Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Abril de 2016

¿Imanirtaq precisan Diosta adoranapaq juntakänantsik?

¿Imanirtaq precisan Diosta adoranapaq juntakänantsik?

“Yachatsicuyanqanta cäsucurmi, firmi cacuyarqan. Pecunam juntacarnin, juc shonqulla [...] Diosman mañacur cacuyaq” (HËCHUS 2:42).

CANTICU: 20 Y 119

1-3. (1) ¿Imanirtaq musyantsik reunionkunaqa Diospa sirweqninkunapaq imëpis alläpa precisaq kashqanta? (Rikäri kë yachatsikïpa qallananchö këkaq dibüjuta). (2) ¿Imakunapitataq yachakushun kë yachatsikïchö?

CORÏNNAQA 17 watayoqmi karqan mamäninta mälas trabajatsiyänampaq apayanqan witsan. Y tiempuwannam pëtapis Siberia nacionman apayarqan. Tsëchömi animalkunata wätayänan chakra wayichö alläpa trabajatsiyaq. Höraqa llapsha röpashqallatam alalëchö trabajatsiyaq. Tsë trabajanqan wayipita karuchöraq Diosta adorana wayi këkaptimpis, Corïnnaqa juk cristiänawanmi juk reunionman ëwayänampaq decidiyarqan.

2 Tardipam ishkan ëwakuyarqan y 25 kilömetrutam trenkuna yarquyänan sitiuyaq chakipa ëwayarqan. Corïnnam kënö nirqan: “Trenqa yarqurqan dos de la mañanam, y joqta hörapam viajayarqä. Tren jaqiyämanqan sitiupita reunionman chäyänäpaqqa 10 kilömetrutaran chakipa ëwayarqä”. Corïnnaqa manam pësakurqantsu reunionman tsëläya karuta ëwanqampita. Porqui kënömi nirqan: “Reunionchöqa Täpakoq revistatam  yachakuyarqä y canticukunatam cantayarqä. Tsëqa alläpam yanapayämarqan y markäkïnïkunatam sinchiyätsirqan”. Kima junaqtaran trabäjunkunamanqa kutiyarqan. Y trabajayanqan wayipa duëñunqa manam cuentata qokurqantsu tsëchö mana kayanqanta.

3 Reunionkunaqa Diospa sirweqninkunapaqqa imëpis alläpam precisashqa. Tantiyarinapaq, punta cristiänukunataqa alläpam gustaq Diosta adorayänampaq y pëpita yachakuyänampaq juntakë (Hëchus 2:42). Awmi, llapantsiktam reunionkunaman ëwëqa alläpa gustamantsik. Peru wakintsikpaqqa manam llapan reunionkunaman ëwanapaq fäciltsu. Itsa atska hörakuna trabajanantsik, imëka rurëyoq kantsik o alläpa utishqa këkantsik. ¿Imataq yanapamäshun reunionkunaman mana faltanapaq? [1] (Rikäri kë yachatsikïpa ushananchö këkaq willakïta). ¿Imanötaq yanapashwan estudiantintsikkunata y wakin nunakunata reunionman ëwayänampaq? Kë yachatsikïchömi kimata yachakushun. 1) ¿Imanirtaq reunionkunaman ëwanantsik precisan? 2) ¿Imanirtaq reunionkunaman ëwanqantsik wakinkunata yanapan? Y 3) ¿imanirtaq reunionkunaman ëwanqantsik Jehoväta kushitsin? [2] (Rikäri kë yachatsikïpa ushananchö këkaq willakïta).

¿IMANIRTAQ REUNIONKUNAMAN ËWANANTSIK PRECISAN?

4. ¿Imanötaq reunionkuna yanapamantsik Jehoväta mas reqinapaq?

4 Reunionkunachömi yachakuntsik. Reunionkunaqa yanapamantsik Jehoväta mas reqinapaqmi. Tantiyarinapaq, entëru Patsachö këkaq cäsi llapan congregacionkunam, Bibliapita Yachakunapaq reunionchö, Acerquémonos a Jehová nishqan librupita yachakuyarqan. ¿Imanötaq sientikurqantsik Jehovä imanö kanqampita yachakurir y Jehoväta alläpa kuyayanqampita wakinkuna parlakoqta wiyarnin? Jehoväta maschi kuyarquntsik. Jina reunionkunachöqa Bibliapita mas yachakushun, discursukunata alleq wiyar, demostracionkunata altantulla rikar y Bibliata leyirninmi (Nehemïas 8:8). Y cada semäna Bibliapita leyinapaq preparakurmi, precisaq yachatsikïkunata tarintsik, jina wiyantsikmi cristiänu mayintsikkuna yachakuyanqampita parlakarayämunqantapis.

