“Teyta Diospa willacoqnincuna carninmi, roguecuyaq: Ama mana caqpaq churayëtsu tse alli queninta Teyta Dios musyätsiyäshunqequita.” (2 CORINTIUS 6:1)

CANTICU: 75 Y 74

1. Alläpa puëdeq këkarpis, ¿imanirtaq wakinkuna pëwan trabajayänanta Jehoväqa permitin?

JEHOVÄQA llapantam kamashqa. Y alläpa puëdeq y yachaqmi. Juk kutichömi Job nirqan, Diosqa llapan munanqanta rurëta puëdinqanta. Pëpaqqa ima rurëpis manam sasatsu (ajatsu) (Job 42:2). Jinamampis manam wanantsu pipis yanapananta. Peru tsënö këkarpis, wakinkuna pëwan trabajanantam permitin. Tsënömi rikätsin alläpa kuyanqanta.

2. ¿Ima precisaq trabäjutataq Jehoväqa Jesusta qorqan?

2 Diosqa puntata kamarqan tsurin Jesustam. Tsëpitanam Jesuspa yanapakïninwanna wakin cösaskunata kamarqan (Juan 1:1-3, 18, NM). Apostol Pablum kënö nirqan: “Jesucristuwanmi Diosnintsic camarqan sielucho y que patsacho llapan ricanqantsiccunata y mana ricanqantsiccunatapis”. Jina kënömi nirqan: “Que llapancunatam camarqan pepa mandaduncho cayänanpaq” (Colosensis 1:15-17). Tsë precisaq trabäjuta qornin  y wakinkunata willarninmi Jehoväqa Jesusta precisaqpaq churarqan.

3. (1) ¿Imata ruranampaqtaq Adanta Jehovä mandarqan? (2) ¿Imanirtaq Adan yanapananta Jehovä permitirqan?

3 Jehoväqa nunakuna pëwan trabajanantapis permitishqam. Tantiyarinapaq, animalkunapa jutinkunata churanampaqmi Adanta mandarqan (Genesis 2:19, 20). Adanqa alläpachi kushikurqan tsë trabäjuta rurarnin. Cada animalpa jutinta churanampaqqa, imanö kayanqanta y imata rurayanqantachi alleq rikaparqan. Munarqa kikin Jehovämi jutinkuna churanman karqan, porqui pëmi kamarqan. Peru Adanta alläpa kuyarninmi yanapananta permitirqan. Jinamampis entëru Patsata juk shumaq huertaman tikratsinampaqmi mandarqan (Genesis 1:27, 28). Peru tiempuwanqa, Jehoväwan manana trabajanampaqmi Adanqa decidirirqan. Tsërëkurmi llapantsik alläpa sufrintsik (Genesis 3:17-19, 23).

4. ¿Pikunataq Dioswan trabajayashqa llapan munënin cumplikänampaq?

4 Tiempu pasariptinnam, Diosqa permitirqan wakin nunakuna pëwan trabajayänanta. Tantiyarinapaq, Apäkï Tamyachö familianwan salvakunampaqmi juk arcata Noë rurarqan, Moisesnam Egiptupita Israel markata jorqarqan, Josuënam Dios änikunqan Patsaman israelïtakunata pusharqan, Salomonnam Jerusalen templuta rurarqan y Marïanam Jesuspa maman karqan. Kë sirweqninkuna y wakin sirweqninkunam Jehoväwan trabajayashqa llapan munënin cumplikänampaq.

5. (1) ¿Ima trabäjuta ruranapaqtaq Jehovä llapantsikta invitamarquntsik? (2) ¿Kikin rurëta mana puëdirku invitamarquntsik? (Rikäri kë yachatsikïpa qallananchö këkaq dibüjuta.)

