Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Agostu de 2017

¿Imakunataq yanapamäshun mushoq nunana tikranapaq?

¿Imakunataq yanapamäshun mushoq nunana tikranapaq?

“Mushoq imanöpis këta imëka röpatanö vistikuyë” (COL. 3:10).

CANCION: 43 Y 106

1, 2. (1) ¿Imanötaq musyantsik mushoq nunana këta puëdinapaq kaqta? (2) Mushoq nunana kanapaq Colosensis 3:10-14 textuchö, ¿imakunatataq tarintsik?

“MUSHOQ imanöpis këtam imëka röpatanö vistikuyänëki” neq palabrakunaqa, Bibliantsikchöqa ishkë kutim yurin (Efes. 4:24; Col. 3:10). Tsënö nirqa, ‘Diospa munëninmannö kamashqa’ këpaqmi parlëkan. Peru ¿Dios munanqannö nuna këta puëdintsikku? Awmi. Porqui Jehoväqa kikin niraqtam kamamarquntsik. Tsëmi pënö këtaqa puëdintsik (Gen. 1:26, 27; Efes. 5:1).

2 Rasunmi, jutsasapa karmi mana alli munëyoq kantsik. Y mana alli tiempuchö kawanqantsikpis mana allimanmi chätsimashwan. Peru kuyamarnintsik Jehovä yanapamashqam pë munanqannö nunana këta puëdintsik. Tsëmi imakuna yanapamänapaq kaqta kë yachatsikïchö rikärishun (leyi Colosensis 3:10-14). Jina Diospita yachatsikurnimpis mushoq nunana kanqantsikta imanö rikätsikunapaq kaqtam yachakushun.

JUKNÖLLA IMËPIS KASHUN

3. ¿Imanö mastaq mushoq nunana kanqantsikta rikätsikuntsik?

3 ¿Imanötaq musyashwan mushoq nunana kanqantsikta? Juknöpaqa  llapan nunakunata igualpa rikanqantsikwanmi. Tsëtam apostol Pablu nirqan Colosensis 3:11 textuchö: “Manam ni Grecia nuna ni judïu nuna, ni penqëninchö señalashqa ni mana señalashqa, ni forastëru, ni escïta, ni sirwipakoq, ni libri nuna kantsu”. * Tsëmi ni mëqan cristiänupis ima kastapita, kapoqyoq kanqampita o ima nacionpita kanqampitaqa wakinkunapita mas precisaq kanqanta pensanantsu. Porqui Jehoväta sirweqkunaqa llapantsikpis ‘juknöllam kantsik’ (Gäl. 3:28).

4. (1) Diosta sirweqkunaqa, ¿imanötaq nunakunata tratayanman? (2) ¿Juknölla kanata imaraq michämashwan?

4 Mushoq nunana këman tikrarninqa, kapoqyoq o waktsa kayaptin, o ima color kayaptimpis llapan nunakunatam respetantsik (Rom. 2:11). Peru wakin nacionkunachö tsënö respetakïqa manam fäciltsu. Unëqa, Sudafrica nacionchö gobernaqkunaqa mandakuyarqan nunakuna ima color kayanqanmannö juk sitiullachö täräyänampaqmi, tsënöpa mana juntakäyänampaq. Tsë sitiukunachömi mëtsikaq testïgukunapis tärëkäyanllaraq. Tsëmi Jehoväpa Testïgunkunata Pushaqkunaqa animayarqan 2 Corintius 6:13 textuchö “shonqïkikunata chipyëpa kichayë” ninqannö rurayänampaq. Y 2013 wata octubri killachömi patsätsikarqan tukï color Testïgukuna alleq reqinakuyänampaq. Peru ¿imanötaq rurayarqan?

5, 6. (1) ¿Imatataq patsätsikarqan Testïgukuna juknölla kayänampaq? (Rikäri kë yachatsikïpa qallananchö këkaq fötuta). (2) ¿Tsëqa imanötaq yanapakushqa?

5 Congregacionkunatam animayarqan juk color y juk idiömata parlaq congregacionkunawan semäna ushëkuna juntakäyänampaq. Tsëmi Diospita yachatsikoq y reunionkunamampis juntu ëwëta puëdiyaq, y wayinkunamampis invitanakuyaqmi. Mëtsika congregacionkunam tsënö rurayarqan. ¿Tsënö rurayanqan yanapakurqanku? Awmi, Betel wayimanmi alläpa yanapakunqanta kushishqa cartakuyarqan. Hasta juk religiösu nunam kënö nir qellqarqan: “Manam Testïgutsu kä, peru cuentatam qokü shumaq churanakushqa imatapis rurayanqëkita, y tukï color këkarnimpis mana chikinakushpa shumaq kawakuyanqëkita”. Y Testïgukunaqa, ¿imanötaq sientikuyan?

