Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 4 2017

Tetragrämaton nishqan, hebreu idiömachö Diospa sagrädu jutin Jehovämi (tsë letrakunataqa derëchapita izquierdamanmi leyikan).

Hebreuchö mas ichik kaq letrapita musyanqantsikmi yanapamantsik

Hebreuchö mas ichik kaq letrapita musyanqantsikmi yanapamantsik

¿Confiakushwantsuraq Diosnintsik llapan änikunqankunata cumplimunampaq kaqman? Jesusqa confiakurqanmi, y tsë änikïkunaman chipyëpa markäkuyänampaqmi wakinkunatapis yachatsirqan. Këman pensari, Jirkapita Yachatsikïkarmi Jesusqa juk igualatsikïta rurarqan. Tsëqa Mateu 5:18 textuchömi këkan, kënömi nin: “Rasuntam niyaq, ciëlupis y patsapis ushakärinmanchi Leypa juk letrampa juk kuchunllapis mana cumplikaptinqa”.

Hebreu idiömachö abecedariupa mas ichik kaq letranqa י (yod) nishqanmi, jinamampis Tetragrämaton, o hebreu idiömachö Diospa sagrädu jutin Jehoväpis tsë letrawanmi qallan. * Ley qellqaqkuna y fariseukunaqa Diospa Leyninkuna imanö qellqarëkanqanta, letrankunata y “letrampa juk kuchunllapis” imanö këkanqantam alläpa precisaqpaq churayaq.

Diospa Leynin mana cumplikaptinqa, ciëlupis y Patsapis ushakänampaq kaqtam Jesusqa nikarqan. Y Diospa Palabranqa ciëlu y Patsapis mana ushakänampaq kaqtam willakun (Salmus 78:69). Tsënö nirmi Jesusqa Jehoväpa Leynin chipyëpa cumplikänampaq kaqta rikätsikïkarqan.

Ichik cösaskuna pasakunqankunataqa, ¿precisaqpaqku Jehoväqa churan? Awmi. Këllaman pensari, Jehovämi israelïtakunata nirqan Pascuapaq üshata wanutsirqa tullunkunata mana pakiyänampaq (Exodu 12:46). Itsa tsëta rurayanqanqa precisaqnötsu karqan. Peru, ¿musyayarqanku imanir tsëta rurëkäyanqanta? Itsapis mana. Peru Jehoväqa musyarqanmi tsëta rurëkäyanqanqa ima ninan kanqanta. Tsë willakïqa Jesuschömi cumplikänan karqan, porqui pëpataqa manam ni juk tulluntapis pakiyarqantsu (Salmus 34:20; Juan 19:31-33, 36).

Jesus willakunqanqa yanapamantsik, Jehovä änikunqankuna chipyëpa cumplikänampaq kaqta següru kanapaqmi. Hebreu idiömachö mas ichik kaq letrapita musyanqantsikqa, ¡Diosnintsik änikunqanman chipyëpa confiakunapaqmi yanapamantsik!

^ par. 3 Griëgu idiömachö abecedariupa mas ichik kaq letranqa iota nishqanmi, y hebreu idiömachö yod nishqan letranöllam. Moises qellqanqan Leyqa hebreuchömi karqan, y tsë idiömallachömi leyikarqampis, tsëchi Jesusqa tsë idiömachö letrapaq parlarqan.