5 Kanan witsampis llapan puëdinqantsikmannö Gobiernunta yanapanapaqmi Jehoväqa invitamantsik. Llapantsik igual rurëta mana puëdirpis, tukïnöpam yachatsikïta puëdintsik. ¿Kikin rurëta mana puëdirku tsëta ruranapaq invitamantsik? Manam. Munarninqa ciëlupita patsëmi llapan nunakunata Jehovä parlapäramunman. Jesusmi nirqan hasta rumikunatapis parlaratsita puëdinqanta (Lücas 19:37-40). Peru Diosqa ‘mincancuna’ kanantsiktam permitimantsik (1 Corintius 3:9). Tsëmi apostol Pablu kënö nirqan: “Teyta Diospa willacoqnincuna carninmi, roguecuyaq: Ama mana caqpaq churayëtsu tse alli queninta Teyta Dios musyätsiyäshunqequita” (2 Corintius 6:1, noqakunam yanayätsiyarqü). Jehoväwan trabajënöqa manam imapis kantsu. Imanir kushitsimanqantsikta rikärishun.

ALLÄPAM KUSHITSIMANTSIK

6. ¿Imanötaq Jesus sientikurqan Teytanwan trabajarnin?

6 Jehoväpa sirweqninkunapaqqa imëpis alläpa kushikïpaqmi kashqa pëwan trabajëqa. Patsaman manaraq shamurninmi Jesusqa “obra ruraq maestrunö” Jehoväwan trabajarqan. Pëqa alleqmi musyarqan Jehovä kuyanqanta, tsëmi kënö nirqan: “Llapan tiempum Pëpa lädunchö kushishqa këkarqä” (Proverbius 8:22, 30). Teytanwan trabajëqa alläpam kushitsirqan, porqui imëkakunatam rurarqan y musyarqanmi kuyanqanta. Y noqantsikqa, ¿Jesusnö sientikïta puëdintsikku?

Jehoväpita yachatsikïqa, imëkapitapis masmi kushitsimantsik (Rikäri 7 kaq pärrafuta)

7. ¿Imanirtaq Diospita yachatsikïqa alläpa kushitsimantsik?

7 Jesusmi nirqan wakinkunapita qarëta chaskirnin y qarakoq karninqa alläpa kushishqa sientikunqantsikta (Hëchus 20:35). Jehoväpita rasumpa kaqta yacharatsimashqaqa alläpam kushikurqantsik.  Jina jukkunata yachatsirnimpis alläpa kushishqam sientikuntsik. Tsënöqa sientikuntsik rasumpa yachatsikïninkunata musyarir kushikuyaptin y Diosta reqir qallayaptinmi. Alläpa kushikïpaqmi kawëninkunachö cambiukunata ruraqta rikëqa, porqui Dioswan amïgu karqa mana wanushpa kawakïtam puëdiyanqa (2 Corintius 5:20). Tsëmi Diospita yachatsikïqa ima trabäjupitapis mas precisaq y mas kushitsikoq.

8. ¿Imanötaq Testïgukuna sientikuyan Jehoväwan trabajarnin?

8 Wakinkunata Diosta reqiyänampaq yanapanqantsikpita, Jehovä kushishqa këkanqanta y kallpachakunqantsikta valoranqantam musyantsik. Tsëpitapis kushishqam sientikuntsik (leyi 1 Corintius 15:58). Italia nacionpita ishkaq Testïgukuna niyanqanta rikärishun. Marcum kënö nin: “Llapan puëdinqämannö Jehoväpaq ruranqäpita kushikïta tarinqäpita willakunäpaqqa, manam palabrapis kantsu. Porqui musyämi ruranqäkunapita juk nunanö mana qonqarinampaq kaqta”. Francunam kënö nin: “Llapan junaqkunam Jehoväqa palabran Bibliata, publicacionkunata y reunionkunata utilizan alläpa kuyamanqantsikta yarpätsimänapaq. Ruranqantsikta ichikllatanö rikashqapis, Jehoväqa alläpa precisaqpaqmi churan kallpachakunqantsikta. Tsëmi Jehoväwan trabajëqa alläpa kushitsiman y mas kawakïtam munä”.

