Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Abril de 2016

 KAWËNIN

Monja kayanqampita Jehoväpa testïgun këman chäyan

Monja kayanqampita Jehoväpa testïgun këman chäyan

ATSKA watanam pasarishqa nanä Aracëli alläpa piñashqa kënö nimanqampita: “¡Alläpam chikeq! Ama parlapämënatsu. Manam religionnikipita imatapis musyëta munänatsu. Shonqümi puwan qamta wiyarniki”. 91 watayoqna këkarpis, qanyantanöllam yarparëkä tsënö nimanqanta. Nimanqankunam alläpa llakitsimarqan. Peru Eclesiastes 7:8 textum kënö nin: “Qallanqampitaqa, imachöpis ushanqanmi mas alliqa” (Felïsa).

Felïsa: Espäña nacionchömi winarqä y familiäkunaqa alläpa catölicum kayarqan. 13 familiäkunam cüra kayaq o Iglesiapaq trabajayaq. Juk cüraqa mamänïpa prïmunmi karqan y catölicukunapa escuëlanchömi yachatsikoq. Wanuriptinnam, papa Juan Pablu II santuna kanampaq nirqan. Waktsam familiäqa karqan. Papänïqa metalkunata rurarmi fabricachö trabajaq y mamänïman chakrachö. Teytäkunapa wamrakunaqa puwaqmi kayarqä y noqam mayorqa karqä.

12 watayoq këkaptïmi, gobiernupa contran churakaqkuna Espäñachö guërrata rurar qallëkuyarqan. Guërra ushariptinmi, polïtica asunturëkur teytäta autoridäkuna carcelman llawiriyarqan. Mamänïpaqqa manam fäciltsu karqan llapäkunata wätayämänampaq. Tsëmi pishillaraq kima nanäkunata Bilbäo markachö monjakuna täräyanqan wayiman mandëkurqan. Tsëchöqa, Aracëli, Lauri y Ramöniqa manam mikïpita pishipakuyamantsu karqan.

Aracëli: Monjakuna täräyanqan wayiman mandayämanqan witsanqa 14 watayoqmi karqä, Laurinam 12 watayoq y Ramöninam 10 watayoq. Ishkë wata pasariptinnam Zaragöza markachö këkaq monjakuna täräyanqan mas jatun wayiman mandayämarqan, tsëchömi edäyashqa nunakunata cuidayaq. Noqakunaqa cocïnatam limpiayaq kayä y alläpa utishqam sientikuyaq kayä. Jina familiäkunatapis alläpam llakiyaq kayä.

Felïsa: Zaragöza markachö monjakuna täräyanqan wayiman nanäkuna ëwakuyaptinmi, mamänïwan tiyüqa pëkunawan kanäpaq mandayämarqan. Tiyüqa cüram karqan. Tsëmi mamänïwan tiyüqa,  noqaman interesäkoq jövinpita rakiyämëta munarnin tsëta rurayarqan. Diosta kuyarninmi monjakuna täräyanqan wayichö juk tiempupa kanäpaq kaqman pensar kushikurqä. Cada junaqmi misaman ëwaq kä, hasta misionëra këtapis munarqämi, Africachö këkaq primünö.

Izquierda kaqchöqa Zaragöza (España) markachö monjakuna täräyanqan wayim këkan. Derëcha kaqchönam, Nácar-Colunga nishqan Biblia.

Monjakuna täräyanqan wayichöqa llakishqam sientikoq kä, pensanqänö mana kaptin. Monjakunaqa Diosta juk nacionkunachö sirwinäpaq manam animayämarqantsu. Tsëmi juk wata pasariptin wayita kutikurqä cüra tiyüta cuidanäpaq. Wayichö rurëkunawanmi yanapakoq kä y cada tardim rosariuta rezayaq kayä. Jina alläpam gustamaq Iglesiäpaq shumaq adornukunata wëtakunawan rurë y santukunata vistitsi.

Aracëli: Monja kanäpaqqa precisaqkunatam änikunä karqan. Punta kaq änikïtaqa Zaragöza markachömi rurarqä. Tsëpitanam monjakunaqa nanäkunatawan rakirayämarqan. Lauritaqa mandayarqan Valencia markachö këkaq monjakuna täräyanqan wayimanmi, Ramöninam Zaragöza markachö quedakurqan y noqatanam Madrid markaman mandayämarqan. Tsëchömi monjana kanäpaq ishkë kaq änikïta rurarqä. Madridchö këkaq monjakuna täräyanqan wayichöqa, mëtsikaq estudiantikuna y edäna nunakunam täräyaq, tsëmi imëka rurëkuna karqan. Noqaqa trabajarqä tsëchö këkaq hospitalchömi.

Monja manaraq karninmi pensaq kä, monja tikrarirqa cada junaq Bibliata leyir y estudiar kanäpaq kaqta. Peru manam tsënötsu karqan. Manam Bibliata leyiyaqtsu kayä ni Diospita o Jesuspita parlayaqtsu kayä. Tsëpa rantinqa latin idiömata, catölicukunapa santunkunapitam yachakurqä y Marïatam adoraq kä. Peru masqa trabajayaqllam kayä.

