëwëkanman. Tsë höra chofer kënö neqta wiyariyanman: “Ama mantsakäyëtsu, asientïkikunachö tranquïlu kayë, cärruqa manam jeqanqatsu”.  Brünuqa tranquïlum këkan, peru Juanqa alläpa mantsakashqam këkan. Tsëmi kënö tapun: “¿Imanirtaq mantsakankitsu?”. Y Brünunam kushishqa kënö nin: “Choferqa papänïmi, ama mantsakïtsu pëqa allim cärruta manejëta yachan”.

11. ¿Imatataq yachakuntsik Juanpita y Brünupita?

11 ¿Imatataq yachakuntsik kë ejemplupita? Brünunöllam noqantsikpis tranquïlu sientikuntsik, porqui Teytantsik Jehovätaqa alleqmi reqintsik y musyantsikmi kë ushakë junaqkunachö imëka problëmakunapa pasashqapis yanapamänapaq kaqta (Is. 35:4). Wakin nunakuna alläpa mantsakashqa këkäyaptimpis, noqantsikqa manam mantsakuntsiktsu, porqui Jehovämanmi confiakuntsik (Is. 30:15). Y Brünu ruranqannöllam Diosman imanir confiakunqantsikta wakin nunakunata parlapantsik. Tsënöpa pëkunapis ima problëmapa pasarpis Jehovä yanapanampaq kaqman confiakuyänampaq.

‘NOQAM KALLPAYOQTA TIKRATSISHQËKI. NOQAM YANAPASHQËKI’

12. (1) ¿Mëqan kima kaq änikïpitataq yachakushun? (2) “Rikra” nishqan palabraqa, ¿Jehovä imanö kanqantataq rikätsimantsik?

12 Kananqa rikärishun Jehoväpa kima kaq änikïninta. Kënömi nin: “Noqam kallpayoqta tikratsishqëki. Awmi, noqam yanapashqëki”. Markanta Jehovä imanö yanapanampaq kaqtapis Isaïasqa willakushqanam karqan. Kënömi nirqan: “Jehoväqa alläpa puëdeqmi y kikinmi rikranwan gobernanqa” (Is. 40:10). Bibliachö “rikra” nishqan palabraqa, alläpa puëdeq këtam rikätsikun. Tsëmi Isaïas ninqanqa rikätsimantsik Jehovä alläpa puëdeq Mandakoq kanqanta. Unë witsanchö sirweqninkunata yanapanampaq y defendinampaqmi Diosqa alläpa puëdeq këninta utilizarqan. Jina tsënöllam kanan witsampis pëman confiakoq kaqkunataqa cuidëkan y kallpata qoykan (Deut. 1:30, 31; Is. 43:10).

Jehovä yanapamashqaqa manam ni ima armapis ushakätsimënintsikta puëdinqatsu. (Rikäri 12-16 kaq pärrafukunata). *

13. (1) ¿Imëtaq Jehoväqa änimanqantsikta cumplin? (2) ¿Imanirtaq Jehovä yanapamänapaq kaqman confiakuntsik?

 13 Chikimaqnintsikkuna contrantsik imëkata rurayanqan höram, Jehoväqa änimanqantsikta cumplin. Wakin nacionkunachöqa, Diospita yachatsikunantsikta michäkurmi chikimaqnintsikkunaqa imëkata rurëkäyan. Peru imëkata rurëkämashqapis manam yarpachakuntsiktsu. Porqui palabranchömi Jehoväqa yanapamänapaq kaqta nimantsik. Kënömi nin: “Imëka armapis contrëki churakaqqa manam imanäshunkitsu” (Is. 54:17). Jehovä tsënö ninqanqa kima cösastam yarpätsimantsik.

14. ¿Imanirtaq espantakuntsiktsu Diospa chikeqninkuna imëkata rurar sufritsimanqantsikpita?