5. ¿Imanötaq reunionkuna yanapashurqunki Diospita yachatsikunqëkichö y Bibliapita yachakunqëkinö kawanëkipaq?

5 Reunionkunaqa Bibliachö yachakunqantsiknö ruranapaqmi yanapamantsik (1 Tesalonicensis 4:9, 10). Itsa Täpakoqpita Yachakunapaq reunionchöqa Jehoväta mas sirwinapaq, mañakïnintsikta mas alliyätsinapaq o piñatsimaqnintsik cristiänu mayintsikkunata perdonanapaq yachakurquntsik. Y wakin reunionkunachöqa, Bibliata utilizarnin Diospita yachatsikunapaqmi yachakuntsik (Mateu 28:19, 20).

6. ¿Imanötaq reunionkunaqa kallpata qomantsik?

6 Reunionkunam alläpa animamantsik. Satanaspa makinchö këkaq nunakunam markäkïnintsikta ushakätsita y qelanäkurinata munayan. Peru reunionkunam kallpata qomantsik Jehoväta sirwir sïguinapaq (leyi Hëchus 15:30-32). Reunionkunachöqa  cäsi imëpis Biblia willakunqankuna imanö cumplikanqantam yachakuntsik. Tsëmi, Jehovä llapan änimanqantsikta cumplimunampaq kaqta següru kanapaq yanapamantsik. Jina cristiänu mayintsikkunam discursukunata o demostracionkunata rurar, yachakuyanqampita parlakur y shonqupita patsë cantarnin animamantsik (1 Corintius 14:26). Y reunion manaraq qallaptin o ushariptin cristiänu mayintsikkunawan parlakurinqantsikpis animamantsikmi, porqui tsëchömi cuentata qokuntsik rasumpa kuyamaqnintsik amïguntsikkuna kanqanta (1 Corintius 16:17, 18).

Reunionkunaqa kallpatam qomantsik Jehoväta sirwir sïguinapaq

7. ¿Imanirtaq alläpa precisan reunionkunachö kanantsik?

7 Reunionkunachömi Diosqa santu espïritunwan yanapamantsik. Jesusqa Diospa santu espïrituntam utilizan congregacionkunata diriginampaq. Tsëmi, santu espïritu congregacionkunata ninqanta wiyakunapaq nirqan (Apocalipsis 2:7). Santu espïrituqa tentacionkunachö alli tsarakunapaq, mana mantsakushpa yachatsikunapaq y imatapis alli akranapaqmi yanapamënintsikta puëdin. Tsëmi alläpa precisan llapan reunionkunaman ëwanapaq kallpachakunantsik. Tsënöpam chaskishun santu espïritunwan Dios qomanqantsik yanapakïta.

¿IMANIRTAQ REUNIONKUNAMAN ËWANQANTSIK WAKINKUNATA YANAPAN?

8. ¿Imanötaq wakinkunata yanapan reunionkunaman ëwanqantsik, tsëchö parlakurinqantsik y Jehoväpaq shonqupita patsë cantanqantsik? (Rikäri “ Mas kushishqanam wayinman kutin” neq recuadruta).

8 Reunionkunachömi cristiänu mayintsikkunata kuyanqantsikta rikätsintsik. Mëtsikaq cristiänu mayintsikkunam sasa problëmakunapa pasëkäyan. Apostol Pablum “jucnintsic jucnintsic” yanapanakushun nir qellqarqan (Hebrëus 10:24, 25). Kënö nirninqa, Pabluqa nikarqan wakinkunapaq yarpachakunapaqmi. Tsëtaqa rurantsik reunionkunaman ëwarninmi. Tsëchömi cristiänu mayintsikkunawan juntu këta munanqantsikta, pëkunawan parlakurita y imanö këkäyanqanta musyëta munanqantsikta rikätsikuntsik. Jinamampis reunionkunachö parlakurinqantsikkwan y Jehoväpaq shonqupita  patsë cantanqantsikwanmi kallpata qonakuntsik (Colosensis 3:16).

9, 10. (1) Juan 10:16 textu ninqan, ¿imanötaq yanapamantsik reunionkunaman ëwëqa alläpa precisaq kanqanta musyanapaq? Willakaramï. (2) Reunionkunaman ëwanqantsikqa, ¿imanötaq yanapan familiampita japallankunalla Diosta sirweq cristiänu mayintsikkunata?