Alläpa llakikurmi qallëkurqä. Jukkuna rïcuyäyänampaq trabajanäpa rantinqa, familiäta yanapanäpaq qellëta ganarchi këkäman nirmi pensarqä. Tsëmi wayïta ëwakïta munanqäta monjakunapa mandaqninta nirirqä. Tsënam pëqa juk cuartuman llawiramarqan ëwakïta manana munanäpaq.

Tsë llawiranqä cuartupita jorqarayämaptimpis, noqaqa wayïman ëwakïta munëkarqällam, tsëmi yapë llawirayämarqan. Kima kutipam tsënö rurayämarqan. Tsëpitanam niyämarqan ëwakïta munarqa kënö qellqanäpaq: “Ëwakü Diospa rantin Satanasta sirwita munarninmi”. Tsënö niyämänantaqa manam shuyararqätsu. Noqaqa wayïta ëwakïta munarqämi, peru tsëtaqa manam imëpis qellqämantsu karqan. Tsëmi juk cürawan confesakïta munanqäta nirirqä. Confesamaqnï cürataqa llapantam willarqä, tsëmi obisputa permïsuta mañakurqan Zaragöza markachö monjakuna täräyanqan wayiman kutitsiyämänampaq. Tsë markaman chärirnam tsëchö quedakurqä juk ishkë killakuna wayiman ëwakunäpaq permitiyämanqanyaq. Ichik tiempullatanam  Lauriwan Ramöni nanäkunapis monja këta jaqiriyarqan.

JUK LIBRUM RAKIRAYÄMAN

Felïsa

Felïsa: Tiempuwannam casakurirqä y Espäñapa Cantabria markanmanmi täraq ëwakurqä. Tsëchöpis llapan semänakunam misaman ëwëkarqälla. Juk domingunam cüraqa alläpa piñashqa niyämarqan, “La verdad que lleva a vida eterna neq libruta mëqëkikunapis katsirninqa entregayämë o basüraman jitariyë”.

Tsë libruqa manam kapamarqantsu, peru kapamänantaqa munarqämi. Tsëpita juk ishkë junaqkunallatam ishkaq Testïgu warmikuna wayïman watukayämarqan y tsë libruta qoyämarqan. Tsë paqasllam tsë libruta leyirirqä. Yapë kutimurnam tsë warmikunaqa Bibliapita yachatsiyämänampaq niyämarqan y noqaqa änirirqämi.

La verdad nishqan libru

Diosmanqa imëpis alläpam creikoq kä. Tsëmi, Jehoväpita rasumpa kaqta yachakurirqa alläpa kuyar qallëkurqä. Jina pï mëtam pëpita willëta munaq kä. 1973 watachömi bautizakurirqä. Y puëdinqämannömi kastäkunata Diospita parlapaq kä. Peru llapanmi pantashqa këkanqäta niyämaq, masqa nanä Aracëlim.

Aracëli: Monjakuna täräyanqan wayichö alläpa mana alli tratayämanqampitam, religionnïwanqa piñashqa këkarqä. Tsënö kaptimpis, misamanqa ëwëkarqällam y cada junaqmi rosariuta rezakoq kä. Jina Biblia imata yachatsikunqampitaqa yachakïta munëkarqällaran, y yanapëkämänampaqmi Diosta mañakurqä. Juk junaqmi yachakïkanqampita Felïsaqa alläpa kushishqa parlapämarqan. Peru noqaqa manam pëwan acuerdutsu karqä. Y yachakïkanqanman chipyëpana creikaqtanömi rikarqä.

Aracëli

Tiempuwannam Madridta trabajaq yapë kutirqä, tsëchömi casakurqä. Watakuna pasanqanmanömi rikarqä imëpis iglesiaman ëwaq nunakunaqa Jesus yachatsikunqannö mana kawayanqanta. Tsëmi iglesiaman ëwëta jaqirirqä y confesakïtapis. Mananam creirqänatsu santukunaman ni infiernuchö sufrimientuman. Jina llapan santükunatam basüraman jitarirqä. Rasumpa kaqchöqa manam musyarqätsu allita o mana allita rurëkanqätaqa. Peru religionnïpitaqa alläpa resentïdum këkarqä. Tsëmi Diosta  kënö nirqä: “Qamtam reqita munallaq, ¡yanapëkamë!”. Yarpämi Testïgukuna atska kuti wayïta tsaktakayämunqantaqa, peru manam imëpis kicharqätsu. Manam ni mëqan religionman markäkurqänätsu.

Lauriqa Franciachömi täraq y Ramöninam Espäñachö. 1980 wata witsanmi pëkunaqa Testïgukunawan Bibliapita yachakur qallëkuyarqan. Noqaqa pensarqä nanä Felïsata engañayanqannölla pëkunatapis engañëkäyanqantam. Tiempuwannam Angelines jutiyoq vecïnäwan yanasa tikrariyarqä, pëqa Testïgum karqan. Atska kutim pëwan qowanqa tapuyämarqan Bibliapita yachakïta munanqäta o mana munanqäta. Noqanam nirirqä, ni mëqan religionpis mana interesämanqanta. Peru Bibliapita yachakïta munanqätaqa cuenta qokuyarqanmi. Juk junaqmi nirirqä Nácar-Colunga Bibliäwan yachatsiyämaptinqa Bibliapita yachakunäpaq kaqta.

