25 watayoqnö Sylviana jutiyoq precursöram kënö nin: “Karu markakunaman Diospita yachatsikoq ëwashqa amïgükuna kushishqa cuentakuyaptinmi noqapis yanapakoq ëwakïta munarirqä, peru mana puëdinäpaq kaqtam pensaq kä”.

¿Qampis Sylviananöku mana puëdinëkipaq kaqta pensanki? ¿Yachatsikoqkuna alläpa mana kayanqan markakunaman ëwakïta gustashunkimantsuraq? Tsënö pensëkaptikiqa Jehovämi yanapashunki. Porqui mëtsika cristiänu mayintsikkunatam yanapashqa. Tsëta musyarinapaq jatun isla Madagascarta yanapakoq ëwakushqa cristiänu mayintsikkunapita parlarishun.

Kë qepa chunka watakunachöqa, 11 nacionkunapitam * qanchis chunkapitapis (70) mas precursorkuna y publicadorkuna Madagascarman yanapakoq ëwayashqa. Tsë nacionchö nunakunaqa Bibliapita yachakïtaqa alläpam munayan. Jina tsë nacionchö täraq wakin publicadorkunapis juk markakunatam täraq ëwakuyashqa nunakunata yachatsiyänampaq. Wakinllata reqirishun.

MANTSAKOQ KAYANQANTAM VENCIYARQAN

Perrinewan Louis

30 watayoqnö Louiswan Perrineqa Franciapitam kayan. Atska watakunapam pensayarqan juk nacionkunata yanapakoq ëwakïta, peru Perrineqa mantsapakoqmi. Kënömi willakun: “‘Nunapa markanchöqa ¿imanöraq kashaq?’ nirmi mantsapakoq kä. Jina familiäta, congregacionnïta, wayïta y markächö imanö kawakunqäta jaqiritam mantsaq kä”. Peru 2012 watachömi Pirreneqa valorarirqan, tsëmi qowan Louiswan Madagascarta ëwakuyarqan. Y kushishqam këkäyan. Pirrenem kënö nin: “Këchö Jehovä imanö yanapayämanqanman pensarninqa, Jehoväman masna confiakunqätam cuentata qokü”. Y Louisnam kënö nin: “Jesus wanunqanta tsë markachö yarpar qallayanqä wataqa chunkaqmi estudiantïkuna shayämurqan. ¡Alläpa kushikïpaqmi karqan!”.

 ¿Imataq yanaparqan mana allikunapa pasarnimpis sirwiyanqanchö yanapakur sïguiyänampaq? Jehoväman mañakuyanqanmi (Filip. 4:13). Louismi kënö nin: “Alläpa mana yarpachakuyänäpaq Jehovä yanapëkäyämanqantam cuentata qokuriyarqä. Tsëmi yachatsikurnin kushishqa pasayanqäkunaman masqa pensayarqä. Jina Franciapita amïgükunam cartakayämarqan y Internetpa qellqayämarqan alleq tsarakuyänäpaq animayämarnin” (Filip. 4:6, 7; 2 Cor. 4:7).

Alleq tsarakuyanqampitaqa Jehoväqa bendicirqanmi. Louismi kënö nin: “2014 wata octubri killachömi Franciata ëwayarqä Casakushqakuna Bibliapita Yachakuyänampaq Escuëlaman. * Tsë escuëlaqa Jehoväpa bendicionninmi karqan, y manam imëpis qonqayäshaqtsu”. Escuëla ushariptin Madagascarman kutiyänampa niriyaptinqa alläpam kushikuyarqan.

“¡ALLÄPAM KUSHIKUYÄSHAQ!”

Nadinewan Didier

Didierwan Nadineqa Franciapitam kayan. Y 2010 watachö Madagascarman ëwakuyanqan witsanqa 50 watapitapis masnam kayarqan. Didiermi kënö nin: “Jövin kayanqäpitam precursor kayarqä, peru wamräkuna kariptinqa mananam precursornatsu kayarqä. Y kiman wamräkuna winariyaptinnam juk nacionta yanapakoq ëwakïta pensayarqä”. Warmin Nadinenam kënö nin: “Wamräkunata jaqirirnin ëwakïtaqa manam munarqätsu. Peru pëkunaqa kënömi niyämarqan: ‘Juk nacionta yachatsikoq ëwakuyaptikiqa, ¡alläpam kushikuyäshaq!’. Tsënö nirayämaptinmi ëwakïta decidiyarqä. Kananqa wamräkunapita karuchömi këkäyä, peru seguïdum parlayä”.

