Kennethwan Filomënaqa Curazäu nacionpitam kayan, pëkunaqa juk nunatawan warmintam Bibliapita yachatsiyaq, y juk domingum yapë watukaq ëwayarqan.

Watukaq chäriyaptin ima pasakunqantam Kenneth kënö willakun: “Wayinkuna wichqarëkaqtam rikäriyarqä y manam cärrunkunapis karqantsu. Peru warminta telëfunupa qayarinäpaqmi decidirirqä”.

Warmiqa contestarirqanmi y qowan trabajaq ëwashqa kanqantam nirirqan. Kennethwan Filomëna wayin frentinchö këkäyanqanta musyarirmi, tsë warmiqa punkunta ras kicharapurqan.

Tsë warmi waqashqa kanqantam Kennethwan Filomënaqa cuentata qokuriyarqan. Y Bibliapita yachatsiyänampaq Kenneth mañakur ushariptinllam, tsë warmiqa yapë waqar qallëkurqan. Tsëmi, pëkunaqa ima pasakunqanta shumaqllapa tapuriyarqan.

Qowampaq juk cartata qellqëkaptin y kikin wanutsikïta pensëkaptin, Kenneth qayanqantam pëqa nirqan. Jinamampis, unëpitana alläpa llakishqa këkanqantam nirqan. Tsëmi pëkunaqa shoqayänampaq Bibliapa shumaq willakïninta leyipäyarqan. Tsëmi kawëninta salvarirqan.

Kennethmi kënö willakun: “Tsë warmita yanapayänäpaq permitiyämanqampitam, Jehoväta agradecikuyarqä. Itsa qayayänäpaqqa, juk angelninwan o santu espïritunwan yanapayämarqan”. *

Kennethwan Filomënaqa Diosnintsik juk angelninwan o santu espïritunwan yanapanqantam pensayarqan. ¿Rasumpatsuraq tsënö karqan? O ¿Kennethqa casual-llatsuraq tsë warmita telëfunupa qayarirqan?

Yanapanqanta o mana yanapanqantaqa manam alleqllaqa musyantsiktsu. Imatam sïqa musyantsik, Diosnintsikqa angelninkunatam utilizan sirweqninkunata yanapanampaq. Këman pensarishun, Etiopïapita juk precisaq autoridäyoq nunam, Diospa willakïninta alleq entiendita munarqan. Y pëta entienditsinampaqmi Diosnintsikqa Felïpi jutiyoq sirweqninta mandarqan. Tsëpaqqa pë kaqyaq chänampaqmi juk angelninwan willatsirqan (Hëchus 8:26-31).

Mëtsika religionkunachömi yachatsikuyan, alli y mana alli angelkuna kanqanta, wakin kaqshi Diospa voluntäninta rurayan y nunakunata cuidayan. Wakin nunakunaqa angelkuna rasumpa kanqanta y kawëninkunachö yanapanqantam creiyan. Peru wakinkunaqa rasumpa kanqanmanqa manam creiyantsu.

¿Rasumpatsuraq angelkunaqa kan? Y kaptinqa, ¿pitaq kamarqan? ¿Imatataq pëkunapita Biblia yachatsikun? ¿Yanapamantsiktsuraq kawënintsikchö? Tsëkunapita yachakurishun.

^ par. 8 Diospa jutin Jehovä kanqantam Bibliaqa yachatsikun (Salmus 83:18).