Warmin wanunqampita juk wata pasarishqanllachömi, Faizal jutiyoq nunapa shonqunta operayäpurqan. Pëmi kënö nin: “Job libruta leyirmi cuentata qokü, Jehoväqa yanapamänantsikrëkur tsë libruta escribitsishqa kanqanta. Unë witsan Diosta sirweqkunapis, noqantsiknölla sientikushqa kayanqanta musyëqa alläpam yanapakun”. Tsëmi kënö nin: “Kawar sïguiqa precisanmi”.

Shipashllaraq këkaptinmi, Tarshapa mamäninqa wanukïkurqan. Pëmi kënö nin: “Diosnintsikta reqinqantsikmi kawarnin sïguinapaq yanapamantsik. Pëqa, mana allikunapa pasëkashqapis shamoq tiempuchö shumaq kawakunapaqmi änimantsik. Alläpa puëdeq karninmi, Jehoväqa cada junaq yanapamënintsikta puëdin”.

KË REVISTAPA punta kaq yachatsikïninkunachömi rikarquntsik, alläpa mana allikunapa y sufrimientukunapa pasarnin wakinkunaqa wanukïllatana pensayanqanta. Itsa mana allikunapa pasëkanki, y tsërëkur wanukïlla mas alli kanqanta o qampaq pipis mana yarpachakunqanta pensanki. Peru Diosnintsikqa alläpam kuyashunki, y llakikuptikiqa pëpis llakikunmi.

Salmus 86 kaq capïtuluta escribeqmi, Jehoväman confiakunqanta kënö nir rikätsikurqan: “Alläpa llakikunqä y yarpachakunqä höram, qamman mañakamushaq, porqui qamqa wiyamankim” (Salmus 86:7). Itsa kënö tapukïkanki: “Llakikunqantsik höra mañakushqaqa, ¿imanötaq Dios yanapamantsik?”.

Llapan problëmantsikkunata jinan höra mana altsamurnimpis, Diosqa yamë këninta qomänapaqmi änimantsik. Palabranchömi kënö nin: “Ama imapaqpis yarpachakur kayëtsu, sinöqa imëkachöpis mañakurnin y rogakurnin y jina agradecikurnin, yarpachakïnikikunata Diosta musyatsiyë; tsëqa imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filipensis 4:6, 7). Diosqa noqantsikpaq yarpachakunqanta rikänapaqqa, Palabran ninqampita yachakurishun.

Diosqa qampaq yarpachakunmi

Diosnintsikqa manam pichïsankakunapita ni jukllëllatapis qonqantsu. Y “qamkunaqa mëtsika pichïsankakunapitapis masmi väliyanki” (Lücas 12:6, 7).

KËMAN PENSARI: Diospaqqa juk takshalla pichïsankapis alläpa valoryoqmi. Y nunakunaqa pichïsankakunapitapis mas väleqmi kantsik. ¿Imanirtaq tsënö kanqanta nintsik? Porqui kë Patsachö imëka kaqkunapitaqa mas precisaqmi kantsik, jina kikin niraqtam kamamashqantsik, tsëmi alläpa shumaq imanö këninta rikätsikïta puëdintsik (Genesis 1:26, 27).

“Jehovä Diosllä, qamqa chipyëpam rikämarqunki, y reqimankim [...]. Alli rikëkallämë, y yarpakachätsimaq pensënïta reqï” (Salmus 139:1, 2, 23).

KËMAN PENSARI: Diosqa allim reqishunki. Imaman yarpachakunqëkita y shonqïkichö imanö sientikunqëkitapis musyanmi. Imakunapa pasëkanqëkita wakinkuna mana entiendiyaptimpis, Diosqa qampaq yarpachakunmi y yanapashïnikitam munan.

 Manam japallëkitsu këkanki

“Jehovä Diosllä, mañakïlläta wiyëkullë, y yanapamänëkipaq rogakullanqä qam kaqyaq chëkallämutsun. [...] Mañakamunqa höra wiyëkallämë, y raslla yanapëkallämë”. “Llakishqa sientikoqkunapa mañakïninkunata wiyanampaqmi, Jehoväqa listu këkan” (Salmus 102:1, 2, 17).

KËMAN PENSARI: Diosqa nunakunata kamanqampitam, sufrir waqayanqanta cuentachö katsishqa (Salmus 56:8). Y qampa sufrimientïkikunatapis cuentachömi katsin. Diospaq precisaq kaptikim, pëqa imakunapa pasanqëkita y alläpa waqanqëkitapis yarpan.

‘Ama llakikur yarpachakïtsu, porqui noqam Diosniki kä. Noqam kallpayoqta tikratsishqëki. Awmi, noqam yanapashqëki. Jehovä Diosnikim, kënö nishoqniki: “Ama mantsakïtsu. Noqam rasumpa yanapashqëki”’ (Isaïas 41:10, 13).

KËMAN PENSARI: Diosqa yanapashunkim. Alläpa llakikunqëki höram, pëqa yanapamäshun.

Shamoq tiempuchöqa shumaqmi kawakushun

“Nunakunata alläpa kuyarninmi Diosqa japallan Tsurinta pëkunarëkur qorqan, tsënöpa pëman markäkuyanqanta rikätsikoqkuna mana ushakätsishqa kayänampaq, sinöqa imëyaqpis kawëyoq kayänampaq” (Juan 3:16).

KËMAN PENSARI: Alläpa kuyashurnikim, Diosqa tsurin Jesusta qamrëkur qonampaq listu këkarqan. Jesus wanunqanrëkurmi, shamoq tiempuchö kushishqa y yamëna kawakïta puëdishun. *

Alläpa llakikur wanukïllata pensarninqa, Bibliata leyinëkipaq tiempïkita patsätsi y Dios änikunqankunaman mas markäkï. Tsëkunata ruranqëkiqa, kushishqa y kawarnin sïguinëkipaqmi yanapashunki.

^ par. 19 Jesus wanunqampita maslla musyëta munarqa, Jesus wanunqanta yarpäshun neq videuta rikäri, tsëqa jw.org päginachömi këkan. Yëkuri PUBLICACIONKUNA > VIDEUKUNA > REUNIONNÏKUNA Y YACHATSIKUYANQÄ neqman.