6 Noma jutiyoq cristiänaqa xhosa nishqan idiömatam parlan. Y waktsalla karninmi, ingles idiömata parlaq congregacionpita cristiänu mayinkunata wayinman invitëtaqa mantsaq. Peru pëkunawan Diospita yachatsikurirnin y wayinkunachö karirninqa kënömi nirqan: “¡Noqantsiknöllataq kayänaq!”. Tsëmi ingles idiömata parlaq yulaq wawqikuna y panikuna congregacionninman ëwayaptinqa, cocinakurirnin wakinkunata wayinman invitarqan. Jukqa anciänum kanaq. Pëpaqmi Nömaqa kënö nin: “Ichikllan cäjallamampis kushishqa jamakaramunqantaqa manam creirirqätsu”. Awmi, tsënö juntakuyanqampitam juk color o juk costumbriyoq mëtsikaq wawqikuna amïgu tikrayashqa y tsënölla rurar sïguiyänampaqmi decidïdu këkäyan.

LLAKIPÄKOQ Y ALLI KËTA PROCURASHUN

7. ¿Imanirtaq llakipäkoq kanantsikqa alläpa precisan?

7 Mana alli tiempuchö kawëkarninqa sufrikäshunllaraqmi: itsa trabäju asuntu, alläpa qeshyarnin, chikir qatikachämashqa, imëka desgraciakunapa pasarnin, suwapamashqa o mas problëmakunawampis. Tsëmi juknintsik juknintsik yanapanakunapaqqa llakipäkoq kanantsik. Porqui tsëmi yanapamäshun wakinkunata allipa tratanapaq y Dios  ruranqannö wakinkunata shoqanapaq (Efes. 4:32; 2 Cor. 1:3, 4).

8. Kuyakïwan shumaq tratakoq kanqantsikqa, ¿imanötaq yanapakun? Juk pasakunqanwan willakaramï.

8 Itsa congregacionnintsikchö kayan juk nacionpita shamushqa o waktsalla wawqikuna. ¿Imanöraq pëkunawan alli kanqantsikta rikätsikushwan? Pëkunawan amïgu karnin y congregacionchö precisayanqanta rikätsirninmi (1 Cor. 12:22, 25). Tantiyarinapaq, Filipïnas nacionpita Dannykarl jutiyoq nunam Japonta ëwakurqan. Y trabäjunchöqa juk nacionpita kaptinmi mana allipa tratayaq. Peru juk kutiqa Testïgukunapa reunionninmanmi ëwarqan. Y kënömi nin: “Cäsi llapanmi Japonpita kayarqan. Peru amïgunkunatanömi kushishqa chaskiyämarqan”. Shumaq tratayanqanmi yanaparqan Dioswan amïgu kanampaq y bautizakunampaq. Kananqa anciänunömi sirwikan. Y anciänu mayinkunapis niyanmi pëwan warmin Jeniferqa alläpa yanapakoq kayanqanta. Jina kënömi niyan: “Kë precursorkunaqa kayäpunqanllawan shumaq kawakurninmi, Diospa Gobiernunta puntata ashichöqa juk alli ejemplu kayan” (Lüc. 12:31).

9, 10. ¿Ima bendicionkunatataq chaskiyashqa mas yachatsikuyänampaq kallpachakoqkuna?

9 Diospita yachatsikurninmi “llapankunapaq alli kaqta” rurëta puëdintsik (Gäl. 6:10). Mëtsika testïgukunam juk nacionpita ëwaq nunakunata llakiparnin juk idiömata yachakuyashqa (1 Cor. 9:23). Tsënö rurayanqanqa alläpam yanapakushqa. Australia nacionpita Tïffany jutiyoq precursöram, Brisbane markachö suajili idiömata parlaq congregacionchö yanapakurqan. Tsë idiömata yachakunan fäcil mana kashqa kaptimpis, alläpa yanapanqantam nin. Jina kënömi nin: “Pipis alläpa shumaq rurëkunapa pasëta munarqä, juk idiömata parlaq congregacionchömi yanapakunan. Porqui markëkipita mana yarqushllapa viäjita ëwaq cuentam, juk idiömachö yanapakïqa. Y tsëchöqa entëru Patsachö juk familialla kanqantsiktam cläru rikantsik”.

¿Imanirtaq nacionninkunapita ëwakamushqakunata cristiänukunaqa yanapëta munantsik? (Rikäri 10 kaq pärrafuta).