Malgache idiömata yachakuyänanqa manam fäciltsu karqan. Nadinem asikurnin kënö nin: “Manam 20 watayoqtsu kayä”. ¿Peru imanötaq yachakuyarqan? Puntataqa frances idiömata parlaq congregacionchömi kayarqan. Tsëpitanam malgacheta parlaq congregacionman pasariyarqan. Nadinem kënö willakun: “Yachatsikurninqa Bibliapita yachakïta munaq mëtsikaq nunakunatam tariyä y visitayanqäpitam alläpa agradecikuyan. Tsëtaqa manam creirirqätsu, ¡peru rasumpam! Alläpa kushishqam cada qoya yachatsikoq yarqü”.

Didier wawqinam asikurnin willakun malgache idiömata yachakur imanö qallanqanta. Kënömi nin: “Juk kutim reunionchö yachatsikïkarqä, y parlakayämunqantaqa manam entiendirqätsu y ‘gracias’ nireqllam kä. Tsëmi juk pani parlakaramuptinqa ‘gracias’ nirirqä. Peru qepanchö täraq kaqkunaqa peqankunallawanmi mana alli contestamunqanta niyämarqan. Tsënam juk wawqitana nirirqä yapë parlakaramunampaq, allichi karqan ari, manam entiendirqätsu”.

 YANAPAKOQMI KUSHISHQA ËWAYARQAN

Thierrywan warmin Nadiaqa, 2005 watachömi juk asamblëachö Timoteupaq parlaq Vayamos tras metas que honran a Dios neq drämata rikäyarqan. Tsëta rikärirmi yachatsikoqkunata mas wanayanqan markaman ëwakïta pensariyarqan. Thierrym kënö nin: “Dräma ushariptin paqchïkäyanqä höram ‘¿y noqantsikqa mëtataq ëwashun?’ nir warmïta tapurirqä. Y pënam, ‘noqapis tsëmanmi pensëkä’ nimarqan”. Y tsëpitam alistakur qallayarqan juk nacionchö yanapakuyänampaq. Nadianam kënö nin: “Ichikllapa ichikllapam cösasnïkunata wallkäratsiyarqä, hasta chusku malëtakunallamanna tinkunqanyaq”.

Izquierda kaqchö: Nadiawan Marie-Madeleine y derëcha kaqchöna: Thierry

Madagascarmanqa 2006 watam chäriyarqan y chäyanqampita patsëmi tsëchö nunakunata yachatsitaqa alläpa gustëkuyarqan, porqui shumaqmi chaskikuyan.

Peru tsëpita joqta wata pasariptinmi Nadiapa mamänin Marie-Madeleine, ishkirirnin peqanta takakurirqan y rikranta pakikurirqan. Tsënam atiendeq doctorwan parlarirnin Marie-Madeleineta niyarqan pëkuna kaqta Madagascarta ëwakunampaq. 80 watayoqna këkarpis pëqa kushishqam Franciapita ëwakurqan. ¿Imanötaq kananqa këkan? Marie-Madeleinem kënö willakun: “Wakin cösaskunawanqa manam yachakäraqtsu. Peru chakwanna këkarpis congregacionchöqa tukïnöpam yanapakü. Y masqa kushikü nunakuna alläpa wiyakuyanqan sitiuchö, wamräwan mashä yanapakur sïguiyanqantam”.

“JEHOVÄMI YANAPËKÄMARQAN”

Rianam tandroy idiömachö discursëkan

Wawqi Rianaqa 20 watayoqnömi, y Madagascarpa inti yarqamunan läduchö këkaq Alaotra Mangoro markapitam. Yachaq alumnu karmi profesionyoq kanampaq estudiëta munarqan. Peru Bibliata yachakurirqa juknöpanam pensarirqan. Kikinmi kënö willakun: “Secundariäta raslla ushanäpaqmi decidirirqä y Jehovätam kënö nirqä: ‘Kë ushanan exäminta alli pasarninqa precursormi kashaq’”. Rianaqa exäminchö allim yarqurirqan y precursormi tikrarirqan. Tsëmi juk precursorwan täraq ëwakurqan y semänachö juk ishkë junaqkunalla trabajanampaq trabäjuta ashirqan. Y kënömi nin: “Precursor këta akrarqa alli kaqtam akrarqö”.

Familiankunaqa estudiar sïguinantam munayarqan. Rianam kënö willakun: “Teytä, tiyü, y wakin familiäkunam munayarqan universidäman estudiaq ëwanäta. Peru noqaqa manam precursor këta jaqita munarqätsu”. Tsëpitanam Rianaqa karu markata yanapakoq ëwakïta pensarirqan. ¿Imanir? Kikinmi kënö willakun: “Ladronkunam wayïpita cösasnïkunata apakuyarqan. Tsëmi pensarirqä, ‘ciëluchö fortünëkikuna ëlluyë’ nir Jesus consejakunqanman. Y Diospa kaqchö masta ruranäpaqmi sinchikurqä” (Mat. 6:19, 20). Rianaqa Madagascarpa sur kaq lädutam ëwakurqan antandroy kastakuna kawayanqan sitiuta. Wayimpitaqa 1.300 kilömetruchömi këkan. ¿Imanirtaq alläpa karuta ëwakurqan?

