¿IMATATAQ YACHAKUNTSIK KAMANQANKUNAPITA?

Pensari gemëlukuna imakunachö igualäyanqanman. Pëkunaqa alleqmi reqinakuyan. Gemëlukuna imanö kayanqanta estudiayanqanchö Nancy Segal jutiyoq directörapam juk gemëla nanan kapun. Pëmi nirqan, wakin gemëlukunaqa imëkachöpis alli entiendinakuyanqanta. Y tsënö gemëla nanayoq juk warmipis, nananwan imanö apanakuyanqampaqmi kënö nirqan: “Nanäwanqa alleqmi reqinakuyä”.

¿Imanirtaq tsënöqa reqinakuyan? Mëchö kawayanqanrëkur y imanö wätashqa kayanqanrëkurpis kanmanmi. Peru tsëta alleq investigarmi rikäyashqa itsa cuerpunkunachö tsë niraqlla kayanqanrëkur kanqanta.

KËMAN PENSARI: Imëkachöpis igual-lla kayänampaqqa, Diosnintsikmi gemëlukunata tsëtanö kamarqan. Tsëmi rikätsimantsik Diosnintsiklla alleq entiendimanqantsikta. Tsëchi Salmus libruta qellqaq Davidpis kënö escribirqan: “Mamänïpa pachanchömi alli cuidashqata katsimarqëki. Pakarëkaqchö rurashqa këkaptïpis tullükunaqa manam rikënikichö pakarëkarqantsu, [...] Rurakar qallëkaptïmi rikämarqëki, y librïkïchömi llapannïkuna qellqarëkarqan, rurakar qallanqä junaqpita patsë, ni imällapis manaraq rurakaptin” (Salmus 139:13, 15, 16). Diosnintsikllam alleq reqimantsik y entiendimantsik y manam imanö rurashqa kanqantsikllatatsu. Sinöqa imanö kawakunqantsikrëkur jukläya kanqantsiktapis musyanmi. Tsënö kaptinmi, alleq reqimanqantsikman confiakunantsik.

BIBLIACHÖMI WILLAKUN DIOSQA ENTIENDIMANQANTSIKTA

Rey Davidmi kënö mañakurqan: “Oh Jehovä, qamqa chipyëpam rikämarqunki, y reqimankim. Qamqa rikëkämankim jamakuptï y sharkuptïpis. Karullapitanam imata pensanqätapis musyarqunki. Manaraq imatapis parlaptïmi, ¡Jehovällä! llapan parlanäpaq kaqkunata musyankina” (Salmus 139:1, 2, 4). Jehoväqa shonquntsikchö imanö sientikunqantsikta y imata pensëkanqantsiktapis musyanmi (1 Crönicas 28:9; 1 Samuel 16:6, 7). ¿Dios imanö kanqantataq tsëqa musyatsimantsik?

Höraqa manam fäciltsu mañakïnintsikchö imanö sientikunqantsikta y imata pensëkanqantsikta nï, peru Diosnintsikqa imatapis manaraq willashqam musyëkanna. Pëqa manam ruranqantsikllatatsu rikarëkämun, sinöqa alleqmi entiendimantsik imanir ruranqantsikta. Y manam tsëllatsu, pëqa alleqmi musyan imata rurëta munëkarpis, höraqa mana puëdinqantsikta. Tsënö kuyakoqta kamamashqantsik karmi, Diosnintsikqa imata pensëkanqantsikta y rurëta munanqantsikta musyëta munan y entiendimantsik (1 Juan 4:7-10).

Diosqa llapantam rikëkan. Noqantsikpaqmi yarpachakun y wakinkunapitapis masmi entiendimantsik

 Bibliam kënö nimantsik:

  • “Jehoväpa nawinqa alli kaqta ruraqkunatam rikëkan, y rinrinqa pëkuna rogakuyanqantam wiyëkan” (1 PËDRU 3:12).

  • Diosmi këta änimantsik: “Tantiyaq kënikim qoshqëki, y alli nänipa purinëkipaqmi yachatsishqëki. Rasumpam, rikëkurniki consejashqëki” (SALMUS 32:8).

DIOSQA ALLÄPA ANKUPÄKOQMI

¿Diosnintsik entiendimanqantsikta musyanqantsikqa shoqamantsiktsuraq? Nigeriapita Änna jutiyoq warmita pasanqanman pensari, pëmi nin: “Manam imanö këtapis puëdirqätsu, imapaqnataq kawashaqpis nirqämi. Canceryoq këkanqäta nirayämanqan kutipaqqa, qowämi wanushqana karqan y wamrapis hospitalchömi antsa këkarqan. Manam fäciltsu karqan, porqui ishkämi hospitalchö cämarëkäyarqä y operayämarqanmi, quimioterapiata y radioterapiatapis rurayämarqanmi”.

¿Imataq Ännata yanaparqan alläpa mana llakikunampaq? Pëmi nin: “Diospa Palabran ninqanmanmi yarpachakoq kä, Filipensis 4:6, 7 textuchömi nin: ‘Imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa’. Tsëta cada yarpanqä höram Diosta amïgütanö rikaq kä, y alleq entiendimanqantam cuentata qokoq kä. Y religionnïchö hermänukunapis animayämarqanmi”.

“Qeshyapäküllaraqmi, peru manam alläpaqa llakikuyänatsu. Tsëllaman mana yarparäkuyänäpaqmi churapakäyarqö, porqui Jehovämi yanapëkäyäman. Santiägu 5:11 textum nin: ‘Kushishqa kayanqantam alli tsarakoqkunapaq nintsik. Qamkunaqa wiyayarqunkim Job imanö alli tsarakunqanta, y rikäyarqunkim pëpaq Jehovä imata ruranqanta, tsëmi musyayanki Jehoväqa shonqupita patsë kuyakoq y ankupäkoq kanqanta’”. Jehoväqa alleqmi musyarqan sirweqnin Job imakunapa pasëkanqanta y entiendirqanmi, y noqantsik imapa pasëkanqantsiktapis musyanmi y entiendimantsikmi.