¿Imanirtaq Jesus wamra kanqan witsampaq Mateuwan Lücasqa jukläya jukläya willakuyarqan?

Jesus wamra kanqan witsampaqqa, manam igualtsu Mateuwan Lücasqa willakuyarqan. Porqui ishkampapis tsë asuntupaq pensëninkuna y rikëninkunaqa jukläyam karqan.

Josëta imakuna pasanqampitam, Mateuqa mas willakun. Pëqa willakun Marïa qeshyaq kanqanta musyarirnin Josë imanö sientikunqampita, imakuna pasanampaq kaqta juk angel suëñïninchö ninqampita y imanö cäsukunqampitam (Mat. 1:19-25). Jinamampis, Mateuqa willakun familianwan Egiptuman ëwakuyänampaq Josëta juk angel ninqampita y imanö cäsukunqampitam. Y Israel markaman kutinampaq juk angel ninqanta cäsukunqanta y Nazaretchö quedakunqantapis willakunmi (Mat. 2:13, 14, 19-23). Mateu librupa qallanan kaq ishkë capïtulunkunachöqa, qanchis kutim Josë juti yurin, y Marïa jutinam chusku kutilla.

Peru Lücasqa, Marïata imakuna pasanqampitam masqa willakun. Pëqa willakun Gabriel jutiyoq angel Marïawan parlanqanta, Elisabet kaqman Marïa ëwanqanta y tsëchö Jehoväta alabanqantam (Lüc. 1:26-56). Jinamampis, Jesus sufrinampaq kaqta Simeon jutiyoq nuna Marïata ninqantam willakun. Y 12 watayoq Jesus këkaptin templuman teytankunawan ëwayanqanchö ima pasanqantam willakun. Tsëpaq parlarqa, Marïa imata parlanqankunapitam Lücasqa mas willakun. Y kë pasakunqanqa, Marïapa shonqunyaq chärinqanta y rurëninchö rikakunqantapis willakunmi (Lüc. 2:19, 34, 35, 48, 51). Lücas librupa qallanan kaq ishkë capïtulunkunachöqa, 12 kutim Marïa juti yurin, y Josë jutinam kima kutilla. Awmi, Mateuqa Josë imakunata ruranqampita y imanö pensanqampitam masqa willakun; peru Lücasqa Marïa imata ruranqampita y imanö pensanqampitam masqa willakun.

Jesus ima kastapita kanqampaq parlarqa, ishkanmi jukläya jukläya qellqayarqan. Mateuqa Josëpa kastankunapitam willakun, y Josë wätashqa kaptinmi, Jesusqa rey Davidpa cargunta chaskinampaq derëchuyoq. ¿Imanirtaq tsëtaqa nirqan? Porqui Josëqa Davidpa kastampitam karqan, tsurin Salomonpita (Mat. 1:6, 16). Peru Lücasqa Marïapa kastankunapaqmi parlan y rey Davidpa cargunta chaskinampaq Jesus derëchuyoq kanqantam alleq entienditsikun, porqui Jesusqa “Davidpa mirënimpitam” karqan (Rom. 1:3). ¿Imanirtaq tsëtaqa nirqan? Porqui Marïaqa rey Davidpa kastampitam karqan, peru tsurin Natanpitana (Lüc. 3:31). Peru Helïpa wamran Marïa këkaptinqa, ¿imanirtaq Lücasqa Josëpa kanqanta nin? Porqui unë documentukunachöqa, ollqu kaqkunapa jutinkunallam masqa yureq. Tsëmi Helïpa tsurin Josë kanqanta Lücas willakunqanchöqa, mashan kanqanta entiendintsik (Lüc. 3:23).

Mateuwan Lücas Jesuspa kastankunapaq willakuyanqanwanmi, Jesusqa Diospa Akrashqan kanqanta musyantsik. Davidpa kastampita Jesus kanqantaqa llapanmi musyayarqan, hasta fariseukunawan saduceukunapis. Kanan witsampis, Mateuwan Lücas willakuyanqanta musyanqantsikqa, Diosman y änikïninkunaman mas markäkunapaqmi yanapamantsik.