9 Reunionkunaman ëwarninmi, congregacion juknölla kanampaq yanapakuntsik (leyi Juan 10:16 *). Jesusqa nirqan, juk mitsikoq cuenta kanqanta y qateqninkunana juk kanchapita üshakunanö kayanqantam. Juk kanchachö üshakunaqa imëpis juntum këkäyan y mitseqnintam qatiyan. Sitsun ishkë üshakuna juk jirkachö këkäyan, ishkë kaqna juk pampachö y juk kaqna juk sitiuchö këkan, tsëqa manam nishwantsu pitsqan üshakuna juk kanchallapita kayanqanta. Tsënöllam noqantsikpis, ‘juk kanchallapita üshanö’ jukllëlla ‘mitseqninta’ qateq cuenta këta munarqa, reunionkunaman mana faltëta ëwanantsik cristiänu mayintsikkunawan juntu kanapaq.

10 Reunionkunam yanapamantsik juknölla y kuyanakoq familianö kanapaq (Salmu 133:1). Testïgu kayanqanrëkurmi wakin cristiänu mayintsikkunataqa teytankuna o wawqinkuna sufritsiyashqa. Peru Jesusqa änikurqanmi alläpa kuyakoq familiata qonampaq kaqta (Marcus 10:29, 30). Mana faltëta reunionkunaman ëwashqaqa kë cristiänu mayintsikkunam rikämäshun teytankunatanö, wawqinkunatanö o paninkunatanö y tsëmi kallpata qonqa. Këkunaman pensanqantsikmi yanapamäshun reunionnintsikkunaman mana faltanapaq.

 ¿IMANIRTAQ REUNIONKUNAMAN ËWANQANTSIK JEHOVÄTA KUSHITSIN?

11. ¿Imanötaq reunionkuna yanapamantsik Jehoväta alabanapaq?

11 Reunionkunachömi Jehoväta alabantsik. Kamamashqantsik kaptinmi Jehoväta agradecikunantsik, respetanantsik y alabanantsik (leyi Apocalipsis 7:12). Tsëkunataqa rurantsik reunionkunachö mañakurnin, canticukunata cantarnin y pëpita parlakurninmi. Cada semänam Jehoväta adorëta puëdintsik y këqa alläpa jatun qarëmi.

Jehoväqa musyanmi reunionkunaman ëwanapaq imëkanö kallpachakunqantsikta y alläpam valoran

12. ¿Imanötaq Jehovä sientikun reunionkunaman ëwanapaq mandamanqantsikta wiyakushqa?

12 Jina Jehovätaqa wiyakunantsik, kamamashqantsik kaptinmi. Pëqa mandamantsik mana faltëta reunionkunaman ëwanantsikpaqmi, masran ushakë junaq chëkämuptinnäqa. Y mandamanqantsikta wiyakushqaqa Jehovä alläpam kushikun (1 Juan 3:22). Pëqa musyanmi reunionkunaman ëwanapaq imëkanö kallpachakunqantsikta y alläpam valoran (Hebrëus 6:10).

13, 14. ¿Imanötaq reunionkuna yanapamantsik Jehoväman y Jesusman witinapaq?

13 Reunionkunaman ëwarninmi, Jehoväman y Jesusman mas witita munanqantsikta rikätsikuntsik. Reunionkunachöqa Bibliapita y noqantsikpita Jehovä imata shuyaranqantam yachakuntsik (Isaïas 30:20, 21). Reunionkunaman shamurmi Jehoväta mana sirweq nunakunapis cuentata qokuyan Jehovä pushëkämanqantsikta (1 Corintius 14:23-25). Santu espïritunwan reunionkunata Jehovä dirigiptinmi, tsëchö yachakunqantsikkunaqa pëpita shamun. Tsëmi reunionkunaman ëwarninqa, Jehovä parlapëkämanqantsikta wiyëta y alläpa kuyamanqantsiktapis sientita puëdintsik. Tsënöpam pëman mas witishun.

14 Jesusmi dirigin congregacionkunata. Y kënömi nirqan: “Ishcaqllapis o quimaqllapis jutïcho juntarëcaqchoqa, pecunawanmi quecashaq” (Mateu 18:20). Jina Bibliaqa yachatsikun congregacionkunachö Jesus këkanqantam (Apocalipsis 1:20–2:1). Juk parlakïchöqa, pëmi congregacionkunata pushan. Tsemi reunionkunaman ëwarninqa, Jesusman mas witikantsik. Awmi, Jehoväwan Jesusqa noqantsikwanmi këkäyan y reunionkunachö këkashqaqa kallpatam qomantsik. ¿Imanöraq Jehovä sientikun pëman y tsurin Jesucristuman witinapaq imëkanöpa kallpachakunqantsikta rikar?

