¿Leyirqunkiku cada yarqamoq Täpakoq revistakunata? Mä yarpärishun:

¿Imanirtaq markankunapita ëwakushqa teytakunaqa wamrankuna parlayanqan idiömata cuentaman churayanman?

Wamrëkikunaqa, itsa escuëlachö y wakin nunakunawan parlarnin täräyanqëki markachö idiömata yachakuyanqa. Juk mas idiömata parlëta yachayanqanqa masmi yanapanqa. Peru mëqan idiömata parlaq congregacionchö wamrankunawan këtaqa, teytakunam decidiyänan. Tsëpaqqa alleqmi rikäyänan wamrankuna ima idiömachö Diospita yachatsikayämunqanta mas entiendiyanqanta. Teytakunaqa wamrankuna Diospa kaqchö mas alli kayänantam mas precisaqpaq churayänan (w17.05, päginakuna 10 y 11).

Jesusmi Pëdruta tapurqan, “¿tsëkunata kuyanqëkipitapis masku kuyamanki?” nirnin, ¿“tsëkunata” nirqa imapaqtaq parlëkarqan? (Juan 21:15)

Itsa tsëchö këkaq pescädukunapaq o pescäduta tsarir trabajanqampaq parlëkarqan. Porqui Jesus wanuriptinqa Pëdruqa yapëmi pescädukunata tsarirnin trabajar qallëkurqan. Cristiänukunaqa alleqmi rikäyänan trabäjunkunata o Diospa kaqta puntaman churëkäyanqanta (w17.05, päginakuna 21 a 23).

¿Imanirtaq Abrahanqa warminta nirqan panin kanqanta ninampaq? (Gen. 12:10-13)

Säraqa rasumpam panin karqan. Abrahanpa warmin kanqanta niptinqa Abrahantaqa wanuratsiyanmanmi karqan. Tsënö kaptinqa manam Dios änikunqan mirë pëpa kastampita shamunmantsu karqan (wp17.3, päginakuna 14 y 15).

¿Imanötaq Elïas Hütterqa estudiantinkunata yanaparqan hebreu idiömata yachakuyänampaq?

Hütterqa, estudiantinkunata yanapanampaqmi hebreu idiömachö letrakunawan imprimirqan: kikin precisaq kaq palabrakunatam (raiz nishqanta) mas yana y tita letrakunawan imprimirqan, y tsë palabrakunata yanaqaq kaq letrakunataqa (prefïju y sufïju nishqankunata) chusu letrakunawanmi imprimirqan. Traducción del Nuevo Mundo de las Santas Escrituras (con referencias) nishqan Bibliaqa, ura kuchunchö willakïninkunawan tsënöllam ruran (wp17.4, päginakuna 11 y 12).

¿Allitsuraq kanman Diospa sirweqninkunaqa pistölata o juk armakunata wakinkunapita cuidakuyänampaq katsiyänan?

Jehoväpaqqa, nunakunapa kawëninqa alläpa valoryoqmi. Jesusqa qateqninkunata nirqan espädankuna ashiyänampaqmi, peru manam defendikuyänampaqtsu nikarqan (Lüc. 22:36, 38). Diospa sirweqninkunaqa ‘espädankunatam takllapa puntanman’ tikratsiyan. Cristiänukunapaqqa, cösaskunapitapis masmi kawëqa precisan. Wakinkunapa concienciankunatam respetantsik y alli kaqta ruranapaqmi kallpachakuntsik (2 Cor. 4:2) (w17.07, päginakuna 31 y 32).

¿Imanirtaq Jesus wamra kanqan witsampaq Mateuwan Lücasqa jukläya jukläya willakuyarqan?

Mateuqa mas willakun Josëta imakuna pasanqampitam; Marïa qeshyaq kanqanta musyarirnin Josë imanö sientikunqanta, familianwan Egiptuman ëwakuyänampaq y Israel markaman kutinampaq juk angel ninqanta cäsukunqanta. Peru Lücasqa, Marïata imakuna pasanqampitam masqa willakun; Elisabet-ta watukaq ëwanqanchö ima pasakunqanta, y 12 watayoq këkarnin templuchö Jesus quedakïkuptin imata ruranqanta (w17.08, pägina 32).

¿Imakunataq Bibliata peligruman churashqa?

Tiempu pasanqanmannö idiömakuna cambianqan, mandakoqkuna cambiayaptin nunakuna juk idiömatana parlayanqan y juk idiömakunaman Bibliata traduciyänanta michäkuyanqanmi (w17.09, päginakuna 19 a 21).

¿Kapamantsiktsuraq juk cuidamaqnintsik angel?

Manam. Qateqninkunapa angelninkuna, ciëluchö këkaq Teytapa qaqllanta rikëkäyanqanta nirqa, Jesusqa manam cada ünupa juk cuidamaqnintsik angel kapamanqantsiktatsu nikarqan (Mat. 18:10). Tsëpa rantinqa, Diospa llapan sirweqninkunaman angelkuna yarpachakuyanqantam nikarqan (wp17.5, pägina 5).

¿Pillapitataq rasumpa kuyakoq këta yachakïta puëdintsik?

Jehovällapitam. Porqui pëqa manam shimillapatsu “kuyaqmi” nimantsik, sinöqa yanapamënintsikta munarmi imëkata ruramun, y manam kutitsinantsikta shuyarantsu. Tsënö kuyakïpaqmi griëgu idiömachöqa agäpe nin (w17.10, pägina 7).