10 Jina rikärishun Japon nacionchö juk familia ruranqanta. Tsë familiapa Sakïku jutiyoq warmi wamranmi kënö nin: “1990 watakunam, Diospita yachatsikïkar tariyarqä Brasil nacionpita mëtsikaq nunakunata. Portugues idiömankunachö Revelacion 21:3, 4 o Salmus 37:10, 11, 29 textukunata leyipuriyaptïqa shumaqmi wiyakuyaq, y höraqa hasta waqariyaqmi. Tsëmi Jehoväpita yachakïta munayanqanta rikarnin, teytäkunawan decidiyarqä portugues idiömata yachakuyänäpaq”. Tsëpitaqa, portugues  idiömata parlaq congregacion patsakänampaqmi yanapakuyarqan. Tiempuwanqa mëtsikaqtam Jehoväta sirwiyänampaq yanapayashqa. Sakïkum kënö nin: “Portugues idiömata yachakïqa manam fäciltsu kashqa, peru mëtsika bendicionkunatam chaskiyarqö, tsëmi Jehoväta alläpa agradecikuyä” (leyi Hëchus 10:34, 35).

HUMILDI KËTA PROCURASHUN

11, 12. (1) ¿Imarëkurtaq mushoq nunana këta procurashwan? (2) ¿Imaraq yanapamäshun humildi kanapaq?

11 Mushoq nunana këtaqa procuranantsik Jehoväta alabanantsikrëkurmi, manam nunakuna alabamänata munartsu. Juk jutsannaq angelta pasanqanta yarpäshun, kikin alabashqa këta munarmi jutsaman ishkirirqan (igualaratsi Ezequiel 28:17 textuwan). Noqantsiknäqa jutsasapa karmi mas fäcil-lla orgullösu këman ishkirishwan. Peru qollmi shonqu o humildi këtaqa puëdintsikmi. ¿Imanö?

12 Cada junaqmi Bibliata leyinantsik, y yachakunqantsikmanmi alleq pensanantsik (Deut. 17:18-20). Masqa yanapamäshun Jesuspa yachatsikïninman y humildi këninman pensanqantsikmi (Mat. 20:28). Porqui pëqa alläpa humildi karninmi hasta apostolninkunapa chakinkunatapis paqapurqan (Juan 13:12-17). Jina humildi kanapaqqa, Jehovätam santu espïritunta mañakunantsik, tsënöpa wakinkunapita mas precisaq kanqantsikta mana pensanapaq (Gäl. 6:3, 4; Filip. 2:3).

13. ¿Humildi karninqa imachötaq yanapakushun y imataraq chaskishun?

13 (Leyi Proverbius 22:4 *) Jehoväqa munan llapantsikpis humildi kanatam. Porqui tsënöpam ruranqantsikpita kushikushun y bendicionkunata chaskishun. Tantiyarinapaq, juknölla y yamë kawakï congregacionchö kanampaqmi yanapakushun. Jinamampis, Jehovämi alläpa alli këninta rikätsimäshun. Apostol Pëdrum kënö nirqan: “Jukniki juknikipaqpis llapëkikuna qollmi shonqu kayë, porqui Diosqa precisaq tukoqkunapa contranmi churakan, peru qollmi shonqu kaqkunataqa, alläpa alli kënintam rikätsin” (1 Pëd. 5:5).

YACHANËPAQ Y ALLÄPA PACIENCIAYOQ KËTA PROCURASHUN

14. ¿Pitaq yachanëpaq y pacienciayoq këtaqa mas rikätsimantsik?

14 Kanan witsan nunakunaqa pensayan, pipis yachanëpaq y pacienciayoq kaptinqa dëbil kanqantam. Peru manam tsënötsu. Porqui yachanëpaq y pacienciayoq këqa, alläpa puëdeq Jehovä Diospitam shamun. Pëmi yachanëpaq y pacienciayoq këtaqa mas alliqa rikätsikun (2 Pëd. 3:9). Tsëtaqa musyantsik, Abrahanwan Lot tapuyaptin angelninkunawan imanö contestanqanchö y 1500 watakunapa mana cäsukoq Israel nacionta pacienciawan tratanqanchömi (Gen. 18:22-33; 19:18-21; Ezeq. 33:11).

15. ¿Imatataq Jesuspita yachakuntsik?

15 Jesuspis kë patsachö këkarninqa, ‘yachanëpaq geniuyoqmi’ karqan (Mat. 11:29). Qateqninkuna pantayaptin, chikeqnin religiösukuna pëpaq mana allita parlayaptin y tumpayaptimpis aguantarninmi yachanëpaq y pacienciayoq kanqanta rikätsikurqan. Jina qeruchö wanunampaqna sufrikarnimpis, kënö nirmi Jehoväta mañakurqan: “Manam musyayantsu imata rurëkäyanqanta” (Lüc. 23:34). Rikanqantsiknömi, imëkata sufrikarnimpis Jesusqa yachanëpaq y pacienciayoq karqan (leyi 1 Pëdru 2:21-23).

16. ¿Imanötaq rikätsikushwan yachanëpaq y pacienciayoq kanqantsikta?

