ASTROLOGÏA

Astrologïaqa, qoyllurkunata rikëkur tantiyëmi. Tsëta ruraqkunaqa qoyllurkuna, killa y planëtakuna yanapakunqantam niyan. Juk wamra yurikuptin qoyllurkuna mëchö kanqampitash, imanö kanampaq kaq y kawënin imanö kanampaq kaqpis musyakan.

Unë Babiloniachömi imatapis musyayänampaq qoyllurkunata rikëkur tantiyar qallayarqan, y tsëtaqa kanampis rurëkäyanllam. Estädus Unïduschö juk encuestata rurayanqanchöqa, mëtsikaqmi niyarqan qoyllurkunata rikëkur tantiyëqa yanapakunqanta. Peru ¿rasumpatsuraq tsëqa? Manam. Rikärishun imanir mana rasumpa kanqanta.

  • Qoyllurkunata rikar tantiyaqkunaqa, qoyllurkuna y planëtakunaqa imatapis musyanapaq yanapakunqantam niyan. Peru manam tsënötsu.

  • Ima pasakunampaq kaqta niyanqanqa llapankunachöpis cumplikanmanmi.

  • Unëqa creiyaq Patsapa jiruroqninchö planëtakuna tumëkäyanqantam. Y tsëta qatirllam qoyllurkunata rikar tantiyaqkunaqa imatapis niyan. Peru planëtakunaqa intipa (rupaypa) jiruroqnimpam tumëkäyan.

  • Juk nunata ima pasanampaq kaqta willakurqa, contranakuyanmi.

  • Imë yurikuyanqampitam, qoyllurkunata rikar tantiyaqkunaqa nunakuna horoscupuchö ima signu kayanqanta niyan. Peru mëtsika watakuna pasanqanmannömi, Patsaqa këkanqanllachönatsu këkan. Tsëmi qoyllurkunapa inti pasaptin tsë signukunaman fëchakunata churayanqampis igualannatsu.

Horoscupuchö signukunaqa nunakunapa imanö këninkunata musyayänampaq yanapakunqantam niyan. Peru tsë junaqllachö yurikoq wamrakunaqa manam igualtsu kayan. Imë killa yurikuyanqanqa manam rikätsikuntsu imanö kayanqanta. Qoyllurkunata rikar tantiyaqkunaqa, nunakuna imanö portakuyanqanta rikäyänampa rantinmi, kikinkunapa pensëninkunamannö pitapis juzgayan. ¿Tsëqa alliku kanman?

 ADIVINACION

Nunakunaqa unëpita patsëmi, adivinaqkunaman o curiösukunaman ëwayashqa. Wakin curiösukunaqa, nunakunapa y animalkunapa aqishninkunata rikëkurmi imatapis adivinäyaq. Wakinnam të o cafëta upuyanqanchö mancha quedanqanta rikäyaq imatapis adivinäyänampaq. Y kanankunaqa cartas de tarot, bola de cristal y dädukuna nishqantam utilizäyan. Peru ¿confiakushwanku tsë adivïnukunaman? Manam. Rikärishun imanir mana confïakunapaq kaqta.

Adivïnukunaqa contranakuyanmi. Adivinäyänampaq tukïta o tsëllata utilizarpis, jukläya jukläyatam niyan. Këman pensari, juk nuna imatapis musyanampaq ishkaq curiösukunata tapukunman y ishkampis tsë cartakunallata utilizäyanman. Tsëqa, ¿manatsuraq ishkampis igual-llata adivinäyanman? Peru manam tsënötsu pasakun.

Curiösukuna imanö y imanir adivinäyanqampaqqa tukïtam niyan. Wakinkunam niyan nunakuna imanö portakuyanqanta rikarlla imatapis adivinaq tukuyanqanta, y tsë bola de cristal o carta niyanqanqa juk adornulla kanqanta. Wakin adivïnukunaqa imatapis tapupärirninmi, clientinkuna imanö contestananta shuyaräyan. Tsëpitanam rasumpa adivinäyanqanta pensayänampaq, tsëllata niriyan. Tsënömi nunakunaqa curiösukunaman confiakuyan y atska qellëta ganatsiyan.

¿IMATATAQ BIBLIAQA YACHATSIKUN?

Qoyllurkunata rikëkur tantiyaqkuna y adivïnukunaqa imanö kawanapaq kaqqa destinashqana kanqantam creiyan. ¿Peru rasumpaku tsëqa? Bibliaqa nimantsik imaman creinapaq kaqta o imata ruranapaq kaqtaqa kikintsik akrakïta puëdinqantsiktam, y imatapis decidinqantsikmannö shamoq tiempuchö kawanapaq kaqtam (Josuë 24:15).

Qoyllurkunata rikëkur tantiyëta y adivinaciontaqa Diosqa chikinmi, tsëmi Diosta kushitsita munaqkunaqa tsëkunaman creiyänantsu. Bibliam kënö nin: “Manam qamchö kanmantsu, [...] adivinaq, ni magia ruraq, ni suerti qateq, ni hechicëru, ni brüjakoq, ni brüjuta tapoq, ni shamoq tiempupaq willakoq ni wanushqakunata tapukoq. Kë llapan ruraqkunataqa alläpam Jehovä chikïkun, y kë melanëpaq rurëkunata rurayanqanrëkurmi, Jehovä * Diosniki puntëkipita qarqurinqa” (Deuteronomiu 18:10-12).

^ par. 17 Tsëmi ‘entëru Patsachö Llapampa Janampa Këkaqpa’ jutin (Salmus 83:18).