Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 5 2017

 QARANCHÖ YACHATSIKÏPITA | ¿RASUMPATSURAQ KAN ANGELKUNA?

Angelkunapita maslla musyari

Angelkunapita maslla musyari

¿Gustashunkimantsuraq angelkunapita rasumpa kaqta musyari? Itsapis kë tapukïkunapita musyëta munanki: ¿pikunataq kayan? ¿Pitaq kamarqan? Y ¿imatataq rurayan? Diospa Palabran Bibliallachömi tsë tapukïkunapa respuestantaqa tarintsik (2 Timoteu 3:16). ¿Imatataq pëkunapita Biblia yachatsikun?

  • Diosqa juk mana rikakoq Espïritum, tsënöllam angelninkunapis mana rikakoq espïritukuna kayan, o juk parlakïchöqa, manam “ëtsan ni tullunkuna” kayäpuntsu. Jinamampis, angelkunaqa ciëluchömi këkäyan y kikin Dioswanmi rikänakïta puëdiyan (Lücas 24:39; Mateu 18:10; Juan 4:24).

  • Höraqa, kë Patsachö Diospa munëninta rurayänampaqmi angelkunaqa nunaman tikrayarqan. Y Diospa munëninta rurarirmi espïrituman yapë tikrariyarqan (Juëces 6:11-23; 13:15-20).

  • Angelkunaqa ollqumanmi imëpis tikrayarqan y Bibliapis pëkunapaq parlarqa ollqupaqnömi willakun. Peru pëkunaqa manam ollqutsu ni warmitsu kayan y manam ni casakïta ni wamrayoq këta puëdiyantsu. Jinamampis, pëkunaqa manam wakinkuna niyanqannötsu, wamra o mayor nunakuna wanurirnin ciëluta ëwaqkunatsu kayan. Angelkunataqa kikin Jehovämi kamashqa, tsëmi Bibliaqa “rasumpa Diospa tsurinkuna” kayanqanta nin (Job 1:6; Salmus 148:2, 5).

  • Bibliaqa ‘nunakunapa y angelkunapa idiömankunapaqmi’ parlan, tsëmi musyatsimantsik espïritukunaqa parlayanqanta y idiömankunapis kanqanta. Diosnintsikqa angelninkunatam utilizashqa nunakunawan parlanampaq. Peru tsënö kaptimpis, manam pëkunaman mañakunata ni adoranata munantsu (1 Corintius 13:1; Revelacion [Apocalipsis] 22:8, 9).

  • Chunka waranqa (10.000) kuti chunka waranqa (10.000) angelkunam kayan, itsapis atska waranqa millonllëpayan (Daniel 7:10; Revelacion 5:11).

  • Angelkunaqa poderyoqmi kayan, noqantsikpitapis mas kallpayoq y mas yachaqmi kayan. Jinamampis, kë Patsachö llapan reqinqantsikkunapitapis mas rasmi mëtapis ëwariyan (Salmus 103:20; Daniel 9:20-23).

  • Noqantsikpita mas kallpayoq y yachaq karnimpis, angelkunaqa manam wakin cösaskunataqa rurëta puëdiyantsu ni musyayantsu (Mateu 24:36; 1 Pëdru 1:12).

  • Angelkunaqa Dios niraqmi kayan y kikinkuna imëkata decidiyänampaqmi kamashqa kayan. Pëkunaqa noqantsiknöllam alli kaqta y mana alli kaqta decidita puëdiyan. Peru wakin angelkunaqa Diospa contran churakäyänampaqmi decidiyarqan (Jüdas 6).