BIBLIAPITA YACHAKUYANQÄMI JUNTARAYÄMAN

Felïsa: 1973 wata bautizakunqä witsanqa, Cantabria markapa mas jatun markan Santanderchöqa 70 Testïgukunallam kayarqan. Tsë markachöqa atska taksha pueblukunam kan. Tsëchö täraq nunakunata yachatsiyänäpaqqa, jatun cärrukunawanmi karuta viajayaq kayä y tiempuwannam taksha cärrukunawanna.

Kë llapan watakunachömi mëtsikaq nunakunata Bibliapita yachatsirqö. Cäsi llapanmi catölicu kayarqan, y 11 nunakunam bautizakuyarqan. Alläpa pacienciayoqmi kanä karqan. Noqanöpis, creenciankuna mana alli kanqanta cuentata qokuyänampaqqa tiemputaran wanayarqan. Noqaqa musyarqämi Biblialla y santu espïritulla pitapis cambianampaq y rasumpa kaqta entiendinampaq yanapëta puëdinqanta (Hebrëus 4:12). Policïam qowäqa karqan y 1979 watachömi bautizakurqan. Y mamänïnam manaraq wanurnin Bibliata estudiar qallarqan.

Aracëli: Testïgukunawan Bibliapita yachakur qallëkurqa, pëkunaman manam confiakurqätsu. Tsëpitaqa confiakurqänam, porqui rikarqämi yachatsikuyanqannö kawayanqanta. Jehoväman y Bibliaman markäkïnïqa masmi sinchiyarqan y mas kushishqam sientikoq kä. Jukläya kanqäta cuentata qokurirmi, wakin vecïnükuna kënö niyämarqan: “Aracëli, tsë akranqëki nänillachö sïgui”.

Jehoväta kënö ninqätam yarpä: “Alläpam agradecikoq Bibliapa rasumpa kaq yachatsikïninta tarinäpaq imëkanöpa yanapamanqëkita”. Jina Felïsatam perdonta mañakurqä mana alli tratanqäpita. Tsëpita patsëqa mananam plëtuyänatsu, tsëpa rantinqa Bibliapitam kushishqa parlakuyä. 61 watayoq këkarmi 1989 watachö bautizakurirqä.

Felïsa: Kananqa viudayashqanam y 91 watayoqnam kä. Tsëmi unënöqa rurëta puëdïnätsu, peru cada junaqmi Bibliätaqa leyikä. Y puëdinqämannömi reunionkunaman ëwä y yachatsikoq yarqü.

Aracëli: Itsa monja kashqa kaptï cürakunatawan monjakunata Jehoväpita parlapë gustamaq. Wakinkunawanqa alläpa shumaqmi parlakuyaq kayä, y mëtsikaqmi librukunata y revistakunata chaskiyämarqan. Masqa yarpä juk cürawan atska kuti parlanqäpitam. Juk junaqmi nimarqan yachatsinqäwanqa acuerdu kanqanta, peru kënömi nimarqan: “¿Kë edänïwan mëtaraq ëwashaq? ¿Ima niyämanqaraq qatimaqnïkuna y familiäkuna? Tsënam kënö nirirqä: “¿Y Diosqa ima ninqaraq?”. Peru rasumpa kaqta nikanqäta cuentata qokurirmi llakikurqan y manatsunchi valornin karqantsu cambianampaq.

Qowä “reunionkunaman ëwëtam munä” nimanqantaqa manam imëpis qonqashaqtsu. 80 watayoq masnam karqan reunionman ëwar qallëkunqampita, tsëpita patsëqa llapan reunionkunamanmi ëwarqan. Bibliatam estudiarqan y Diospita yachatsikurmi qallëkurqan. Ishkäkuna yachatsikoq yarquyanqätaqa kushishqam yarpä. Ishkë killa bautizakunampaq pishikaptinmi wanukurqan.

Felïsa: Jehoväta sirwir qallëkuptïmi kiman nanäkuna michäkuyarqan. Tsëpitanam pëkunapis Jehoväpa testïgun këman tikrayarqan. Tsë pasakunqanmi alläpa kushitsimarqan. Kananqa juntunam kayä kuyakoq Diosnintsikpita y Palabran Bibliapita parlakurnin. Kananmi sïqa llapäkuna juntuna Jehoväta adorayä. *

^ par. 29 Ramöniqa 83 watayoqnam, Felïsanam 91 watayoq y Aracëlinam 87 watayoq këkan. Kiman nanäkunam Jehovä Diosta kushishqa sirwikäyan. Jehoväta mana jaqipa sirwikarmi Lauriqa wanukurqan 1990 watachö.