JEHOVÄMANMI WITITSIMANTSIK Y CRISTIÄNU MAYINTSIKKUNAWAN JUKNÖLLA KANAPAQMI YANAPAMANTSIK

9. (1) ¿Imanötaq Jehoväpawan Jesuspa kuyanakïninkuna karqan? (2) ¿Imanirtaq Jehoväwan Jesusqa juknölla kayarqan?

9 Piwampis kuyanqantsikwan trabajarninqa, masmi pëwan juknölla sientikuntsik. Imanö kanqantam mas alleq reqirintsik. Kawëninchö imata rurëta munanqanta y logranampaq imata rurëkanqantam musyarintsik. Jesusqa Patsaman manaraq shamurmi Teytanwan trabajarqan mëtsika millon watakunapa. Tsëmi alläpa  kuyanakuyarqan y pipis rakita puëdirqantsu. Tsëchi Jesusqa, “Dios Yaya y noqa jucllellam cayä” nirqan (Juan 10:30). Awmi, juntu trabajarnin y yanapanakurninmi juknölla kayaq.

Diospita yachatsikïqa markäkïnintsiktam mas sinchiyätsin, porqui Diospa leyninkunata y änimanqantsikkunatam yarpätsimantsik

10. ¿Imanirtaq Jehoväpita yachatsikïqa pëman mas wititsimantsik y cristiänu mayintsikkunawan juknölla kanapaq yanapamantsik?

10 ¿Imanirtaq Jesusqa qateqninkunata mana allikunapita tsapëkunampaq Teytanta mañakurqan? Kikin Jesusmi kënö nirqan: “Noqantsic jucllella canqantsicnolla pecunapis jucllellano cayänanpaq” (Juan 17:11). Jehovä nimanqantsikta wiyakurnin y yachatsikurninqa, masmi entiendirintsik Jehovä imanö kanqanta. Masmi musyarintsik pëman markäkï y nimanqantsikta wiyakïqa imëkapitapis mas alli kanqanta. Y amïgun këta sinchikushqaqa pëpis noqantsikmanmi witimunqa (leyi Santiägu 4:8 *). Jina Diospita yachatsikunqantsikpis cristiänu mayintsikkunawan juknölla kanapaqmi yanapamantsik, porqui Jehoväta kushitsiyänampaq kallpachakoqtam rikantsik. Jina rikantsikmi noqantsiknö kushikuyanqanta, mana allikunapa pasayanqanta y logrëta munanqantsikta pëkunapis logrëta munayanqanta. Tsënöpam juntu trabajantsik, kushikuntsik y imëkatapis aguantantsik. Gran Bretäña nacionpita Octavia jutiyoq panim kënö nin: “Jehoväwan trabajëqa pëmanmi mas wititsiman y cristiänu mayïkunawan juknölla kanäpaqmi yanapaman”. Tsënöqa nin pë logrëta munanqanta amïgunkunapis logrëta munayaptinmi. Tsëqa, ¿manaku pëkunawan igual kanqantsikta sientikuntsik?

11. ¿Imanir-raq shumaq Patsachöqa Jehoväwan y cristiänu mayintsikkunawan masraq juknölla sientikushun?

11 Jehoväta y cristiänu mayintsikkunataqa alläpam kuyantsik, peru shumaq Patsachöqa masran kuyashun. Juntuchi trabajashun imëka rurëkunachö: wanushqakuna kawarimoqta chaskirnin, Jehoväpita yachatsirnin y entëru Patsata paraïsuman tikratsirnin. ¡Imanö shumaqraq kanqa juntu trabajë y ichikllapa ichikllapa jutsannaq këman chëqa! Cada junaqchi cristiänu mayintsikkunawan y Jehoväwampis masraq juknölla sientikushun. Y pëqa llapan munanqantsiktachi qomäshun (Salmu 145:16).

MANA ALLIKUNAPITAM TSAPÄMANTSIK

12. ¿Imanirtaq Diospita yachatsikïqa mana allikunapita tsapämantsik?