14 Punta kaq. Nunakuna chikimänapaq kaqtaqa musyantsikmi (Mat. 10:22). Kë ushanan junaqkunachö qateqninkuna chikir qatikachashqa kayänampaq kaqtam Jesusqa willakushqa karqan (Mat. 24:9; Juan 15:20). Ishkë kaq. Isaïas willakunqanqa manam nunakuna chikimänantsikpaq kaqllatatsu rikätsimantsik, sinöqa ushakätsimënintsikta munarnin imëkata utilizäyänampaq kaqtam. Y tsëkunaqa kayan, yachëllapa noqantsikpita mana kaqta parlayanqan, mana penqakushpa ulikuyanqan y imëkata rurar sufritsimanqantsikkunam (Mat. 5:11). Jehoväqa manaraqmi kanan witsanqa chikimaqnintsikkunapita libramäshuntsu (Efes. 6:12; Rev. 12:17). Peru imëkata ruramashqapis manam mantsakunantsiktsu.

15, 16. (1) ¿Mëqan kima kaq änikïtataq yarpänantsik, y tsë änikïpaq imatataq Isaïas 25:4, 5 textu nin? (2) ¿Noqantsikpa contrantsik pelyaqkunata ima pasanampaq kaqtataq Isaïas 41:11, 12 textu nimantsik?

15 Kima kaq. Jehovä nimanqantsikmanmi yarpänantsik. Porqui pëqa nimantsikmi noqantsikpa contrantsik imëka armata utilizarpis mana imanamänapaq kaqta. Imanömi fuerti vientupita juk perqa tsapämantsik, tsënöllam Jehoväpis mana alli nunakunapita cuidamäshun (leyi Isaïas 25:4,  5 *). Chikimaqnintsikkunaqa manam puëdiyanqatsu para siempri mana allita ruramënintsikta (Is. 65:17).

16 Jina Jehoväqa musyatsimantsikmi llapan chikimaqnintsikkunata imanö ushakätsinampaq kaqta. Tsëmi yanapamantsik pëman mas confiakunäpaq (leyi Isaïas 41:11, 12 *). Diospa markampa contran imëka armakunata utilizarpis manam ushakätsimäshuntsu, peru Diospa chikeqninkunam sïqa chipyëpa ushakäyanqa.

¿IMATAQ YANAPAMÄSHUN JEHOVÄMAN MAS CONFIAKUNAPAQ?

Bibliata estudiarninmi Jehovätaqa mas reqintsik y tsëmi yanapamantsik pëman mas confiakunapaq. (Rikäri 17 y 18 kaq pärrafukunata). *

17, 18. (1) Bibliata estudianqantsikqa, ¿imanötaq Diosman mas confiakunapaq yanapamantsik? (2) ¿Imanirtaq kë watapaq kaq textuman alleq yarpachakunantsik?

17 Bibliata estudiarninmi Jehovätaqa mas reqintsik y tsëmi yanapamantsik pëman mas confiakunapaq. Tsëmi cada junaq Bibliata leyinqantsikman yarpachakunapaq tiempuntsikta rakinantsik. Unë witsanchö markanta Jehovä imanö cuidanqan willakïkunam Bibliachöqa escribirëkan. Tsë ejemplukunam noqantsiktapis yanapamantsik Dios cuidamänapaq kaqman confiakunapaq.

18 Markanta Dios imanö cuidashqa kanqantam Isaïasqa shumaq willakun. Achkasninkunata juk mitsikoq imanö cuidanqantawanmi igualatsin. Kënömi nin: “Rikranwanmi üshankunata juntanqa, y mellqaninchömi apanqa” (Is. 40:11). Jehovä imanö cuidamanqantsikta rikarqa tranquïlu y segürum sientikuntsik. Tsëmi problëmakunapa pasanqantsik höra alläpa mana yarpachakunapaq alli juiciuyoq y markäkïpaq sirwipakoqqa, Isaïas 41:10 textuta 2019 watapaq akrayämushqa. Kënömi nin: “Ama llakikur yarpachakïtsu, porqui noqam Diosniki kä”. Kë textuman yarpachakushun, tsëmi yanapamäshun shamoq tiempu pruëbakunachö alli tsarakunapaq.