15. Reunionkunaman ëwarninqa, ¿imatataq Jehoväta rikätsintsik?

15 Reunionkunaman ëwarninmi, Jehoväta cäsukïta munanqantsikta rikätsikuntsik. Pëqa manam reunionkunaman ëwanapaq mandamanqantsikta wiyakunapaq obligamantsiktsu (Isaïas 43:23). Tsëqa, ¿imataraq rurashun patronnintsik mas trabajatsimashqa llapan reunionkunaman ëwëta mana puëdirqa? Juk gobiernu kënö nimashwan: “Reunionkunaman ëwarninqa multatam pagayanki, carcelchömi llawiräyanki o castigashqam kayanki”. Tsëqa,  ¿imataraq rurashun? Y juk rurëkunata ruranantsikrëkur reunionkunaman mana ëwëta puëdirqa, ¿imataraq rurashun? Kë cäsukunachöqa, kikintsikmi decidinantsik (Hëchus 5:29). Jehoväta cäsukunapaq y reunionkunaman ëwanapaq decidirninqa, kuyanqantsikta y Pëlla imata ruranapaq mandamënintsikta puëdinqantam rikätsikushun (Romänus 6:17). Tsëta ruranqantsikmi Jehoväta kushitsinqa (Proverbius 27:11).

MANA FALTËTA REUNIONKUNAMAN ËWASHUN

16, 17. (1) ¿Imanötaq musyantsik punta cristiänukunapaqqa reunionkuna alläpa precisanqanta? (2) ¿Ima nirqantaq George Gangas wawqi reunionkunapita?

16 33 wata Pentecostes fiesta pasariptinmi, cristiänukunaqa reunionkunachö juntakarnin ‘yachatsicuyanqanta cäsucur, firmi cacuyarqan. Pecunam juntacarnin, juc shonqulla Diosman mañacur cayarqan’ (Hëchus 2:42). Juk parlakïchöqa, Jehoväta adorayänampaqmi juntakäyaq. Y Röma gobiernu y pushakoq religiösu judïukuna chikir qatikachëkayaptimpis, juntakëkäyarqanllam. Sasaraq kaptimpis, juntakar sïguiyänampaqmi llapan puëdiyanqanmannö kallpachakuyarqan.

17 Kanan witsampis Jehoväta sirweqkunaqa, alläpa precisaqpaqmi reunionkunata churantsik. Tantiyarinapaq, Jehoväpa Testïgunkunata Pushaqpita George Gangas wawqiman pensarishun. Pëmi nirqan cristiänu mayinkunawan reunionkunachö juntakanqanqa alläpa yanapanqanta y kushitsinqanta. Jina gustaqmi punta puntata reunionkunaman chëta y llapankuna ëwakuyaptinraq ëwakïta. Cristiänu mayinkunawan parlëqa alläpam kushitseq, tsëmi kënö nirqan: “Pëkunawan karninqa espiritual kaq Paraïsuchö këkanqäta y wayïchö familiäkunawan këkaqnömi sientikü”. Jina nirqanmi tsërëkur cristiänu mayinkunawan juntakëta alläpa munanqanta.

18. (1) ¿Imanötaq rikanki reunionkunata? (2) ¿Imata ruranëkipaqtaq listu këkanki?

18 Y qamqa, ¿Gangas wawqinöku sientikunki? Tsëqa reunionkunaman ëwanëkipaq sasaraq kaptimpis, llapan puëdinqëkimannö kallpachakï. Rey David sientinqannö qampis Jehoväpaq sientinqëkita rikätsikï. Pëqa nirqan Jehoväta adoranqan sitiuta alläpa kuyanqantam (Salmu 26:8).

^ [1] (3 kaq pärrafu): Wakin cristiänukunaqa manam llapan reunionkunaman ëwëta puëdiyantsu. Tantiyarinapaq, itsa alläpa qeshyapäkuyan. Peru musyayanmi Jehovä entiendinqanta y sirwiyänampaq kallpachakuyanqanta alläpa valoranqanta. Anciänukunaqa reunionkunata grabëkur o telëfunupam kë cristiänu mayintsikkuna wayinkunallachö reunionta wiyayänampaq yanapëta puëdiyan.

^ [2] (3 kaq pärrafu): Rikäri “ ¿Imanirtaq reunionkunaman ëwanantsik?” neq recuadruta.

^ par. 9 Juan 10:16 (NM): “Juk kaq üshäkunapis kapamanmi, manaraq kë kanchaman ëllukämushqa kaqkuna; precisanmi pëkunatapis pushamunä. Parlashqäkunata entiendiyanqam. Tsënam juk kanchallachöna kayanqa; noqallam mitseqninkuna kashaq”.