12 Satanas mandakunqan tiempuchömi kawantsik y jutsasapam kantsik. Alleq mana cuidakurqa Diosta mana sirweq nunakunanömi pensar y rurar qallëkushun. Tsëmi Jehoväwan amïgu kënintsikta alleq cuidanantsik. Peru tsëpaqqa alleqran sinchikunantsik. Tsëqa imëka mayuchö witsëpa nadënömi kanman. Mana apamänapaqqa  llapan kallpantsikwanmi nadëta tïrashwan witsëpa ëwanapaq. Tsënöllam, Diospita yachatsikunqantsikpis Jehoväwan amïgu kënintsikta cuidanapaq yanapamantsik. ¿Imanirtaq tsënö nintsik? Porqui Diospita y Bibliapita parlarninqa mas precisaq kaqkunaman y alli cösaskunamanmi pensantsik. Manam markäkïnintsikta ushakätseq cösaskunamanqa pensëkantsiktsu (Filipensis 4:8). Diospita yachatsikïqa markäkïnintsiktam mas sinchiyätsin, porqui Diospa leyninkunata y änimanqantsikkunatam yarpätsimantsik. Jinamampis, Dios munanqannö nuna karnin Satanaspa y nunankunapa munëninman mana ishkinapaqmi yanapamantsik (leyi Efesius 6:14-17).

Diospita yachatsikï, Palabranta estudië y cristiänu mayintsikkunata yanapëqa problëmantsikkunaman alläpa mana yarpachakunapaqmi yanapamantsik

13. ¿Imanirtaq Australiapita juk Testïgu Diospita yachatsikïta precisaqpaq churan?

13 Diospita yachatsikï, Palabranta estudië y cristiänu mayintsikkunata yanapëpis mana allikunapitam tsapämantsik. Porqui tsëkunata rurarqa manam problëmantsikkunamanqa alläpa yarpachakuntsiktsu. Australiapita Joel jutiyoq Testïgum willakun, Diospita yachatsikunqanqa nunakunapa problëmankunata mana qonqanampaq yanapanqanta. Jina kikintapis Bibliapa consëjunkuna alläpa yanapanqantam yarpan. Tsëmi, yachatsikïta alläpa precisaqpaq churar kënö nin: “Diospita yachatsikïqa yanapaman humildi këta y Jehoväman y cristiänu mayïkunaman markäkïtam”.

14. ¿Imanirtaq musyantsik santu espïritunwan Dios yanapëkämanqantsikta?

14 Jina Diospita yachatsikunqantsikqa rikätsikun santu espïritunwan Dios yanapëkämanqantsiktam. Këta juk igualatsikïwan tantiyarishun. Juk nuna nirishunkiman täranqëki sitiuchö këkaq llapan nunakunapaq mikïnin apapunëkipaq y llapan gastukunataqa kikiki pagakunëkipaq. Y musyankim tsë apanqëki mikïta nunakuna mana munayänampaq kaqta y tsërëkur hasta chikiyäshunëkipaq kaqta. ¿Ëka tiempuraq tsë rurëchö aguantankiman? Qelanäkurirchi tsë rurëta raslla jaqirinkiman. Tsë cuentam noqantsikpis nunakunaman Diospa palabranta apantsik tiempuntsikta y qellënintsikta gastar. Y nunakunaqa burlakuyan y hasta chikimantsikmi. Peru tsënö këkaptimpis, wata watam yachatsikur sïguikantsik. ¿Manaku këqa rikätsikun santu espïritunwan Dios yanapëkämanqantsikta?

KUYAKOQ KANQANTSIKTA RIKÄTSIKUNAPAQMI YANAPAMANTSIK

15. ¿Imanirtaq Diospita yachatsikïqa alläpa precisan?

