Unë witsan pipis barcuwan viajëta munarqa, ¿imatataq ruranan karqan?

APOSTOL Pablu kawanqan witsanqa manam kaqtsu pasajëruta apaq barcukuna, sinöqa cargata apaqkunallam. Tsëmi viajëta munarqa, alleqraq tapukuyaq mëpa ëwanqanta y pasajëruta apëta munanqanta (Hëch. 21:2, 3). Y tariyanqan barcu munayanqan sitiuman mana chaptimpis viajayaqllam, y päranqan puertukunachömi juk barcutana ashiyaq ëwëta munayanqan sitiuman chäyänampaq (Hëch. 27:1-6).

Barcukunaqa manam wata entërutsu viajayaq, y imë höra yarqunampis manam musyëtsu kaq. Tiempu mana alli kaptinqa barcu manejaqkunaqa manam viäjita yarquyaqtsu. Jina manam yarquyaqtsu imapis mana allikuna pasakunanta creirnin, tsëmi barcunkunaman ratëkur o ushakashqa barcuman ratëkur juk cuervu waqaptinqa viajayaqnatsu. Juk barcu alli ëwanampaqqa vientum alläpa importanti kaq, tsëmi yanapanampaqnö alli vientu kaptinlla viajayaq. Y juk pasajëru viajanampaq juk barcuta tarirqa, bultunkunata apakurkurmi puertuman ëwaq y tsëchömi barcu yarqunqanyaq shuyaraq.

Unë witsanchö pasakunqanta willakoq Lionel Casson jutiyoq nunam kënö nirqan: “Pasajërukuna muëllin muëllin tapukur mana puriyänampaqmi Röma autoridäkunaqa oficïnakunata patsätsirqan. Tsë oficïnakunataqa patsätsiyarqan Tïber puertupa amänunchö këkaq Ostia markachömi. Tsë oficïnakunaqa cada sitiupa ëwaq barcukunapaqmi kaq, tsëchömi këkarqan Narbonapa [kanan Franciachö], Cartagupa y Tünezpa y mas sitiukunapa ëwaq barcukunapa oficïnankuna. Y tsë oficïnakunallachönam pasajërukunaqa tapukuriyaq”.

Barcuwan viajarqa rasllam chäriyaq, peru peligrösum kaq. Apostol Pabluqa Diospita yachatsikur viajanqanchö atska kutim lamarchö cäsi wanurqan (2 Cor. 11:25).