38 KAQ CANCION Jehovämi cuidashunki

^ par. 5 2019 watapaq kaq textuchömi kima yanapakïkunata tarintsik. Tsëmi mana allikunapa pasashqa alli tsarakunapaq yanapamäshun. Kë yachatsikïchömi tsë kiman yanapakïkunapita yachakushun, jina llakikur mana mantsapakunapaq y Jehoväman mas confiakunapaqmi yanapamäshun. Tsëmi kë watapaq kaq textuman yarpachakushun y puëdirqa dememoria yachakushun. Porqui ichikllachönam mana allikunapa pasashun, tsëmi alli tsarakunapaq kallpata qomäshun.

^ par. 1 Isaïas 41:10: “Ama mantsakïtsu, porqui noqam qamwan këkä. Ama llakikur yarpachakïtsu, porqui noqam Diosniki kä. Noqam kallpayoqta tikratsishqëki. Awmi, noqam yanapashqëki, rasumpam makïwan tsararashqëki”.

^ par. 3 MASLLA ENTIENDINAPAQ: Juk änikïqa, imapis rasumpa cumplikänampaq kaqmi. Jehovä änimanqantsikkunaqa, problëmakunapa pasarnin sufrinqantsik höra alläpa mana yarpachakunapaqmi yanapamantsik.

^ par. 4 NÖTA: “Ama mantsakïtsu” nishqan palabrakunaqa, kima kutim Isaïas 41:10, 13 y 14 textukunachö yurin. Jina tsë textukunallachömi “noqam” neq palabrapis atska kuti yurin, tsëqa kikin Jehoväpaqmi parlan. ¿Imanirtaq atska kuti Isaïas tsënö escribinampaq Jehovä nirqan? Tsëtaqa nirqan pëman mas confiakunapaqmi, porqui pëman confiakurqa manam mantsakushuntsu.

^ par. 8 Isaïas 46:3, 4: “Jacobpa tsurinkuna y llapëki kawëkaq kaq israelïtakuna wiyayämë. Noqam, manaraq yurikuyaptiki cuidayarqoq. Tsënöllam awkinyäyaptikipis cuidëkäyashqëkilla, porqui noqam qamkunata kamarqoq, tsëmi pushayashqëki y imëka mana allikunapitam librayashqëki”.

^ par. 15 Isaïas 25:4, 5: “Waktsakunatam qamqa imëpis salvarqunki y llakikïkaqkunatapis shoqarqunki, alläpa tamyachö machënö y alläpa achachëchö sombra cuentam karqunki, porqui mana allita ruraq nunakunaqa fuerti vientuwan tamyanömi kayan. Tsaki jirkakunachö achachënömi mana alli nunakunataqa penqakïchö quedatsinki; y kushishqa cantar këkäyaptinmi chipyëpa ushakäratsinki”.

^ par. 16 Isaïas 41:11, 12: “Llapan chikishoqnikikunam mana kaqpaq churashqa kayanqa y penqakuyanqa. Qamkunawan pelyëta munaq kaqkunaqa ushakätsishqam kayanqa. Chikir maqayäshoqnikikunata ashirpis mananam tariyankinatsu; chipyëpam ushakashqa kayanqa qamkunapa contrëkikuna guërrata ruraqkunaqa”.

^ par. 56 FÖTUKUNAPAQ WILLAKÏ: Juk familiam trabäjunchö, salorninchö, predicacionchö y escuëlachö problëmakunapa pasayan.

^ par. 58 FÖTUKUNAPAQ WILLAKÏ: Policïakunam juk wayichö wawqikuna y panikuna këkäyanqanman yëkuriyashqa, peru wawqi panikunaqa tranquïlullam këkäyan.

^ par. 60 FÖTUKUNAPAQ WILLAKÏ: Familiantsikwan juntu Jehoväta imëpis adoranqantsikqa, alli tsarakunapaqmi yanapamäshun.