Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 2 2017

 QARANCHÖ YACHATSIKÏPITA | ¿CHASKIKUNKITSURAQ DIOSPA MAS VALORYOQ QARËNINTA?

Imawampis mana igualaq qarë

Imawampis mana igualaq qarë

JORDAN jutiyoq wamram barcu niraq tajadorta makinchö këkätsin, tsëqa mana precisaqnömi rikakunman. Peru Jordanpaqqa llapan kapunqampitapis masmi precisan. Pëmi kënö willakun: “Wamra kanqä witsanmi, familiäwan alläpa reqinakoq Russell qaramarqan”. Russell wanuriptinmi, Jordanqa musyarirqan awilumpaq y teytankunapaq kë nuna alläpa kuyë kanqanta, y mana alli tiempukunachö yanapanqanta. Tsëmi Jordanqa kënö willakun: “Alli nuna kanqanta cuentata qokuriptïmi, tsë takshalla qarëninqa alläpa valoryoq tikrarirqan”.

Juk qarë mana precisaqnö wakinkunapaq kaptimpis, agradecikïta yachaq nunapaqqa alläpa valoryoqmi kanman, tsëtam kë willakïqa rikätsikun. Bibliachöqa imawampis mana igualaq juk precisaq qarëpaqmi kënö willakun: “Nunakunata alläpa kuyarninmi Diosqa japallan Tsurinta pëkunarëkur qorqan, tsënöpa pëman markäkuyanqanta rikätsikoqkuna mana ushakätsishqa kayänampaq, sinöqa imëyaqpis kawëyoq kayänampaq” (Juan 3:16).

¡Imëyaqpis kawëta qokoq qarë! ¿Kë qarëpitaqa mas valoryoq qarë kanmantsuraq? Wakin nunakunapaq kë qarë mana valoryoq kaptimpis, rasumpa cristiänukunapaqqa “alläpa valoryoqmi” (Salmus 49:8; 1 Pëdru 1:18, 19). Peru ¿imanirtaq japallan Tsurimpa kawëninta nunakunarëkur Diosqa qorqan?

Apostol Pablum kënö entienditsikun: “Juk nunarëkurllam llapan nunakunaman jutsa yëkurqan, y jutsarëkurnam pëkunaman wanï charqan, y tsënömi wanïqa llapan nunakunaman chärirqan” (Romänus 5:12). Adan nunaqa alleq musyëkarmi Diosta wiyakurqantsu y tsënöpam wanurqan. Pëpa culpanrëkurmi llapan mirëninkuna, o juk parlakïchöqa, llapan nunakuna wanuyan.

“Jutsa qokunqan päguqa wanïmi, peru Dios qokunqan qarëqa Señornintsik Cristu Jesusrëkur  imëyaqpis kawëmi” (Romänus 6:23). Wanïpita llapan nunakunata salvananrëkurmi, Diosnintsikqa japallan tsurin Jesucristuta Patsaman kachamurqan, jutsannaq kawëninta noqantsikrëkur qonampaq. Jesus wanunqanrëkurmi, pëman markäkoqkunaqa imëyaqpis kawakïta chaskiyanqa (Romänus 3:24).

Jesucristurëkur sirweqninkunata Diosnintsik qonqan bendicionkunapaq parlarmi, apostol Pabluqa kënö nirqan: “Diosnintsik agradecishqa katsun, alläpa shumaq y käyitsikïta mana puëdipaqnö debaldilla qarënimpita” (2 Corintius 9:15). Jutsantsikrëkur Jesucristu wanunqan qarëqa, imawampis mana igualaq qarëmi. Peru Diosnintsik llapan qaramanqantsikkunapitaqa, ¿imanirtaq Jesus wanunqanqa mas precisaq qarë? ¿Imanirtaq tsë qarëqa alläpa jukläya? * Y noqantsikqa, ¿ima nishwanraq tsë qarëpita? Qateqnin kaq yachatsikïkunam kë tapukïkunata contestamunqa.

^ par. 8 Jesusmi noqantsikrëkur kawëninta qorqan (1 Juan 3:16). Tsëmi, Diospa munënin cumplikänampaq yanapakurqan. Kë yachatsikïkunachömi, Jesus jutsantsikrëkur wanunampaq Jehovä imakunata ruranqankunapita yachatsikunqa.