 16 ¿Imanötaq rikätsikushwan yachanëpaq y pacienciayoq kanqantsikta? Juknöpaqa wakinkunata perdonarninmi. Apostol Pablum kënö nirqan: “Jukniki juknikikuna aguantanakurnin sïguiyë, y ofendinakurpis jukniki juknikikuna perdonanakuyë. Imanöllam qamkunata Jehovä perdonayäshurqunki, jina tsënöllam qamkunapis rurayänëki” (Col. 3:13). Tsënö ninqanta cäsukunapaqqa yachanëpaq y pacienciayoqmi kanantsik. Y tsëta rurarqa congregacionchö juknölla kanapaqmi yanapakïkäshun.

17. Yachanëpaq y pacienciayoq këqa, ¿imanirtaq alläpa precisan?

17 Jehoväqa mandamantsik yachanëpaq y pacienciayoq kanapaqmi. Shumaq patsachö kawëta munaqkunapaqqa tsëqa alläpam precisan (Mat. 5:5; Sant. 1:21). Yachanëpaq y pacienciayoq karninqa Jehovätam alabashun, y Biblia ninqanta cäsukuyänampaqmi nunakunata yanapëta puëdishun (Gäl. 6:1; 2 Tim. 2:24, 25).

KUYAKOQ KËTA PROCURASHUN

18. ¿Imanötaq kuyakï yanapakun pïmëtapis igualpa tratanapaq?

18 Kë yachatsikïchö yachakunqantsiknö mushoq nuna kanapaqqa kuyakïran yanapamäshun. Tantiyarinapaq, kapoqyoq kaqkunata waktsa kaqkunapita mas alli tratëkäyanqanta rikarmi Santiäguqa cristiänukunata consejarqan. Y entienditsirqanmi tsënö rurëqa, “nuna mayikitam kikikitanö kuyanëki” nir Dios mandakunqampa contran kanqanta. Y tsëpitam kënö nirqan: “Sitsun wakinkunata mas precisaqpaq churar sïguikäyanki, tsëqa jutsallakïkäyankim” (Sant. 2:8, 9). Nuna mayintsikta kuyarninqa, manam pitapis colorninrëkur, waktsa kanqanrëkur o mana estudiashqa kanqanrëkurqa despreciashuntsu. Janan shonqulla piwampis alli tukunqantsikqa clärum rikakärin, tsëmi alläpa precisan shonqupita patsë llapanta igualpa rikänantsik.

19. ¿Imanirtaq kuyakoq kanantsikqa alläpa precisan?

19 “Kuyakoqqa pacienciakoqmi y ankupäkoqmi” y “manam allish tukuntsu” (1 Cor. 13:4). Tsëmi nuna mayintsikta Diospa Gobiernumpita yachatsirnin sïguinapaqqa, pacienciayoq këta, alli këta y humildi këta wanantsik (Mat. 28:19). Tsënö kanqantsikqa congregacionchö llapantsikpis shumaq kawakunapaqmi yanapamäshun. Awmi, kuyakoq karninqa congregacionchö juknöllam kashun y Jehovätam alabëkäshun. Y tsërëkurmi wakin nunakunapis Diospita yachakïta munayanqa. Tsëmi mushoq nunana kanapaq parlarirnin, Bibliaqa kënö nirin: “Jinamampis, kuyakoq këta imëka röpatanö vistikuyë, porqui tsëqa chipyëpa juk shonqulla këman chätsikoqmi” (Col. 3:14).

MUSHOQ NUNAMAN TIKRËTA AMA JAQISHUNTSU

20. (1) ¿Ima tapukïkunatataq rurakunantsik y imanir? (2) ¿Imatataq alläpa shuyarantsik?

20 Kënömi tapukunantsik: “¿Ima mastataq ruranä mana alli rurënïkunata chipyëpa jaqinapaq?”. Jehovätam rogakunantsik Gobiernunman yëkunata michämaqnintsik mana alli pensëkunata y rurëkunata chipyëpa jaqinapaq (Gäl. 5:19-21). Jina kënöpis tapukunantsikmi: “Jehoväta kushitsinärëkur, ¿pensënïta cambiëkäku?”. Jutsannaq këman manaraq charninqa, mushoq nunana kanapaqqa kallpachakurnin sïguikäshunllaraqmi (Efes. 4:23, 24). Peru ¡imanö shumaqraq kanqa llapan nunakuna jutsannaq këman chäriyaptinqa!

^ par. 3 Bibliata qellqayanqan witsan nunakunaqa, escitakunata rikäyaq wakin nunakunawan mana juntakoqtanö y markannaq nunakunatanömi y tsëmi despreciayaq.

^ par. 13 Proverbius 22:4: “Humildi këqa y Jehoväta respetëqa, Diospa rikëninchö rïcu këman, alabashqa këman y kawëmanmi apakun”.