Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 5 2017

 QARANCHÖ YACHATSIKÏPITA | ¿RASUMPATSURAQ KAN ANGELKUNA?

¿Rasumpatsuraq mana alli angelkuna kan?

¿Rasumpatsuraq mana alli angelkuna kan?

Awmi. Peru ¿imanötaq tsëqa kanman? ¿Yarpankiku? Diosqa kikinkuna imatapis decidiyänampaqmi angelkunata kamarqan. Adantawan Ëvata kamanqampita ichik tiempu pasarinqanllachömi, juk jutsannaq angel mana allita decidirirqan y nunakunatam Diospa contran churakäyänampaq engañëta tïrarqan. ¿Puëdirqantsuraq? Awmi, tsëmi Adanwan Ëvapis Diospa contran churakäriyarqan (Genesis 3:1-7; Revelacion [Apocalipsis] 12:9). Diospa contran manaraq churakar tsë angelpa jutin ima kanqanta y ima carguyoq kanqantaqa Bibliaqa manam willakuntsu. Peru Diosta mana cäsukunqampita patsëqa Satanas y Diablu kanqantam nin. Satanasqa “chikikoq o contrakoq” ninanmi, y Diablunam “mana kaqpita tumpakoq” ninan (Mateu 4:8-11).

Tsëpita patsëmi, wakimpis Diospa contran churakar qallëkuyarqan. Noë kawanqan witsanmi “täräyänan sitiunkunata jaqishqa” angelkuna Patsaman urämurnin nunaman tikrariyarqan, pëkunaqa tukï mana allikunata rurar y lluta kawakurmi qallëkuyarqan. Tsënöpam Dios qonqan cargunkunata mana kaqpaq churariyarqan (Jüdas 6; Genesis 6:1-4; 1 Pëdru 3:19, 20).

¿Ima mana allichötaq ushayarqan mana alli angelkuna? Mana alli nunakunata ushakätsinampaq Diosnintsik Apäkï Tamyata apamuptinmi, pëkunaqa angelman yapë tikrarir ciëluta kutikuyarqan. Peru tsënö kaptimpis, Diosqa manam permitirqantsu qonqan “cargunkunata” yapë chaskiyänanta. Tsëpa rantinqa, ciëlupitam qarqaramurqan y ‘chipyëpa ampimanmi churarirqan’, Tartaru nishqanman (Jüdas 6; 2 Pëdru 2:4). Satanaspa makinmanmi supëkunaqa churakäyashqa. Pëqa “supëkunapa gobernaqnin” y “juk atsikyaq” angel tukurmi sïguin (Mateu 12:24; 2 Corintius 11:14).

1914 wata, ciëluchö juk Gobiernuta Dios patsätsinqantam Bibliaqa willakun. * Tsëpitanam, Satanaswan supëninkunaqa ciëlupita kë Patsaman qarqushqa kayarqan y këllachönam imëka mana allikunata rurayänan karqan. Tsë pasakunqampita patsëmi, pasëpa mana alli y lluta kawakïta rikantsik, y tsë rurëkunawanmi supëkunaqa vengakïkäyanqanta rikätsikuyan (Revelacion 12:9-12).

Peru tukï mana alli rurëkuna y maqanakïkuna mirëkanqanmi rikätsikun, supëkunapa mana alli rurëninkuna ichikllachöna ushakänampaq kaqta. Diospa Gobiernunqa mana allikunata rurar sïguiyänantam michanqa, Patsatam juk shumaq huertaman tikratsinqa y waranqa watapam gobernanqa. Tsë waranqa wata pasariptinnam, supëkunaqa wallka tiempullapana nunakunata yapë engañëta tïrayanqa. Tsëpitanam, paqwëpa ushakätsishqa kayanqa (Mateu 25:41; Revelacion 20:1-3, 7-10).

^ par. 6 Diospa Gobiernumpita maslla yachakïta munarqa, Rasumpëpaqa, ¿imatataq Biblia yachatsikun? neq librupa 8 kaq capïtulunta leyiri. Kë librutaqa Jehoväpa testïgunkunam rurayämushqa y këtaqa jw.org päginachömi tarinki.