Rianaqa antandroy kastapita ishkë nunakunatam Bibliapita yachëkätsirqan, tsëmi pëkuna parlayanqan idiömachö juk ishkë palabrakunata yachakurirqan, y tsënam pensarirqan tsë kasta nunakuna markankunachö Diospita manaraq wiyayanqanman. Kënömi nin: “Jehovätam mañakurqä tandroy idiömata parlaq nunakunata yachatseq ëwanäpaq yanapëkamänampaq”.

Peru chärirqa manam trabäjuta tarirqantsu. Juk nunam kënö nirirqan: “Imapaqtaq shamurqëki, këpita nunakunaqa markëkitam trabäju asheqqa ëwayan”. Tsëpita ishkë semäna pasariptinmi Rianaqa juk asamblëaman ëwarqan y qellënin ichikllana kaptinmi alläpa yarpachakïkarqan. Y asamblëa ushanqan junaqmi juk wawqi qellëta bulsikarkatsirqan. Y tsë qellëqa antandroyta kutinampaq y yogur negociuta qallanampaq tinkum kanaq. Tsëmi Rianaqa kënö nin: “Jehovämi yanapëkämarqan. Tsënöpam Jehoväta mana reqeq nunakunata yanapëta sïguirqä”.  Pëqa congregacionchöpis allipam yanapakurqan. Kënömi nin: “Semäna ushëkuna cada ishkë semänata discursanäpaqmi churayämarqan. Jehovämi yachëkätsimarqan”. Rianaqa kananyaqpis tandroy idiömata parlaq nunakunata jinallaran yachëkätsin.

JEHOVÄMI BENDICIRQAN

Shonqupita patsë sirweqninkunata bendicinampaqmi Jehoväqa änikun (Is. 65:16). Y yachatsikunantsikrëkur llapan puëdinqantsikmannö rurashqaqa bendicimantsikmi. Pensarishun qallananchö parlanqantsik Sylvianaman. Pëqa alläpa yanapakïta munarpis, karu markachö yanapakïta mana puëdinampaq kaqtam pensarqan. Tsënöqa pensarqan izquierda kaq chakin mas ichiklla kaptin alleqlla purita mana puëdir y raslla pishiparninmi.

Sylviana (izquierda kaqchö) y Sylvie Ann (derëcha kaqchö) (chowpichöna) Doratine bautizakunqan junaq

Tsënö këkarpis Sylvianaqa 2014 watachömi Sylvie Ann precursörawan juk taksha markata yanapakoq ëwakurqan. Tsë markaqa wayimpita 85 kilömetruchömi këkan. Y tsënö yanapakoq ëwanqampitam juk shumaq bendicionta chaskirqan. Kikinmi kënö willakun: “Tsë markaman chanqäpita juk watallatam Bibliapita yachatsinqä Doratine jutiyoq jövinlla warmi juk asamblëachö bautizakurirqan”.

‘NOQAM YANAPASHQËKI’

Jehovämi kënö nimantsik: “Noqam kallpata qoshqëki. Noqam rasumpa yanapashqëki” (Is. 41:10). Madagascarchö yanapakoq wawqikuna y panikunaqa tsëtam cläru rikäyashqa. Noqantsikpis pëkunanö yanapakurqa Jehoväpa bendicionnintaqa rikäshunmi. Y tsëta rikanqantsikmi yanapamäshun pëwan mas amïgu tikranapaq y markantsikchö kar o juk nacionchö karpis mas yachatsikïta munanapaq. Jina Didier ninqannöpis “mas necesidäyoq markachö yanapakurninqa shamoq tiempupaqpis alistakïkantsikmi”. Wawqikuna panikuna, ima alliraq kanman tsënö kawakïpaq alistakoqnö yanapakïta procurashqaqa.

^ par. 4 Tsëmanqa ëwayarqan Alemaniapita, Canadäpita, Estädus Unïduspita, Franciapita, Guadalupepita, Luxemburgupita, Nueva Caledoniapita, Reino Unidupita, Republica Checapita, Sueciapita y Suizapitam.

^ par. 8 Kananqa, Diospa Gobiernumpita Yachatsikoqkunapaq Escuëla nirmi reqiyan. Juk nacionchö llapan tiempunkunawan yanapakïkaqkunaqa, nacionninkunachö kar o juk nacionchö karpis idiömankunachö tsë escuëlaman ëwayänampaqmi solicitëta puëdiyan.