15 Diospita yachatsikunantsikqa alläpam precisan, porqui nunakunapaq Dios munanqan cumplikänampaqmi yanapakun. Jehoväqa munarqan llapan nunakuna imëyaqpis kawakuyänantam, y kanampis tsënö kanantaqa munëkanllam (Isaïas 55:11). Adan pasamanqantsik jutsapita y wanïpita libramänapaqmi tsurin Jesusta noqantsikrëkur wanunampaq kachamurqan. Peru tsë pagakunqan yanapamänantsikpaq  y imëyaqpis kawakunapaqqa Dios nimanqantsiktam wiyakunantsik. Jesusmi nunakunata yachatsirqan Dios munanqanta rurayänampaq y qateqninkunatam mandarqan pënölla yachatsikuyänampaq. Tsëmi yachatsikurninqa, nunakunata yanapantsik Dioswan amïgu kayänampaq, y jutsapita y wanïpita nunakunata Jehovä salvanampaq yanapëkantsik.

16. Diospita yachatsikurninqa, ¿imatataq rikätsikuntsik?

16 Juk pushakoq religiösu, mëqan mandamientu mas precisaq kanqanta tapuriptinmi, Jesus kënö contestarqan: “‘Teyta Diosniquita cuyanqui llapan shonqiquiwan, llapan boluntaniquiwan y llapan yacheniquiwan.’ Que mandamientum mas presisaq llapan mandamientupitapis. Tsenollam jucnin caq mandamientupis casi punta caqwan iwallla y quenomi nin: ‘Nuna mayiquita cuyanqui quiquiquitano’” (Mateu 22:37-39). Yachatsikurnin y mana wanushpa kawakïta imanö tariyänampaq nunakunata yachatsirninmi, Jehoväta y nuna mayintsikta kuyanapaq mandakïta cumplikanqantsikta rikätsikuntsik (leyi Hëchus 10:42). Alleqmi musyantsik Diospa Palabran kënö ninqanta: “[Diosqa] munan llapan nunacuna salbacuyänantam, y rasonpa caq yachatsiquicunata musyayänantam” (1 Timoteu 2:4).

17. Y qamqa, ¿ima ninkitaq Jehoväwan trabajëpita?

17 Jehoväwan trabajanqantsikpitaqa alläpam agradecikunantsik. Porqui pëwan trabajarqa kushishqam sientikuntsik, pëmanmi mas witintsik, cristiänu mayintsikkunawanmi juknölla kantsik y mana allikunapitam tsapämantsik. Jinamampis Jehoväta y cristiänu mayintsikta kuyanqantsikta rikätsikunapaqmi yanapamantsik. Entëru Patsapam Jehoväpa sirweqninkunaqa mëtsikaq kayan, y imakunapa pasayanqanqa jukläya jukläyam. Peru llapantsikmi, jövin o mayor kar, rïcu o waktsa kar, sinchi o dëbil karpis puëdinqantsikmannö Diospita yachatsikuntsik. Franciapita juk pani ninqannömi sientikuntsik, kënömi nirqan: “Ciëluchö y patsachöpis mas precisaq kaq y llapanta Kamaq kushishqa Diosmi kënö niman: ‘Ëwë y parlë. Noqapita parlapë. Shonqïkipita patsë parlë. Noqam kallpata qoshqëki Palabräwan, angelkunawan y yachatsikoq mayikikunawan. Imanö ruranëkipaq kaqtam yachatsishqëki y wananqëki hörachömi yanapashqëki’. Jehoväqa invitamantsik munëninta ruranapaq y pëwan trabajanapaqmi. ¡Pëwan trabajënöqa manam imapis igualantsu!”.

^ par. 10 Santiägu 4:8 (NTCN): “Dios Yayata mas cuyarnin payman witiyay, paypis mas llaquiyäshurniqui gamcunaman mas witimunanpag. ¡Alläpa jutsasapacuna imayca maquiquicunata mayllacugnö jutsayquicunata dëjayay! ¡Gamcuna cay patsachöcagcunallatawan Dios Yayata cuyayta munagcuna, shongoyquicunata imayca limpiagnö amana jutsacunata rurayaynatsu mana alli yarpayniquicunawan!”.